11/9/13

11/9/13   WED   HOT

今朝笨元都肯起身, 叫哂兩位大爺起身搞掂就出得門口, 撘到車好快返到去, 笨元D感染力真係好得人驚, 總之D同學一見到佢就係咁叫佢, 好嘈好嘈, 我都冇眼睇, 只係叫佢快D排隊咋! 幫佢比錢買埋新的茶點袋就返工, 買咗早餐返嚟食, 之後都係做吓自己嘢, 有公事做時咪做公事囉! 近來都真係好冇mood! 午飯叫咗外賣咋, 食到好飽, 老細又未夠2點返嚟嘈嘈閉! 下午都有公事要做呀, 臨放工總監先打嚟, 阻住人放工! 約咗老公喺樓下等, 過法國產檢嘛, 撘小巴過去都好快, 6點已經到啦, 例牌量血壓都高架啦, 都冇坐夠15分鐘, 驗好尿磅好重就等囉, 見醫生前再量多次過關啦, 入去照時諗住可以見吓蕃薯粒個全相啦, 點知尤醫生照得好快, 佢自己睇得到就OK, 又話25周係穩定期, 唔會有好大出入, 所以真係連蕃薯粒個側面都睇唔到, 有D可惜咁啦, 之後比咗錢先問番佢幾時再返嚟覆診, 佢話臨生之前一個月先至返嚟覆一次就OK, 可能佢見我有政府嗰邊睇住都冇意思要我睇咁密, 都好GE慳D錢! 返美孚同奶奶會合, 去咗食上海嘢, 跟住去埋惠康入吓貨就返去睇個新雪櫃! 老公全力處理個新雪櫃啦, 我就處理笨元, 本來諗住好心幫佢沖咗涼先等佢可以玩陣, 但到我都沖完叫佢收嘢又多多事實啦, 激到我死, 真係著哂火嗰隻, 先要佢做好執書包嗰D先, 然後溫埋書, 其實係想佢可以自動自覺做好晚上嗰D嘢, 咁到時蕃薯粒出咗世佢就可以照顧好自己, 但佢都唔明, 好在仲有幾個月時間再教, 不過佢最終都激到我要出衣架, 原因都係冇禮貌, 你想daddy講故事可以, 但唔係拉人衫大大聲, 咁我就捉咗佢入房吹吓一輪水, 話佢因為做嘢做得慢, 浪費哂d時間後搞到咁夜等等, 鬧完要佢明咗道理先叫佢邀請daddy入嚟講故事囉! 之後我地終於可以睇吓電視, 咁啱FOX做鐵達尼喎, 睇到十二點多先瞓囉!

10/9/13

10/9/13   TUE   HOT

今日都係如常咁揍笨元返學啦, 兩個都唔願起身, 浪費哂我D時間叫佢地! 返到學校都係咁啦, 唔洗排隊就入去仲好, 跟住返工買早餐啦, 點知行緊返去時喺街遇著個傻婆, 無端端鬧人喎, 佢係一路見人就鬧, 無端端比人鬧真係呆咗囉! 返到公司都係做吓自己嘢啦, 或者係唔願做公事咁啦! 午飯都係睇吓電視咁啦, 下午老細返咗嚟, 但真係冇咩找佢, 點都要搵D嘢出嚟比佢望吓, 等佢唔好以為我冇嘢做咁囉! 放工就返青衣啦, 笨元又係一返嚟就要我陪佢玩, 但到食飯時就攰又話唔食, 梗係啦食咗兩個奶黃月餅, 邊食得落飯呀! 仲要食埋生果後趕唔切7:50班車, 要撘42A就等到眼瞓, 行返去時行到體育館已頂唔順, 要抱啦! 返到去用扭蛋先整得醒佢沖涼, 仲可以溫埋書先瞓, 算係咁啦! 老公就話要睇埋哂D恐怖片, 其實都冇幾恐怖, 又係爛片一部! 不過睇完要睇吓其他嘢平衡番嘛, 就十二點幾先瞓囉!

