30/6/19

30/6/19.   SUN.    VERY HOT RAIN

3日連假的第二天，我瞓到10點幾先起身，其實都比仲爺嘈醒咗幾次， 係唔願起身啫！醒咗諗起子元個VR 遊戲卷今日到期，馬上打去同佢book，等子元踢完波返嚟，沖好涼執好嘢12點幾就出去，過愉景新城玩佢個VR，睇佢郁郁吓咁都幾無聊，等仲爺玩埋車仔就可以去食嘢，點知出車就落勁大雨，所以泊好車食嘢都濕哂呢！附近茶記食完去咗荃灣廣場行，都行到4點幾才回家，老公要瞓覺，我就同仲爺快手咁叫做溫咗數學常識，我都覺得自己溫得好求奇咁，但總好過冇啦！叫醒老公出門口去食嘢，本來想去深水涉食好出名嗰間牛扒，但實在太多人，最終去咗奧海城食food court算，食完就行咗陣商場，買咗仲仲的睡衣，還有子元的斜揹袋，又洗多咗錢啦，一出街就會咁！今晚老公又返夜，送我地回家後佢hea咗陣都返工了！

29/6/19

29/6/19.   SAT.    VERY HOT

今日係忙碌的一天呢，朝早8點多笨元就叫醒我地，因為要去補英文呢，咁老公揍咗佢過去就回來接我地去食早餐，再過阿媽到還埋條key就接番子元，返屋企執一執嘢，又差不多時間要揍子元返學校，佢今晚要童樂童歡晚會呢！然後就揍仲爺去學音樂，真係好耐未試過老公車我地過去，襯仲仲學緊嘢時就去咗食完，終於可以唔喺呢個商場食， 但真係悶到呢！食完去揍番子元，再入青衣接嫲㛦佢地，出番學校接子元去食嘢，再安頓佢返學校，嫲嫲就同姑姐就揍住仲仲喺AEON等，我同老公就喺學校門口等入場，攞好位先叫佢地上來，今年個節奏幾好，全部準時完成，子元個話劇真係幾好睇幾好笑！散場走得先送嫲嫲回家才到我們，老公就要返工，返去快手k.O.咗仲爺，我都好攰了！

28/6/19

28/6/19.   FRI.    VERY HOT

終於捱到星期五，而且係有3日假放嗰隻！朝早都係揍仔返學啦，返公司食完早餐又係時候hea住做，打吓機咁又做吓嘢，都係準備吓下午開會啲嘢，不過阿姐出咗去，又唔趕梗係慢慢做啦，做得多冇著數又唔會多啲人工！午飯同咗班八婆入房吹水，咁樣先係放lunch架嘛，平時連放風都不如，悶死！下午咪開會先囉，跟住跟吓嘢又做吓嘢，阿姐又跟咗阿sir出去開會， 梗係悠閒等收工啦！今日最後一日放6：10啦，下星期放早10分鐘，點都有賺啦！返屋企換好衫攞埋仲爺啲嘢，要去球場找佢地，點知去到只係見老公同仲爺，佢話子元走咗去，原來子元話好攰今日唔想再練，老公就鬧佢，佢就走咗去，陸生完全冇諗過找佢，話佢實會返嚟，其實佢真係唔明， 人有時都係有情緒，個仔開始青春期啦，真係要轉方法架！喺球場出面搵番子元時，佢唔開心到話想死，聽到個仔咁講你話我幾擔心先得架， 唉。。。教細之餘仲要教個大，我真係好攰，幾時可以舒服啲！揍咗仲仲去小童，我就去咗萬寧shopping，都買得好克制，應買先買，不過之後都忍唔住去麥記買咗榴槤麥旋風食！所以揍咗佢地放合唱團後唔多食得落飯呢！老公要返公車唔切我地返屋企，唯有等程生車咗佢地返去再嚟車我地，如果唔係就要撘巴士架啦！仲爺喺車到又嘔，雖然嘔得唔多，但幾時先咳得哂啲啖出嚟呢，好煩！返到去沖完涼佢地都好快瞓，但我就慢吞吞囉，又要留意住佢兩個咩狀況喎，做阿媽係咁架啦，啲阿媽一齊全部都係講班男人壞話架啦！

