31/8/22. WED. WARM
今日都係要返去上training，但其實教嘅嘢都唔關我哋個部門事，但係又要聽喎真係好晒時間！今朝早全部人一齊出動，因為佢哋兩個都要踢波，所以老公車完我返學就車佢哋去踢波！返去聽完個幾鐘嘢終於可以返大房做吓嘢，其實都係有啲嘢要去影印，不過我同事叫我一齊去咁咪一齊囉，不過四個人去做影印其實都真係幾浪費，不過呢度做嘢就係咁！返嚟之後做埋個quiz就去食飯，我都係食杯麵咋，靜靜地喺Staff Room淥完個杯麵就可以食，夠鐘返返去其實都係冇嘢做，於是就print番晒學生嗰啲時間表出嚟咁嚟緊開學就可以用啦！最後一個鐘返去禮堂，聽每一個present返佢哋今個學年與教學目標咁上下，咪又係唔關我哋事，所以過咗三點三我見佢哋仲未有平嘅趨勢，就同另一個同事正準備走啦，準時收工嗎，因為子元趕住去球場！返到屋企我好肚餓係咁要搵嘢食，之後老公車我去湊埋德仔，咁佢就去接返子元！今日得得都係病病哋，成日又話要抱又唔知佢喊定笑傻吓傻吓咁！等佢走咗我就可以煮飯啦，聽日開始試吓帶飯嘅生活，反正學校啲嘢食都唔好食，都係慳錢食屋企飯算！
30/8/22 TUE. COOL
今日終於要返咁啦，七點幾起身梳洗叫醒埋老公，因為佢要車我返工，呢三日子元有波踢，所以佢請咗假湊仔，夾啱我又要返工佢就可以睇仔喇！揍咗我返工，佢就返去照顧大寶細寶，我出門口時細佬仲喊，真係好搞笑！返到學校其實仲有15分鐘先係我正式開工時間，梗係唔蝕俾佢啦，去咗個廁所先，點知去到AL1唔見有人喎，估計佢哋去哂hall，所以又要行過去！全日都係聽嘢啦，做吓prepare，返去溫做吓嘢好就好在今日午餐供應，可以食飽繼續做！我終於知道點解我一路都用唔到個printer，係因為我張卡根本未啟動，根本冇人教過我，總之平平安安又放工，老公嚟接我，返到屋企休息一陣又要出去湊德，今日條友仔好似唔多精神，唔係又病呀嘛！等佢爸爸來接走佢就叫老公起身煮晚飯，食完快手洗完碗，沖涼休息啦，聽日繼續開工！
28/8/22 SUN. WARM
今朝瞓到九點幾先起身，又要快啲煮早餐又要做清潔，因為今日Stella會過嚟我哋屋企食飯，所以要做好清潔先！食完早餐都11點，老公又要整炸大腸又要湊哥哥去踢波，所以大家都好忙碌！細佬就主力期待Stella幾時嚟，因為有兩個小朋友同佢玩！佢哋12點就過到嚟，先係吹左一輪水，我就叫公公快啲去煮飯，如果唔係就唔使食！點幾兩點終於開到飯，一路食繼續一路傾，老公快手食完就去球場接番子元，返到嚟都係繼續傾吓計囉，大人聚會都係吹水多㗎啦，五點幾佢哋先至準備走，喺門口又要再傾一輪，啲小朋友好快都玩熟咗，佢哋住咁近等佢哋執好屋再去佢哋嗰度玩啦！之後都係睇吓休息吓七點幾先至煮飯，因為開咗套生化危機可以係咁睇！聽日又要長途跋涉上伯明翰，今次到我好期待，因為可以見到Ivy啦！
27/8/22 SAT. WARM
