31/8/19

31/8/19.    SAT.    HOT

今日心情唔知點解麻麻地，做咩都冇心機咁！朝早9點多起身，因為子元要去畫班，食埋早餐子元就去畫畫，我地就去咗買餸，應該都夠呢幾日食架啦！咁我地就返屋企啦，老公差不多時間要去接子元，我就係咁摺衫，足足摺咗幾個鐘，四機衫喎唔少嘢，等老公接咗子元又入青衣幫嫲嫲換埋電話卡等等先回來，接埋我地去咗幸福邨食午飯，都係返屋企，一來子元要游水，二來真係冇咩地方好去，返來打咗陣switch，子元就去游水我就打吓機，6點幾開始煮飯，晚上老公同咗子元去踢波， 我就喺屋企揍住仲爺囉，今日都係閉吓關啦， 我都要收拾心情準備開學！

30/8/19

30/8/19.    FRI.    RAIN

今朝瞓到8點幾先起身，不過都唔係瞓得咁好，間中都有醒過，但總算可以！起身梳洗後見到好大雨，仲打定輸數冇得玩天浪淘園，但都要食早餐架，落去翠華又要等一輪，食得嚟都10點啦，不過好好彩已經停雨可以玩，反正有得late check out，梗係玩盡佢，於是11點都照落去游，玩漂流河先，然後去真游水，再浸熱水按摸池，超正！玩埋衝浪就要去沖涼，上去執得嘢差不多1點，真係要check out啦！撘shuttle過番去北面，目的地係科學館，但要行過去，邊行邊找地方食午飯，都找到個西餐廳好好食！行到去科學館兩點幾，估唔到好幾年個科學館已經被玩到殘，不過仲爺都玩得好開心！撘5點多嗰班shuttle去番碼頭，係時候回程了，用了兩個鐘左右返到屋企，仲爺仲趕得切上合唱團，同程家一齊晚飯，果然係捉緊暑假的尾巴呀，一齊講吓旅行嘢，又一日啦！

29/8/19

29/8/19.    THU.    RAIN

今日係期待已久的澳門之旅，朝早老公回來就執嘢梳洗出門口，先去食早餐，然後入欣澳轉巴士去港珠澳香港口岸，辦好出境買埋飛就上金巴，完全唔洗等就，11點已經過到澳門，係入境時要等。再轉巴士去到市區就先玩氹仔中央公園，但好快就落雨，唯有躲到下層的圖書館，躲到一點唔係辦法，就跑過對面找地方食嘢，點知都係食麥當勞，食完就行過官也街買手信，再行埋在去酒店check in，安頓就落天浪淘園玩，水梯，浪啦⋯⋯浮住咁都漂咗兩轉，玩到6點幾先返上樓，收拾好就去百老匯街食嘢，簡單地食咗星洲嘢，好好味！返房沖涼等蛋糕影靚相，再快啲打暈佢兩個，就同老公去按腳，完滿的一天！

28/8/19

28/8/19.   WED.    HOT

今日完全已經係holiday mood，返到公司食完早餐做埋更表就開始睇澳門之旅的詳情，重點都係睇交通，始終目的都係玩水多，所以真係睇點撘車就已經可以！不過要諗得清清楚楚，都要啲時間，還要偷偷摸摸去做呢！午飯同咗Catherina佢地食，吹水時間過得勁快！下午開始真係冇咩做，但阿姐又係到咁，想打機都打得唔舒暢！放工攞埋啲雪糕返去，但又冇車又塞車咁，好在落得夠冰種啫！返到去休息吓先煮飯，老公揍咗兩個去踢波， 等佢地踢完回來食都9點囉，食完老公又返工啦，我就洗碗清潔，再同佢地執下明天去澳門的行李，今次真係只帶背包，玩輕裝呢！