27/6/19

27/6/19.    THU.    HOT+

終於捱到一個比較輕鬆的星期四，朝早搞掂子元出門口，我都自己返工了，因為仲爺休息多一天，老公唔想咁早起身，我地唯有自己返工返學！買埋早餐返去食，慢慢開工做吓嘢，又係到等食啦，食完又係打機囉，好悶！下午真係勁唔想做嘢，所以都係輕鬆做！放工閃人返去等開飯，兩條友又係到玩到顛，又激到我地死死吓，食完飯都係收拾清潔，幫仲爺溫咗陣書，9點幾10點老公返工，臨瞓比藥仲爺食，條友又作嘔咁，叫佢又廁所嘔佢又唔肯，到忍唔住先走入去，咪一路行一路嘔囉，激死！又要我做餐死，我咪發佢老脾氣囉，可惡！

26/6/19

26/6/19.    WED.    HOT

今朝嫲嫲嚟揍住仲爺，子元就照返學，仲爺都係休息吓啦！買埋早餐返工，食完又開工啦，今日啲時間過得好慢咁，做咗好耐嘢都仲係時間唔郁！但嘢就未停過手做喎，真係好慘！午飯都係就咁入房食完打吓機啦，下午都係繼續做嘢，吹吓水咁，放工老公嚟接我，又去番麗新嗰間日本嘢食，又平又好食呢！回家沖涼休息啦，捉佢地早啲瞓，點知瞓瞓吓仲爺嘔喎，又做一大餐啦，好在老公今日喺放假啫，可以一齊搞掂佢再瞓！

25/6/19

25/6/19.   TUE.   WARM

今日都係hea住嚟做啦，因為仲可以唔洗比人管住哂嘛！朝早要揍哂兩隻豬人青衣交收，因為子元放假嘛，唔可以獨留在家，買埋早餐返去食，跟住咪做吓嘢吹吓水囉，時間都好快過，今日阿姨唔喺到，肥La即刻入嚟食，真係擺到明反咗面！下午都係要做嘢啦，但輕鬆吹水下都算得快！4點多收到老公話揍兩隻豬去睇醫生，因為仲爺發燒子元又咳多咗，都係要睇架啦！咁睇完再過嚟接我，返長沙灣食粥咋，回家沖好涼食咗藥就快啲瞓啦！咁我地都可以早啲寧靜吓！

24/6/19

24/6/19.    MON.    HOT RAIN

又到咗Blue Monday啦，不過相對地今日比較輕鬆，可能會管人嗰個放咗假，連阿姐都周圍吹水！返去食埋早餐就做嘢，真係有嘢做架，所以時間過得勁快！午飯後過咗去同Joyce佢地食，吹吓水咁，有時真係要講吓嘢先似放lunch架嘛，否則同自己喺位食有咩分別！下午都係做住嘢咁啦，放工快閃回家，因為今晚要去睇戲嘛，子元就唔記得去游水，好在邦sir打我我即刻call子元落去啫！老公接埋子行先嚟接番我地，過到長沙灣間新戲院隔離間餐廳試吓，食牛肉飯的，價錢相宜味道又好，可以再試！食完等程家溫家嚟埋就入場睇，又幾好笑喎劇情好順暢！睇完喺門口都散啦，老公去攞車揍咗竹找地返去先，明天又要努力工作！

23/6/19

23/6/19.   SUN.    HOT*

今日瞓到8點幾比太陽光射醒，仲爺已經唔知起咗身幾耐，咁我地都差不多起身，先同仲爺做咗啲功課先再出去食嘢，真係教到嘔血，一早就咁就係好攰！然後就出去食光速餐再行吓街，點知去咗愉景新城又玩咗好多嘢啦，算啦， 一排唔好再嚟就得！玩到點老公就車我地返去，買定少少餸就返上樓，今午都算做咗好多嘢架啦，不過係勞氣啲囉，因為係咁趕佢地做嘢執嘢嘛，執哂仲爺個床下底，轉移去我地嗰邊床，又換埋床單咁，7點多煮晚餐，又係食粉啦，不過今次唔用罐頭湯啦，就咁雞胸肉菜咁去煮佢地又鍾意喎！清潔完沖涼休息睇電視！

