13/1/17

13/1/17   FRI   COOL

今日都好忙呀, 因為要趕好明天annual dinner的文件! 朝早都係咁揍仔返學啦, 返到公司都係做吓公事做吓自己嘢啦! 又要開會咁囉, 邊有咁多嘢開呀! 午飯要去買飯, 然後都係睇電視啦, 下午開始好忙好忙, 因為唔覺唔覺有咁多嘢要印又要cut, 我一向都大頭蝦架啦, 要數幾廿次先安心! 最慘係去到利是嗰part, 因為要同會計夾嘛, 但原來人名個list有人double咗, 老實講我係冇對清楚, 但個list都唔係我create的, 經過咁多對眼都睇唔到, 咁都唔洗咁GE語氣同我講嘢架, 搞到放工前的氣氛幾差, 放工後忍唔住同Gloria呻, 真係唔呻會爆! 返到去攞齊游水嘢就出去小童接笨元, 老公趕得切嚟接我地就唔洗行啦! 今晚約咗敏瑩佢地去Aeon晚飯, 不過我地要等笨元游完水才到, 佢地玩住卡先! 放咗游水就快手接埋笨元過Aeon, 先去食coco啦, 我都覺得我地好嘈呀! 食完佢地就去玩卡機, 兩個細就睇玩具, 玩卡機玩到10點幾, 我幫子元排多轉, 等佢玩夠兩次滿足D啦! 不過有時要睇埋仲爺就有難度, 因為佢同婷婷周圍跑! 咁到子元已經玩到第一次時, 已經好夜, 我又已經頂唔順仲仲係咁跑, 所以抱住咗仲爺去睇住子元玩機, 好在抱住咗佢咋, 因為婷婷又自己kick跌咗自己, 又用個樣落地, 撞到個嘴, 喊爆! 我都同gloria講, 婷婷平衡感係有問題, 不過佢父母唔去幫佢都冇辦法! 回家沖涼瞓覺, 明天又是忙碌的一天!

12/1/17

12/1/17   THU   COOL

今日要出去開會, 仲爺一見到我換著開會的衫就好誇張咁讚, 比佢笑死! 不過原來同我平日的裝束真係好唔同, 因為返到學校, 副校都問我今晚係咪去飲, 哈哈! 返到去做少少嘢又要準備過商會, 無端端又因為要處理咗D御藥堂產品, 所以我又要將D產品編number! 整起快手出門口, 過到去先食個飯, 再上去開票等等, 堅係多嘢做, 人齊開會我都仲做緊! 今日都好快開完啦, 佢地閃咗我地走, 我仲去咗書局睇吓有冇常識練習啱笨元, 去到地鐵都係3點9, 見時間尚早就book咗按腳, 快手返到屋企趕到過去按腳叫做啱啱好, 按一part真係唔多夠, 可惜我真係冇兩個鐘咁悠閒去按呢! 回家收拾吓hea吓就過長沙灣, 約咗阿媽食生日飯, 今晚間餐廳又整得特別好食咁喎! 仲爺又好好笑, 首先叫佢同婆婆要講咩呀, 佢就話: 「婆婆, 新…哎呀…講錯咗! 婆婆生日快樂」仲要側面埋一邊話講錯, 真係頂佢唔順! 到出生日蛋糕時, 閂咗燈唱生日歌嘛, 仲爺唱咗一句, 見對面枱望住佢, 佢就喺到怕羞, 人地覺得仲得意囉, 你話係咪咩人都比佢收服! 食完回家啦, 都係沖涼練歌瞓覺囉, 考完試真係輕鬆哂!

 

11/1/17

11/1/17   WED   COOL*

今日都係如常返學返工啦, 仲爺又一早一齊起身, 揍咗哥哥就到佢返學啦! 今日老公要出去買嘢, 可以車埋我返工! 朝早都係做吓公事做吓自己嘢啦! 午飯後睇電視, 老細唔返嘛, 唔洗理佢! 下午都係做公事喎, 話哂明天又開會, 星期六又annual dinner, 所以真係有嘢要做GE! 放工去接子元啦, 都冇咩激氣嘢, 返去都係煮飯食, 食完老公去咗踢波, 我就睇住兩隻嘢囉, 都係抺地沖涼趕仲仲去瞓, 同子元再溫數, 10點多先去沖涼, 又趕唔切睇向世界出發! 11點幾老公回來, 睇埋電視先瞓!

