30/6/20

30/6/20.    TUE.    HOT

今日請咗一日假，本來只係想放吓假，連埋7.1放多日咁解，估唔到呢日假放得咁合適！一來嫲嫲仲未出院冇人揍仔，二來程生朝早跌斷手，我地要幫手做跑腿，又幫佢渣番架車離開醫院，又攞日用品等佢住院用！講番朝早， 揍咗佢地返學就試咗一號西九間茶餐廳的早餐，都不過不失啦！之後老公車我返去佢就去做運動，我返去都係邊睇番檢法男女大結局，邊摺哂啲衫， 跟住就收到程生電話，佢本來想找老公幫佢喺明愛渣番架車出來，好在陸生做緊運動又咁啱睇到message，先可以救到佢咋！攞埋日用品比佢，我地就去接放學，買埋飯返去食完老公就返工，子元到咁上吓就出去踢波，我就捉仲爺做咗功課先，淨番作文明天做！6點幾七點就煮晚餐， 之後都係如常清潔做運動沖涼休息！

29/6/20

29/6/20.   MON.    HOT

返一日又放兩日啦，所以今日真係冇咩mood，照樣揍仔返學老公就一齊食早餐送我返工，做完基本嘢就開始打機聽收音機，等開飯囉！午飯時只睇得一集檢法男女咋，要找時間睇埋個大結局！下午又入房做女工，吹水聽住收音機咁又一個下午，放工閃人買餸回家接更，老公揍咗子元去踢波，阿媽來揍住仲仲，等我回來佢就走啦！我就快手煮飯啦，佢地都返緊！8點多開到飯，但之後收拾清潔都慢，又要睇埋仲仲啲功課，做埋運動又掛住睇電視，11點幾先沖涼呢！

28/6/20

28/6/20.   SUN.    VERY HOT*

今朝瞓到10點幾先起身啦，兩個細冇好嘢， 仲爺梗係搞嘢食搞嘢飲，又玩水咁啦，子元就喺床打機唔知打咗幾耐， 終於出到去食早午餐，趕得切叫早餐， 食完去咗荃灣廣場行陣，點知又中咗牛肉乾，不過之後發現今日荃灣區大抄，是禍躲不過！回家後老公就執嘢出去做運動，我就喺屋企嘔血，因為諗住幫仲爺溫中文，嚟緊進評嘛！到默書時就死啦，之前我冇跟得咁緊嗰課就唔識囉！阿媽又過咗嚟攞湯比我地飲，咁老公又返到，咪車佢返過去，我地先去mega box囉，要去ikea買嘢，不過先去食咗嘢先，然後先行！最後去埋反斗城玩咗陣就走，因為嫲嫲塊面又痛，老公叫咗大包call白車去PMH，成日叫佢去睇醫生又唔肯，真係唔明！回家做運動沖涼，仲爺有心拖唔肯默埋啲字，但我要比佢知唔可以，點都要佢溫埋先比瞓！老公去醫院睇完嫲嫲就買麥記回來，但條友執漏哂嘢，老公話明天回來鬧爆佢再攞番啲嘢食返嚟！

27/6/20

27/6/20.   SAT.    HOT

今日都係一個悠閑的星期六，老公放工回來揍佢地去學嘢，再回來接我去食早餐，等佢地學完哂嘢，就去荃灣眼鏡鋪，等仲仲驗眼，因為佢話有字睇唔到，所以都係驗吓穩陣，好在都冇事，但老細就叫我地開學前嚟驗多次穩陣！回家後我就hea足一個下午，老公夠鐘就揍仲仲去學音樂！我就同笨元打吓機咁啦！子元6-8學埋畫班就出去食飯，試吓間新嘢食扒，不過不失啦，以咁平嚟講算唔錯，食完回家，做運動沖涼休息啦！

26/6/20

26/6/20     FRI     VERY HOT

返一日又放假啦，所以今日真係好holiday mood! 朝早都遲咗少少起身，所以又好趕咁啦！揍哂佢地返學老公就車我返工， 一齊食埋早餐先返去，再飲一大杯咖啡先上到電啦！聽住收音機做住嘢咁啦，時間都算過得快，午飯梗係第一時間睇住劇嚟食啦，睇完又開工啦！下午梗係去做份正嘢，可以自由自在喺房仔做口罩女工，check完5點左右就出番去準備放工， 返到去先係好戲開始，仲爺落去踩完單車，返來沖涼時就玩廁紙，塞咗個沖涼位，第一轉用咗通渠佬都唔掂，啲水又喺廚房個渠位倒番入嚟，我又失哂方寸，老公又唔聽電話，唯有先去買多兩支通渠水，再將餘下的通渠水倒哂落去試一試先！好在我記得至老公之前嗰次係用熱水，最終都算成功，通得番！仲爺就比我趕咗去做哂啲功課，食完飯再做！算係合作搞掂，9點幾老公覆番電話，原來佢去咗收唔到電話的地方做嘢，所以先聽唔到，咁知道佢冇嘢我就安心沖涼休息啦！