27/8/19

27/8/19.   TUE.    HOT

今日都係冇時間做澳門之旅的行程，因為真係做咗一日嘢，點可能咁忙架，係咪玩嘢先！早上叫哂佢地起身我就出門口返工，返去都係食完早餐就做嘢，忙到我都唔記得自己忙咗啲咩，總之就係不停做啦，午飯後都係打吓機啦，時間都過得好快，下午仲要整埋啲compliement，又玩咗個幾兩個鐘，再督住個仆街經理做埋啲嘢，真係好攰！放工還要過荃灣，book咗今日剪頭髮嘛，剪咗個頭都輕哂！去食埋燒味飯買埋嘢飲就返屋企，但完全唔記得咗要去睿陽屋企攞書，唯有下星期再約！老公今晚又係返夜，所以我都未沖好涼佢就出咗門口，睇埋仲爺啲功課，就趕佢地去瞓啦！我就要摺埋啲衫等等，12點先有機會抖抖！

26/8/19

26/8/19.   MON.    RAIN

又要返工啦，不過返3日又放番個long weekend先返學，都係期待嘅！今日可能真係太多嘢做，時間真係過得超快，返工時去到紅磡先嚟落雨，好在有人遮我上車啫！買埋早餐快手返上樓，食完就開工啦，忙到呢，根本就未停過，想盡快清哂啲嘢安心地放假！午飯落樓下同紳士食散水飯，係有點傷感的飯，另一邊HR都係食散水飯，我做咗一年幾啫，眼見都散咗好一班人，真的有點兒那個！食完返上去又做啦，要打電話比去海洋公園的人，成績唔錯欠2個啫！做好嘢原來已經5點幾，想做吓自己嘢都冇咩時間又放工，返到屋企係可以Hea吓喎，因為老公揍咗仲爺去踢波，子元就去咗游水，我就休息吓先準備晚飯啲嘢，7點幾8點才煮都未遲，仲爺踢到7點9呢！返來食完飯清潔完K.O.埋佢地我先沖涼，仲爺明天還要返多一日預備日呢，老公又返夜，明天先見到呢！

25/8/19

25/8/19.    SUN.    RAIN

今日都有點虛度的感覺，朝早8點起身，子元要畫班，食完早餐上阿媽到幫佢整番廁所個架，老公整時又趕唔切去接子元，我就要揍埋仲爺過去接番佢，再去咗南方買文具，跟住就返咗屋企，老公就揍子元去比賽，我就同仲爺喺屋企，本來仲爺要踢波，但因為大雨取消了，咁就留喺屋企hea啦，我今日都唔想出街，大把嘢做！先係包好部份較殘的書，又要刷咗啲舊筆痕，跟住煮吓午餐咁，仲要將仲仲的校服褲加番橡筋，到四點幾先叫做閒少少，仲爺就放生佢冇叫佢做功課，任得佢自由發揮玩！等子元佢地踢完波回來接我地，就過咗青衣搞電話卡同食飯，跟住就上嫲嫲到幫佢都處理啲電話卡，然後快手回家，荃灣周圍都封路，深水涉又佔咁，同埋今日真係堅冇心情，完全唔知咩原因！

24/8/19

24/8/19.   SAT.    VERY HOT

今日最重要活動咪仲爺的第二次迎新日囉，要著校服要揹書包，真係大個仔啦！7點幾起身，子元今日要跟Konter去行山，不過都可一齊出門口，佢自己再過黃大仙，我就同仲爺去荔天，去到登記時見到Ms Mak，以為仲爺真係咁好運，點知收到資料時知道嗰啲老師完全唔識，今次真係頭都大，不過都係唯有煮埋嚟就食架啦，可以點啫！喺Hall聽咗兩個幾鐘，初頭冷氣唔夠真係焗死嚟，搞到個人都暈暈地呀陰公！11點幾去得課室都係聽老師講嘢，處理吓班務，Ms Mak喺到幫手就知呢個班主任太新了，隨緣啦！老師好似都認得我係陸太，好驚囉！完成哂啲嘢攞埋想入谷的家長電話，就落去接番仲仲，試撘校車主要為仲爺，等佢知道點放學，落左校車就上阿媽到，想換吓衫等等啫！差不多時間就去黃大仙接番子元，佢同啲隊友想去樂富食烏冬，咪同佢一齊去囉，但條友一同朋友仔一齊就忘記要照顧家人就唔啱囉！食完等老公嚟接番我地回家休息，我仲有一堆回條友搞，做到7點多才出去食晚飯，老公要踢波，所以喺長沙灣食小菜就回家，沖涼休息睇電視！

