25/2/17

25/2/17   SAT   COLD

今日堅係凍呢, 朝早都要著夠衫先出得門口, 但因為遲咗起身, 所以去得畫班都已經9:30, 去食埋早餐買吓嘢, 點知仲爺又急POPO, 上咗阿媽到辦事啦, 上到去又唔疴, 又要換片咁囉! 等老公接咗子元才返來接我地, 跟住就開始家長日啦, 首先係仲仲見先, 都遇咗老師會問仲爺在家的學習, 睇到仲爺D卷, 真係冇眼睇架, 佢識圖識讀但係唔識字囉, 老師都話佢學習唔夠認真, 總之講到玩就冇得頂, 認真時就唔願囉! 見完呢到就返荔天到子元見, 不過未夠鐘就喺AEON行咗陣先啦, 1點去到周sir都未返到, 見得時又覺得佢由骨子裡hea出嚟, 因為都係冇咩講, 你唔問佢又冇咩講, 你問咗佢又好似唔知答咗D咩咁! 所以都算快見完架啦, 去咗睇吓視藝展同書展咁才回家, 買得KFC嚟仲爺又瞓咗喎, 但返到屋企佢又醒, 所以等我地食完就到佢食! 比子元抖陣就要溫書啦, 仲爺就留番比daddy搞, 我地溫完書就出發去打籃球, 約咗炮哥佢地呢, 雖然唔係打足成個鐘, 但郁吓都有出吓汗架! 打完就返番美孚食香港地, 可能打完波加上下子元食得少, 佢真係清哂枱咁滯, 好得人驚! 返去沖涼瞓覺啦, 我地就好夜, 老公仲要睇波呢!

24/2/17

24/2/17   FRI   COLD

今日都是如常的星期五, 都係咁揍仔返學啦! 返到公司都好忙好忙呀, 忙住做商會D嘢, 臨尾呢個星期會最忙囉! 做咗一朝都好冇咩做過咁, 又要開會又吹吓水, 結果下午先正式入肉! 所以下午時間過得好快呢, 夠鐘亦閃了, 返去攞齊嘢又去接我隻笨元, 仲仲可能聽到我返都醒咗, 但我都唔得閒理佢啦, 落到去等小巴等咗好耐都冇車, 好在子元都遲放! 老公嚟到樓下接我地, 揍咗子元去泳池就回家整嘢打邊爐, 奶奶又買咗好多嘢, 點食都食唔哂呢! 洗埋嘢老公就送嫲嫲回家, 我就K.O.兩隻嘢! 沖好涼睇吓電視摺吓衫咁啦, 明天都係要8點起身, 因為畫班呢!

23/2/17

23/2/17   THU   COLD

今日都係如常咁返工返學啦, 仲爺今日去濕地公園參觀呀, 唔知佢會參咗D咩出嚟呢! 今日返到公司都好忙碌咁做商會D嘢, 要排位等等係最煩, 不過就好充實囉, 勁快又放飯, hea吓睇吓電視咁, 下午又做吓勞動, 對面公司摺…有好多box file唔要比咗我地, 接近100個喎, 我地過濾吓邊D唔太靚就唔要, 都有五十幾個可以要番, 都要找地方收拾好! 跟住都係繼續做嘢, 食埋個tea就放工去接笨元, 今晚老公同同事出去食, 我就簡單地只係煮長通粉咋, 兩個都好比面食哂, 連仲爺都食哂真係難得! 跟住咪比佢地玩到8點半先沖涼囉, 然後又喺房玩一輪, 9點幾要仲爺瞓啦, 再同笨元睇埋功課, 10點多佢都瞓啦, 我都要沖涼! 老公11點幾先返到嚟, 佢先話我知佢同事頂咗飛上海嗰轉, 咁佢明天就不用飛, 睇嚟佢真係好想去兩個仔的家長日呢!