仲仲今朝五點幾係咁喺度咳，佢醒咗我，搞到我瞓唔到，唯有處理吓佢，同埋叫佢着果瞓唔到就落去廳度，如果唔係我一定瞓唔瞓！最終我都瞓到九點幾先至醒，不過就有啲趕呀！因為今日又要去中超又要去Costco入貨，所以快食完個早餐， 10點幾就出發，先去咗中超入貨，然後再去Costco，但行Costcfo嗰個時間冇好好控制，所以子元要去練波就遲咗喇，都係遲咗15分鐘啫冇辦法！揍完佢就返屋企，老公放低我哋又要過返去準備接佢，我就喺屋企不停分割肉類，真係分極都分唔完，老公返嚟幫手分割吓，因為之後我想去Broadway買嘢，嚟緊新學期我都諗住開始帶飯，可以慳啲錢，反正學校啲嘢食都唔係咁好食！風景輪佢哋就睇多，我就預備星期一去IVE度包餃子要嘅韭菜餡，之後老公就煮飯，不過煮8點幾先有行食，我又開咗套好舊嘅電影睇，而家睇返真係好諷刺，金雞2當年已經諷刺時弊，但今時今日睇又係諷刺返而家嘅香港，真係好悲哀！
26/8/22 FRI COOL
話咁快暑假最後一個星期五都過埋, 其實又唔係話特別唔捨得, 返工就有返工的模式咁解, 充實好多! 今朝7點多都醒咗, 又係睇吓機咁, 8點先起身梳洗整早餐, 食完出去買咗雞肶先, 今晚子元要踢波, 所以要食簡單啲! 買完返嚟清潔咗個廁所同廚房先, 跟住又同佢地玩switch又玩到煮午餐啦, 今日食廚餘加蒸肉餅拼米線, 因為有口水雞個汁, 加落個米線到冇得頂! 下午都係hea, 又開始唔想郁, 等到夠鐘先去接德仔, 今日佢返到嚟又好嗲咁痴住唔放, 但都唔可以成日抱住囉, 攰架嘛仲要整飯食呢! 仲仲就係到彈ukulele, 佢可以將幾首歌combined埋好似人地串燒歌咁, 好勁! 最搞笑係德德聽完識講好好聽呀, 真係睇住佢終於識講嘢識溝通吓! 老公揍咗子元去踢波, 我同仲爺食飯先, 睇吓電視咁啦, 等佢地返嚟食完洗埋碗先沖涼休息!
24/8/22 WED. WARM
今朝七點多啲就醒咗，所以好早起咗身，咁多時間不如煮火腿通粉，細佬最鍾意！食完之後捉佢做咗英文功課先，然後又Hea下再做中文功課，跟住到時去睇電視，同埋整我個花膠螺頭煲雞湯，一早煲起佢，今晚可以飲！午飯食碗仔翅，不過整得有啲樣衰所以冇影相！食完午飯都係睇電視啦，之後好攰所以攤咗喺疏花唔想郁！今日德德運動日，佢爸爸同佢玩完順手揍埋佢過嚟，應該係運動會玩得太攰，唔使一陣就瞓咗， 6:00都要叫醒佢起身食飯，佢爸爸七點有多先來接佢，不過都無所謂啦佢都係睇電視，我就預備好晒啲餸等老公沖完涼可以煮，所以七點幾就有飯食！食完都係洗碗沖涼休息啦，暑假好快又完喇又要開工！
21/8/22 SUN. WARM
