24/4/18

24/4/18   TUE   RAIN

今朝子元晨早起咗身喺到打機, 不過佢做好哂嘢就由得佢先, 仲爺起埋身咁就搞掂出門口, 揍咗子元校車就快啲叫老公起身返工啦, 所以今日都算早返到學校, 買埋早餐返公司又開始hea, 不過今日都有啲嘢做, 起埋個議程就上吓網囉! 午飯後都係睇吓電視, 下午就要處理老細啲文件啦, 又要copy好多嘢等等, 搞到放工先做起, 所以都係唔寄住啦, 明天再check清楚先! 放工去學校接埋笨元就過球場, 今日冇跑步啦, 天氣不穩又冇帶衫, 只係坐足兩個鐘打機, 餵足兩個鐘蚊呢! 8點幾走得, 海洋公園呢個球場真係最近架啦, 返去沖得涼嚟9點幾已經食得飯! 仲爺就瞓咗啦, 咁食完洗嘢都洗一輪, 又要叫子元執嘢都執十世先執得完咁, 11點趕得切摺好衫先瞓電視, 唔覺唔覺又睇到12點幾1點先瞓!

23/4/18

23/4/18   MON   HOT*

今日係子元10歲生日啦, 終於踏入雙位數, 希望佢真係大個仔啦! 今日要返學, 今年都冇咩幫佢大慶祝, 不過條友又好生性, 都冇話要點! 朝早都係如常咁返學, 我今朝就要見工, 見10點呢啲時間我就冇揍仲爺返學啦, 喺屋企做吓嘢先, 食埋早餐咁, 夠鐘就行出去, 都預早咗10分鐘到架啦, 填完表就直接見校長, 一嚟就問我對呢個職位有咩抱負咁上吓啦, 我都吹一輪自己係想做啲關於教育呀, 雖然唔可以教到學生, 但比起商界我係對教育界更有興趣咁囉, 都係講咗先知, 不過之後佢講job duties就講得仲長氣囉, 不過好事嚟GE, 等我詳細了解吓, 我仲問埋啲返放學時間等等啦! 見完都差不多10:40, 已經見第二個人等緊, 都唔理得咁多啦, 見完就算, 今個星期五就知結果! 返到屋企接埋衫睇吓電視咁, 食完午餐就返公司, 返去都冇咩做嘢, 只係寫吓日記傾吓偈又放工, 返去接笨元回家換衫, 等老公嚟接我地再去買蛋糕, 入青衣先切咗蛋糕影咗相先, 時間關係好似趕趕地咁, 有啲求奇, 搞掂就入深井食燒鵝, 不過唔係好肚餓, 所以都覺得一般好食咁! 返屋企仲爺瞓咗, 都要捉佢起身沖涼, 仲可以溫埋書先, 子元就等老公泊好車返嚟同佢setup部switch叉電等等!

22/4/18

22/4/18   SUN   HOT

今日瞓到9點先起身, 老公雖然去攞車先, 但都發現抄咗, 不過7點抄, 冇得講! 諗住附近食咗早餐再去圖書館抄書, 但時間關係只可以借到部份等子元返去快抄! 跟住就老公揍子元去打鼓, 我揍仲仲去踢波, 仲仲喺球場真係好搞笑, 又唔比我走咗去要睇住佢, 個波碌走咗又哎…住咁要我去執, 老公等子元打完鼓過嚟接番我地, 車我去醫院佢就返屋企先, 等兩個細做嘢, 我就要去睇阿婆, 因為情況都慢慢差, 醫生都話可以隨時睇, 不用跟探病時間, 所以我都去探一探! 返得屋企都2點多, 換好裝執好嘢就出去食午餐, 然後選擇咗去黃埔食錢樂園玩, 玩完就去咗「找數」, 找到麗城嗰間有得買, 真係走到入去買! 晚飯找程家一齊食, 都係食COCO啦, 仲比子元呃到份生日禮物返嚟! 等佢地打埋卡機就返屋企, 快手K.O.咗佢地就休息啦!

21/4/18

21/4/18   SAT   WARM

星期六長周, 撞正子元有打鼓比賽都冇得睇, 返到去見到深哥先記得要開票, 真係做到我死死吓, 寫到手都軟! 之後都係吹吓水咁啦, 講吓搵工嗰D嘢, 因為有間學校又打嚟叫我in, 咁下星期一又要請半日假, 不過都要請架啦, 為咗要離開呢個地方, 點都要有啲犧牲! 放工入青衣揍仲仲, 因為老公仲要同子元去還鼓, 所以我揍咗仲仲返去就做功課, 但要等我食埋飯先, 拖耐咗叫佢做都做唔出啲咩, 因為佢又係到拖, 真係人都顛架! 做到老公佢地返嚟佢都未做完, 搞到我又冇時間理子元啦, 子元5點又去游水, 今日完全冇通知阿sir, 由得笨爺自己落樓, 都真係開始要放手啦! 仲仲做好功課又唔瞓, 我又想打吓機, 所以邊陪佢玩邊打機, 差不多7點落去接埋子元就去食晚飯, 不過因為要睇Avenger, 所以買咗壽司返去食咋, 沖好涼K.O.埋仲爺就可以休息! 睇電視睇到眼瞓, 不過都睇埋先瞓!