25/6/20

25/6/20.   THU.    VERY HOT

今朝本來都冇咩，但啲細路又plan去唔知程家定溫家玩，加上仲爺原來都冇做過功課，我就開始火啦，若做好咗，食完早餐就可以一齊過去程家玩啦，洗鬼要又返去再做過咩！加上佢玩哂嘢咁咪迫到我起火囉，開行Toubo中佢先掂！11點幾出門口去食早午餐，然後行咗新都會，子元同老公又要買褲等等，經過見到床單好平，但係都要五百幾蚊，不過老公話係千二針，會好舒戈服，都要買架啦， 之前嗰套用咗十幾年啦！ 買哂嘢就回程，我返去同仲爺做功課，子元就直接去程家，老公就返工！等仲爺做好哂嘢就過程家，我同仲爺係行過去囉，真係夠哂熱，但行同撘地鐵其實差不多遠！去到啲細咪玩囉，我地大人就吹水，吹到6點幾7點溫家嚟埋就出去咗買晚餐，食完再吹水再玩到9點幾10點回家，今日都夠皮啦，明天還要返工返學呢！

24/6/20

24/6/20.    WED.    HOT

今日終於有車返工返學， 大家都舒服好多呀！不過老公懶瞓搞到遲咗少少啦，好在都趕得切！跟住就同老公去工商食早餐，跟住就返去開工囉， 今日算係冇咩做，所以先做咗啲正經嘢先， 就係幫仲爺找找練習同卷， 話哂嚟緊都要進評， 點都要盡吓力！午飯後睇劇啦，我估我都會繼續咁自閉落去！下午又入去做口罩工廠， 放工行去啟德站，試吓個新站啦， 因為子元喺摩士踢緊波嘛，咁就去樂富會合，然後去長沙灣， 接埋阿嫲去阿媽到食飯，一上到去個冷氣好似冇開咁，因為開錯咗囉，真係服咗佢！食完餐豐富晚餐啦，老公送哂我地返去就出去踢波，搞掂仲爺沖涼， 我就打咗一晚機， 明天放假嘛， 梗係放縱吓！

23/6/20

23/6/20     TUE     HOT

朝早要自己揍佢地返學再返工, 對夏天嚟講真係好吃力! 返到公司都濕哂身, 下次可能真係要帶衫換! 食完早餐就開始做嘢, 今日要出通告係可以做足一日, 都係好事嚟, 唔怕悶死, 午飯有得加餸, 食飽飽就睇劇, 自閉吓幾自在! 下午又開始做嘢, 差不多都做到5點多, 今日唔洗check口罩, 都係好事, 做得多都悶要休息吓! 放工老公嚟接我, 然後一齊返屋企, 順手送埋阿媽返屋企先去食飯, 因為仲爺話想食大家樂嘛, 咁就去食啦! 回家後睇埋仲爺功課等等, 趕咗佢去瞓先做運動沖涼休息, 返埋明天又放一日假先, 都好呀!

22/6//20

22/6/20     MON     HOT

今日要自己揍兩位少爺返學, 真係幾攰吓! 都係6點9起身, 唔洗一個鐘返到去啦, 跟住我又要行去南昌站啦, 返到去咪食早餐吹水做吓嘢囉, 午飯都係邊食邊睇劇啦, 專登留番呢集檢法男女今日睇, 下午入房做咗兩個鐘口罩女工就出番嚟, 阿姐放假冇理由唔自由吓架嘛! 老公今日OT到6點, 順路過來接埋我, 我去啟業買咗早餐同餸先, 返去同阿媽交更, 老公車埋佢返去再去洗車, 我就返上樓煮飯睇功課, 做咗一晚, 真係做到12點幾呢, 好命苦呀!