23/8/19

23/8/19.    FRI.    HOT

終於捱到星期五，今日除咗忙，其實都冇咩，已經算好好！朝早都係冇等到嫲嫲來到就出門口了！有點趕所以冇買早餐，只係食脆片，當刻夠飽但做咗一輪嘢又餓了，還要上德福攞雪糕，完全係令人肚餓的動作！午飯今日算好和諧，同二姐有講有笑，梗係啦，9月起佢斷哂左右手喎，冇埋我呢啲養女佢點死！下午努力出埋啲notice，做完差不多放工了，等得車返去都6點幾7點！嫲嫲煮緊飯，老公去咗泊過架車，子元游水未返，我咪執好仲爺間房囉！食完飯老公揍仲仲去小童合唱團，順手揍埋嫲嫲返靑衣。我就洗碗執屋，等仲爺佢地回來，睇佢地執埋明天啲家檔就沖涼，子元明天要自己去黃大仙滙合行山，應該唔太難的，我會完咗荔天活動再去接佢！

22/8/19

22/8/19.   THU.    HOT+

今朝都係嫲嫲嚟揍佢地，我又由得佢兩個自己喺屋企等！買埋早餐返去食完就開工啦，本應出通告，但又係IA，交嘢比佢查係最恐佈的，人人自危咁，都唔明點解要有個咁嘅部門出現！做到午飯出咗去同Joyce及Joey佢地食，請我食生日飯喎，我話想飲茶就去啟業飲平啲啦！期間都係吹吓水講吓壞話等等，時間過得好快，又要返去了！下午都係做做做，我真係好攰呀，同埋真係好怕同阿姐講嘢囉，成日搞到我心情唔好呀，講句嘢啫邊有咁多學問呀，已經好客氣咁問啦，但又覺得個內容係迫佢，唉。。。我真係唔識撈！終於放工，返到去屋企係冇人，因為老公揍咗仲爺去踢波，子元就游水，等佢游完返來整番熱公司個午飯，見係炒烏東幾啱食，咁又唔洗諗啦！食完我出去幫Loletta報名小童，搞掂返嚟老公佢地都返咗，仲食緊Burger添！沖埋涼摺埋衫趕埋佢地去瞓就可以休息了！

21/8/19

21/8/19.   WED.    HOT

今日過得麻麻地啦，不過公事嘅嘢，去到邊都係咁啦，所有阿姐都係short架嘛！朝早老公車我返工，但返到去就忙，早餐都未食得哂，真係好慘！然後都係做呀做，今日個個都負能量咁，二姐又係short架，成日推哂啲job比我地呢邊做，佢兩條𡃁請哂假梗係佢頂架啦，又係我地做，仲唔係痴嘅！午飯同咗Catherin佢地食，都係講上司壞話啦，係咁架啦！下午都係做嘢同講是非，放工返屋企，等子元游完水就去深水涉食飯，因為仲爺打爛咗姑姐個ipad面，要攞去黃金整，然後去出糧比阿嫲個工人就返屋企！

20/8/19

20/8/19.    TUE.    HOT

今日叫醒哂佢地我就出門口返工了，老公今日放假嘛，佢照顧啲仔，返到公司都係做吓嘢啦，咁都有吹吓水，都係嗰句啦，佢地嗰邊放假嘅嘢就變咗我地做，又冇得反抗好慘！午飯喺房食完飯我都出返嚟，個冷氣擺明壞咗佢地都唔覺熱，痴線架！返出嚟同大婆佢地吹吓水咁又夠鐘，下午都係做嘢囉，咁齊人唔通可以做自己嘢咩！放工過單車公園搵番啲仔，老公又揍咗佢地過嚟玩，嫲嫲都一齊，玩到6點幾就去九龍城食越南嘢，然後送嫲嫲返屋企，仲爺都喺嫲嫲到過嘢，佢就恨到啦！因為子元明天要覆診，老公唔想帶仲仲上去，所以放佢去過夜，佢就係咁打視像過嚟，都唔知好嬲定好笑！