22/6/19

22/6/19.   SAT.    VERY HOT

今朝7點幾就要起身，因為仲爺要返去綵排畢業禮，揍完佢入去跟手又送埋子元去學英文，我同老公就山二人世界去咗食個早餐，再揍子元由上畫班，咁我地就可以返屋企抖夠先，最終我係執咗仲爺個書櫃啦，又夠鐘去揍笨元，再入去康傑揍番仲爺，因為要早走又要按鐘先得！點知車都係勁！揍埋仲仲我就要去趕地鐵，因為勁塞車！學完撘巴士回來仲仲就要趕功課，但都係做唔哂，激死！等仲爺游完水就出得丁，過咗MegaBox行吓IKEA又去咗間韓國餐聽口食埋晚飯，10點幾先回家，泊咗車PCCW，明天又可以瞓晏啲！

21/6/19

21/6/19.     FRI.    HOT

今日忙到一個點，我覺得真係好慘！朝早就如常揍仔返學，仲爺去到青衣城，我見嫲嫲去咗買包人又唔多，就比仲仲自己出閘過去找嫲嫲囉， 佢幾開心呀！返到去食住個早餐嚟做嘢架啦，忙到我都唔記得自己做過咩，但重點係我覺得自己入病，唔知係感冒菌入腸定腸胃炎，做到午飯前開完個會，出嚟食個飯都冇胃口，我會冇胃口喎仲唔驚！加上今日個飯真係好難食，所以扒咗幾啖就走，跟咗IVY佢地上德福行，買咗仲爺啲早餐奶！下午同樣冇停過，最慘又要開會又有十萬樣嘢做，加埋下半時間嗰兩件大囡細囡都唔係到，結果開門又係我，送件又係我，放工時喺個lift真係忍唔住講咗句，一個人做三個人嘢真係死得！老公嚟接我又見到個仲爺，咩都唔記得哂！返來捉佢做住一樣功課都好，跟住就去小童合唱團啦，但我又再唔妥，肚又再痛，但點都要返去煮埋個飯，洗埋碗清潔埋先沖得涼休息，已經12點多啦！

20/6/19

20/6/19.    THU.    HOT

今日下午要去training，朝早又忙，基本係冇停過手，我連食飯都做埋嘢，另一個原因係我唔想入房食呢，因為唔啱channel！其實有嘢忙都幾好，時間又過得快啲呢，但做完啲嘢又要比啲唔關事嘅上司睇，關事嗰啲叫咗你做又唔睇，呢間咩公司嚟架！2點幾去撘巴士過尖咀上堂，都係為儲鐘而上呢，總之捱夠就得！老公本來話來接我，不過又早咗放，所以我叫佢唔好嚟，我撘西鐵返去仲快呢！去長沙灣食米線，買埋餸明晚程家嚟食嘛！回家後快啲沖涼，又要教功課又要做家事等，真係冇停過手！

19/6/19

19/6/19.   WED.    HOT. RAIN

今朝老公揍佢兩個返學，我就自己返工！返到去慢慢整早餐食，然後都係做嘢啦，打咗個會議記錄先，阿姐又話要比咗佢先，比咗佢又唔覆，真係好想小！午飯時本來都冇咩，但係細姐話阿姐同佢講琴日開會啲嘢，我明明意會到阿姐係琴日都係鬧雀神，但細姐就話阿姐話我明明只係管job cert 都唔明做咩咁！大佬呀，當日又係你話唔明就問，問咗你又話我點解唔識，咁識就唔會問啦，冇病呀嘛！今日啲朋友仔又放哂假喎，搞到我都唔知同邊個講，真係谷得好辛苦！但都係要做嘢架嘛，所以時間都過得快，轉個頭就放工，老公過嚟接我，再返屋企接子元，入青衣接埋嫲嫲就去荃灣食泰國嘢，去埋Aeon入貨就回家，返到嚟仲要對功課，check書單等等，搞到12點幾！

