24/6/16

24/6/16   FRI   HOT**

星期五都係忙碌的一天啦, 朝早要整午餐盒比子元, 仲仲又醒咗喎, 所以都幾難搞! 都叫做on time出到門口, 跟住就要同仲仲換衫, 今日表演summer song, 要著便服呢! 剛趕到開門前入去, 車埋程太去地鐵站, 返到公司都係咁做嘢啦, 午飯後睇吓電視, 下午老細返咗, 但都唔算阻住我地GE, 所以都係各有各做嘢, 放工就去買餸啦, 返去放好嘢又要出去小童接佢地, 不過都唔洗太急, 因為要等陸生接完仲仲同婷婷先來車我地去泳池! 返到屋企就快手煮飯啦, 兩個細自己玩其實OK架, 叫老公幫仲仲沖涼先啦, 點知我就快刀手切損手啦, 切到手指尾, 都少咗忽肉呀, 但都要繼續煮架, 咪用紙巾包住佢先囉, 等老公搞掂仲仲先救我! 8點多佢地上到嚟就沖涼啦, 早D開飯, 一來老公又要去踢波, 二來我9:30要睇瑯琊榜, 洗好碗抺好地得番10分鐘唔夠, 電視佢地又睇緊99台, 咁我咪用電話睇囉, 攞埋入廁所睇添呀! 10點幾佢地走埋, 趕埋子元去瞓我就hea啦, 竟然瞓鬼咗喎, 到12點幾見老公都未返就打比佢囉, 踢到咁夜先返!

23/6/16

23/6/16   THU   HOT

今日都係如常咁揍仔返學啦, 全日都好似過得有D悶, 我係咪真係咁冇嘢做呢, 有時想做自己嘢都唔知做咩好, 簡單D諗有$就算啦, 唔好諗咁多! 午飯前老細返咗嚟, 我地唯有返自己位食, 好在都冇咩電視想睇, 咪打吓機咁囉! 下午繼續hea, 睇吓煮咩餸咁, 可能今日太熱, 唔想食飯就決定煮意粉, 不過買料都幾貴吓, 加上意粉子元不能帶飯, 又要買料整三文治比佢帶! 揍咗佢返屋企就要佢做好份小日記, 成日懶寫係咁拖, 局佢寫就寫到衰衰咁, 比佢激死! 煮好靚靚晚餐齊齊食, 子元食得好快呢! 收拾完就洗碗抺地啦, 然後K.O.仲仲瞓, 催子元執好嘢, 又要做咩鬼四色圖喎, 要daddy幫手! 我就快D沖好涼睇瑯琊榜, 摺咗兩機衫, 睇埋新聞瞓覺!

22/6/16

22/6/16   WED   HOT

今日仲仲又一早醒咗, 佢就係到自娛但好嘈囉! 揍咗子元上校車, 返上樓到仲仲啦, 老公又係慢吞吞咁, 搞遲咗到青衣啦, 我咪叫佢先車咗程太去地鐵站先囉, 因為我要排隊尾入去, 揍咗仲仲就去太興攞定位等老公, 食完早餐佢就車我返公司佢就返屋企, 因為公司放佢地半日假喎! 朝早都係做吓自己嘢啦, 不過都有公事做, 難得呀! 午飯後老細返咗嚟, 不過我本身都諗住落去快圖美架啦, 順勢唔洗見到佢! 下午都係hea啦, 放工就去接笨元, 買餸返去煮飯啦, 都係如常咁煮洗碗抺地啦, 老公就伴住佢兩個玩! 仲仲真係超級BB, 今日老公放半日接仲放學啦, 佢見到Daddy已經即刻變咗BB啦, 伏喺daddy到, 上到車係咁話: “我唔byebye dada”, 但都冇辦法架喎, 嫲嫲揍咗佢上樓之後, 仲要爆喊! 真係比佢笑死! 沖埋涼瞓覺啦, 我都快手沖完睇瑯琊榜, 10點到趕埋子元去瞓啦! 摺住衫睇電視啦, hea到12點到就瞓啦!