今日主要節目係晚上約咗33屆康傑會，本來諗住直接搭地鐵出去，但因為罷工，我哋一定要揸車，收費區又難泊車，最終決定食完午飯就揸到出去收費區外，再慢慢行入去搵地方玩！朝早九點幾先至起身，早餐食咗西多士，但都要加個麵至夠飽！然後就好努力咁搵吓Central London有咩玩，重點係盡量唔使使錢！最終我哋就行海德公園，再去大英博物館，前後行咗個幾鐘先至到，都係打卡吸收下靈氣！估唔到咁都撞到子元Konter嘅隊友，吸收完靈氣就要去飲下珍珠奶茶，又試咗間新嘢今次都冇伏到！然後行出去泰晤士河，因為想近距離睇吓倫敦眼，慢慢行出去都係20分鐘左右，近睇倫敦眼，再加埋大笨鐘，喺條橋上面睇，真係好靚！時間差不多又要行返去唐人街，約咗佢哋6:30食晚飯，四個家庭10幾人，叫咗啲嘢食每人都係試到少少，不過傾吓計吹吓水咁又幾好玩，啲小朋友好快就熟絡返，始終細個好似玩得返埋，唔知琴日嗰啲少年人，好似唔識咁！食到八點幾終於捨得行，去咗買雪糕食，嗰間係日本舖頭，所以食咗抹茶雪糕，好好味！最後玩到九點多先至捨得散，大家都要再搭地鐵，不過佢哋就返酒店我哋就返屋企！倫敦嘅tube真係好難撘，路在口邊問人哋先至知道我要搭嗰條線喺邊， 10點幾返到屋企沖涼瞓覺！
20/8/22. SAT. WARM*
今朝7點就醒咗，想瞓晏啲都唔得！起身之後老公早餐，我就覆message，睇吓central London子元個同學仔點樣過嚟，最終佢都搵到火車搭過嚟，所以唔使過去接佢！食完早餐，我就出去買地拖，老公就揍子元去練波，點知今次有球員就冇教練，呢個球會都係制唔過，所以都唔會再去！咁買完嘢返嚟我就再做多次清潔，話晒人哋喺屋企點都要乾乾淨淨，老公就做大廚一個廚房密密整，子元就要開咗個麻雀枱打住牌等人哋嚟，不過三個人打真係唔好玩！12點幾一點佢哋都差不多到喇，就開始吹水活動！不過啲小朋友變晒年青人之後好似唔係好啱玩，始終有幾年冇見係生疏啲！咁老公啲嘢食就得七七八八大家就開餐，食完我就去咁洗碗，好多嘢洗！終於搞掂晒就先影咗大合照，因為鎵樂仔佢哋有下場要早走，影完合照啲細路就打吓機，我哋大人就傾計，唔覺唔覺傾到六點多佢哋先至走！跟住我哋都係收拾吓咁啦，可能一路食住好多嘢所以都唔係好肚餓，晚飯用啲廚餘，再去超市買多幾塊漢堡扒就算啦！
18/8/22 THU HOT
為咗令時間唔好咁浪費, 所以今朝起身整完火腿通做早餐之後, 先試埋整慢煮蔬菜, 午餐時加牛肉就撈咩都得! 跟住就清潔地方, 星期六要招呼客人, 點都要乾淨啲! 跟住就要做運動跑步, 但實在係太耐冇跑, 1KM有多用咗6分幾7分鐘, 仲要好似抖唔到氣咁, 幾辛苦! 返嚟沖完涼抖吓又要煮午餐啦, 不過真係幾好食, 只係本來諗住打溶個慢煮蔬菜, 但因為個機壞咗打唔到, 唯有改方法囉! 食完睇電視, 差不多4點要提早出去接德, 因為多咗一個鐘喺屋企都唔係辦法, 所以帶咗佢去公園玩, 原來條友唔係好識玩公園, 千秋滑梯全部都唔肯玩, 所以都引咗佢一輪先肯玩滑梯算叻架啦, 但佢真係要練吓, 大小肌肉係要學架! 返去食完飯等佢爸爸嚟接佢我就收得工, 等老公煮晚飯, 食完就洗碗沖涼休息!