19/8/19

19/8/19.   MON.    HOT

今日老公返早，佢起身又唔call嫲嫲，子元又要踢波喎，都係唯有獨留佢兩個等嫲嫲過來，子元才出門口去踢波，我就返工先啦！返到去都係食早餐做嘢啦，Ivy請咗假我要做埋報更，本來都冇咩，係阿姐叫我落去幫個同事整拍卡嗰張八達通咁咪去囉，點知落到去物管又話我地個額滿咗，要除一個名先可以加一個名，咁紳士仲大大個喺到都未last day，洗唔洗咁快做replace佢嗰個張證啫，之後PK仲要帶住個新人周圍介紹，我覺得很心酸，話哂同紳士一場朋友！午飯快食完同Joey媽媽去咗e-max行街，喺759買咗啲嘢咁啦！下午做哂兩個更表好攰呀，放工試吓入傑志石門個球場係咩時間，到時同阿媽交收仲爺時都仲可以，其實會遲15分鐘囉，睇吓阿媽肯唔肯幫我揍入去，唔係的話就咁九龍塘站交收都OK！入到去石門去商場行咗陣先去睇仲爺踢波，踢到7：45帶佢去沖埋涼就返美孚接哥哥，再過長沙灣食埋粥就回家沖涼休息！

18/8/19

18/8/19.   SUN.    RAIN

今日主力是一場民主運動，到維園集會！雖然早上我地都是如常在家，吃早餐做功課，但心情上已是在準備！一出門口就落大雨，更預備定雨褸比佢地，行起上嚟比較方便！跟住炮哥一家出車，直達大坑找地方泊車，從未去過呢個位置，先泊好車就去食午餐先，都要有氣有力先可以集會嘛！1點幾行到過維園，找到入口後炮哥與朋友會合，我們就喺場中間近出入口位等著，因為集會才有不反對通知書嘛，大家就集啦！好在佢地帶咗地墊等啲細路可以坐，仲爺好投入地留心台上講嘢，佢唔係矇架喎，會叫口號會接受訪問，真係有傳媒訪問咗佢地，其實我地又冇為意係邊間，後來先知係獨媒，佢地5個細路最後上咗電子傳媒的新聞上呢！等到3點多，一來天開始想落雨，二來知道差不多可以行，就馬上收拾家當，原來我地企個位係龍頭，所以一話行就有得行，另一重點係一行到出馬路位就突然落大雨，好在之前已估算到，所以即刻同啲細著雨褸開遮咁，我地只係行到去中央圖書館就左轉上番去攞車，但真係幾大雨，所以喺天橋底避咗陣先返去攞車，上車換過哂啲濕衫，就出發回家， 路面堂可以啦，返到去沖個涼又趕佢地去做埋啲功課，老公去咗瞓覺，我就得個做，約咗炮哥佢地9點先去日日刷，食到11點先回程，好攰！

17/8/19

17/8/19.    SAT.   RAIN*

今日瞓到9點幾先起身呢！跟住就梳洗出門口去食早餐，子元就去畫班，不過一出門口就勁大雨，玩嘢咩！又醒唔起老公今日返1點，所以揍唔切子元返屋企，咁我就去畫室門口等，揍到佢去巴士站上咗車我就同仲爺去撘地鐵過去海怡學音樂了，早咗半個鐘過到去，可以去麥記食埋午餐先去學嘢，我就係咁去買嘢，的起心肝買咗兩把遮，上AEON又喺門口賣鞋嗰間買咗對拖鞋，因為減到$99對咋喎，梗係要買！接番仲爺就撘巴士返去，子元又去游水了，咁就趕仲爺做練習，等子元游完水回來就食晚飯，簡單地見冰格有咩就整咗意粉，食完有好多節目睇，兩隻嘢睇到11點幾先肯瞓！

