19/5/17

19/5/17   FRI   WARM*

今日係笨元運動會, 佢照樣撘校車去運動場, 我地就照樣揍咗仲爺返學食埋早餐再趕過嚟運動場, 因為場刊寫8:40就開始佢地60米跑嗰D, 好在去到仲係跑緊5年級, 咁睇得切隻笨跑, 其實佢都跑得唔錯, 但真係唔夠後勁, 又係梗頸四, 佢都幾唔開心, 但都要等佢學吓面對失敗囉! 好啦, 佢跑完就到我啦, 其實有時都諗每年都有機會有新GE家長會好勁, 不過都係咁跑架啦, 好好彩今年冇勁家長, 所以我又可以攞到第一, 仲要贏成條街, 哈哈! 老公話拍片時聽到後面D人係到大叫好好笑喎! 不過跑完我真係用哂一日的能量……好攰好攰! 跟住到睇三年級4X100, 子元其實跑得好好, 奈何唔怕神一樣的對手, 只怕豬一樣的隊友, 本來佢接棒時都仲係第二, 交棒都係咁上吓, 但第三棒嗰個又慢, 第四個接棒時直情企喺到仲講吓嘢咁, 死得, 包尾囉! 搞到子元又失望一次, 唉…不過我覺得佢本人進步咗好多架啦, 下年個人環節努力D啦! 等頒哂獎就閃啦, 本來想去唱K但因為full哂, 就同炮哥佢地去咗食晏, 然後返屋企沖個涼休息吓先, 再去傾吓裝修D嘢, 要講詳情都講好耐, 老公又要壓吓價, 所以都搞到5點先走, 趕去小童打鼓, 蝕咗15分鐘呢! 有一個鐘時間又冇咩做就返咗屋企hea吓, 接咗佢去泳池就入青衣揍仲爺出來, 嫲嫲冇煮飯就一齊食, 只係去新華食咋, 平靚正! 返屋企都係沖涼瞓覺啦!

 

18/5/17

18/5/17   THU   HOT

今日都係如常咁返工返學啦, 朝早仲爺又一早起身落去送哥哥啦, 揍咗佢地返學就買早餐返工, 今日都係冇咩特別嘢做, 做吓私務咁囉! 午飯後都係睇吓電視咁啦, 又冇老細喺到最開心! 下午都係做吓公事又做吓私事咁啦, 放工接咗笨元返屋企換好衫又準備等老公嚟接我地出去晚飯, 都係近近地喺長沙灣試上海嘢咋, 因為老公要踢波喎, 送哂我地返屋企佢就出去, 咁我就負責K.O.佢兩個啦! 明天子元運動會唔洗對功課住, 仲爺就要做吓功課啦, 跟住都快D捉佢瞓, 老公11點多返到嚟, 等佢沖埋涼睇多陣電視就瞓啦!

17/5/17

17/5/17   WED   HOT

今日如常返學啦, 因為未食早餐就去到仲爺學校樓下食, 條友一落車見到婷婷個朋友就想衝埋去, 結果PK咗, 都係膝蓋啫但已經喊爆, 抱到佢上學校門口, 入咗學校都仲好淒涼, 蔣老師見佢坐咗喺書記嗰邊喊緊就埋嚟睇吓咩事, 知到跌到少少啫就叫佢勇敢D囉, 佢地會處理, 咁我都閃人啦! 食埋早餐返工, 今朝都係做吓自己嘢就要出去, 八到大老闆娘點解叫哂全邨人出去食飯, 原來係預祝經理生日, 頂…生日咋嘛, 洗唔洗咁誇張呀! 12點到食到2點幾, 咁富豪D嘢今次都可以, 我地早D走咋, 唔係寫字樓真係真空3小時! 不過返到去都冇咩做, 所以都係hea吓啦, 放工接埋子元返青衣食飯, 同笨元對埋功課先, 因為仲爺瞓緊, 7點幾開飯啦, 仲仲例牌食飯又扭啦, 我冇眼睇呀, 因為嫲嫲係到佢完全唔會合作! 食完再同嫲嫲計吓位點放梳化, 好似真係砌唔到咁, 我要再諗吓先得! 叫子元快D行佢又掛住睇電視, 最終上到車站都係要等10分鐘先有車, 好啦落咗車啦又爭按過馬路個制, 我咪火起囉, 我話咁鍾意按你咪企喺到一晚按飽佢囉, 佢地先知死, 有時我真係唔想發脾氣, 但佢地專登做D你叫咗十萬次唔好做GE嘢, 你話係咪佛都有火! 返到屋企就快手沖涼, 等佢地入哂去廁所先開電視, 比佢地睇到9:30先, 亦都同仲爺溫吓數學, 我發覺日常生活佢係知個概念, 但叫佢數數佢就唔明數到4就等於4呢樣嘢! 叫做同佢做咗幾次教具, 就放佢去瞓, 笨元就英文默書, 我就沖涼, 都叫做順利完成! 老公11點幾先返到嚟, 佢去聽完個training course覺得都係唔啱, 又要跟餐單, 又要啱時間, 適合D兩公婆或者單身族囉, 有家室又要出差又要就嚟就去好難! 咁佢沖好涼瞓覺啦!