18/6/19

18/6/19.   TUE.    HOT

今日都係如常返工啦，朝早都係咁搞掂啲仔就返工，食完早餐咪開工囉，Ivy去咗睇醫生後又直接病假，另一個同事本身又請咗假，部門真係人手短缺呢！朝早都好乖咁做嘢，時間都算過得快，午飯後本來打吓機，但因為搵開個六年級家長想要攞啲舊書，就再問吓佢升中的問題，十分長知識呢，原來呈分試頭兩次才用作全港排名用，第3次是用來計band的，大抽獎又係靠幸運號碼呢！仲有問吓啲中學資料啦，都講咗好耐呢！做吓嘢4點幾又要開會啦， 都開到差不多6點，好在冇阻住放工啫！今日直接去球場，睇吓子元踢成點，應該冇問題入到選掛！8點幾先走得，返到去食嫲嫲的炒飯，快手沖涼睇埋功課休息！

17/6/19

17/6/19.    MON.    WARM

又要返工口啦，今朝起身真係好攰，琴日遊行透支了太多了，但都係要如常返工架啦！今日抬埋啲奶呀脆片咁，之後早餐有著落！朝早返去做好嘢已經冇咩好做，但機又唔係好想打咁，時間真係好難過！午飯入咗房食架，不過食完就出咗去行街，成日屈喺office好悶！下午更悶啦，真係想瞓呢！睇咗陣小說又打咗陣機，連水板樽都寫埋，終於捱到放工就梗係彈閘，去到車站即有車，又好快返到呢！阿媽攞番件衫過嚟比我，見吓仲爺咁啦！之後都係等開飯，吸定塵先，陣間食完飯快手啲，洗好碗沖涼休息睇電視！

16/6/19

16/6/19.    SUN.    HOT

今日嘛，真係好熱血的一天，人生第一次遊行，若果比人迫到咁都唔行出嚟，真係過唔到自己，阿媽一朝早問我有冇黑色衫，就知佢都想去行，所以等老公同子元踢完波返嚟就出去，先攞衫比阿媽，跟住揍仲仲去踢波，食埋午飯，就會合程生去遊行，本來想約喺長沙灣等，但後來都係改咗去美孚，因為荃灣線已經上唔到車，估唔到西鐵線都要分流，等到第二架係吉車先上到車，但過到去香港站，都係轉唔到車，最終唯有係香港站出閘上地面，由海旁一路行過去鵝頸橋才入番遊行隊伍，還去見一見GLORIA，佢企街站呢！仲爺其實未入番隊伍時已經行到攰，但為咗將來都要努力架啦，行吓又抱吓佢咁，叫住口號都算可以，見到有分流路線又可以轉出去行快啲，就咁行法差不多7點才行到去政總，但要由政總再行去香港站撘車走先係最攰，有時仲爺還要抱，我條腰真係唔洗要，差不多8點半先返到去屋企！快手沖涼煮啲嘢食完就趕隻豬仔去瞓，返去休息時才覺得對腳好似唔係自己咁，但值得架！

15/6/19

15/6/19.    SAT.    HOT

今日都係8點多就要起身，子元去補英文，我地就去荃灣食早餐，然後去剪頭髮，由於Ann嗰到有客，佢又知我要等埋笨元同老公剪埋先，所以真係得個等字！差不多11點先有得剪呢！好邪地竟然撞到以前西頓同層其他公司的人，嗰時都係我介紹佢嚟呢到剪髮的呢！剪完去荃灣廣場行咗陣，仲爺就去學音樂，老公就揍住子元！學完返屋企，仲爺就做功課，子元就游水，然後去葵芳晚飯，老公就去咗踢波，我就同佢地返去，沖好涼睇電視呢！今晚有怪獸與牠們的產地，都幾好睇嘅，但比起哈利波特又唔同呢！

14/6/19

14/6/19.   FRI.    HOT

今日要揍仲爺去青衣交收，佢一遲起身就好鬼趕！買埋早餐返公司就開工啦，今日部門人手短缺，朝早都仲有阿大肚婆喺到，下午佢去埋產來我就慘，所以午飯後決意要去吓街，去咗ikea買咗guess chair同毛巾，快去快回咁又跑又趕都幾好玩呀！下午就真係去個廁所都難，同時又電話又開門咁，係咪玩嘢呀！放工等老公揍咗子元去球場先嚟接我，又塞車咁7點多先返去美孚，仲要去超市買嘢，一買又買咗差不多400蚊，不過都係日用品食品多啫，咁唔出街食就要咁架啦！揍埋仲爺去小童我就返屋企煮定丁麵等佢地返嚟，都9點幾先返到，又唔係買咗好多嘢食，再煮多兩個麵囉，食完嘢啲細咪入哂房玩囉，我地都係吹吓水咁啦，佢地都11點多先走。