16/8/19

16/8/19.   FRI.    HOT

都係返工啦，不過終於捱到星期五啦！買早餐返到公司，做吓嘢咁，中午前二姐又點我地做嘢，佢真係唔夠膽叫IVY做架喎，不過其實都有，阿姐叫佢搞今日派cake啲嘢佢咪又係叫Ivy做，連隔離team都話佢地叫哂你地做咁佢做咩，佢咪點人囉！有時我都覺得其實阿姐未必係咁諗，係佢要做嘢架空阿姐，等啲人怕咗阿姐咩都經佢咁佢先有存在價值咁！午飯後又上咗去shopping，然後都係吹吓水咁，跟住2點幾就去德福攞cake，順手買埋woodstock個包比仲爺，佢今朝出門口都提我買！返到去都係叫人食呀影相吹水咁啦，跟住又係要做嘢，搞啲卡片嘢，最後都係等放工啦，但今日架巴士有啲塞，差不多7點先返到去，又要趕仲爺去做功課，又係趕食飯仲爺去合唱團，等佢時最好可以打機，不過撞到Gloria又打得唔專心！回來後快手叫佢地沖涼休息啦！

15/8/19

15/8/19.   THU.    HOT

今日都係如常咁返工啦，但出門口前就要預備好啲嘢，仲仲要去攞新passport嘛，跟住又要攞埋兩部手機比老公攞去放！返到公司其實都冇咩做，所以主力打機吹水啦，時間都過得幾快，午飯後又跟咗佢地上去，又買清潔用品！下午都有做吓嘢，時間都過得快，又要上德福同Ivy一齊訂明天派的餅，咁又玩咗大半個鐘呢，非常好！放工叫咗老公嚟接我，難得佢今係放假，我又買咗好多嘢呢，佢就帶仲仲嚟踩住單車等我呢！返屋企都係煮飯，子元游完水回來差不多開飯，之後都係慢慢吞吞咁搞掂沖涼再打暈佢地囉！

14/8/19

14/8/19.     WED.    HOT

都係返工的苦日子啦，究竟我幾時先可以唔洗做呢，要中好大條六合彩先得， 然後再移民啦，去邊都好！返到去先買早餐，食完就開工吹水過日子，其實都冇咩，但我個監督又係到話辭職，唉。。。若果真係要做埋佢啲嘢但出得一份糧，真係好難撈喎！午飯入去房食到咁上吓，Catheria叫咗我出嚟，原來同Joey媽媽佢地打機，咁又真係幾開心嘅！下午啲阿姐入咗去開會，細姐又出咗去，仲唔作反咩，去咗OSO嗰邊吹水，真係吹得好開心，跟住就做吓私務，print吓練習比仲爺，對住文盲加數學白痴，其實真係咩都死！放工快跑去巴士站，比我追到車啦，返到去仲爺又係未做功課，但嫲嫲話出去食飯，子元游完水自己過來香港地食，食完佢同大包就回家，我就返去勞氣教功課，唔早啲習慣，真係開咗學我怕我嘔血！

13/8/19

13/8/19.    TUE.    HOT

今日都係照樣自己返工啦，老公就揍仔！返到去先買早餐，食完咪開陣工hea吓打吓機做吓自己嘢，午飯本來個飯都幾差，但有人整咗餸回來加料，好好味呢！食完狂打機，下午都係啦，因為開咗好多個鐘free！咁都有做吓嘢嘅，放工都係撘巴士返去啦，仲爺又係唔合作淨係睇機，做練習又唔識咁，食完飯襯我做緊家務時又走咗上床睇機，比我叫落嚟做埋啲數學練習時又激到我顛咗！啲加減數又好似完全冇哂concept咁，激到我去咗沖涼冇理佢，之後阿哥教咗佢一陣，都係火架啦！摺埋衫趕埋佢地瞓終於可以自由呢！

