22/12/15

22/12/15   TUE   COOL

今朝柏仲早起身, 坐咗喺床等我, 不過佢起埋身我又好亂, 只係今朝我唔整早餐比子元, 點都好少少! 落到去校車剛到, 跟住返上樓等阿媽過來, 摺哂D衫咁啦! 返到公司都忙一陣啦, 不過今日勁冇mood, 所以都係保持做自己嘢狀態! 午飯去咗做冬飯, 食西班牙嘢, 又幾好食, 用埋上次大老闆娘比的錢食, 每人都係補多60蚊, 返公司後都係等收工, 最PK係我地唔知冇人講我地可以早收, 問咗之後仲要話幫你爭取到, 真係唔該囉! 臨放工前收到阿媽個whatsapps, 個衰仔包竟然用個雷神鎚打爛咗部電視, 點會咁架, 我真係顛咗, 返到去又鬧又罰但柏仲好似都唔明咁, 究竟我可以點呀! 等老公回來比佢睇咗, 救就一定冇架啦, 局買過囉! 老公上咗去送飯比奶奶, 咁等佢送完本來諗住喺地鐵會合, 點知子元瞓咗, 叫得醒佢出門口換衫又慢, 柏仲又搞事, 搞到我又顛啦, 唉…近來都唔係好控制到情緒! 老公最終返咗上嚟屋企先再一齊出去青衣城, 去到先食嘢, 簡單D食拉麵咋, 之後就先去豐澤買電視囉, 都係買番sharp不過梗係update好多啦, 要6K呀但可以分期, 每月都係$250, 都唯有係咁! 之後就再去買嘢, uniqo買衫, 買到8點幾回家啦, 兩隻細沖好涼, 咁柏仲食完奶瞓, 我都估到佢實會嘔架啦, 所以都準備定等佢咳咗嘔埋先, 再沖多次身可以瞓啦! 咁我都可以沖涼休息, 今日都夠哂攰啦!

 

 

 

21/12/15

21/12/15   MON   COLD

今朝都忙呀, 朝早整餐盒佢返去party, 以為趕唔切車, 馬上打比校車姨姨, 好在佢今日都遲咗咁就趕得切! 返上樓柏仲仲瞓緊, 8點先叫老公起身, 阿媽過到嚟仲仲都未起身, 交代完今日點搞, 不一會柏仲醒啦, 比埋奶佢我就出門口! 今朝公司都忙, 老細無端端晨早走番嚟, 好在我都有嘢做緊啫! 最慘之後都係要開會, 午飯前都忙呢! 午飯買嘢返嚟食睇埋個大結局, 老細只係返嚟攞嘢就閃, 避債主咁! 都好呀, 下午做好公事我就做吓自己嘢, 因為要幫子元找數學專題研習的資料! 咁都搵到收工呀! 返到去我又變顛婆, 太早煮飯又唔係, 但沖涼又唔放心兩隻嘢喺出面, 跟住柏仲又做衰嘢, 總之就激到我趕咗佢出街, 之後我又繼續顛, 我真係好嬲佢兩個爭執! 老公回來, 同埋大包一齊, 佢地上去醫院睇完奶奶, 做咗手術都係等康復! 咁我就安心煮飯先啦, 食埋都係8點多, 老公先同柏仲沖涼, 比佢玩吓水, 等我洗好碗等等先接番出嚟, 抺埋地8點幾就打暈柏仲, 我可以沖吓涼啦! 之後叫子元要自己執明天旅行日D嘢, 因為佢今日竟然因為食同學仔的食物而冇食我朝早辛辛苦苦整GE三文治, 真係嬲到我爆呀! 所以我話你唔自己執咩都冇得食, 不過當然都係要guide住佢執啦! 10點捉佢去瞓啦, 我食埋藥都頂唔到幾耐, 11點幾都瞓啦!

20/12/15

20/12/15   SUN   COLD

今朝如常咁起身去畫班, 然後食完早餐去買吓嘢咁囉, 夠鐘就返去接佢地, 返到屋企又係食藥休息, 但我就冇咩休息, 因為老公要去送飯比奶奶, 咁我睇住佢兩個, 先打暈仲仲, 老公回來後我就落樓買日用品食物, 返上樓後再睇笨元有咩功課, 發覺好多要借書, 咁就捉埋笨元去圖書館, 怕到時太多人借咗冇書借! 點知返到去發現仲仲醒咗但老公仲瞓緊, 佢就散到一屋都係嘢啦, 重點係攞咗老公個銀包, 馬上叫醒佢自己收拾番啦, 仲有連櫃筒內的牙膏都攞埋, 真係叫救命囉好在佢開唔到咋! 收拾好就出去啦, 因為我已經好餓, 老公話去奧海城睇tomica, 過到去先食嘢, 真係咩都好食啦! 人多都死我又冇食藥, 最終打咗幾個鐘噴嚏真係好辛苦, 仲要返阿媽到食冬至飯嘛, 柏仲又坐唔定, 我真係完全唔知自己做咩, 總之快D返屋企快D食藥後, 打暈佢兩隻嘢就沖涼啦! 食埋隻眼瞓藥, 唔洗半個鐘已經想瞓!