13/6/19

13/6/19.   THU.    HOT

今日要揍仲爺入青衣，因為老公改咗返早，撘地鐵時佢聽到廣播金鐘站封咗，竟然會諗到喺林鄭嗰到，又諗到星六去唔到學音樂，所以佢除咗唔識字之外其實咩都識咩都諗得到好遠！揍咗佢同嫲嫲會合我就返工啦，返到去都係食早餐咁啦，然後扮做吓嘢都要，但見阿姐去咗吹水，我又做吓自己嘢，上咗EK睇荔天有冇仲爺嗰屆開咗谷，順手入埋啦！午飯喺位食完痴ivy佢地出街，幫佢手買西餅，阿sir點阿姐做，咪輪到我地啲細嘅做囉，不過食完飯出去行吓好過喺公司吽囉！回來後下午都係拖慢嚟做嘢，終於捱到放工啦，快手返到去睇咗功課老公就開飯，然衍後都係睇電視啦！子元今日派咗兩份卷都係B咋，其實你話好差唔係，但我當然希望佢係攞A啦，但成績都出咗可以點呢，再勤力啲囉！

12/6/19

12/6/19.   WED.    HOT

今日真係好悲哀的一日，點解個政府要咁白痴，我都真係想去埋政總嗰邊參與，但始終好難唔返工，唯有身在曹營心在漢！早上一路返工聽住收音機，連節目主持都唔知點做節目啦，當年六四就話細個唔識，而家明但又可以點呢！今朝做到未停過手，但都好似唔知自己做咗啲咩咁，覺得個人好迷，所以食午飯冇同佢地入房，快食完同班新姐妹去德福行吓講嚴卜壞話都好，下午返去做到冇停手，成日做埋啲無聊嘢，都唔知為咩！放工撘巴士返去，老公煮咗米粉，好好食呢！跟住都係洗碗清潔沖涼睇電視啦，仲有睇吓政總嗰邊點，今次香港人可唔可以堅持到呢，支持住呀！

11/6/19

11/6/19.    TUE.    WARM. RAIN

今日都係如常咁返工返學啦，朝早買好早餐返去食，跟住都係做吓嘢打吓機啦，不過部手機今日好慢，又好易熱，唔玩得耐！午飯約咗Tim哥同佢送行，佢就有好路數走人啦，祝佢順順利利啦，同場有埋Cathrine同Mandy一齊食，吹吓水咁時間過得好快呢！返到去全個下午都係到整屎相囉，跟住又嚟放工先嚟落雨咁啦，本來諗住撘shuttle，但實在係太多人，所以都係行返出去撘巴士囉！返到去開飯食飯洗碗睇電視，考完試的日子真係自在！

10/6/19

10/6/19.   MON.    HOT RAIN

又放完3日假期要返工，但真係完全的唔起心肝做嘢！朝早買埋早餐返去食，然後做吓嘢先啦，吹吓水咁時間原來過得好快！午飯又同Tim哥分多半個飯食啦，不過都唔耐啦，佢月尾就唔做，有好路數係好事，所以約佢明天食個散水飯！下午一邊打吓機一邊執唔卜啲屎相，明天真係要努力做啦！放工一落到樓就落大雨，去到巴士站又冇車，不過都算快，都係7點多就返到屋企，嫲嫲煮好飯食埋就洗碗清潔沖涼睇電視休息！