16/8/22 TUE HOT RAIN
今朝瞓到8點幾先起身, 整完早餐食, 又係時候hea, 都唔知有咩做, 就整定蘿蔔牛腩, 12點多又要去整午餐, 一日就喺個廚房整呢樣整嗰樣, 食完本來係睇模範的士, 咁啱Joey同Joyce佢地打嚟視像, 所以都唔睇住啦反正今晚可以再睇! 都同佢地傾咗個幾鐘呀, 咩都講吓啦, 難得興起傾電話嘛! 吹到3點多才收線, 咪又係繼續再睇電視, 同埋聽番個miss call, 初頭以為係老公個朋友租屋的agent打來有回音, 點知都唔係, 反而係仲爺攞眼鏡去整嗰到, 但我完全聽唔明個留言講咩, 唯有直接打去, 佢都問唔番係咩事, 但總之叫我照正常星期五去攞就得! 老公4點幾就返到, 車我去接埋德佢就送子元去練波, 點知去到又唔見人, 等到教練到先話今日冇人嚟練唔到, 真係唔知咩玩法! 所以咪返嚟一齊食飯睇電視囉! 晚上又找找路, 因為鐵路罷工嘛, 星期日晚去central london約咗康傑33屆的朋友仔, 都要諗吓點過去!
11/8/22 THU HOT
玩咗兩日冇力啦, 琴晚仲爺又咳到嘔我都冇力理, 佢都好叻仔架啦自己盡咗力衝落去廁所嘔, 好在老公呢啲時候又識去幫手處理佢喎, 仲叫咗仲仲落樓下瞓有咩都去得切廁所! 今朝佢又好好多, 但都比咗化痰粉佢食! 食完早餐子元話打switch, 就打一轉啦, 不過仲爺都係一輸就發顛咁真係好煩! 到咁上吓時間要整午餐, 清吓腸胃食粥啦, 再加個麵或米粉, 下午都係睇吓電視hea吓啦, 真係好hea! 夠鐘去接德, 返嚟咪玩吓食埋飯, 老公回來就同佢處理埋個車保, 嚟緊樣樣都係錢, 加油呀! 晚飯睇咗兩集模範的士, 所以9點幾先洗碗沖涼, 之後仲要交埋嗰半年租, 交咁多錢好緊張!
10/8/22 WED HOT
進入四字頭之後的生日, 都可以繼續精彩! 今日節目的安排得好豐富, 但因為琴晚太夜瞓, 所以今朝8點幾鬧鐘響先醒, 梳洗整好早餐食完老公要去買蛋糕, 我就去買冰, 因為嚟緊又話有heat wave, 都係做好準備好啲! 差不多10點半先出到門口, 要一個鐘頭車先去到Achiney嗰到, 仲要喺附近泊好車叉電, 行過去佢屋企, 坐到1點先出發去食午餐, 仲仲最開心就係有狗仔比佢玩! 因為分咗兩架車去食嘢嗰到, 佢地又行錯咗地方喎, 所以幾經辛苦先嚟到餐廳, 趕得切喺截單前叫到嘢食, 韓國嘢又幾好食喎! 食完就行咗溫莎堡外圍, 因為今日係冇開, 但係影外圍都已經好靚啦! 最後行咗去河邊睇吓船餵吓天鵝咁再飲埋珍珠奶茶, 幾好呀! 差不多5點要散啦, 渣得車返去抖抖再出發, book咗7點去食自助餐, 喺Wembly嗰到, 但堅唔掂囉, 好在我免費咋! 食完返嚟同個蛋糕影埋相先沖涼, 今日好攰啦, 又食咗好多, 要休息!
9/8/22 TUE HOT
今朝8點多起身, 食完早餐冇咩特別嘢做, 就同仲爺做吓英文同中文練習, 然後老公whatsapps嚟話今日會去嗰個地方叫Swindon, 叫我睇吓有咩地方行, 但原來嗰到都真係冇咩行, 所以都係bookmark咗個outlet, 食完午餐睇吓電視, 老公回來就出發, 都要個半鐘車先得, 老公可能未食嘢所以係咁要打醒自己先掂, 真係好大壓力! 第一站去咗行B&Q, 攞吓靈感, 不過先喺對面買啲包食咗先再行, 都攞到啲諗法! 然後就去outlet, 人少少咁都幾好行, 佢地仲買到嘢添! 然後就去餐廳, 約咗Konter隊友食飯, 泰國餐廳都算不過不失, 但我都係掛住香港嗰間泰國嘢呀! 食完哂老公竟然有驚喜比我, 佢托隊友爸爸拪搵人整咗tiramisu比我, 襯我去完toliet攞出嚟, 蛋糕好好味呀! 每年生日佢總有啲小心思比我架, 真係sweet的! 食完飯去埋佢地屋企玩到11點幾先回家, 所以返到嚟已經1點啦, 實在係太夜, 明天還有行程, 快啲瞓!
