24/10/16

24/10/16   MON   HOT

今日要過商會開會, 不過我都返咗公司浦吓頭先囉! 朝早仲爺又一早起身啦, 反而應該起身嗰個就要叫一輪先, 我要忙住整飯喎, 真係好怕咁樣, 仲仲送哥哥落樓時又變咗嗲仔, 痴住我唔放! 揍咗佢地我就返公司啦, 只係寫番吓日記, 攞吓嘢交代吓咋, 10點幾就閃了, 過到商會開始寫寄掛號嗰D嘢, 12點去食晏, 回來後繼續做, 今日李太又上嚟, 議員又上嚟, 攞咗一大輪, 開哂會已經4點幾, 真係好耐未試過咁遲, 仲要去接子元放話劇喎, 行得過去接佢都已經5:15, 去AEON買咗少少嘢就行返去撘巴士, 返到屋企叫子元沖咗涼先, 我就hea吓6:30先煮飯, 子元都要做埋D功課, 嫲嫲過咗嚟一齊食, 所以老公去咗加餸, 煮起食完我就去咗幫子元對功課, 奶奶好好幫我洗埋碗, 咁等我執埋子元D功課, 條友D時間計法完全錯哂, 教極都係錯, 火起! 老公8點幾出門口去踢波, 車埋嫲嫲返屋企, 我就睇住兩隻豬, 我都唔知自己點分配時間光速做起哂D嘢, K.O.咗仲仲, 還要幫子元溫英文, 叫佢自己溫一溫做咗卷先, 等我沖完涼出嚟幫佢對, 錯咗D咩GE就知自己唔識D咩, 都係唯有咁溫先有用! 佢臨瞓前仲識得講, 要keep起求先做的兩張紙, 星期五返到學校可以再溫喎! 老公踢完波11點幾返到, 仲買咗糖水, 食完睇埋芉月就瞓啦!

23/10/16

23/10/16   SUN   HOT

星期日都係如常咁啦, 朝早趕D豬起身去畫班呀, 今日要車埋婷婷去小童先食早餐, 食完又要接番佢啦, 然後都係去買吓嘢咁, 又夠鐘放學! 回家後先溫中英數常, 放佢去踢完波先, 返來再做數, 明天數進評呀! 佢地閃咗就到仲爺做功課, 真係命都冇! 做好就煮午餐, 冇咩嘢喺手, 都係煮吓烏冬蒸吓牛肉咁就算, 仲仲邊睇電視邊食哂喎! 食完比佢玩多陣就瞓覺啦, 我終於可以抖一抖, 又要摺衫啦, 等子元回來又要影D數比佢做, 老公5點到出咗門口去踢波, 子元呢做做吓瞓鬼咗, 頂! 好在叫醒佢都完成到, 等仲爺醒咗都係放佢地自己玩啦, 我就要hea吓呀! 等老公8點幾返到嚟, 一齊出去食晚飯, 都係喺長沙灣食愛群咋, 不過叫3個餐都要4百幾蚊都係貴, 下次可能真係叫兩個都夠食! 食完回家沖涼瞓覺, 我都睇睇吓芉月瞓吓咁, 真係攰了!

22/10/16

22/10/16   SAT   HOT+

無端端的long weekend, 今日都係好hea咁, 不過相對喺昨天已經係冇咁hea架啦! 朝早hea到10點幾先出門口, 諗住出去食早餐, 點知阿媽打嚟話佢都係暈暈地, book咗對面海個醫生睇, 叫我陪佢過去, 咁都要去架, 但我話食埋早餐先佢又好似好趕咁, 結果咩都冇食就過去, 其實都係車佢過去啫, 不過因為係中環, 塞到爆囉, 安頓好佢喺診所, 佢睇完阿妹會接佢, 咁我地就閃, 子元1點要睇波, 順路喺油麻地食咗間好好味的舊式茶記, 就快趕回家, 子元攞衫去踢波, 我就同仲仲喺屋企, 我都係要做吓家務咁啦, 等老公揍咗子元去學校乒乓球, 就回來接我地, 因為3:15又到仲爺家長日, 堅係忙! 揍咗兩隻嘢去嫲嫲到就去見家長啦, 都係D standard的問題, 大家交流吓咁, 4點幾買麥記返上去一齊食吓當午飯啦, hea到6點幾出去, 咁嫲嫲佢地都要晚飯GE, 最終都係食唔到outback, 因為真係太多人, 都係食咗嗰間日本嘢, 喺愉景佢地就多D嘢玩多D嘢行吓咁啦, 食埋嘢回程啦, 返得去沖涼瞓覺又到我要休息吓!