21/6/20

21/6/20.    SUN.    HOT

今日係父親節， 但好似冇咩做過關事嘢，老公返早嘛， 子元又去踢波喎， 隻傻仔又遲出門口又唔記得帶八通， 真係擔心死人！見佢順利過到去， 我都hea完起身， 食早餐執屋等等，都算過得充實！老公放工回來，諗唔到去邊都係去咗新世紀行咋， 子元要買衫買褲， 又唔啱著啦！買完就找食，但涮涮鍋又貴喎，最終去咗南昌站vwalk食海南雞，5百蚊咁真係好食喎，好過食牛牛！回家返去做咗運動先沖涼， 再趕埋仲仲去瞓覺呢，明天又要返學啦！

20/6/20

20/6/20     SAT     HOT

今朝子元自己去補英文, 所以我都冇特別早起身叫佢, 只係醒咗順手去廁所時, 見到佢差不多出門口都冇問題! 同仲爺喺床hea到9點幾先起身, 因為琴晚做哂功課, 所以今朝我決定hea過就算, 不過都叫仲仲換咗床單, 摺咗啲衫, 打咗輪機, 夠鐘就出門口揍仲爺去學音樂, 又係我自由的1小時, 梗係睇劇啦, 回程喺巴士都唔係好瞓到! 6-8點子元又要畫班, 老公揍佢過去, 我地就喺屋企等到差不多時間, 喺畫室樓下食, 因為兩位陸生又要去踢波! 咁我同仲爺咪返屋企, 沖涼休息嘆吓囉!

19/6/20

19/6/20     FRI     HOT

今日又比老公引咗去工商食早餐, 真係可惡! 食完返上去真係得個hea字, 做好更表其實已經冇咩做, 都唔知係我快定啲嘢真係少, 打機都打到有啲悶, 好在阿姐今日放假, 我就更加放肆咁聽吓早霸王啦! 午飯時直情用電腦睇檢法男女, 好睇好多! 下午又係入去整口罩囉, 可以明正言順咁聽收音機都係好事! 放工快腳返去, 先同仲爺做哂功課先, 跟住就開飯啦, 今晚提早做端午節囉, 要等子元踢埋波先返來開飯呢! 終於都可以放吓假啦, 下星期又放番一日紅日, 好過冇啦!

18/6/20

18/6/20.   THU.    HOT

今日老公放假，話一齊食早餐， 咁揍咗佢地返學咪去公司樓下食早餐囉，返到上去就開工， 朝早冇咩做，所以都係打吓機咁！捱到午飯就可以睇劇，下午又入去做女工， 得一個阿姐都比我照做， 梗係冇所謂啦， 反正可以入去睇劇聽收音機， 閂埋門就自由自在！放工撘巴士入青衣，又係瞓到飽的一程！返到去等開飯，開之前飲飽湯就唔洗食飽啦！返到屋企做咗運動先，沖埋涼再睇埋功課捉埋仲爺瞓覺，仲要摺衫等等做好家務先可以打機呢！

17/6/20

17/6/20.    WED.    HOT RAIN

今日都係一個好平時的返工日子，朝早又係6:45要起身啦，執齊哂佢地出門口，又係8點4已經返到公司，邊睇劇邊食埋個早餐就開吓工啦，但都係打機打發時間居多！午飯時間梗係睇檢法男女啦，實在好睇到不得了，下午又做工廠女工，聽住收音機咁真係易過！放工買埋土早餐撘巴士返去，同仲爺踢吓功課咁又開飯啦，今晚老公整餐腸蛋飯，真係好食呢！洗碗打掃做埋運動就可以沖涼休息！

16/6/20

16/6/20     TUE.    HOT

今日都係如常咁返工返學，朝早老公放工過嚟車佢哋兩個返學，再送我去地鐵站。返到公司實在太早只係8:20，所以把握時間煲新劇，九點就點開工做吓嘢，打下機吹吓水，仲要做埋廚房切功，午飯時都係煲劇，下午入房繼續做口罩工廠女工，做到放工前出嚟執埋啲手尾，又可以彈閘。去買埋麵包搭42C返青衣，瞓咗餐飽，返到嫲嫲度又開飯啦。九點多出發返屋企，老公就直接返工，哋就沖涼我就做運動，講晒兩個去瞓我又要摺衫，好夜先有時間打機。

