10/4/18

10/4/18   TUE   HOT*

今日老細上哂大陸, 可以自由自在吓! 朝早去接埋婷婷返學, 仲爺喺學校都夠膽跳樓梯, 抵比人鬧! 返到公司都係做吓自己嘢先啦, 跟住就努力找工作, send咗咁多份都冇一份回音, 係咪我set得太高要求, 定係個天覺得未係時候呢! 午飯後都係都睇吓電視啦, 下午太老闆娘返咗嚟, 咁又冇咩特別嘢GE, 所以好快都閃了! 放工去學校接番子元, 佢要踢學校又要趕去凱景踢, 真係夠哂攰, 接佢時校隊都未踢完, 不過佢都要閃人, 今日要過跑馬地, 真係超遠! 等笨爺換得衫嚟都差不多6點, 幾經辛苦過到跑馬地又要搵唔到個場, 原來要行到最入, 搞到差不多7點先到! 佢有佢踢我有我打吓機啦, 不過都有望吓佢踢成點GE, 以為佢踢咗學校再嚟呢到踢好攰啦, 但相對地好似仲好過平時! 8點散場都閃人啦, 行出去換衫再走都8:30啦, 冇車撘要行返去撘地鐵, 返到屋企都9點半, 大家都勁攰! 快手沖涼食飯啦, 搞掂哂嘢仲要摺衫, 不過睇住電視摺就好啲GE, 呢排都夜瞓, 老公囉掛住打機又唔瞓!

9/4/18

9/4/18   MON   WARM

終於正常返工返學啦, 6:45起身蒸飯揍仔返學! 買埋早餐返工食啦, 都係開吓會咁, 午飯不久老細就返, 阻頭阻勢, 搞到冇得再睇套劇, 好在上星期五睇咗啫! 下午繼續做自己嘢, 今日真係想hea, hea 到放工就閃, 接咗笨元返去收拾好等老公嚟接, 因為嫲嫲話去愉景新城, 又有得去玩去食啦, 仲爺食咗少少嘢就瞓咗, 唔係去玩夾公仔掟彩虹我諗佢會繼續瞓! 終於夾到車仔啦可以返屋企, 返到去忙忙亂亂, 因為我要整明天帶飯啲嘢, 兩個沖好涼子元就做功課, 仲爺就溫陣生字要瞓啦! 我都趕到11點前沖好涼睇J2劇, 邊整帶飯啲嘢邊睇, 因為試吓整嗰個藜麥沙律! 睇電視到12點1點先瞓, 夠哂攰!

8/4/18

8/4/18.  SUN.   WARM
今日過得好hea，朝早8點幾起身， 老公揍子元出去打鼓，我就同仲爺喺屋企，煮個早餐食完換衫梳頭出去球場同老公會合，仲爺都有得踢啦今次，不過踢到咁上吓就喺到嗲仔，完全唔知佢想點，踢完去食午餐，我就同仲仲返屋企，老公就同子元繼續練區隊，返到屋企我都冇咩mood做嘢，得過hea字！等子元練完波返嚟沖埋涼就出去行吓，不過我都冇咩mood，比仲爺激到！去到奧海城就睇玩具囉，真係好悶！之後係去無印睇吓嘢開心番啲啦， 但返到屋企又要一打二， 子元就做埋佢漏咗的中文，我就煮飯，兩個都食得唔錯，飯後沖好涼就睇電視，要睇3個女人1個因呢！老公踼完波11點到先返到嚟，我都KO哂兩個囉！

7/4/18

7/4/18.   SAT.   COOL

今日長周要返工， 8點多起身梳洗出發， 返到去都係做吓自己嘢啦，星期六喎， 咁都比我send咗一份工，放工行返屋企，順手買咗啲餸，邊日喺屋企食都有得食嘛！買完返去放低嘢一陣又要出去接子元，去對面茶餐廳食個晏就回家，我好勤力做家務，換哂啲床單，仲幫仲爺換埋季，執埋佢啲玩具！7點夠鐘去接番我隻笨元放游水，跟住就出去食晚飯，近近地去咗荃灣咋，食咗間米線好正，行吓商場，去到AEON撞到Barry兩公婆，大家睇完買完就車埋佢地返去，沖完涼之後都係睇吓電視啦！