12/8/19

12/8/19.   MON.    HOT

今朝要叫醒哂幾位我先出門口返工，shuuttle竟然等好耐先有車，好在冇遲到！返到去都係吹吓水做吓嘢，午飯幾位同事請我食晏，生日飯嘛，我選咗落去飲茶！下午邊做嘢邊打吓機，都幾好！臨放工睇吓facebook，見到原來Amanda將我unfrined咗我，連hatsapps都cancel埋！真係講到有啲想喊！放工快閃返屋企教仲仲做功課，食飯打掃啦！K.O.咗佢地我都想K.O.埋自己！

11/8/19

11/8/19.   SUN.    HOT

今朝老公先揍咗子元去畫班，我都唔知佢放工返咗嚟又出咗去，起身就梳洗出去食早餐，要諗吓去邊，見唱K都抵玩又夠近就去唱K了， 都真係好耐冇唱過，包埋個晏平均每人八十幾真係幾抵！唱到2點要走，因為約咗朱因佢地去火炭放四驅車，我就悶死同餓死，因為啲lift太恐佈，我要老公陪我先肯撘呢，去沙商買咗麥記食先好啲，6點左右走啦，去咗沙田先比仲爺喺交通安全成玩單車，然後7點就食晚飯，老公book咗間食意大利嘢，但實在太多比較，佢只係好一般！食完回程都算順𣈱，老金仲專登行出去美孚買蛋糕比我，因為我話今年生日未切蛋糕呢！所以回來沖完涼才唱生日歌切蛋糕，跟住就趕仲爺瞓覺！

10/8/19

10/8/19.    SAT.    HOT

今日係我生日，但冇咩特別生日活動，本來都諗過去海洋公園架，但一來子元朝早要踢波，二來仲爺下午又要學嘢，啲時間都夾唔到，加上老公又要返工，都係算數啦！朝早老公一早起身揍咗子元去練波，我就瞓到9點幾起身煮早餐同仲爺食，然後都係比佢玩吓，我就摺咗啲衫先，點知仲爺疴屎唔出，我又落去買乳酪佢食，但食完又唔係即刻有得去，又差不多要去學音樂，途中要去就麻煩，所以不如改下星期才上埋嗰一堂。子元又話踢波攰今日唔游水，到1點多阿媽又打嚟話又頭暈唔舒服，叫我過去買保礦力比佢，最終老公車我地過去，佢食住飯先，我就幫手開火煮埋啖粥比佢才落樓同老公會合，佢就食完返工先，我諗諗吓今晚都係唔開party住啦，於是通知阿妹同阿嫲，但覺得阿嫲喺電話聽得唔清楚，所以都係親身上一上去好啲，坐到3點多先走，本來諗住同佢兩個睇戲，但長沙灣兩間戲院一係就冇飛一係就太貴，最終都係放棄，一路行到去D2睇吓嘢再行返屋企算，叫咗Pizza今晚食，返去沖好涼就唔出街啦，做埋啲功課等食pizza，然後咪玩咁上吓睇反斗車玩囉，睇到11點幾先瞓！今日生日冇切過蛋糕冇做過任何慶祝活動，老公明天話會補番，睇吓佢有咩神秘嘢！

9/8/19

9/8/19.    FRI.    VERY HOT

今日子元有daddy揍去踢波，我又唔洗理啦，返到公司買個豐富早餐食完就開工，都係做吓公事做吓私事咁啦，午飯後勁打機，唔覺意開咗原來有6個鐘免費，但喺公司又唔打得咁多， 好蝕！下午時間都算過得快，可惜冇咩人吹水有啲悶啦！5點幾已經自我收工，準時彈閘上到巴士，返到去準備開飯，子元唔記得咗補英文，比佢激死！下星期一才可補番！然後等子元游完上回來食飯，食完就交比嫲嫲執埋手尾，我就揍仲爺去小童合唱團，我就自己睇機！回去後叫佢地沖完涼就請子元教仲仲做練習，我就抺埋個地才沖涼！