15/6/20

15/6/20.    MON.    HOT

終於兩隻豬仔都返晒學啦，今日要6點9就起身，老公放工返嚟就車佢哋返學，再送我去地鐵站，所以我超早返到公司，佢就返屋企摺埋個洗衣機，仲有等佢安裝埋。返去食早餐開始做嘢都未夠九點，真係有啲蝕。Hea左一朝等開飯，開咗套新劇集睇，下午就做工廠女工，負責QC啲口罩，真係做足幾個鐘，都好啲時間快啲過，話咁快又放工。去啟業買埋早餐比佢哋，就搭巴士返屋企，又要好迫好迫咁撘。返到去等老公開飯，就先睇咗仲仲啲功課，然後食完返嚟清潔沖涼，趕埋仲爺去瞓覺。

14/6/20

14/6/20.    SUN.    HOT

小學雞明天要返學啦，今日好好玩埋佢啦，朝早瞓到10點幾十一點先起身，捉佢哋執好晒返學啲嘢先至出去食早餐，順手出埋街。去荃灣食咗個豐富早午餐，再去Aeon攞埋Snoopy床單，跟住就去K11影snoopy，啲snoopy好得意呀！影完相順手行吓個商場，真係未嚟過，不過個場都係買高級野多，所以都係得個行字。最後喺附近食咗華嫂冰室，跟住就去MegaBox再行下，因為唔想咁早返屋企。喺IKEA買咗都幾多嘢，因為都算平啦，老公要換過枕頭，我見啲毛巾好抵又買咗好多。晚飯去咗元州邨食便當，食完就返屋企收拾，老公今晚返夜，佢打機打到咁上下都出門口啦。

13/6/20

13/6/20     SAT     RAIN

星期六都係比較忙碌! 早上兩個9點就有嘢學, 子元補習仲仲畫班, 咁我同老公就可以自己去食個早餐, 終於慢慢開始甩身啦, 過多5年啦, 兩隻都唔多洗我理, 我都要諗吓自己有咩興趣先得! 接埋子元仲仲, 就要去買洗衣機, 點知豐澤12點先開, 咁唯有返屋企收拾好仲仲音樂啲嘢, 就去青衣城買, 笨元自己喺屋企, 佢又enjoy, 最緊要放錢比佢買飯食就得啦! 好快手咁就買咗個洗衣機, 今次試吓大眼仔, 又唔貴喎3千幾咋, 希望真係好用啦! 計番條數我地啲洗衣機, 部部都用到8年以上, 算係咁! 老公車我地去佐敦轉地鐵過海, 佢就返工啦, 仲爺過去食得切當當先去學嘢, 我就去食薩利亞啦, 邊睇Error自救TV邊食嘢, 夠鐘就去接番仲爺, 回程梗係撘171啦, 瞓得都幾舒服! 返到去hea吓就開始煮晚餐, 都係簡單地食牛肉烏冬, 清潔完可以休息啦!

12/6/20

12/6/20。   FRI.    HOT

今朝如常都係差不多八點先出門口返工，下個禮拜主日都要返學就要一早出去啦。買埋早餐返到去食完，又開始做自己嘢打吓機！時間都過得幾慢下，都冇飯食就食自費飯，又睇Error咁真係好好笑。下午都係冇咩做收工狀態，今日約咗啲舊同事食晚飯，地點非常就腳，一落shuttle就係啦，我先等住位，都等咗大半個鐘先有位，不過吹水等都好快，可以先上網睇咗有咩好食先帶嗰啲，都係一路食一路吹水講吓近況，坐到八點多，陪梁小姐接埋嘟妹影吓相咁都散啦。返美孚同老公接力，去小童搞埋個報名，老公佢地就去買埋糖水再回來接我。回家沖涼休息睇電視劇。

11/6/20

11/6/20。   THU.    VERY HOT

今日雖然放假一天，但係都七點起咗身，因為子元要返學嗎，我都唔放心，送佢出門口穩陣啲。之後訓唔番，喺房打機打到九點多先起身，整早餐同仲爺一齊食，10點幾開始捉佢入房給功課，諗住今日做晒佢就算，其實都唔算太多，但都仲爺嚟講真係可以做足幾個鐘。做到一點多，真係要煮飯啊就放生佢先，蒸翻熱啲餸煮埋麵就食得，子元返嚟沖好涼就自己搞掂，我兩點到出咗去複診，都算光速搞掂，一個鐘來回睇埋攞埋藥，真係好快㗎啦。返到屋企繼續同仲爺做功課，老公放工返嚟就接子元去踢波，我同仲仲做埋功課之後就打機。老公踢完波返嚟接我哋入嫲嫲度食飯，食完咪返屋企囉，明天又要返工返學。係得陸生放假，所以佢夜晚又出咗去做運動都唔怕夜。

