7/1/20

7/1/20.   TUE.  COOL

今日佢地開始考試，但笨元一朝起身同我講佢發燒，馬上處理，食藥沖涼刮痧敷額做齊叫做過到關先，叫咗佢準時食藥，一鼻水倒流就係咁麻煩！今朝車到我去南昌站就算，我撘shuttle返去食減肥麥皮餐，一齊減！今朝都多嘢做架，始終今個星期要半日做一日野，所以冇得hea!一返去阿姐仲要呻佢琴日返去做書僮嘢，咁我點都要奉陪！放工前做好預計要做的，入房同負能量太太團食埋個飯先走，返去做書僮，但今日到我發顛囉！首先笨元睇錯時間去補習，老公又唔睇清楚時間就揍咗佢過去，咁佢又病病地都算，跟住仲爺溫英文又係令人痴線，文盲點考試呢，總之我就又顛又打又鬧咩都齊啦，其實真係好辛苦！子元被Ms Yu提早收留後可以早點回來，咁就快啲做埋我啲練習囉，7點多出去食咗米線，回來又係時候快啲沖涼，都係唔甘心要同仲爺做埋份卷，10點多放佢去瞓啦，我真係好攰，心靈上嗰隻！

6/1/20

6/1/20.   MON.    WARM

今日只係返半日，得半日做好哂啲嘢，其實真係冇咩機會吹水做其他嘢！同老公一齊食埋早餐先返工，但可能真係剛病好，胃口都係一般，明天都係跟老公咁食keep fit餐啦，有人陪住一齊可以試吓！返到去真係吹咗陣水就開始做，快手咁都做到放飯先做得完呢！今日個飯真係超唔掂，好在有Jackie的黃酒雞，咁先有啖似樣的餸食吓咋！食飽就閃人啦，2點返到嚟，老公都同佢地食完飯揍咗佢地返來，咁休息一陣就開始溫書，主力係同仲爺溫，子元好多都可以自己跟，仲爺重點都係一樣嘢，唔識字！因為到臨尾做卷時又開始令人失控，加上食咗藥又攰啦，所以最後老公叫唔好再做快啲瞓算啦！咁都要放佢啦，反正都冇咩用，冇嘢可以輸！子元就再睇吓佢哦練習仲有咩要執啦，中文都唔係一朝一夕有得救，都唔明有幾難！

5/1/20

5/1/20.   SUN.    COOL

今朝出到汗，叫做好番少少，9點幾起身，仲爺已經醒咗，老公就出咗去，為咗仲爺要入教，佢都要去上慕道班呢！咁梳洗後我都仲係好病咁，但都要煮早餐比佢地食，子元就自己煮丁麵啦，我煮咗通粉同仲爺食，然後都係食藥啦，老公回來後買咗啲麵包又一齊食啲啦，佢就入咗房瞓，瞓之前有個重任就係同仲爺塞肛，條友仔燒到差不多40度，又呆哂啦，塞咗藥佢就自由活動，因為我好似又燒番，食咗藥喺梳化瞓吓先掂，子元就自己做數！到點幾真係要郁吓，同子元對吓卷先，跟住就出去食啲嘢，不過我都冇胃口，食完就回來同仲爺溫吓英文，子元4點幾要出去華夏盃比賽呢，我可以好專心咁同仲爺溫囉，字都係唔識串咁，但起碼叫做認得多咗好多字！老公佢地返到嚟，7點多就出去食晚餐，我又想食粥，子元又想食其他嘢，所以去咗深水埗食，大家都滿足哂！回家後冇再溫書啦，沖涼食藥瞓覺啦！

