20/5/18

20/5/18   SUN   VERY HOT

子元今朝要去區隊幫手, 所以朝早得番我同仲爺, 琴晚都諗定不如去游水, 天氣熱到咁! 所以8點幾9點幾起身整咗少少嘢食, 執埋嘢就出門口, 撘6號轉40號非常方便, 泳池門口落車, 我地去到斧山游泳池, 嗰到先有得玩水, 入去又唔記得影相打卡喎, 換好衫我今次都冇著件短袖衫, 實在太熱! 一去到泳池就衝落水, 真係服咗佢, 由10點幾玩到散場先肯走, 我就好醒咁帶咗條毛巾遮住頭頂以防頭痛, 仲仲不怕水到玩滑水梯衝咗落水底都唔怕, 服! 差不多12點上水, 沖身換好衫老公嚟接我地, 子元都喺摩士踢完啦! 跟住去咗mega box食IKEA, 再行咗個圈, 又去吓反斗城, 又去買過條泳褲比子元, 泳鏡比仲爺, 用子元踢波贏的贈卷買, 慳咗$200! 3點多回家, 要仲爺瞓覺先, 老公自己又瞓咗, 佢真係好瞓得! 我就同子元溫書囉, 真係覺得溫書係好辛苦的事! 到7點多叫醒佢地出去食晚飯, 近近地去咗荃灣食米線, 順手去一田行吓, 仲爺買到佢個警察套裝! 回家後都火火地, 可能因為攰啦又有大把嘢未做, 所以係咁黑面! 11點幾先K.O.哂佢地, 仲有3機衫要摺, 點幾先瞓得!

19/5/18

19/5/18   SAT   VERY HOT

今日長周, 真係勁唔想起身架, 但都要郁架! 揍咗子元去英文, 就揍埋我返工! 返到去都係做自己嘢, 老闆今日返咗嚟攞嘢, 係煩架啦, 啲嘢放哂喺公司, 家族生意就係咁, 公司當屋企咁點得架! 放工即閃買埋KFC返去同子元食, 老公未夠1點就起程帶仲仲去學音樂, 所以獨留咗子元喺屋企等冷氣師傅嚟整冷氣, 都夠大個仔去處理架啦! 返到去見到好大工程呀, 整咗差不多4個鐘, 拆哂啲窗先搞得掂! 我同笨元食完嘢休息吓就要入去溫書啦, 溫常識真係好難, 因為佢地真係好冇常識! 5點子元去學游水, 仲爺就返嚟玩囉, 7點去接番子元時順手問吓阿sir, 仲仲可以幾時學遊水, 其實6月就可以開始學, 咁到時再報名啦! 晚飯去咗九龍城食, 食完想行都冇咩地方行, 仲爺又POPO去唔切要處理, 所以喺九龍城廣場行咗陣AEON就回家了!

18/5/18

18/5/18   FRI   HOT

今日真係好熱呀! 朝早如常咁揍哂兩隻仔返學老公就車我返工佢返屋企啦, 嗰時佢先知自己冇帶key又要我比我嗰條佢, 成日都咁大頭蝦! 返到公司都係巡例聽佢地開吓會啦, 然後就做自己嘢囉, 下午要去覆診, 所以1點即閃, 去買咗兩個飯團, 立食完就去等巴士過葵涌醫院啦, 去到先量血壓, 一嚟15幾架, 再量多吓就13幾囉, 見到醫生佢話呢個指數都係未夠低, 但試吓唔加藥住, 要減磅做運動! 攞埋藥就走得, 老公剛好來到接我, 同仲爺一齊返去, 冷氣機鋪嚟睇埋兩部冷氣點解會唔夠凍同滴水, 都係要處理架啦! 等子元回來換埋衫, 老公就揍佢去畫班, 本來仲爺又話要跟埋去之後的選拔, 但比我講服咗, 我地做功課先, 咁之後幾日咪可以玩! 佢真係肯聽又做得哂喎, 雖然期間又食糖又要食餅, 我打住機嚟陪佢做, 叫做冇咩發過火囉, 夾夾埋埋做咗2個幾3個鐘先做完呀! 搞掂就去球場同老公佢地會合, 去到剛散場, 就一齊去冬菇亭嗰到食囉…又飲咗酒啦! 不過選拔埋今日啫, 之後都冇咩機會架啦! 回家後都有啲醉, 但都要K.O.好哂兩隻嘢先有得休息!