10/6/20

10/6/20     WED     HOT

返埋今日又放一日假啦, 係要調劑吓先得! 早上送咗子元出門口返學就梳洗等阿媽來接更, 仲爺喺阿媽嚟到之後就醒咗, 我都出門口了, 買埋早餐返去食, 又係時候做埋啲相片報告, 然後都係hea, 所以啲時間過得好慢, 好在之後有人嚟裝新電腦, 咁我都可以明正言順唔做嘢住, 午飯後睇番viu, Error有新節目好好笑! 下午終於更新完部機, 又要適應吓, 做吓嘢又打吓機, 上吓淘寶咁, 又係時候放工, 老公過咗嚟接我, 因為佢揍子元去踢波, 車番我同仲爺回家, 佢又去番球場, 叫我地唔洗等佢地食飯, 梗係啦, 踢到唔知時間咁, 9點幾都未返, 我梗係黑面啦, 子元明天要返學架嘛! 一到晚上我就覺得好攰咁, 咩都唔想做, 我都唔知全面回復正常後我頂唔頂得住!

9/6/20

9/6/20。   TUE.    HOT+

今日開始正式返宏天開工，提早咗出門口，都唔等嫲嫲來到我就出門口，反正仲爺未起身！咁就買埋早餐返去，要習慣番呢邊嘅生活，都要啲時間！食完早餐仲要全部人探熱，咁搞一搞又半個鐘！闕一始做吓嘢咁，其實時間過得幾快！午飯被邀請入房食，咁就一齊入吹吓水囉！下午本來諗住專心做埋啲相片報告，但因為小六谷嗰邊出事，結果來來回回人咁好多message，畢業禮只可一個家長出席仲要喺課室睇視像，你話啲家長點會放過學校！放工快腳趕車返去，但心情唔多好，人又熱屋又亂，大包又嘈仲爺又嘈！所佢地未走之前我都仲係好燥底，清潔完沖好涼再攤喺到抖吓先叫做好啲！

8/6/20

8/6820     MON.    RAIN

子元今日開始要返學啦，見佢攞住大袋細袋又落住雨咁真係好辛苦，好在佢都有返咁大隻如果唔係都唔知點拎啲嘢返學。今日仲要搬返宏天啦，不過朝早都係返咗嚟等準備搬野先，拍左卡就去買早餐食，食完就邊打機邊聽收音機，享受埋呢少少自由嘅時光， 10點幾十一點要起行，一齊搭的士返過去，再等啲行裝到齊分配好，執返好張枱又差不多放飯。本來都諗住食孤獨飯，睇吓劇就算，但之前返我面嘅人竟然走來話一齊食飯，基於我係一個唔記仇嘅人，咁咪一齊食囉，多個朋友好過多個敵人，邊吹邊食咁好快又開工啦。下午啲時間都過得好快，執下相咁又要派蛋糕做吓妹仔，轉個頭又放工啦。見到龍翔道今日放工時塞車，都係搭地鐵穩陣啲，不過行咁遠又近啲又戴住口罩真係幾辛苦。返到屋企見到間屋亂糟糟，真係火都嚟埋。梳洗完捉仲爺做埋啲功課，又係時候開放日。食飽都係清潔等等工作啦，仲要跟埋仲爺啲功課，好像10點幾之前都已經沖好涼可以休息吓。

7/6/20

7/6/20     SUN     RAIN

今朝落大雨落咗成朝，好在唔係明天，應該唔會啦掛！本來9點多醒咗， 但最終趕番仲爺出去後我又再瞓番到11點多先梳洗，結果又要找地方食早餐，去德貞嗰邊間茶餐廳食， 但應該唔會再去啦，啲嘢又變壞咗咁，雖然換過但都唔好啦！回家後對好功課溫好書已經黃昏啦，出去荃灣aeon問埋snoopy張床單幾時先有貨，原來要等到7月中，可惡！之後周圍行咗個圈，但啲餐廳太多人， 都係去番泊車嗰邊食茶記好，又平啲！回家後做埋運動就沖涼，今日啲時間好似過得好快！