9/6/19

9/6/19.     SUN.    VERY HOT

今日又係好熱好熱，笨元朝早仲要去比賽，我就同仲爺喺屋企，食完早餐就執定下午去游水啲嘢，等12點幾老公揍子元回來後，就帶仲仲落去交換人質，到佢揍仲仲去踢波，我就同子元喺屋企煮午餐，簡𠴱地食啲餃子同麵咋，2點多老公回來接埋我地就去程家游水，其實都算游得耐，差不多玩咗兩個鐘，天氣太熱浸喺水真係幾舒服，玩到差不多5點先同兩個細返上去沖涼先，然後才到大嗰班，沖得嚟休息吓，等陸生過來接我地，就去日日涮食放題，但其實真係食唔到咁多，不過我都算好食得架啦！臨尾仲食咗3杯雪糕，攞埋嘢飲走！返到去快手沖涼啦，只係覺得好熱好熱！

8/6/19

8/6/19.    SAT.    VERY HOT

今日真係好熱，我可以早上唔開冷氣都真係好勁！朝早老公又要揍笨元去Konter比賽，我9點都起身了，蒸粽比仲爺一齊做早餐，跟住就迫佢做功課，原來都唔係好多啫，咁就可以快啲做完，放佢去自由活動，我都要處理埋仲爺功課的家長部份，有時根本係家長做功課！1點出門口去學音樂，但落咗樓不久我就覺得全身冇力，好似血糖低嗰隻，買咗少少嘢食咗都唔見好好多，頂到上地鐵好在有位坐，坐到去金鐘好少少，揍咗仲爺去音樂班我就喺麥記坐，反正仲爺都係食麥記，接佢放嗰時眼濕濕咁，原來臨尾唔合作比老師話！上巴士食埋嘢就瞓，子元跟咗祈佢地食埋嘢先返，竟然同我一樣時間返到，快手叫佢去游水，我就hea 吓啦，點知到7點幾都唔見佢返，嚇死我，原來佢以為我去接佢，真係攰到矇咗！搞到我又打比兩位阿sir，真係嚇死！回來食埋飯就沖涼，打暈埋仲爺就睇電視休息，放假都係應該要hea吓先好！

7/6/19

7/6/19.   FRI.    HOT

今日端午節，但好似冇做過咩關節日事！朝早7點幾就起身，因為要去睇戲，睇8：50的黑鳳皇，冇期待中咁好睇，進度有啲 慢咁啦！睇完比佢地去玩咗陣掟彩虹啦，都算滿載而歸的！去接埋阿嫲過阿媽到食做節飯，到2點多又要趕返去開子元的視像會議，傾佢地個科探呢！又係傾到離哂題啦，唯有快啲end咗佢地，因為又要趕去畫班，之後上阿媽到幫佢搞加拿大個簽證等，再同程家去tea番轉先接子元放畫班，又要趕去konter選拔，不過我就同仲爺去咗行商場先，因為實在係太熱了！7點幾先過番去，等佢地完場，返長沙灣食晚飯，睇埋倚天，回家快手沖涼休息，今日實在係太熱了，令人特別攰！

6/6/19

6/6/19.    THU.    HOT

今日真係好熱呀，不過都係喺室內多啫！返到去食完早餐做吓嘢啦，今日冇嘢趕啦，可以慢慢休息吓， 加上二姐請咗病假，唔知點解特別輕鬆！午飯後去咗同Catherine吹水咁，反正喺房都係各有各咁，其實同喺自己位食冇咩分別，過去講吓是非好過！下午都真係有嘢做架，不過唔洗急囉，阿姐又holiday mood咁周圍吹水，冇皇管呢！放工老公嚟接我，先去荃新天地買飛明天睇戲呢，又睇啲晨早場！跟住返屋企食飯，做節嘛！食完飯埋碗等等就沖涼休息囉！

5/6/19

5/6/19.   WED.    HOT

今日都係返半日，原來真係幾好feel架喎，不過都係返埋今日半日，明天又要全日了！就係因為得半日，根本忙到停唔到，好在今日ivy好番可以幫手，唔係都唔知點算！放工老公嚟接我，返到去其實2點未夠已經捉佢開始做，個豬仔又OK做得啱啲數，但又唔多夠時間溫視藝同體育，估唔到原來需要咁多時間，6點幾入青衣食飯，回來後又要睇埋倚天，都再睇多咗一次架啦，希望明天順順利利啦，真係佢考試就我緊張咁！

