31/12/18

31/12/18.   MON.    COLD

來到2018年的尾聲，仍是要返工的一天，早上叫醒老公駛番架車入嚟我就去返工， 朝早都係做吓嘢，時間都過得快，話咁快就食晏啦，吹吓水咁又等放工， 今日放4點都唔錯呀，臨收工前都做埋啲嘢，好頭好尾嘛！放工撘小巴可以去到奧海城同老公佢地會合，佢地去咗睇水行俠，咁我就直接過去，等佢地食埋嘢都5點多，若要睇煙花倒數就要出發去海運泊好架車霸咗位先，再去行商場囉，其實冇咩地方好行架，但為咗等時間過都要，其實Barry都跟埋嚟，但到我地行得咁上吓佢都係選擇咗返屋企， 因為倒數要等咁耐又真係有難度！我地就去大家樂食埋嘢然後行咗去中港城嗰邊，有個新嘅戲曲中心起得好靚又去八吓！行返返去時又喺馬路影吓相咁，然後10點幾就上去停車場等，果然係要有泊車先可以名正言順上去，等咗兩個鐘，期間都係要控制住佢兩個都攰架啦，不過喺嗰個位睇煙花倒數又真係好正！回程就辛苦，淨係塞出停車場都有排！