6/4/18

6/4/18   FRI   WARM/WIND

今日仲爺佢地要返學, 老公又要一朝早見工喎, 所以程生就要做校巴司機, 過來接咗我地就放兩個大的過長沙灣才再入青衣比兩個細返學, 跟住車埋我去地鐵站! 返到公司老細朝早返咗, 比佢簽吓嘢咁啦, 午飯食完都閃番過嚟啦, 因為實在唔想見到老細同嗰兩條友! 返過自己位hea吓好過! 下午佢地閃咗可以自由吓, 又係時候搵吓工, 都send咗少少啦, send咗先囉有冇回音再算! 放工老公嚟接我, 天文台今日又好準喎, 大風到爆, 本來一齊去同子元踢波, 但諗諗吓都係我同仲爺返屋企好啲, 所以去畫室接完子元就我同仲爺返去先, 叫佢沖好涼玩吓我就煮晚飯, 都係雞肉麵咋, 點知煮起開始食佢就叫POPO, 咁佢有佢去我有我食啦, 到我食完佢都去唔到, 咁可以點呢! 將會講啲好核突GE嘢, 明明見住舊POPO喺門口架啦, 就係出唔到, 用金油條的原理, 我用咗餵藥針筒吸梘水再打入個patpat, 終於好順利疴到啦, 真係大家都辛苦! 疴完就食到嘢啦, 佢食到嘢我就可以摺衫先啦, 老公佢地9點多就返到, 我都未煮飯比佢地, 咁老公都醒目識自己煮, 我就搞掂K.O.仲爺, 子元成日都唔願瞓, 話佢又唔like, 咁佢係成日都唔醒水嘛, 唉!

5/4/18

5/4/18   THU   HOT

清明節一向都係多日假, 我地都唔洗拜山, 朝早瞓到8點幾9點, 梳洗收拾後就出門口, 老公約咗佢兩個朋友飲茶, 咁我地要一齊去, 因為早咗出門口, 去到找到標位泊咗車先, 然後喺美麗華行吓, 好在有大大間商務, 子元可以打書釘, 仲爺就玩吓對面間tomica啦, 可以用埋子元之前賺落張書卷, 佢又買咗4本書, 全程飲茶就喺到睇! 查實我完全唔識咩水都有啲悶架, 仲爺就一般合作啦, 飲到差不多2點去攞車入愉景灣, 約咗同學仔玩playhouse, 佢地朝早已經入咗去, 我地2點幾入到去佢地剛食完嘢, 比埋錢就入去一齊玩! 基地只係兩張櫈, 一入去大嗰D已經消失得無影無蹤, 反而細嗰兩個就要跟住囉, 始終人又多, 唔可以完全放手任得佢地周圍走! 另外3家人其實都玩咗一朝, 佢地真係好體力, 我地跟吓又陪吓咁, 仲爺玩長滑梯玩咗N次, 完全唔洗我陪, 咁我地有時候咪吹吓水囉, 唔覺唔覺係玩到散場趕人我地先走, 仲爺終於玩到攀石, 因為呢到冇高度限制, 不過其實仲爺真係唔多玩到架, 佢係唔夠力攀架, 最好笑係攀完時玩唔切跳彈床係到喊, 咁我唯有叫個姐姐係咁二比佢跳幾吓囉, 咁就冇事啦! 出咗去兩位司機先去攞車, 我地女人就同啲細去買啲水呀三文治食咗先, 要等到8點05先有車, 咁就邊等車邊食住嘢先, 最終出到長沙灣食晚飯都9點多, 大家都餓鬼咁啦, 食完返去快手沖涼瞓覺啦, 我都冇摺衫啦好攰…睇埋J2套劇就瞓!

4/4/18

4/4/18   WED   HOT

今日都係過得好holiday mood, 不過就做咗啲有用啲GE嘢, 就係搵咗一日工囉! 朝早揍咗子元去婆婆到我就買早餐返工, 喺麥記撞到家寶吹咗幾個字水呀, 可惜佢呢排太忙都skype唔到! 返到去都係做吓嘢開吓會咁啦, 午飯後都係自由時間, 老細喺自己schedule寫咗話放假咁即係唔會返嚟, 下午狂找工, 有啲要寄信的都打好埋cover letter, 雖然係騎牛搵馬但呢到除咗可以hea之外都冇咩好面口, 再睇埋老公呢排找成點先啦, 煤氣找佢second in, 希望成功啦! 放工接埋子元入青衣食飯, hea到8點幾先走, 返到去都係沖涼捉佢地瞓覺啦, 明天放假啦, 已經密鋪活動, 一日都唔放過!