6/8/22 SAT. WARM
第二日旅程，首先就要處理大家一早起身梳洗食早餐，又係十個人輪流廁所，舅母仔佢哋仲整埋早餐，老公都有貢獻下，就係沖奶茶！食飽又係吹一輪水又要影吓相咁最終差不多9:30先至離開到，先要去搵地方入油，然後直接去Hastings同Keith佢哋會合，首先佢哋又去打水漂，乜真係咁好玩咩，不過我都執咗舊石頭做手信！然後就行過去搭登山纜車，不過過搭之前去咗食咗海鮮杯，今次呢間都幾好食，等大家食飽就去搭登山纜車，我哋13個人基本上包車㗎啦，上去嘅風景真係好靚，有海有天啲屋仔仲變到好似Lego咁真係好得意，上到去影咗一輪相，然之後喺草地比佢哋狂奔左一輪，又要預備搭返車落山！跟住就去搭蒸氣小火車，£10可以五個人搭其實都可以啦，玩完小火車就玩高卡車，仲仲話佢都要自己揸一架，不過一開車佢就撞咗埋駁，好彩之後都揸得幾好，最後入埋去機動遊樂場，玩咗轉轉過山車，仲仲話一啲都唔驚喎，我就睇吓就夠啦！終於肯嚟開個遊樂場，係時候去食嘢，是否選咗一間似乎係飲酒合適過食嘢嘅地方，最終等咗好耐啲嘢食先來齊晒，啲青少年全部都瞓晒覺！行埋嗰條景點之一嘅街道，買咗啲糖果，跟住就行去買珍珠奶茶！沿途見到封路準備巡遊，就決定買完珍珠奶茶返嚟睇巡遊，第一次睇英式巡遊，雖然好Hea，但都幾得意！之後炮哥其實話佢攰，但係我都唔知有咩行程可以輕鬆啲，最終行咗去碼頭嗰邊，發現要比入場費先可以再行入去，就放棄咗，行返去觀光嗰條街食晚餐！食咗豐富海鮮晚餐都已經八點幾，係時候回程啦，因為要揸兩個鐘頭車先返到去，好在天黑之前趕得切上到公路，咁都安全啲！ 10點幾返到嚟馬上執嘢沖涼休息，玩咗兩日又要時間回下氣！
5/8/22 FRI. WARM
旅行終於可以順利開始，因為遲咗少少起身，所以冇出到去餐廳食早餐，只係求其買咗麵包咖啡就算，兩個幾鐘頭嘅車程， 11點我哋就到咗停車場，不過炮哥佢地仲要去睇薰衣草，所以似我哋半個鐘先到，咁我哋喺商場行咗陣，然後走出海邊等佢哋，第一站首先去搵海鮮杯嚟食，我哋又食咗好多款海鮮啦，雖然全部都係細細杯不過都幾特別，之後就去石灘片石仔，佢哋真係玩極都唔厭，片左一輪終於肯行啦！先完成海邊嘅旅程，所以就去買Brighton嘅碼頭，不過個碼頭全部都係遊樂設施，但可以影吓相，影吓一望無際嘅海岸，都係心曠神怡！點都要貨金玩少少遊戲㗎啦，咁啲細路就最開心！終於可以行去內街搵嘢食，是否滿心歡喜去試嗰間棋哥茶餐廳，點知都係伏伏地，我哋等唔切啲湯麵伏，因為要等半個鐘，嗰時已經兩點幾我實在太肚餓，所以叫咗粉麵飯就快手好多有得食，同埋味道都唔太差，然後嘅路程我哋都係食，不過就去咗食雪糕同埋飲珍珠奶茶，雪糕就到我哋伏咗，但仲仲話要去結他鋪，因為佢要買咗條M線。最後去行吓先好復古嘢嘅街，街買咗啲手信比舅父仔，差不多時間要起程，因為仲要去睇七姊妹涯，差不多要爭一個鐘頭車先到，雖然冇去正宗嗰個七姊妹涯，但喺呢個位睇都好壯觀，而且行少好多路，不過佢哋影相時期到好出真係好得人驚！再查多半個鐘頭車，終於去到舅父仔屋企，佢哋已經差不多煮好飯迎接我哋，一路食一路傾吓計咁，時間過得好快，仲要八個人輪流沖涼，又吹吓水咁，差不多點幾鐘先至瞓！