21/10/16

21/10/16   FRI   8號風球


今日可以放足全日假, 因為天文台好乖咁6點多就掛8號, 雖然都瞓吓醒吓咁, 但都9點多先起身呢! 老公煮早餐, 食完都係hea啦, 睇吓電視咁, 真係幾無聊吓, 比佢地玩到2點左右就落去大快活食午餐, 睇吓打風嘛, 不過亦唔算好大風雨, 食完嘢去百佳買埋雞翼先返去, 仲爺要瞓覺啦, 子元就做數學練習, 都真係做得幾耐, 不過數學真係只可以做, 冇得就咁溫! 晚飯喺屋企簡單地煮咋, 食完沖涼瞓覺啦, 我地就睇電視咁囉, 晚上都落咗風球, 明天可以照樣家長日了!

20/10/16

20/10/16   THU   HOT


琴日就黑雨, 今日就陽光普照, 真係估佢唔到! 朝早都係如常咁返學返工啦, 都係做吓公事做吓自己嘢, 午飯後睇電視啦, 同埋關注吓海馬呢個風, 照計明天都唔洗返架啦, 不過就連會都冇得開, 都要諗諗點搞, 最終都係要改期啦!  老細今日返咗HK啦, 仲返埋公司, 不過都係見D高層啫, 唔關我地事啦, 話之佢開會啦, 放工走先, 接咗笨元就返屋企, 今晚佢同老公去睇演唱會, 所快手返屋企叫佢搞掂D功課先, 等老公嚟到就交換人質, 我帶仲仲回家, 煮粥一齊食, 差不多時間就沖 瞓覺, 老公佢地睇到11點幾先返嚟, 仲買咗牛雜麵齊齊食, HEA到12點幾瞓!

19/10/16

19/10/16   WED   RAIN 黃/紅/黑雨

今日朝都有D雨, 仲爺冇一早起身啦, 瞓晏D咪好囉! 搞掂揍仲仲返學啦, 老公要出去旺角買嘢, 車咗我去學校就閃, 點知南橋又撞車, 我地繞路行北橋, 總之幾經辛苦入到去, 我地喺街市落咗車行過去! 我揍完仲仲要行去撘地鐵呢! 返到公司都係做吓自己嘢啦, 午飯後睇電視囉! 下午又要開會啦, 一路開個天氣就一路差, 本來已經係黃雨, 跟住變咗紅雨, 最後仲黑雨添! 咁都冇咩, 反正唔可以走, 點知4點幾子元打嚟, 話佢冇帶功課袋返屋企, 結果要我返學校攞, 又唔可以等喎, 黑雨下過一過去學校, 濕到under都濕埋, 真係攞命! 放工時就停雨…頂! 返到去梗要丙吓佢啦, 快手返去叫佢做埋D功課囉, 因為今日出去AEON食晚飯, 好在佢都喺老公來接我地時做哂! 去AEON食蒸飯, 食完我同奶奶就shopping, 老公就帶兩個去睇玩具! 9點幾先走, 送埋嫲嫲返去就回家, 沖好涼快手趕哂佢地去瞓我就沖涼, 要睇電視呀, 又要摺衫啦, 睇埋芉月就瞓啦!

18/10/16

18/10/16   TUE   RAIN 3號風球

今日3號風球, 仲仲唔洗返學, 但佢一早就起咗身又係都要落去送哥哥校車, 落雨嘛又係都要落去! 今日老公車仲仲入去就得, 我自己夠鐘先返工, 夠哂時間可以整吓呢樣整嗰樣, 返到去都係做吓自己嘢做吓公事啦! 午飯後都係睇電視啦, 咁大雨梗係唔郁! 下午都冇咩特別, 要諗吓議程咁啦, 個個都話星期五唔會打風, 係咪我太緊張呢! 放工去接笨元, 不用買餸因琴日出咗去食嘛D餸仲喺到, 過到去笨元仲差少少功課未完成, 等佢做埋先, 因為阿媽而家要佢先溫書後做功課, 咁佢個速度就會快好多! 返到去我有我煮飯啦, 我叫子元唔好打機睇吓書, 佢就睇佢堆小百科, 係唔睇故事喎! 食完飯可以慢慢收拾抺地啦, 都唔洗趕落去跑步! K.O.咗仲仲就幫子元睇功課, 10點多諗住沖涼架啦, 點知收到老細個MSG, 話咩鬼D里程登記未能辦理, 我第一時間都係諗到幫大老闆娘換里數的事, 但佢就話係佢機票, 要我打去問一輪, 咪真係關大老闆娘換里數的事囉, 阻鬼住哂! 睇埋芉月就瞓啦, 好攰!