22/2/17

22/2/17   WED   COOL*

今日仲爺又同我一齊彈起身, 又要一齊落去囉! 揍咗佢地返學就返工啦, 開會都開哂我D時間, 呢排真係好充實, 淨係諗排位企位坐位襟花嗰D都有排我煩! 午飯後就hea吓先啦, 下午又再開始貼嗰塊磨貼, 今次分3張貼終於成功! 之後又開始做商會D嘢, 做到放工閃人了, 返去買餸揍笨元, 回家馬上煮飯, 笨元話佢做哂功課, 咁就叫佢做咗視藝, 煮好飯食埋就沖涼, 子元教仲仲做功課, 我就幫子元對功課, 等佢地玩陣都要瞓啦! 點知收到程生電話, 話敏瑩漏咗本英文書喺功課班, 想我地print第三課比佢, 咁咪print囉, 本身話叫程生過嚟攞, 但我話叫子元明早餐比敏瑩咪得囉, 但最終, 程太再send msg嚟話敏瑩怕明早找不到子元, 驚到喊喎, 叫晴晴print! 老公睇到就發火囉, 叫我打比佢話已經print咗, 叫程生過嚟攞, 話而家喊大哂呀, 係咁媽媽叉叉! 最終程生咪過咗嚟攞囉! 我沖完涼摺埋衫都11點幾, 不過今日唔係咁眼瞓, 打吓機先瞓!

21/2/17

21/2/17   TUE   COOL

今日又正常返工返學, 放咗日假真係會積埋好多嘢做囉, 平時都唔覺我有咁多嘢做GE! 不過返到嚟又吹吓水又過吓相咁, 寫埋日記都半日囉! 午飯後都係hea吓咁啦, 下午玩第二樣, 貼玻璃門的磨沙貼, 但最終都係失敗, 明天再試! 下半場時間都係搞吓商會D嘢啦, 得番個幾星期我都諗緊我係咪真係搞得掂! 食埋hea就放工了, 去接番笨元回家煮飯啦, 今晚都好快煮起, 8點前已收碗, 本來想同佢地出去打吓籃球, 點知落雨喎, 咪喺lift口踢吓波算囉, 佢有佢地踢, 我就執吓個廚房, 門後面真係亂到你唔信, 到時裝修其實應該好多嘢要掉, 但膠袋紙袋呢類雞肋又真係好難處理! 8點幾佢地返嚟就沖涼瞓覺, 我仲要對好功課先沖涼摺衫, 已經11點多, 打咗冇兩盤機已經眼瞓!

20/2/17

20/2/17   MON   WARM

今日我地兩個都請咗假, 因為要去睇笨元的話劇表演, 但原來只係做半個鐘, 早知其實唔洗請假, 哈哈! 我都係要一早起身GE, 同仲爺食埋早餐返去泊番好車才過去子元學校, 路過體育館諗起要book camp就要今日問, 竟然真係有位喎, 就book咗先啦, 再找其他人去! 趕到學校趕好開場, 子元係一開始就係佢嘛, 比我預計中佢係多對白, 不過亦做得好好呀, 起碼我覺得好好! 睇完聽埋老師講吓嘢, 先至10點幾, 要買埋午飯比笨元才出街! 去咗旺角係咁行, 睇裝修嘢啦, 但見到唔同的房門都係好貴, 真係好唔抵, 所以老公諗到不如叫佢之前訂板嗰到做埋, 應該唔會好貴, 子元而家隻門都係$200咋嘛, 旺角嗰D吓吓2千幾蚊呀, 10倍喎! 睇到點幾食咗午飯, 再去行咗陣, 幫子元買埋白色波衫就回家hea吓, book咗4點去按腳, 不過今次按得我好痛呢, 我都係適合溫柔D! 接咗子元再接埋嫲嫲同仲爺就一齊出咗葵芳, 因為子元跟葵青隊操, 我地喺嗰頭食飯, 食完就先回家, 我搞掂仲爺仲可以hea吓, 睇吓新劇, 等笨元回來才對功課等等!