9/9/13

9/9/13   MON   HOT

今日係拍拖11周年紀念, 但我地都冇做D咩, 大家都冇要求, 我又唔係呢D咁在乎紀念日的人, 大家齊齊整整健健康康咪囉! 朝早照樣捉佢兩父子起身返工返學啦, 返到學校排隊尾, 最好啦唔洗等, 見到家長們又傾咗一陣咁, 買埋早餐就返公司啦, 都係寫番日記做吓公事咁啦! 午飯又要去買, 買咗大家樂意粉啫, 加個朱古力奶咁啦! 下午老細返咗嚟一陣, 簽完嘢又走啦, 好事呀! Hea吓咁又放工, 返到去笨元睇緊電視, 我睇咗功課先, 今日寫的中文字都少少難, 寫“我有”&“朋友”, 仲有填充做! 咁佢6:30就要歸還電視, 其實係唔想佢再睇, 入咗房玩到開飯, 嫲嫲話開飯前笨元已經食咗好多嘢, 本來諗住由得佢食得幾多就算, 但就估唔到佢第一個食哂, 其實就想daddy陪佢玩, 不過一玩又玩得好激, 好易咳架嘛! 諗住較時間趕巴士, 攞個電話出嚟先知學校打過嚟, 覆番時老師又唔得閒住, 都冇法啦! 啱啱好趕得切巴士, 返到去都撘lift啦, 又要我鬧, 因為daddy入緊時佢竟然關門, 又係講咗十萬九千次GE嘢! 返到去ignore咗佢一輪, 叫做態度好番D, 又係時候溫書, 咁又算佢幾合作, 溫好都九點多, 到老公下半場, 我要摺衫啦, 一個星期的衫完全未摺, 咁又摺咗大半個鐘, 笨元都瞓咗囉! 跟住睇千禧BB, 不過大個哂都冇嗰時咁好睇囉! 十一點多望咗陣新聞就瞓啦!

8/9/13

8/9/13   SUN   HOT

今日都節目豐富架! 朝早冇較鬧鐘, 9點幾先起身, 但笨元10點要學畫畫, 所以要馬上起身同佢落去, 好在佢已經起咗身食埋早餐, 咁佢學緊時我地就兩個撐枱腳啦, 食完行咗轉百佳, 差不多時間就去接佢, 回家後我同佢做功課溫書, 老公就搬定個雪櫃出嚟等星期三新雪櫃嚟, 佢都算乖啦, 我教笨元時佢抺埋地, 可能因為想快D出街掛, 咁做好哂嘢十二點幾咪可以出門口囉! 先入沙田行吓, 因為老公四點幾喺上水踢波! 入到沙田先去食嘢, 本來諗住食Burger King ga, 但執咗喎, 唯有食麥當勞啦, 跟住要去行咗反斗城滿足咗笨元先, 然後再去IKEA, 本來想諗吓點搞吓個廚房門後面, 但點計條數都係唔抵, 可能最終係咩都唔整囉! 反正搬好位其實唔執個新雪櫃都夠位放, 咁就無謂浪費啦, 執吓佢咪算囉! 差不多時間就撘火車去北區運動場, 我就喺看台hea住等, 笨元就成日走上走落, 咁就個幾鐘啦! 去番火車站嗰頭先去街市買D料今晚煮麵, 然後撘巴士返去, 笨元未出上水已經瞓咗啦, 老公最慘係轉車時要抱住囉, 一路返到屋企笨元先肯落地! 返到去馬上沖涼, 老公煮好嘢食又沖埋先食, 快手食完睇衝上雲霄大結局嘛, 笨元掛住睇電視話唔食, 咪比老公鬧囉, 最終都差不多食哂! 不過之後都唔見得好架啦, 明明講好十點瞓, 但叫佢洗茶點袋執校服嗰D, 全部都做得勁慢, 因為成日想睇多陣, 係要人發火先掂GE! 最終十點半先叫做入咗房講故事瞓! 我地就可以休息吓啦, 睇完大結局老公又話要睇埋Transformer先肯瞓, 都十二點幾囉!

7/9/13

7/9/13   SAT   HOT

今朝笨元去參加生日會, 所以起身後我都要confirm佢D嘢搞掂我先出門口, 搞到我都晏埋! 返去食得早餐都就10點, 深哥又上咗嚟開票, 咁開票喎我梗係歡迎啦, 做好都係十點幾, 做埋自己嘢不一會又放工啦! 同老公喺美孚會合, 食咗D嘢先, 本來約咗敏瑩, 詠彤, 善孜先去荔枝角公園玩, 然後再上嚟我地屋企, 不過詠彤病咗, 善孜又唔嚟, 得番敏瑩都照嚟啦, 不過佢要學埋嘢先, 所以三點幾先過嚟! 於是我地食完嘢行埋過去荔枝角公園望吓嗰個遊樂會係咩, 見唔多對路都冇玩返屋企算! 返去執吓嘢抖吓咁等佢地嚟啦, 差不多四點先到, 兩個小朋友梗係玩啦, 我地大人咪吹水囉, 又玩吓程小B咁! 都玩到7點多先走人去食嘢, 返番長沙灣嗰邊食, 因為美孚真係冇咩好食, 佢地就帶咗我地去一間佢地本身熟ge, 叫咗5隻餸, 好好味呀, 邊食邊講, 食咗個幾鐘呀, 好在有部手機鎮壓咗佢兩個細路, 程小B就最緊要有得食, 吹到9點先走人, 撘巴士返去沖埋涼就要笨元瞓啦, 玩咗全日夠哂啦!

<幾咁兩小無猜>