25/5/16

25/5/16   WED   HOT**

今日都係如常咁返工返學啦, 朝早仲仲而家真係醒咗唔會嘈我喎, 我估佢真係聽明咗我之前講GE嘢, 聽到鬧鐘先至起身, 咁我都有得休息吓嘛! 揍咗佢兩個返學我就返工啦, 今朝都係冇咩特別, 做吓自己嘢咁啦, 午飯後去咗AEON, 周三特價日又買咗80蚊嘢, 都係食嗰D啦, 唔太過份啫! 買完回來下午其實都冇咩忙, 咁啱新造嗰D櫃送嚟, 咪要幫眼睇住囉, 咁就hea咗一個下午啦, 放工返去接子元, 今日唔洗煮飯, 嫲嫲話出去食因為我嗰邊今日停水停電, 借D二出去食啦, 咁接咗子元返去等老公嚟接我地, 去咗長沙灣一間餐廳試吓, 點知間嘢好串, 又要齊人先入得, 咁到我地齊人時, 有3條友突然出現就比位, 我話我D人到咗架啦, 咁奶奶行得慢嘛, 你望都唔望就比位人先, 點得架! 我咪出聲話唔食囉, 個女人先話我有位比你, 我都再話唔食架, 咁佢再出聲話有房呀咁咪算囉, 不過食物都係麻麻地, 係平架咋但都唔會再食! 食完買埋糖水就送嫲嫲返去我地就返屋企, K.O.咗仲仲就到子元, 佢又未做哂英文份練習, 我又未同佢對功課, 搞掂哂都9點幾, 佢今日派中進有滿分喎, 佢呢個神經刀真係好難估! 沖完涼陪埋佢瞓, 就可以快手摺衫休息, 今日心情好好呀, 可能唔洗做咁多嘢! 睇完劇12點幾先瞓!

24/5/16

24/5/16   TUE   HOT

今日都係如常咁返工返學啦, 仲仲又係早起身, 我又局住早半個鐘醒! 揍完子元就閃返去快手出門口, 因為老公今日話要早返公司, 所以早D車咗我地入青衣, 咁就去咗麥記買個早餐仔一齊食, 但仲仲主力飲咗個橙汁! 差不多時間就過去接更, 揍完佢地見時間啱就撘巴士, 好在夠早因為去到美孚都塞! 朝早都hea過, 雖然老細返咗嚟, 但都係同佢D愛將開會啫, 唔會理我地, 午飯後都係睇吓電視啦! 下午都係做吓公事做吓自己嘢, 又同個FD呻吓咁啦, 因為近來真係好攰好辛苦! 返到屋企有做唔完GE嘢咁, 開始頂唔住! 放工買完餸接埋子元返到去都就嚟7點, 快手煮飯囉, 今日都算快手煮好, 食完飯望住一枱嘢要執, 完全唔想做! 咁入廚房洗埋D嘢先啦, 出到嚟老公竟然會收碗喎, 但讚佢又冇反應咁, 唉…我都覺淡咗GE感情係要時間培養番, 始終生活磨人, 唔通仲好似熱戀咁咩! 之後都係兩隻細沖涼睇功課瞓覺啦, 未夠10點已可以沖涼, 不過今日我好攰, 11點套劇都睇唔到, 瞓覺!

23/5/16

23/5/16   MON   HOT

今日又要返工返學啦, 仲仲可能真係個天一光佢就醒, 睇吓我不如整黑D個窗簾, 唔係到暑假點算, 日日咁早起身我會顛! 搞掂佢地返學我又返工啦, 朝早要開會, 但我都已經變成咗一個配角, 是但啦有糧出得啦! 中午食完飯都係hea吓啦, 下午老細有返但全程喺嗰邊啦, 都好唔洗煩住我地! 放工又唔肯走喎, 搞到我都遲咗先走, 買埋餸接埋子元返到屋企都6點幾, 即刻煮飯啦, 7點幾已經煮好但老公都未返, 原來仲仲又搞事, 老公要執埋手尾先走得! 我同子元食先啦, 之後就對咗功課先, 跟住都係要洗碗抺地, 不過我開始燥底, 因為D嘢好似做極都唔完咁, 真係好灰好辛苦, 叫老公洗仲仲個杯袋佢就點子元去洗, 一句講哂一屋人都合作唔到囉! 我做到10點先去沖涼, 沖完出嚟叫做好番少少, 可能精神番D! 但仲有兩機衫要摺啦, 做好哂已12點, 我諗唔明點解我日日都咁忙!

