25/11/15

25/11/15   WED   WARM

柏仲今朝都有一齊起身, 我就蒸熱D餸比子元, 不一會佢已經換好衫出嚟, 仲仲都醒咗, 就叫佢睇住細佬囉, 準時出到門口, 之後返上樓又係等嫲嫲嚟啦, 不過今日直接出去酒樓等, 叫定嘢食但原來都叫得多咗! 返到去都係要做嘢啦, 寫好自己嘢真係要開工, 下午開會D嘢都未諗掂! 跟住就食飯時間, 之後hea吓睇吓電視後, 飯都未落格又call開會, 開到放工咁滯, 都冇力去執手尾, 明天再算! 放工返到去笨元差不多做好功課, 就幫佢沖埋涼我先沖, 不久老公就返, 有嫲嫲煮飯我輕鬆好多, 陪陣仲仲, 睇陣功課就食飯, 飯後抺好地, 又要睇埋功課溫埋書做吓嘢, 仲要教佢寫紀念冊, 不過都見到佢可愛一面, 佢又好清楚自己的喜好! 9點幾10點瞓得, 我地又自由啦, 老公晚飯唔夠飽, 食咗個杯麵, 我就食咗包薯片, 好有罪惡感! 睇電視到12點幾瞓覺!

24/11/15

24/11/15   TUE   HOT

今日柏仲選擇唔起身住喎, 咁我可以靜靜地去熱番個飯比子元帶飯, 再叫佢起身梳洗出門口, 又要咬住個包嚟行! 返到上樓柏仲啱啱醒咗, 叫我開奶佢食, 今日嫲嫲出嚟, 我就摺吓衫咁先囉, 嫲嫲嚟到接更就買早餐返工啦, 今朝都唔算好忙, 不過11:30要過到工展會開會, 所以11點未夠就要行, 往年一向係4點幾嗰轉架嘛, 攞完嘢就行得唔鬼聽架嘛, 但呢D時間又冇得早走, 咪聽陣囉, 今年都有D新嘢要聽吓, 12點幾閃了, 返去食飯睇電視呀! 下午又要開會又要做工展D嘢, 超充實! 放工就回家, 返去時笨元仲做緊功課, 佢幾驚我鬧佢因為佢瞓咗未做哂, 所以喊, 嫲嫲安慰佢話只要你快D專心做, 媽媽返嚟見到唔會鬧你, 咁佢先安樂D! 所以我返去沖咗涼先, 陪陣柏仲, 等子元做完就同佢對吓功課先, 食完飯K.O.咗柏仲後再對再溫書, 9點幾10點前已瞓到, 我可以hea吓啦! 老公去咗踢波, 10點幾到先返呢!

23/11/15

23/11/15   MON   HOT

清晨時份比柏仲咁玩法, 全日都冇哂精神, 好在今日都要出吓去, 否則肯定坐喺到瞓咗! 起身叫醒埋老公煮飯比子元, 我就搞掂佢出門口, 柏仲吵鬧完一輪補眠, 搞到我要遲一班車, 仲要叫醒佢就行! 揍咗柏仲入去就買早餐返工啦, 食完唔夠一陣就要出門口, 去商台要錄音喎, 未夠11點我已經到, 坐喺到等囉, 等齊人就11:15開始錄, 其實都好快手, 老細雖則又要改又要剩, 但都叫做快, 11:45已經搞掂, 可以去飲茶, 難得去富豪飲茶呢, 食到差不多2點呀, 返到公司好多好多嘢做, 差不多4點幾先開始做吓自己嘢呢, 好快又放工啦! 直接返屋企, 阿媽揍住兩隻嘢, 返去快手準備煮飯嘢, 到老公回來沖好涼, 就叫佢負責蒸餸, 我去沖涼, 食完飯洗埋碗抺埋地就K.O.柏仲, 還要睇子元功課等等, 總之到10點先可以坐低, 都有呻架, 我話老公好似打咗好耐機, 做咩唔幫吓手! 今晚好攰…11點未夠就瞓, 臨瞓前子元又咳到好勁, 叫佢去嘔吓痰, 食個全餐聞埋氣先再瞓就冇咩!