20/4/18

20/4/18   FRI   WARM

今朝好趕忙, 子元7:15校車, 仲要買埋早餐先, 跟住就要快手出門口, 8點未夠都入到青衣, 先去食早餐, 8:25喺迴旋處見到有其中一個同學仔, 就交帶咗比佢就算, 你睇我地幾放心! 快手出去深水涉運動場睇子元跑呀, 好在趕得切, 見到子元喺佢嗰組跑第二, 加上見第一組跑得慢啲, 估計佢應該有機會攞獎, 果然攞到第三名, 見佢真係好開心, 咁都替佢開心GE, 平時練波咁努力喺幫助到跑步架! 之後就開始hea, 又唔走得住喎, 等佢散都等到差不多1點, 去食個晏我就返工, 都係hea架啦! 放工老公嚟接我, 再去畫室接埋子元就過海踢波, 喺球場陪坐陪到好凍, 晚飯同啲隊友一齊食, 食到10點多, 終於捨得走, 返到去都好攰啦, 不過唔洗搞阿仲, 佢喺嫲嫲到過夜!

19/4/18

19/4/18   THU   WARM

如常返工返學啦, 不過今朝要炒飯比笨元帶, 真係有啲趕, 食埋早餐先返工, 不過返到去有咩好做呀, 咪又係咁! 無聊到夠鐘就開飯囉, 今日算好架啦, 起碼打咗啲議程, 簡真係拖慢嚟做! 午飯後去咗D2行吓, 原來都有幾多snoopy架喎, 可惜其實冇咩用, 都係唔會買架啦! 下午都係打吓嘢找吓工咁啦! 放工就直接返屋企, 連餸都唔洗買, 因為嫲嫲話出嚟食上海嘢, 咁子元又去咗補英文, 我咪返屋企摺埋啲衫先囉, 跟住出去接番子元, Miss Yu話子元又口多又冇做齊功課, 唉…呢個衰仔, 都係要我迫番緊啲先得! 行到去食嘢嗰到老公佢地又係啱啱到, 食完老公先去攞車, 我地後join, 先車我地返去, 佢送埋嫲嫲返屋企就去踢波, 咁我地返到樓下時撞到Letty佢地一家去7樓玩, 咁時間尚早明天又唔洗交功課, 咪一齊囉, 不過我都要放低佢地家檔, 再攞埋毛巾水呀等等先去陪佢地玩! 玩到9點關燈就落樓啦, 點知3個大GE要去消防通道飛多次車, 仲爺追唔到, 我要佢停, 於是佢就喊啦, 佢都唔明自己係細, 邊夠人嚟呢, 咁最後大嗰班咪陪佢近近地走一轉佢先收聲囉! 返到屋企要沖涼執嘢瞓覺啦, 10點幾佢地已經瞓醒, 我好得閒咁可以打機, 仲download咗隻新game玩, 老公差不多12點先返到, 我實在太攰啦, 睇埋J2套劇就瞓, 冇理佢啦!

18/4/18

18/4/18   WED   WARM

今日正常咁返學啦, 仲爺喺我叫子元起身時走咗出房, 以為我地已經閃咗係到喊, 但喊唔夠一陣又冇嘢, 入咗房找Daddy, 後來見到我地喺哥哥房, 又傻傻吓咁走出嚟話原來你地喺到! 揍哂返學就買早餐返工啦, 跟住都係好閒, 打吓機睇吓嘢咁, 午飯後去咗買公司零食, 下午又係找工作的時候, 但真係冇咩啱心水, 只係找咗份東華三院的, 不過又要寄囉好落後咁! 放工買埋餸直接返屋企, 因為阿媽接唔到子元放學, 咁啱老公約咗人食飯又係揍唔到仲仲, 所以叫咗嫲嫲出來荔欣等我放工, 佢就出街啦! 返到去首先要佢地執好啲地方, 子元話佢做好嘢所以喺到打機, 我唔得閒理佢住, 先搞掂仲爺啲功課, 數學暫時簡單啲叫佢數咗就算, 但中文字點都要寫啱架嘛, 所以教咗好耐囉, 都係寫個「個」字啫, 真係咁難咩, 攞支筆好似千斤重咁! 等佢寫完都已經7點幾我先開始煮晚飯, 我又衰GE要玩整漢堡扒咁, 搞咗一大輪差不多8點幾先開到飯, 食咗一陣老公都回來囉! 食完趕佢地去沖涼, 我就洗碗抺地啦, 仲爺都9點幾就瞓啦, 子元就要溫默書, 好在同佢對一對功課, 原來數學啲小數化到錯哂, 佢話因為出咗去比賽冇上到堂所以唔識, 又要我教一輪囉!