17/5/18

17/5/18   THU   HOT

今日冇咩特別啦, 老公開始放假, 下星期才返新工, 咁就可以車埋我返工, 返到去都係做吓自己嘢啦, 一向都冇咩好做架啦, 午飯後咪睇吓電視hea吓打吓機囉, 新工若冇問題都幾難再有呢D日子, 下午又係做吓公事咁囉, 放工老公未嚟到接我, 咁就叫佢直接去阿媽到等! 返到屋企時收到個msg, 4月初apply醫管局的EA II叫我去in喎, 老公話梗係去IN咗先, 我見日子係商會開會嗰日, 都應該可以安排到, 咁就覆咗去囉, 話哂都15-18K喎, 地點又係PMH, 近得咁緊要! 老公今日腸胃唔舒服唔食飯, 咁我淨係煮麵比佢地兩個囉, 食完就打掃啦, 再睇埋兩個功課囉, K.O.埋仲爺可以沖涼, 老公收到消息話青衣爆水管, 嫲嫲嗰到冇水, 嫲嫲又唔早講喎, 結果10點幾先打嚟問老公可唔可以車佢嚟沖涼! 我就摺吓衫睇吓電視啦, 差不多1點先瞓!

16/5/18

16/5/18   WED   HOT

今朝請咗半日假, 因為要去做body check, 朝早如常揍仔返學啦, 跟住由青衣去牛頭角都要足40分鐘, 對於我呢D兩公里生活圈的人嚟講真係幾遠! 9:30準時過到去等攞文件去驗身, 都要再填吓嘢先, 搞掂10:30過到去尖咀驗身啦, 只係照肺, 驗尿, 驗眼, 量血壓等, 血壓就實唔合格架啦, 姑娘都好好, 叫我喺房瞓吓先再量, 咁叫做免強合格囉! 走得就返屋企啦, 煮好粉邊食邊睇吓電視等, 跟住又要返工啦! 都係做吓公事做吓自己嘢等等, 吹吓水咁其實真係好開心架! 放工馬上去接子元去摩士踢波, 不過今日條友踢到好差, 走嗰時係咁比daddy鬧囉, 返長沙灣食粥咋, 陸生好似比子元傳染咗腸胃炎咁, 所以食好少! 返到屋企快手沖涼睇功課瞓覺, 三父子瞓哂我就hea吓洗埋啲衫摺埋啲衫先瞓囉!

15/5/18

15/5/18   TUE   HOT

今日都係如常咁揍仔返學啦, 仲爺早咗返到去, 佢好開心咁將佢封情信比鎧恩啦, 點知人地收到打開時好嫌棄咁大叫: 「咦…好核突!」就掟番比仲仲, 我唯有叫恩恩同仲爺講:「多謝哂啦, 比番你啦!」, 人生第一次食檸檬就係咁啦! 揍咗佢返學我就去麥記快買個包, 撞到Apple喎就吹吓水講吓升學啲嘢囉, 佢都陪我行到去番康傑, 因為我今日要做聽故事家長, 仲爺喺隔離望住我好想我聽佢講咁好好笑! 我聽咗4個小朋友, 有3個都識字, 係有一個女仔同仲爺一樣係文盲, 哈哈! 最後睇埋佢地早會操就返工啦! 返到都係做自己嘢先啦, 想做公司嘢都冇得做啦, 都比人攞哂囉, 我已經講明不如我跟, 但條女都係話: 你比聯絡人我等我跟…..! 我冇嘢講! 明天驗身要順順利利! 午飯後都係睇吓電視啦, 下午又係整吓教材囉, 放工快腳去地鐵同子元會合, 今日要去九龍灣踢呢, 去到已經收到初部入選張表, 好在今日老公嚟啫, 唔係又要聽阿sir講咩又要作決定咁點呀, 不過就要帶仲爺去遊樂場玩囉, 終於踢完就去大牌檔食嘢, 嫲嫲都出咗來一齊食嘛, 送埋佢返屋企老公就返, 我都盡快K.O.哂佢地, 11點多我地全部瞓啦, 堅攰!