4/1/20

4/1/20.   SAT.    WARM

今日真係夠哂忙碌，亦夠哂估唔到！朝早兩位少爺一個補英文，一個學畫畫，本來諗住襯仲爺畫班時間去交哂兩份子元的自行選校表，但又要食埋早餐怕去哂兩間唔夠時間，所以食完早餐去咗近的長天交咗表先，接番仲爺之後佢有啲唔妥，主動瞓咗就知出事，所以先過咗九華交表先，去到學校都唔識搵校務處，我真係好想好想子元入到呀，諗番自己十一二歲時又係派位，我足足幾個月晚晚祈禱希望入到OLR，我諗今年我都會咁，為咗阿仔入到九華呢！交完表就同仲爺去睇醫生啦，估唔到冇人睇喎，一埋去就有得睇，反而係攞藥等得耐！搞掂哂返到屋企12點幾，快手比仲爺食藥再瞓啦，燒到火爐仔咁陰公！咁今日就主力同子元溫吓書，但都唔溫得好多，仲爺瞓醒咗就精神咗好多，但5點幾開始到我唔舒服，唔知係咪個車仔麵呢，瞓咗個幾鐘都唔得，起身後又嘔咁，老公被頭仲話我，都要出去食啲嘢架，我咪話我根本出唔到囉，轉個頭就嘔啦！最終佢去BBQ前買咗粥返嚟比我地食，咁全晚我都好辛苦咁全身骨痛，但都要搞掂佢兩個架，好在笨元夠大個幫到手，11點幾我入咗房瞓，但都瞓得好差，因為又沾寒沾凍又周身骨痛咁！

3/1/20

3/1/20.   FRI.    COOL**

又到happy friday啦，雖然月頭都多嘢做，但總冇話非今日完成不可！朝早子元起身話冇咩事可以返學，咁見佢又真係冇事咪比佢返囉，留番放學先睇醫生！揍咗佢地返學就車我返工食早餐，返上去吹吓水就開工啦，努力了一朝又放飯，入房吹吓水咁食飯係最開心，啱傾的飯腳好重要！下午本來都應該乖乖做嘢，但因為我提出咗訂樓上的清潔用品，就要搞掂啲手尾，好在有Ivy幫手整咗個表訂，咁放工前都做咗8成嘢架啦！回家後執吓仲仲啲嘢，轉個頭又夠鐘出門口去合唱團，然後又要去畫室接番子元，佢轉咗成人畫班的時間，可以學吓其他嘢！返小童接埋仲爺就同程家食飯，10點多才回家，沖好涼打暈佢地後，還要填好自行兩份表，明天去交表啦，反正都冇咩選擇，專心一致啦！

2/1/20

2/1/20.    THU.    COOL

又要返工啦，今朝都係自己起身撘車返工，原來時間都係有啲趕架！買埋早餐返去食完都係做嘢，真係冇Hea架，忙忙碌碌咁好快又放飯，本來入房食就係想靜吓，但今日好多訪客囉，真係好奇怪！午飯後都係做嘢，先做自己嘢，因為阿姐下午請咗假，梗係做私務先，填好咗啲自行表格星期六交，跟住就做公事囉！放工即閃去撘巴士，但等咗好耐都冇車，好在最終迫到架沙田車，咁先可以入到石門，仲爺踢完波喺附近食埋飯，見到有間西餐都價錢合理就試吓，估唔到性價比都高，生蠔買一送一下都抵食呢！回家後還要檢查功課齊唔齊，仲爺原來要英文oral等等，又搞到11點幾12點呢！笨元仲要又咳， 唉。。。佢一咳就好麻煩，明天都係睇咗醫生先好啲！

1/1/20

1/1/20.    WED.    COOL

新年進步呀！又到咗新一年了，老公朝早帶咗仲爺去主日學，我竟然瞓到11點幾先起身，笨元梗係唔會自己做嘢啦，所以起身後就馬上煮早餐，但老公佢地都差不多回來，我又想出去行吓，所以出咗轉荃灣，但又多車又多人，想行吓嗰間新嘢咩激安都唔得，多人到都唔知點行好，加上老公又要返工了，所以都係返屋企算！本來諗住幫兩個溫書，但原來子元要4練波，即係3點幾要出門口，返去又要煮飯佢地食，咁即係完全溫唔到，所以唯有同仲爺溫！好在子元有補開英文我都有信心，但佢都真係要比個心出嚟，令我覺得佢想考好個試！佢去咗練波我就同仲爺溫英文，開頭都ok咁架，但之後又開始激到我火起！轉個頭又已經5點幾，要出去接子元，喺樂富食埋丸龜食埋烏冬先回家睇903頒獎禮！