21/6/16

21/6/16   TUE   HOT

今日老公返啦, 真好! 朝早我都係一打二揍返學啦, 遇啱時間上車就唔洗喺街等咁耐! 返咗學我就去買早餐返工啦, 朝早都係做吓自己嘢囉, 午飯後都係打吓機hea吓啦, 因為新劇真係完全唔好睇! 下午都冇咩特別, 老細返咗嚟, 好在冇走過嚟煩住我地! 放工就閃人啦, 返去接笨元, 知道老公4點幾落咗機我已經安心架啦, 佢仲可以過埋嚟車我地入青衣, 咁我同笨元咪去咗食住豆腐花等佢囉! 返到青衣, 個衰仲當我透明咁走埋去摟個daddy, 可惡呀! 跟住佢地就係咁食食食啦, 除咗正餐又食雪糕咁啦! 到8點幾我地先返屋企, K.O.咗仲仲就可以沖涼啦, 都係做番D日常嘢, 咁而家又唔洗睇功課係輕鬆好多! 我仲要趕住睇瑯玡榜呢! Hea到12點多才瞓!

20/6/16

20/6/16   MON   HOT

今朝起身仲未見老公覆msg, 電話又唔通, 一整晚都搵佢唔到, 我就好擔心啦, 但都要起身揍仔, 都忍唔住同子元講話聯絡唔到daddy, 佢都明明地! 好down咁繼續揍仲仲返學啦, 又趕唔到架巴士喎, 唯有再等下一班, 企喺到等車都熱死! 揍咗佢返學再去買麥記做早餐, 返到公司個人都吽吽地, 一來真係冇哂mood, 二來琴日實在太攰, 又瞓得唔好! 所以一朝早都係一個喪屍咁, 最後老公12點幾終於覆我啦, 因為佢做通頂落咗船收唔到電話又冇電, 所以先至失聯, 但已經夠嚇死我啦! 聯絡到後我又生猛番啦! 買飯食睇番琅琊榜咁啦, 老細返咗嚟梗係唔過去食啦, 背脊骨落呀, 但過去幫佢地攞飯時老細無聊到喺到嚇我地, 真係比佢嚇到成個跳起! 下午都係hea吓啦, 佢梗係伴住佢D愛將啦, 我地呢D咪做下欄嘢, 買外賣咁啦! 放工先去接子元, 然後入青衣晚飯, 好耐未試過唔洗煮唔洗洗啦, 8點多call車返屋企啦, K.O.咗仲仲就沖涼執嘢啦, 一屋嘢我做, 仲有衫要摺呢! 子元瞓埋就睇吓電視咁啦, 都12點幾先瞓, 老公明天返啦, 太好!

19/6/16

19/6/16   SUN   HOT

今日要出一日街, 我真係骨都散, 但點都要頂住架啦! 仲仲又6點幾嘈醒咗, 但都7點幾先起身, 子元話我冇熄到廳個冷氣, 可能琴晚攰啦以為自己熄咗! 起身後收拾出街嘢, 今日要去幾個地方, 所以都好多嘢攞, 執得嚟竟然差不多9點先出到門口, 買個包比子元食再撘巴士去, 然後買早餐上阿媽到食, 本應係等夠鐘去接子元再撘巴士去尖東, 咁程生渣車喎咪做Uber司機, 結果勁早11點幾已過到去但又未夠鐘喎, 咁都要周圍行吓, 12點就過返去食飯的地方, 約咗阿叔佢地, 不過餐飯我都係忙於照顧佢兩個啦, 到點幾差不多走啦, 就撘地鐵過去程生佢地屋企, 約咗游水嘛! 先換好衫落得去游都3點多啦, 大嗰幾個其實都唔係好洗理, 主要係爭嘢玩啫, 仲仲真係超級唔怕水, 佢係全個人落哂水都唔怕, 所以同佢玩水又真係幾好玩, 不過仲仲真係唔怕到就咁跳落水就算, 都冇諗有冇人接住佢! 玩到5:30全部要上水啦, 全部上返去由細嗰D開始沖起先, 混混亂亂咁D細路沖哂就到我沖啦, 我其實已經好攰, 但佢地諗食飯又找咗好耐, 最終都係去樓下茶記, 好在之前食咗D燒賣等, 因為只係嚟咗湯啫, 食咗少少紅蘿蔔仲仲就已經自動熄機, 咁食完飯程生咪車我地返去囉, 放好仲仲就叫子元沖涼, 我就執一執嘢先啦, 同老公講咗聲啦, 但到我搞掂哂嘢再what 佢, 之後就一路都冇收到回覆, 係連send都send唔到比佢, 電話又唔通, 其實我已經好亂, 但一路等等到12點幾我已經好攰, 冇得再等唯有瞓啦, 但都仲係好擔心, 雖然佢話過今晚應該會開夜, 因為隻船下午先到, 但連一個電話都冇我真係會好擔心!