8/8/19

8/8/19.   THU.    HOT

今日下午要覆診，可以放半日假，真好！朝早叫醒哂佢地，子元要踢波嘛，今日踢九龍仔所以要老公揍！我就如常返工啦，然後都係做嘢囉，今日都冇咩打機，阿姐喺到行嚟行去，都係做嘢穩陣啲！午飯快食完就去覆診，本來叫老公揍埋仲仲嚟比我跟住佢就返工，但佢就叫子元睇住仲仲算！覆診都係如常啦，佢都係開藥比你咁解！返到樓下又去超市買嘢，都係買食物啫！回家後主力同仲爺做吓練習比佢玩吓，最驚訝係仲爺整咗生日卡心我，又等我一回家時唱生日歌等等，都係想同我慶祝生日，又真係幾sweet，子元去咗游水，差不多時間就煮晚飯食，然後都係沖涼休息啦！

7/8/19

7/8/19.   WED.    HOT

今日我有我返工，子元有子元去踢波，今日道路情況安全先比佢自己返！返到公司都係食碎早餐吹吓水啦，然後就要做吓嘢，但都係主力打機多，今日都好想罷吓工先呢！時間都算過得快，食午飯後全力打機，因為有個幾小時任打！但下午都係要整吓相架嘛，做到放工已經好攰，對眼真係好用力！放工即閃回家，邊有話休唔休息，見個地dirty又吸塵，亂又係到執，開飯食完又要洗碗抺地等等！沖完涼又要教仲爺書，盡吓人事咁啦，我都唔想佢考第尾！

6/8/19

6/8/19.   TUE.    HOT

今日子元唔洗踢波，老公又要返早，我又要返工，就等嫲嫲嚟睇住佢地，但我又唔記得早啲叫醒嫲嫲，所以我照出門口，佢地瞓住等！返到去都係食早餐做嘢啦，今日都算忙架，一路都係做吓嘢啦，午飯入房食完就上去買消毒用品，買完已經2點要開工！下午都係忙，冇停手！做到差不多放工，趕去撘巴士，今日勁迫，好在係啲靚仔大隻仔迫住咁就算啦！返到去換咗衫就落球場找回啲仔，去咗長沙灣食粉，然後過咗Aeon，明明係老公想去12蚊店買嘢，點知變咗我喺超市買，因為周三特價日提早咗今晚開始都有！買完返去沖涼休息，子元可以教埋仲爺做今日練習，我又可以做少樣！

5/8/19

5/8/19.     MON.    HOT

今日實在係太特別的一天，心情其實唔係咁好，好矛盾! 8月5日全城三罷，但有家累的我們，唯有身在曹營心在漢，個軀體都係要返去，冇特別早出門口，都係平日咁，好在老公今日真係本身放假，子元又唔洗踢波啦，佢地自己搞掂！落到街人勁少，可能大家真係三罷，西鐵好少人撘，但去到尖東都停咗車，不過等咗5分鐘都開，但我都係whatsapps定阿姐穩陣啲，去到紅磡轉shuttle，出奇地人少暢順，未夠9點返到去，但其實都係按章工作咁，做咗好少嘢，又要睇吓message吹吓水咁，到12點幾阿姐通知可以離開，我地食埋飯都走啦，老公帶咗啲仔去油麻地，咁地鐵又通咗我咪過去搵佢地囉，老公去買埋料整仲爺條梯就回程，都算走得快，因為旺角開始有人聚集，返到屋企都係休息吓先，7點幾出去食米線再去咗球場郁動吓，9點幾返去沖涼休息了！其實腦袋好攰，太多資訊！