10/1/17

10/1/17   TUE   COOL

如常返學返工啦, 琴晚都好夜瞓, 所以大家都唔多願起身! 揍咗仲仲返學就返工啦, 今日都唔算多嘢做, 老細又返咗大陸, 所以好Free! 午飯後吹吓水睇電視啦, 4點幾時就要落去揍子元去敏瑩屋企, 因為婆婆要覆診, 所以要搵人接收佢! 講咗十萬九千次要靜唔可以阻住人地溫書, 好在佢真係合作到冇嘈, 算係咁啦, 但要抄GE嘢抄到晚上都抄唔哂, 叫佢寫字真係好難! 老公今晚約咗同事食飯, 咁我同佢兩個食雞胸肉荷蘭豆長通粉, 8點多佢兩個沖涼時我就抺地啦, 點知個衰仲竟然掉咗條面巾落廁所, 子元又係豬GE, 洗鬼走出嚟話我知咩, 第一時間執番佢咪得囉, 就喺佢開門講我知時, 仲爺就一手沖咗條巾走, 嗰吓我真係嚇顛咗, 因為實在有太多塞廁所水浸屋的經歷, 打比老公佢叫我唔好郁住, 再倒哂支通渠佬落去囉, 之後係咁黑面隻衰仲, 真係好嬲佢呀! 著好衫食完奶就趕佢去瞓, 然後又要叫笨元抄埋D常識, 跟住都係比番作業佢做, 冇咩卷比佢做, 下學期可能都要再買, 真係買練習都買到傻, 做完常識又要溫埋音樂, 今次考五線譜嘛, 原來佢真係唔多清晰, 好在有教一教啫! 搞掂呢D就到練鼓, 真係好忙呀佢! 我都唔弱, 因為要影印D數學佢明天喺婆婆到溫! 所以摺好埋衫都已經12點, 朝7晚12真係攞命!

9/1/17

9/1/17   MON   COOL

開始考試啦, 其實都係只可以祝佢好運! 朝早都係如常咁揍佢地返學啦, 返到公司就做吓嘢, 要開會咁囉, 跟住都係寫吓日記啦, 仲要prepare吓下午老細又話返嚟傾Annual Dinner D嘢, 做到食飯就睇吓電視啦, 下午老細係有返嚟呀, 但佢又冇話要開會, 真係比佢玩死, 不過都好GE, 唔洗怕佢多多事實! 放工去接笨元, 問佢溫成點, 又冇帶writing過嚟溫, 工作紙又未做哂咁囉! 回家唔係好洗煮餸, 因為食番嗰日的口水雞, 同埋炒條菜囉, 所以都可以密密望吓子元溫書情況! 食完飯又要作嘢比子做, 所以都唔記得同仲仲溫書! 又整咗writing比子元做, 我就去沖涼, 出嚟又要再對卷, daddy就同佢練非洲鼓, 真係好忙, 又10點幾先瞓! 我地睇埋電視12點多都瞓啦, 考試真係好攰! 今日笑點—子元話佢今日考試時發生尷尬事, 佢考考吓急屎, 好在有同學又流鼻血, 咁老師都補番8分鐘比佢地!

8/1/17

8/1/17   SUN   HOT

今日真係好熱, 真係應該開冷氣! 朝早仲爺又7點唔夠嘈醒我, 真係火都嚟埋! 最終我地都拖到9點先起身, 之後仲仲出咗去搞阿哥, 叫做可以瞓吓醒吓, 最終起身係因為又要解決佢地D爭執! 笨元有時真係唔識變通, 細佬係錯但佢個解決方法又係錯, 咪愈來愈錯囉! 梳洗完出去食得早餐嚟都已經11點, 回家叫子元快默吓D中詞, 佢12點又要學鼓, 所以又出咗去, 咁咪得番我同仲仲囉, 比佢玩陣先因為我要吸塵抺地, 跟住就同佢溫吓數字, 用咗龍校長個方法, 好似真係有D效咁, 每日練吓希望真係work! 笨元回來就開始溫中文, 先係讀吓課文, 跟住就溫修辭, 最後就係做卷, 咁佢做時我又可以做其他嘢, 仲仲3點幾踢咗佢入去瞓, 叫做可以靜吓! 溫到6點幾先出得去食飯, 午餐只係蒸咗D燒賣食, 不過出去前同佢對卷都係激死我, 好多無謂錯囉, 所以我話食完飯回來要再做多次卷囉! 去玩去食元氣高速線時就笑笑口, 返到嚟沖好涼要做卷就黑面, 做到10點幾都未做完真係到我火囉! 終於K.O.完佢可以去沖涼, 老公又要同佢練非洲鼓, 所以11點幾12點佢先瞓, 明天都唔知有冇精神!

 

 

 

 

7/1/17

7/1/17   SAT   HOT

今日長周呀, 揍咗子元去畫班就返工, 都係做吓自己嘢啦, print吓卷比子元嚟緊考試做! 放工買KFC返去食, 食完就開始溫書啦, 今日目標係溫常識, 主力都係要佢識字啦, 之前叫佢要抄學習成果架, 但最終只係抄得一課, 咁我都冇丙佢, 只係話陣間問書唔識寫嗰D字要罰抄囉! 咁溫一課問一課, 錯字就記下, 溫哂咁多課就叫佢抄字, 然後做卷, 咁我就有時間做大掃除啦, 6點多叫醒老公出去買晚餐, 點知仲爺6點幾都已經醒咗, 好在佢肯自己玩, 咁我可以繼續對付個廁所! 老公買完晚餐返嚟食, 佢就去踢波, 我就K.O.埋個廁所等佢地可以沖涼! 8點幾開始叫佢地去沖, 之後比仲爺玩陣就要去瞓, 反而係笨元唔肯瞓, 佢要睇勁歌金曲總選喎, 咁今年又幾好睇喎, 除咗頒獎仲一路唱番D金曲, 咁我見佢今日都溫好書, 明天又唔洗早起咪比佢睇囉! 老公11點幾返, 笨元先係啱啱瞓咋!