27/5/18

27/5/18   SUN   VERY HOT

今日老公係放假, 但佢琴晚去咗睇波, 基本上係今朝先返, 所以我9點左右起咗身都盡量叫嗰兩個唔好嘈, 但真係好難, 我個人又唔多好心情, 所以冇咩理佢地, 最終10點多叫陸生起身, 冇煮早餐呀, 直接出旺角, 子元買麵包食, 我地揍咗佢上去鼓室就食早餐, 然後返屋企溫書, 考試嚟講我覺得今次好似冇幾個鐘喺房溫咁, 定之前真係溫咗啲可以唔洗迫埋一次呢! 返去先溫咗中文先, 然後就做數, 我亦找找英文有咩卷啱, 之後可以做! 4點幾真係要出去食啲嘢啦, 叫番老公起身就出去, 食完嘢再去咗AEON行吓, 老公今晚要踢波, 我買埋餸返去簡單地煮飯食咋, 仲爺係咁叫我同佢玩, 但我一來真係攰,二來真係要煮飯點玩啫, 唔知佢明幾多! 飯後家務完都K.O.仲仲, 子元又多多事實囉, 做好欠我的練習後又睇電視又打機咁, 10點幾都唔捨得瞓, 好可惡!

26/5/18

26/5/18.    SAT.    VERY HOT

今日老公返早，仲爺又有重頭節目父母親節獻禮，我都係要一揍二！早上8點多要起身，揍子元去英文，空檔同仲爺食個早餐再去公園玩，點知過雲雨搞到濕哂冇咩得玩，係咁二玩吓咪去接子元，返到屋企收拾吓又要出門口，預45分鐘入主恩表演，都算預得準！去到交低仲仲比老師就去坐好，其實都同平時表演差不多，本來最期待仲仲跆拳道，但佢企到勁後根本睇唔到咁滯。唱完跳完影吓相，3點幾落到青衣城食啲嘢就回家，子元又要游水，仲仲咪搗蛋囉。等子元游完水就去咗旺角新都會，食food court 行咗陣回來，終於打暈佢地可以休息，老公就半夜去睇波。

25/5/18

25/5/18    FRI.   VERY HOT

話咁快又到星期五，某程度上都冇咩特別，朝早老公返咗工，我都係要搞掂兩隻，最終都係同仲爺撘地鐵算，時間上易預又化算。揍咗佢返學我咪返工囉，返去都係吹吓水開心埋佢，又整吓個工作表等人跟，都講多咗比人知我唔做架啦，遲早的事。午飯喺位食咋，因為老細喺到阻頭阻勢12點幾出去食，咪一早就返嚟囉！下午都係公事吓又私事咁，放工直接返屋企，老公去揍子元踢波我回去幫仲爺做功課先。今日比笨元第一次試自己撘巴士去畫室，都算順利，話哂都冇馬路我又放心少少。做好功課佢地都返嚟，就去長沙灣食晚飯再回家，睇吓電視都瞓啦！

24/5/18

24/5/18   THU   VERY HOT

今日要過去商會開會, 開最後一次會啦! 朝早都係要揍仲爺返學, 今次撘巴士轉小巴, 行係行少咗但真係好貴, 係地鐵的三倍幾, 咁我寧願行去撘地鐵啦, 而家時間上又冇長啲! 結果8:40先返到學校, 買埋早餐返工啦, 今朝都係吹水多, 11:30要過商會啦, 先去食午飯, 再去買吓嘢飲等等, 去到寫少少票就OK, 跟住都係講是非啦, 2點多開始有人來, 最PK係老細嚟到佢真係眼尾都冇望我, 想同佢講聲你陣間要同理事會交代, 但最終都要Nicho開口講, 你話佢係咪PK! 其實佢都真係好乞人憎架啦, 佢主持會議時D人坐吓去枱尾囉, 有人直情知佢到就缺席添! 開到尾局住同啲會員講我唔做時, 幾輕輕帶過呀, 算…我唔會再理佢咁多, 只係講到咁我的工作邊個頂時, 佢叫Nicho頂埋, 話請全職係養懶人喎, 幾想講粗口! 終於人就哂啦, 我都走啦, 話哂都8年啦, 點都有啲唔捨得! 不過都唔到我唔捨得, 因為跟住又好忙咁去接仔, 老公突然要OT到11點多一更, 所以我要揍咗仲爺再返去, 阿媽已經揍咗子元返荔欣, 返到去執好嘢就抖吓先, 可能太熱我真係好攰! 6點幾開始煮飯食, 簡單咋! 7點幾食得嚟再捉佢地沖涼, 仲爺明天生日會唔洗交功課, 但都要佢襯我沖涼時做咗一份先, K.O.哂佢地我就摺衫啦, 點知11點多子元又開始話瞓唔著, 最後我估佢係有壓力, 因為佢話發夢見到兩個點要連又連唔到咁, 唯有摟吓佢同佢上床蓋被, 多啲關注番佢囉, 咁又冇再走出嚟瞓到啦! 老公11點幾返嚟仲買咗糖水比我食!