6/6/20

6/6/20     SAT     RAIN

慢慢開始進入番忙碌的星期六啦，早上老公返左工，所以子元補習仲仲畫班都係我負責，好在子元可以自己搞掂，咁我就主力揍咗仲仲過去畫班，食完個早餐，本來想行吓超市等等，但連萬寧都未開，咁又唔想亂洗錢，最終上咗阿媽到hea, 夠鐘接番仲爺就返屋企，同佢做埋功課，又差不多時間過去音樂，因為改早咗嘛，過去食埋嘢上堂差不多，我就去食我午餐行咗陣又去揍番佢撘巴士回家，返得去都五點幾，佢喺車瞓咗好耐呀，勁！晚上約咗letty同程家上來party，仲爺就開咗場演唱會咁，又打鼓又結他咁，佢應該好開心！食咗個口水雞，炮哥好似頂唔住咁，最後佢都提早咗返屋企，啲細路又係玩到11點先走，我地仲要收拾清潔。老公就車程家返去，順手出去做運動先返來喎！

5/6/20

5/6/20     FRI     VERY HOT

今日係最後一日正式返利登啦, 但都係食大家樂做早餐咋, 因為都唔熟路邊度仲有嘢啱食! 返到去做好嘢就打機啦, 今日都冇咩心機做嘢, 中午出咗去食日本嘢, 估唔到12點半出門口都勁多人囉, 等到1點有多先有位, 不過都抵食, 五十幾蚊咋喎! 食完幫老公去駱駝漆嗰邊攞貨, 訂咗個咩鬼口水雞醬喎, 搞到我又排隊撘lift又等咁好耐! 下午返去做咗陣嘢就開始執嘢pack箱! 夠鐘放工就可以閃, 去長沙灣同老公會合食粥, 食完送嫲嫲返屋企先, 跟住去接番子元放畫班, 老公又渣錯路, 搞到遲咗返來睇唔切降魔的大結局個開頭呢, 不過個結局好似都一般咁! 之後做埋運動先沖涼睇電視!

4/6/20

4/6/20.   THU.    HOT

都係咁返工，都係咁買早餐返去食囉，雖然悶但自由自在嘛，做好嘢就打咗半日機，下星期最慘係冇得聽收音機，午餐買咗車仔麵加吓料，但食過南山邨的車仔麵，真係找唔到一間好食過佢！下午都係打機聽住do姐過日神啦，放工又瞓住咁撘巴士返青衣食飯，因為老公喺屋企放完曱甴蛋，所以要睇埋降魔的先返去，又要清理完一大輪只係想快啲沖涼，又冇做運動，明天記得做番！

3/6/20

3/6/20.    WED.    HOT

今日係輕鬆休息嘅一日，因為又得返我一個喺寫字樓， 今日真係要放縱吓，先係食個豐富早餐，報好更就開始打機睇劇，食飽飯就出咗去行吓，今日行哂全個apm，過哂鐘先返去，仲買咗杯老虎珍珠奶茶，係有啲貴但一次半次算啦，下星期要返過去啦！下午都係hea過囉，等收工！撘巴士返去又有飯食啦，老公今晚煎牛扒，仲有千層麵，好好食呀！清潔完掛住打機，好在都記得要做番轉運動先沖涼！

2/6/20

2/6/20.    TUE.    HOT

今日都係有做嘢又自由的一天！朝早買完早餐見勢色唔䒧，都係返咗上樓拍卡先，唔係就真係遲到啦！報完更做埋job cert就打機了，午飯時睇埋套大結局，但係個大結局真係唔係cctvb嗰種，所以都要習慣吓！下午做好嘢就睇咗兩套，仲去咗食tea!準時收工入青衣食晚 飯，老公叫我諗食咩，我真係諗唔到囉，最後等佢地嚟埋先決定食Mr Steak，又食到好飽囉！回家後都係沖涼休息啦！小一家長谷開始問功課啦，有人真係可以幾個月唔做，都唔明佢地諗咩！

1/6/20

1/6/20.    MON.    HOT

今朝買早餐時，杯咖啡竟然附送一隻曱甴全屍，好彩夠近可以去換過杯。食完野就開工做咗一陣嘢。然後開始又冇嘢做啦，咁就聽住收音機打咗陣計，又係時候準備開飯睇劇。飯後就當兩位少爺寫返今個星期手冊，下星期笨元終於復課，真係要檢查清楚有咩功課未做。放工前個幾鐘，終於開始有啲正經野做，做到放工就即閃彈閘啦，搭到巴士返去，又已經開飯啦。飯後清潔完睇電視，都有做返一Set運動先沖涼，老公就出咗去gym room做運動。