4/8/19

4/8/19.   SUN.    HOT

今日都冇咩地方要去，朝早瞓到9點幾要起身了，因為子元要學畫班，所以過咗去長沙灣食早餐，然後返去同仲爺做功課，夠鐘老公就去接番子元回來，本來都諗住出去食，但見到電視做星爺啲戲，最終冇出去，老公2點幾就返工，我就煮午餐比佢地食，突然好有心機咁整咗個好似餐廳的烏冬呢！食完我都冇理佢地，睇住電視摺埋啲衫咁，點知阿媽打嚟話換番張電話卡一定要我出現，咁唯有去一轉啦，好在係青衣城啫，咪帶住佢兩個去囉，本來換張卡都冇咩，但佢話我份約就到期，提出續約啦，我都已經打去問老公，佢又話照續，本來仲想叫佢問吓EVA先，但佢又話照續，到搞完一大輪，我又喺青衣城hea咗一輪比佢地玩，老公先打嚟叫我voil咗張單，因為EVA那邊真係多好多著數，比佢激死，搞到我比人西面！最後買埋壽司返去食，到咁上吓就捉佢地沖涼瞓覺！明天返工，是個考驗，本來都好想連肉體都罷工，但我地呢啲咁有負擔的都係怕死，唯有身在曹營心在漢！

3/8/19

3/8/19.   SAT.   RAIN**

今日係各有各揍仔學習日咁！朝早子元要去訓練，咁9點已經出咗門口，我就hea到九點幾先起身，煮早餐仲爺又話佢食咗零食，唔洗食麵，咁我就唔煮比佢啦！開咗啲工作紙比佢做我就食早餐，等佢做番呢兩日的練習就可以出去踩單車，順手買奶同買咖啡，跟住踩番返去當完成，因為雨已經越來越大！返上樓收拾吓就出門口學音樂，順手問埋唔再上呢個班，有咩樂器班可以上，但時間上似乎真係夾唔到，可能都要轉！撘巴士返去時九龍開始封路，結果紅隧後要行公主道再去到深水涉才可落車，變相我就快咗，子元已經去咗游水，我地返上樓休息吓，就跟老公去踢波，仲爺可以踩吓單車，我就狂打機，踩完返去屋企接番子元，就要去巴士站等阿媽喺機場撘巴士回來， 佢話太多嘢攞唔掂要我地接應佢，等到差不多9點半才接到佢，快手返去長沙灣食晚飯才送埋佢回家，我地都返去沖涼休息！晚上全部新聞都係九龍半島各區都有佔路，真係好難解決！

2/8/19

2/8/19.   FRI.    WIND

今日應該係happy friday嘛，但就一般happy啦，都係啲仆街經理煩，問啲嘢都答唔到，正廢人！今朝天氣不穩子元繼續冇得踢波，我就快手出門口，返去食個早餐開始做嘢，月頭梗係多嘢做啦， 又要處理新的報更做法等等，總之一朝都未停過啦！午飯同咗Catherina佢地入房食，吹水吹得好開心呢！下午都係做啦，放工返去揍仔，嫲嫲煮好飯食咗就揍仲仲去合唱團，再去萬寧買嘢，儳唱團完有程生車埋我地返去，咁就快手抺埋個地才沖涼休息！

1/8/19

1/8/19.    THU.    3號風球球

以為今朝會落哂風球，點知冇喎，子元又冇得去玩小童活動啦，佢真係好邪！咁我就照返工啦，都係如常咁返工，但今日真係好塞車，連地鐵都塞，真係好刺激58分先返到！食埋早餐就開吓工啦，朝早都係有嘢做吓，所以轉個頭就已經放飯，入房同埋有阿LA食係開心好多，起碼會吹水吹其他嘢，唔會講公事囉！下午忙到PK，月頭係咁架啦，幾快放工！老公話去睇戲睇toy story，咁就直接過長沙灣食完飯先，上阿媽到淋埋花先過去，試南昌站個新商場間GH，但泊車嗰部份真金係好失敗，等到咁上吓我地過去先，老公趕得切開場前入到來算係咁！toy story點會唔好睇呢，仲爺睇第二次成日喺到劇透呢！睇完回家仲爺又瞓咗但我唔會抱，返到去快啲沖好涼瞓啦！