6/6/16

6/6/16   MON   HOT

今日請咗下午假返去幫佢溫書, 所以朝早做好D嘢先啦! 今朝揍咗子元校車返上樓仲仲先醒, 仲識得話去廁所, 掛住幫佢換衫等等, 唔記得咗整脆片早餐, 所以揍咗仲仲就去食個早餐先返工! 朝早要開會, 我都係sit會囉, 冇咩關我事咁, 唉…遲早唔洗我架啦! 開完會就做自己嘢啦, 搵D卷比子元做吓囉! 夠1點就閃, 返阿媽到食埋飯先, 再同子元一齊返去溫書, 2點幾開始溫, 又休息吓又溫吓咁啦, 夾埋都有溫咗兩個幾鐘GE, 佢唔係嗰種你比10份卷佢做佢就好, 佢只會發炆唔鍾意再做, 要靈活囉變通囉, 我只叫佢寫咗一篇看圖作文咋, 都有錯架, 講咗比佢知唔知佢到時點發揮啦! 6點幾開始就煮飯, 但老公都7點幾先返到嚟, 我已經一早煮起哂啦! 食完同佢兩個沖好涼玩一陣, 我都沖埋涼先啦, 9點幾趕哂兩個去瞓, 9點幾我就自由啦, 仲可以睇琅琊榜呢, 睇埋看見味道的少女就瞓啦!

5/6/16

5/6/16   SUN   RAIN*

今朝唔知醒去畫班, 子元起咗身掛住睇電視都唔識叫我地, 激死! 勁趕出門口去接埋程生佢地, 食埋早餐快手送佢地去畫室, 我地就去食早餐, 然後買餸呀去銀行呀咁, 又要揍番佢兩個! 返到去抖一抖, 12點又開始溫書, 今轉先溫英文, 星期二考但完全未溫過嘛! 又溫咗3個鐘但都只係溫得一半同做咗卷咋! 肚餓要出去食嘢先, 行轉消化吓返去, 老公打暈仲仲, 我就再同子元溫多次中文, 但只係比卷佢做吓, 睇番錯咩咋, 係咪我溫得太hea呢, 我見大家upload上去的都好似好誇張咁GE! 到7點幾老公起身啦就出去食晚飯, 都只係食米線啫, 但唔知點解師傅咁重手, 辣過平時好多咁, 搞到我腸胃都唔多舒服! 食完返去都係捉兩隻嘢沖涼瞓覺啦, 醒起完全未執仲仲個書包囉, 又一大堆嘢要做呢! 10點幾先去沖涼, 睇吓電視咁12點幾先瞓呢!

 

4/6/16

4/6/16   SAT   VERY HOT RAIN

考試周開始, 今個星期六日都係溫書日啦! 朝早都要返工, 返到去就係出好份中文卷囉, 放工老公嚟接我, 去食埋午餐就返屋企, 3點正式開始溫習, 主要溫咗中文先, 睇課文默字泣修辭做卷, 期間梗係有休息啦, 到6點多叫做完成啦, 老公7點半去屯門踢波, 我地一齊去, 輕鬆吓啦! 去到上半場未有得踢, 咁我就同兩隻豬跑吓圈啦, 分開幾次咁仲仲都跑咗4個圈喎! 下半場老公有得踢咁我地就唔走開啦, 不過要控制住仲仲都煩架, 好在找到個相機apps可以影得意相, 咁時間就易過D啦, 終於走得去食飯, 原來已經9點幾, 唔怪得咁肚餓啦! 老公帶我地去食有間潮州粉麵, 又真係幾好食喎, 仲食埋隔離間甜品, 11點先返屋企, 真係好耐未試過啦! 返到去快手K.O.咗佢兩個, 我地都快手沖涼瞓了!