4/6/19

4/6/19.   TUE.    HOT

今日都係返半日，常識總係溫唔完，唔知點算！朝早如常捉佢地起身返學，我返去食埋早餐就快手開工，已經未㒅口過手架啦，但都係做唔完，加上IVY又病咗，佢未夠12點都閃咗，所以我呢個部門就停工咁啦，不過同會計夾咗比佢地做咗先我地再後入番資料，今日可以準時食埋飯先閃，叫咗老公嚟接我，因為琴日咁樣返去實在太廢時失事，果然今日兩點幾就可以開始溫！不過老實講真係好唔夠時間咁，已經早兩個星期開始溫架啦，但今次啲範圍真係太深，歷史呢家嘢真係唔知佢會點考，我都叫做讀咗十幾年歷史，但去到近代史呢part我真係投哂降，已經叫咗阿媽又同佢溫過架啦，希望冇意外啦！溫到6點入去青衣食飯，食完都閃啦，趕回來睇倚天，睇完又要繼續做，好在weekend已經溫咗音樂啫，諗住今日先溫實死！唉。佢考試我仲攰過佢！

3/6/19

3/6/19.   MON.    WARM

月頭的星期一，除左忙已經冇第了個字形容！今日仲要只返得半日，唔理咁多啦， 做得幾多得幾多啦！考試日子鬧鐘都要較多幾個！返到去食埋早餐就開工啦，後面嗰位請咗上午，我又要做多啲囉！跟住就係咁做啦，得個上午真係勁唔夠用，放飯前都未做完我想做的事，連飯都食唔切要攞返去食，但等巴士又等唔到喎，都要2點先返到去，食埋飯等子元返到嚟就開始溫習啦！其實都係邊做練習邊了解吓錯咩啦，做吓休息吓咁，又要捉吓仲爺做功課啦！今晚決定唔煮飯啦，出去大家樂食都唔算好貴，咁就快手食完回來再做，8點幾比佢睇倚天後沖埋涼再執埋啲手尾，餘下的明天睇佢自己臨場發揮啦！

2/6/19

2/6/19.   MON.    RAIN. SUN

今日又係溫習日，捱埋佢啦好快得架啦！朝早竟然瞓到11點幾，可能因為琴晚拉咗窗廉瞓，完全唔覺天光！起身後就食個早餐加午餐，為方便仲爺1點練波，近近地去咗幸福邨食，食完老公就帶仲仲踢波， 子元就跟我返屋企，順手去攞埋裕希媽話比佢兩個的圖書，真係有好多，要等考完試先有時間執！全個下午都係溫習，做練習等等，仲爺回來後老公都係打機同瞓覺，其實佢好似真係冇咩幫到手喎，連仲爺的默書都係我溫，所以男人都靠唔住！5點幾仲走咗出去踢波，又叫我地等佢踢完回來才食飯，但8點幾先返到，仲爺就係咁叫肚餓， 唉。。。真係煩死人！最後去咗奧海城食food court就回家，沖涼瞓覺明天進入直路啦！

1/6/19

1/6/19.    SAT.    WARM

都係如常的星期六啦，8點多起身就是子元去補英文，不過我地冇出去食早餐了，老公揍咗子元過去時我就煮早餐囉， 然後就係同仲爺做功課啦，之前又參觀又去影畢業相，堂就冇上功課就要做，冇得走啦！做到臨出發去音樂時叫做做得完啦，預備好練習比子元做，又獨留在家呢！等仲爺學完返嚟都5點，睇吓電視等等，跟住都係捉住兩位少爺執埋功課啲手尾然後煮飯，笨元除咗有時沉迷吓睇youtube外， 都算好合作做練習， 係錯埋啲無謂嘢囉，希望今次考試順順利利啦， 呈分呀我好緊張！晚餐煮咗意粉，簡簡單單咋！食完睇吓電視，10點前捉哂佢地去瞓！子元知道daddy今晚去睇波又話想去，但睇半夜2：45呀，唔好玩啦， 若果你考完試啦都仲由得你，但星期一考啦，明天都要有精神溫習架！個daddy又係唔諗吓就答應佢，好在子元問一問我啫，唔係返咗嚟接我先話唔比又煩！