 

 

 

 

 

 

 

 

19/12/15

19/12/15   SAT   COLD

今朝請咗假, 因為要帶子元去睇醫生, 我自己都順手睇埋啦! 子元發燒, 冇得唔睇啦, 9點幾過到去都好快有得睇, 攞埋藥11點唔洗已返到美孚, 去麥記食埋早餐就回家, 食藥後要佢瞓覺, 瞓咗個幾鐘出咗身汗好好多啦, 佢醒咗柏仲瞓緊, 咁我都要瞓吓, 本來瞓子元張床, 之後仲仲醒咗, 老公揍埋佢出去買午餐我就返番自己床瞓, 但都唔瞓得幾耐, 食完嘢再hea吓, 子元食咗藥再要佢瞓一覺, 到7點幾先叫醒佢, 約咗敏瑩佢地AEON晚飯, 去到等佢地玩吓卡, 我地又買吓嘢, 等埋子慧嚟都9點幾先食嘢, 簡單地食COCO咋, 食完就打的回家了, 食咗藥的日子都係hea過好!

18/12/15

18/12/15   FRI   VERY COLD

今日係老公生日呀, 但因為各種因素, 都冇咩大慶祝, 冇辦法啦, 本身星期五又忙, 跟住子元又病咁, 所以連切蛋糕都唔齊人咁! 講番朝早, 都係有點趕啦, 老公應承咗子元整聖誕午餐盒比佢返學, 所以佢要一齊起身, 柏仲就瞓吓先啦, 今日都係等阿媽過嚟揍住佢, 咁我就返工啦! 今日又係堅忙, 我真係好討厭咁忙, 做緊A, 又有BCDEF衝埋嚟, 搞到我亂哂龍! 捱到食lunch可以抖抖, 但我又要快手快腳買今晚打邊爐料返去先, 順手食個快飯盒! 飯後又再嚟過, 想幫老公諗吓有咩慶祝都冇機會, 準時放工就算啦, 因為要返去攞齊嘢又去接佢地, 去到小童阿媽就話子元啱啱去咗嘔, 真係比佢玩死, 完全唔知佢想點, 話唔游水佢又話唔肯, 最終都照比佢游啦, 但回來時又凍到死, 梗係啦, 話上水褸濕咗唔著到, 總之就係蠢啦! 沖好涼就好D啦, 但佢都係病病地架啦, 食完嘢佢地入哂房玩, 原來子元後來瞓咗, 連切蛋糕佢都冇起身啦, 可惜! 11點幾佢地先走, 我先沖涼呢, 但都未去沖, 子元又嘔落床, 好在唔多但都要處理嘛, 真係嫌我唔夠辛苦!

 

 

17/12/15

17/12/15   THU   VERY COLD

今朝我人就得一個, 但就要處理兩隻豬仔, 柏仲瞓緊我又冇理由叫醒佢, 所以膽粗粗叫子元自己撘lift落去, 我都送到佢去lift口架, 跟手入屋睇番住個閉路電視, 見到希媽同子元一部lift, 咁都放心D, 之後希媽上咗嚟攞嘢先, 柏仲瞓到8點多, 放假又唔見佢瞓咁晏喎, 頂! 咁等佢起身食咗奶我就揍佢落去, 一齊出門口佢就跟希媽去食嘢, 我就返工啦! 今日都忙呀, 開電腦先發現原來我幾日冇寫日記, 又想寫番喎, 但真係唔明點解咁多嘢做, 午飯Gloria找我食飯, 咁就去咗食米線仲有去埋訂蛋糕, 都遲咗返公司呀, 老細仲要返咗嚟, 頂! 下午都係忙忙碌碌啦, 放工阿媽揍咗子元上嚟, 咁我可以快D返去接番仲仲, 都真係麻煩到人嘛, 梗係要快D接番! 老公已經返咗嚟, 喺屋企煮緊飯, 咁返去就兩仔豬仔沖涼囉, 之後我地大人沖埋就食飯, 飯後老公睇住, 子元做埋D功課, 我洗碗抺地後, 就先K.O. 柏仲, 然後睇子元功課, 今日都多呀, 條友又錯好多喎, 都冇比心機做! 終於搞掂瞓得都10點, 我又要摺衫呢, 唉….11點多先可以坐吓, 辛苦死我呢!