 

 

16/5/17

16/5/17   TUE   WARM

今朝仲爺未知醒, 可以輕鬆D搞掂子元出門口, 但返到上樓就見佢企咗上櫈想開哥哥房門, 但又賴咗尿喎, 所以動彈不得咁, 等我救佢囉! 梳洗食早餐出門口, 返到學校都有D遲, 好在趕得切同婷婷一齊入學校! 返到公司都係hea啦, 今日冇咩忙, 都係做吓自己嘢, 同子元砌吓暑假活動, 午飯睇電視咁啦, 下午幫仲爺整吓教具啦, 放工接咗笨元回家不久老公就打嚟叫我地落樓, 因為明天唔洗帶飯我唔想煮, 笨元又有材料帶三文治啦! 嫲嫲知道食粥又一齊出嚟食, 仲帶佢去睇埋梳化, 老公就叫佢買梳化倉嗰張, 嫲嫲覺得有D貴想買AEON嗰張, 平一半喎不過就之前買過係麻麻地! 送埋嫲嫲回家返去我地就快手整嘢瞓覺, 笨元要做埋幅視藝, 老公就幫我整教具, 我就去沖涼, 手工嘢都係交比佢做好過我! 邊睇電視摺埋衫, 12點幾就瞓啦!

15/5/17

15/5/17    MON   RAIN

今日都落咗好耐雨, 仲爺仲要半夜又賴尿, 臨天光又發夢喺到喊, 搞到我都冇覺好瞓, 再對住咁GE天氣真係好攰! 仲爺著埋水鞋攞埋遮返學啦, 今日都有D趕呀, 因為天雨落滑行慢D好! 返到公司都係寫番D日記啦, 不過之前唔敢開電腦住, 要諗吓點處理嗰D甚麼病毒, 叫做應該都冇咩事啦! 閒過咗個上午啦, 午飯後都係睇吓電視啦, 下午都係hea過, 放工買餸返去接笨元, 返到去都係煮飯啦, 笨元就成日掛住睇電視, 多多借口唔溫習, 都唔諗吓仲有幾個星期就考試! 老公回來就食飯啦, 仲爺又係到扭, 食飯啫有幾難呀! 跟住都係沖涼睇功課趕仔入房瞓啦, 今晚超眼瞓, 11點未夠已經喺梳化瞓咗!

14/5/17

14/5/17   SUN   HOT

今日係母親節呀, 但其實都冇咩特別, 只係晚上會出去食飯! 朝早第一個活動係子元去將軍澳考奧數, 揍咗佢去就同埋程生喺附近食早餐周圍行再hea囉, 夠鐘就去接番佢地, 問笨元識唔識, 佢有好似胸有成竹咁! 趕返去長沙灣就去學鼓啦, 我地就喺AEON睇咗陣嘢, 本來諗住揍咗子元去球場就車我地返屋企, 點知仲爺竟然望到炮哥架車, 我地就八掛佢地去邊, 最終仲一齊食晏, 不過只係我帶仲仲啫! 去咗食壽司啦, 都好開心架啦, 食完跟埋佢地車返屋企! 比仲仲玩到3點多瞓覺, 我就摺吓衫hea吓囉, 老公佢地4點多返到嚟, 食完嘢要笨元溫吓書, 5點前就要捉仲爺起身啦, 因為約咗食晚飯, 要接埋阿媽同阿嫲, 6點出到尖咀食, 大包識人book咗位方便D, 餐飯要又好忙咁叫呢個快D食, 叫嗰個唔好嘈, 充份顯示阿媽有幾忙! 食完送咗阿媽佢地返屋企, 我地返到去沖好涼比佢地玩陣就捉仲爺瞓, 子元就畫埋視藝先瞓!

13/5/17

13/5/17   SAT   HOT

星期六都是節目豐富, 朝早笨元去畫班, 不過老公琴晚攞咗架車去補油, 所以今日要撘巴士! 食完早餐就去了解吓浸信會嗰個暑期一星期班, 但點知冇人在, 咁照報啦! 夠鐘去接番笨元回家先溫吓默書, 成日都唔識自動溫, 起身就淨係第一時間睇電視! 12點佢又要出去踢波, 咁我同笨元做功課啦, 我又發顛啦因為佢讀極都唔識, 我都唔明點解自己就係控制唔到! 午餐煲粥食啦, 3點多捉佢去瞓又唔瞓, 最終4點先瞓著, 咁叫老公照同笨元返嚟, 再溫書! 差不多6點先叫醒仲爺出去, 去咗Mega Box睇傢俬, 不過先喺IKEA食咗嘢先再睇, 主力真係淨係睇IKEA都睇到9點幾, 所以冇得去睇玩具, 同佢地講toyrus閂門, 哈哈! 回家沖涼瞓覺, 我地就睇吓電視咁啦!