22/5/16

22/5/16

今日回復正常的星期日安排, 不過仲仲都係好冇人性咁6點幾嘈醒我, 佢幾時先識放假唔洗咁早起身架! 比佢咁搞一搞我全日都勁攰囉! 迷糊了個幾鐘8點起身但都搞到8:45先出到門口, 過去接埋敏瑩佢地快買麥記邊行邊食, 跟住就上畫室啦, 我地就去食早餐, 然後去惠康買嘢, 再去元州邨等等, 總之大家忙忙咁夠鐘又接番佢地啦, 返屋企先對功課, 都係有錯漏啦, 係數學近來好似錯多咗, 成日都唔識善用D乘除法, 仲係到數數, 點得架! 12點幾佢又要出去踢波, 咁我同仲仲咪自己玩囉, 不過我都好忙, 仲仲都算肯自己玩, 整好子元個窗簾咪陪仲仲囉, 不過我真係眼瞓, 可惜又唔瞓得, 不如就摺埋D衫先囉, 唔係明晚摺4機摺死我呀! 差不多4點老公先買埋KFC返嚟, 勁餓囉, 食完抖一抖老公K.O.仲仲瞓覺, 我就要同子元溫書, 只係溫咗中文進評咋, 期間我又係到整理仲仲的功課, 我真係冇咩休息! 6點多佢兩個醒咗, 咁老公又要出去踢波, 我一揍二冇可能溫到, 咪放過佢先囉, 反正嫲嫲歸位揍番仲仲, 阿媽可以專心同子元溫書囉! 等佢睇埋美國隊長就出去買晚餐, 仲要去惠康買奶呢! 我今晚冇咩胃口, 所以夠兩個明天帶飯, 咁多把口食都唔洗100蚊抵啦! 食完執好嘢就捉佢地沖涼, 仲仲瞓咗叫做可以hea吓! 趕埋子元去瞓老公都返啦, 我真係攰爆都睇唔到咩電視, 邊睇邊瞓咁, 所以12點多自己入去瞓先啦!

21/5/16

21/5/16   SAT   WARM

星期六而家都冇再放工交收仲仲, 因為咁早返去佢都唔肯瞓, 咁不如一齊食晏, 但今日有唔同, 因為要去小童報暑期活動, 所以我照返工啦, 老公就同兩隻豬食完早餐就揍咗入嫲嫲到, 因為佢仲要去銀行等等, 報好名先再返去接佢地, 子元就踢波, 我同老公就兩個去食lunch, 靜靜地食咁又好似怪怪地咁! 食完去接番子元就過Aeon, 帶咗佢去食八方雲集, 然後佢就去打乒乓球, 我地就去AEON 12蚊店買嘢, 布就有啦, 要買D夾呀勾呀咁, 買齊嘢又差不多接番子元, 出去旺角買埋佢份玩具, 差咗佢幾個月架啦, 訂咗貨等有貨啫, 不過旺角塞車真係塞到顛, 入得青衣接嫲嫲仲仲佢地都6點多! 去葵芳食牛涮窩, 都等咗半個鐘先有位, 仲仲都好識食, 專食牛肉等等! 之後開始搞事啦, 又倒瀉汽水又玩棉花糖等等, 比佢嚇死! 食完睇咗少少家品就返屋企啦, 沖好涼趕佢地去瞓都10點幾! 我地仲要hea吓執吓嘢先瞓呢!

 

 

 

20/5/16

20/5/16   FRI   WARM

今朝仲仲一早嘈住我, 結果我一起身都鬧咗佢一餐, 呢排都係咁, 有咩辦法令佢唔好咁早起身呢! 而家唔洗食早餐, 老公可以一齊揍仲仲上學校, 個衰仲竟然話: 我要dada揍, 我唔要媽媽揍! 冇良心架! 今日老公又可以車我返工, 因為佢要出旺角買嘢! 今日部電腦係到自我upgrade到Win10喎, 但勁hand機, 好在可以回復番去win7, 唔係都煩死! 開完會都係做吓自己嘢啦, 午飯後去咗做垃圾婆, 對面公司掉咗好多布呀嗰D出嚟, 我地就係咁執囉, 真係好好笑! 下午老細有返, 不過就掛住佢兩個新的愛將, 都冇過過嚟呢邊! 夠鐘放工就閃啦, 返去執咗游水嘢又行啦, 接咗佢地換好衫就去泳池, 然後返去煮飯啦, 今日都係比較簡單, 仲仲又喺嫲嫲到食咗飯, 所以都唔算太忙! 佢地返到嚟就沖涼開飯囉, 之後都係吹吓水啦, 9點幾先開始收拾洗碗抺地, K.O.咗子元沖涼睇電視, 12點幾先瞓呢!