23/5/18

23/5/18   WED   VERY HOT

今朝老公開始返新工, 要8:30返到, 所以我要自己揍仲爺返學, 真係夠哂趕時間, 但重點喺熱, 行出地鐵站撘嗰兩個站又行一大段, 足足半個鐘但行都咗2/3, 不過真係平囉, $7都唔洗, 但巴士轉小巴就要$21! 8:15就去到學校, 程太可以閃先, 佢兩個細都算合作! 買埋早餐返公司, 然後就開吓會咁, 心情就一路等緊信和嗰邊的電話, 真係好煎熬! 11點幾時終於收到消息, body check通過可以上工, 咁就定咗8/6返工, 返一日可以抖一抖先! 個心就已經漂走咗, 但個軀殼都係要開會, 其實都知唔關我事架啦, 有條友上嚟講解公司個網頁之後點update, 但做個樣都要聽! 點知到1點都唔識stop, 你呢D紅人梗係幾點食飯都得啦, 我地遲咗冇得補番架, 咪借啲二閃囉! 下午打好辭職信, 比人事部比總監, 明知佢同老細一齊架啦, 可以間接比佢知道咗就得啦! 放工接咗子元, 老公接埋嫲嫲同仲爺就嚟接埋我地去AEON食COCO, 然後去超市shopping, 買完送埋嫲嫲返屋企回到家快手沖涼同仲仲子元睇功課, 10點幾K.O.埋子元就摺衫, 兩機都幾用時間, 睇埋劇12點幾瞓啦!

22/5/18

22/5/18   TUE   VERY HOT*

佛誕都係多日假咁解啦, 今朝8點幾就比佢地嘈醒, 瞓唔番咪起身囉, 煮早餐比佢地食, 老公瞓到10點多我煮好先起身, 食完佢要返長沙灣攞車, 其實都未諗去邊, 但今日都唔想困喺屋企, 叫笨元做好埋佢啲數就出去, 老公想過土爪灣視察吓明天返工的地點, 可以點泊車等, 過去睇完又要諗去邊, 順路去咗奧海城囉, 今次行吓同平時唔同的路徑, 竟然發現平台上面有個遊樂場, 又比佢玩咗陣啦, 然後行咗去一期嗰邊再行番返去反斗城, 睇咗陣玩具Ann覆我今日都有開, 咁擇日不如撞日就今日去剪髮啦, 於是馬上過荃灣, 都等咗陣先有得剪, 3位終於都剪咗個清爽的髮型! 跟住就去咗愉景新城食午飯先, 其實都下午茶囉…食完去玩埋掟彩虹咁就返屋企, 老公話有份表要填埋, 咁返去執吓嘢先子元再去踢波囉! 我就諗住同仲爺去游水, 天氣實在太熱, 游水最啱! 點知過到中山公園原來大維修, 唯有叫老公車我地過去堅尼地城個泳池游囉, 呢個池又幾好玩喎, 不過夜晚就有啲凍囉, 同仲仲玩咗個幾鐘先走, 佢真係好鍾意玩水! 等老公過來接我地就返長沙灣晚飯, 回家忙忙碌碌咁K.O.好佢地, 子元瞓到11點幾話想嘔又嘔唔出, 老公話佢可能食晚飯時太急, 比埋上次啲胃藥佢食, 之後又話瞓唔番又話頭痛, 要幫佢用按摩油按頭先得, 半夜仲爺又叫我起身疴尿, 比佢激死!

21/5/18

21/5/18   MON   VERY HOT

今日仲爺同老公都放假, 得我同子元要返工返學, 所以我都係要一早起身, 只係唔洗咁趕揍仲爺返學啫, 但就吹水吹到唔知時候, 竟然傾到8:10先驚醒, 馬上返上樓啦! 老公車我返工就同仲爺二人世界啦, 我咪返去受囉, 唉…鬼叫你窮呀頂硬上, 今日又未收到新嗰邊通知上工, 真係好難捱! 午飯幫子元去買新水樽, 順手喺爭鮮買埋午餐, 又要去優品買意粉, 唔記得攞環保袋攞到一手都係! 食飽飽下午都係自由時間吓啦, 大老闆娘返咗一陣, 知道老細唔返仲可以食個Tea! 放工老公嚟接我, 去街市買埋餸就可以返去, 老公約咗朋友出去食飯, 咁我同佢兩個就煮粉囉! 休息吓hea吓先煮, 差不多8點先食, 沖埋涼K.O.埋佢地好快就自由時間啦, 老公11點幾都返到嚟, 都唔算好夜啦!