 

22/11/15

22/11/15   SUN   HOT

今日都係早早比柏仲嘈醒, 子元同陸生出咗廳我就可以眠多半個鐘又要起身出發去畫班, 之後去食早餐啦, 跟住去投票, 然後行吓商場文具鋪咁, 夠鐘就去接佢地, 仲要過759換番個玩具, 但原來係因為電GE問題, 要用另一種電, 咁換咗就OK啦, 去惠康買埋嘢就回家, 老公又要揍子元去踢波, 柏仲本來係咁要跟住出去, 唯有點咗佢入房做嘢時老公馬上出門口! 差不多1點捉佢入房瞓, 我又hea吓, 又執吓屋囉, 條友瞓咗冇兩個鐘就起身啦, 整番熱D粥佢食, 老公佢地返來後就到我食lunch啦, 跟住又要同子元溫書啦, 其實明天英默, 但我竟然係第一次同佢溫, 好在阿媽喺放假嗰日已經幫佢溫過, 隨緣啦! 溫哂中英默同普通話同日常嘢後就放佢, 因為我都已經好攰! 慢慢執嘢再過敏瑩到, 齊齊晚飯, 去Aeon睇吓嘢, 最終Gloria都過埋嚟, 去咗食CoCo, 食完又係玩卡機, 我地就去買吓嘢咁啦, 去咗10蚊店買盒放Snoopy的模型, 又買咗工具吊好個布櫃, 最終買埋材料明天子元帶飯用, 好多嘢呀! 10點多才走, 飛的返去打暈佢兩隻嘢啦, 但我地就唔多眼瞓, 1點幾先瞓, 點知柏仲玩得太開心, 4點多開始係咁發惡夢, 搞到我完全瞓唔到, 之後顛到老公叫我出廳瞓, 佢有特異功能邊哄自己邊瞓!

 

 

 

21/11/15

21/11/15   SAT   HOT

今朝又比柏仲6點嘈醒, 點解佢放假唔可以瞓晏D, 我真係好辛苦! 拖住個軀殼送子元去體操, 跟住買早餐返工, 食完就hea吓啦, 咩都唔想做! 柏仲差不多1點先過到嚟, 都啱GE唔好搞搞震! 落到樓唔夠一陣就要我抱, 喺巴士已瞓咗, 由於冇買飯我諗住返去煮粥仔, 咁等佢瞓咗我就整嘢煮啦, 點知佢瞓咗大半個鐘就醒, 梗係要打番暈佢啦, 由於仲煲緊冇關爐入咗房噯佢, 噯到自己都瞓埋, 其實都幾危險, 好在好細火同埋開住蓋, 仲有我20分鐘就醒咗, 所以冇咩問題! Hea吓咩都冇做又瞓唔到, 等仲瞓醒就餵粥仔佢食啦, 之後嫲嫲出咗嚟, 等到子元踢完波就去出面大家樂會合, 食完去咗759狂shopping, 買咗D糧都夠到聖誕假之前, 回家後都係沖涼瞓覺啦!

20/11/15

20/11/15   FRI   WARM

今朝本來諗住自己整子元個午餐盒, 點知柏仲起咗身, 咁整到一半馬上叫老公起身整埋下半場, 我要搞掂仲仲, 又要叫笨元起身, 叫Daddy一齊揍笨元落去啦, 校車馬上到又齊人馬上走啦, 返上樓後就執嘢過嫲嫲到, 然後買早餐返工啦! 都係做吓公事又做吓私事啦, 午飯後好忙, 買手食咗個米線就過學校交番張支票去飯堂, 見到笨元呢, 佢應該食完架啦, 係到飲緊水, 所以我交完票佢都唔見鬼咗, 反而就同子慧吹咗陣水! 跟手又趕住去買今晚的餸, 去到惠康竟然冇哂一字骨, 諗到頭大應該點好時, 決定去另一邊間超市博一博, 好在買到, 再買埋其他配料就快閃返公司, 趕得切2點前, 好在老細今日冇返, 唔洗驚! 下午都係hea吓啦, 到放工就返屋企樓下買埋D麵呀飲料呀等等, 搬埋返屋企就落去接佢地啦, 都順利地揍咗佢地去泳池, 然後就返屋企整嘢, 今日只係主力煮肉骨茶都方便GE, 仲沖得切涼, 上到來忙忙亂亂咁開飯啦, 不過先K.O.咗柏仲先, 打邊爐真係可以吹好耐水, 吹到10點幾先執嘢, 跟住又切蛋糕呢, 慶祝婷婷生日嘛! 所以執埋嘢散場已經11點幾! 又要幫子元換床單喎, 因為佢地喺床玩, 仲要搬D紙箱上去玩, 夠哂dirty呀! 搞得嚟佢12點多先瞓, 真係比佢激死! 我都超攰, hea咗一陣都冇就喺梳化瞓咗!