3/6/16

3/6/16   FRI   VERY HOT

今朝仲仲完全唔合作, 迫到我又發顛啦! 詳情都唔想再講, 反正就係顛, 顛到我都冇帶仲仲落去, 顛到老公都要起身, 我又要整飯盒又要梳洗, 仲仲又係咁喊要呢樣嗰樣, 我邊有手服侍佢呢! 所以成朝大家氣氛都好差, 因為咁搞法就實遲, 我又要趕開門前返去喎, 佢都唔明我成日開咗門先到幾唔好意思! 所以老公上咗地鐵咪whatsapps吓佢囉, 我唔鍾意全日都唔好心情! 返到公司都冇咩公事忙啦, 有嘢做咪做, 冇咪做自己嘢囉, 都慣咗! 午飯後睇吓電視咁啦, 下午都係hea, 執吓張枱因為買咗D新tray, 太多垃圾啦都要執吓! 放工就直接返屋企, 換好游水嘢又出去接佢地, 老公車咗我地去泳池, 再返埋屋企樓下佢就去踢波, 搞到我要一條友攞哂D嘢上去! 上到去仲要快手煮飯, 又要仲仲頭圍用膳, 所以都同仲仲沖唔切涼, 唯有等子元返到嚟, 兩個一齊沖啦, 開咗飯就開埋奶比仲仲食打暈佢, 安樂開飯啦, 食完都快手洗碗抺地, 因為出咗一日汗好臭, 想快D沖涼, 佢地就等老公買埋糖水返嚟食先走, 都11點到啦, 趕咗子元去瞓我都睇電視啦, 但就冇摺衫囉!

2/6/16

2/6/16   THU   VERY HOT

今日都係如常咁返學返工啦, 仲仲又變番早起身, 唉! 今日唔洗去接婷婷, 又晏咗啦, 去到剛開門, 都有D唔好意思! 返到公司因為太早啦, 忍唔住買咗燒賣食, 今朝都係冇咩做GE, 係老細玩嘢囉, 明明幫佢約咗去龍堡碌訂金, 佢又話唔得, 最終我都係幫佢問吓可否填表碌囉! 結果老細午飯時間又返嚟要你攞嘢落去簽, 老土D講句食晏時間冇話一定要stay喺office架囉! 下午做吓公事做吓自己嘢啦, 諗吓明晚煮咩, 放工去美孚買餸, 返得去都6點幾, 一混亂我又火架啦, 老公好快又返到叫我地落去, 快手叫佢地執好嘢就行, 嫲嫲約咗我地食晚飯, 去咗食元氣咋, 子元有時真係好冇禮貌, 大家都未到齊, 坐都未坐好佢就想攞嘢食, 佢真係心急得太緊要, 又係唔諗後果嗰隻囉! 之後我限佢只可攞$10嗰D, 佢都食咗8碟呀, 咁有D係同仲仲share GE! 食完行咗陣759就返屋企啦, 快手搞掂佢地瞓, 子元冇咩功課, 我都冇同佢溫書, 佢話佢溫咗, 信佢! 比佢自由15分鐘就瞓, 我就整定明晚D餸先沖涼啦, 跟住都係摺衫睇電視啦!

1/6/16

1/6/16   WED   VERY HOT

今日老細都唔喺到, hea埋佢啦! 朝早都係咁揍仔返學囉, 今日都仲要去接埋婷婷, 返工前去埋銀行搞掂埋D錢先! 上午都係hea 啦, 午飯快食完再去周三特價日啦, 真係好正呀, 最鍾意買平嘢! 返到公司都有嘢做吓GE, 不過整住冷氣個環境都唔係咁啱做嘢! 放工閃人, 買咗大部份餸啦所以都係買D菜就得, 不過阿媽病病地, 所以都係放子元自己做功課咋, 返到去快手煮飯啦, 今日好似好多嘢要煮咁, 有羊扒, 漢堡, 雞肉, 炒青瓜, 葡汁雜菜, 因為有兩樣係奶奶攞出嚟叫我地煮! 咁多佢地又食得哂喎, 洗埋碗都8點半, K.O.咗仲仲再要睇功課, 今日好多呀, 佢又錯得多喎對餐死仲要慢慢教, 結果10點多先放到佢去瞓我先去沖涼! 老公就一早瞓先啦, 佢話今日好多嘢做好攰, 咁我沖完涼摺好衫就hea住睇電視咁, 其實都係一種享受。