4/8/22. THU. WARM
今朝八點左右就醒咗，今早起身做早餐，睇埋Lego Master就開始Scan啲文件俾律師睇，如果冇問題下星期就可以寄俾佢，跟住都係睇吓Running Man同埋準備煮午餐啦，本來諗住睇埋模範的士就出去買下野，點知老公send message話足球教練叫子元星期六可以去同一啲半職業球隊training，本身個message話係下星期六，其實冇問題，當我教佢覆完之後，就收到個資料係今個星期六同下個星期六，佢竟然話星期六朝佢同子元揸車返上嚟，然後我同仲仲繼續玩，咁完全唔合邏輯囉，我直程係1秒即著，喺個message度我都好火滾咁覆佢話叫佢收線同埋講啲悔氣說話，然後開始失控咁喊啦，喊到返咗上房繼續喊，都仲未攞杯水上嚟俾我之後先叫做好啲，冷靜咗少少之後，我就打咗俾Loletta，話想講旅行都同佢哋一齊去都要俾佢哋知個情況，佢同炮哥商量之後其實都打返俾我，最終我都選擇咗自己同佢講，唔好麻煩到人哋，我用咗一個好絕嘅方法，反正我冇問教練呀嘛，我就用英文打咗同教練講13號可以出席但係6號我哋our of town，變相即係擺到明6號係唔去㗎喇，咁仲唔係解決咗，某程度上大家都唔算嗌交之下解決咗個問題，都算係好事，不過就搞到我喊咗一大餐！四點幾出去買埋野就湊德返嚟，佢病咗兩日，但睇落冇乜嘢，照樣食同玩，冇咩問題！六點幾老公仲要返嚟，收拾好個車尾箱，搬埋舅父仔啲行李上車先，咁聽日將我哋啲行李放埋上車就可以。
2/8/22 TUE HOT
今日帶咗仲仲出去IKEA行, 因為佢之前一路都話想去, 但星期六日成日都唔啱時間去, 見今日有時間就帶佢去囉, 只係要行去broadway撘巴士遠啲啦, 其實應該可以巴士轉巴士, 但其實都係要行, 咁不如就同佢一齊行啦, 閒日去到IKEA行人少少幾好, 又可以攞吓靈感, 最後買埋香味candle同肉丸呀等等, 回程前仲仲話要食麥當勞, 佢好掛住魚柳包喎, 咁就比佢食囉, 我自己就叫咗burger咋夠平嘛! 返去之前買埋餸, 今日又唔洗揍德, 佢阿爸話佢發燒喎! 咁咪輕鬆一日囉! 返到屋企都係打吓機食吓嘢啦, 真係好hea! 老公回來煮晚飯, 諗唔到食咩就食肉醬意粉囉!
1/8/22 MON HOT
今日都係有啲宅啦, 係揍德嗰時先出去咋! 朝早瞓到8點幾呀, 但因為有發夢都係瞓得唔好架, 整早餐食完就等10點有人嚟幫我剪頭髮, 剪完到Letty剪, 佢打完網球過來嘛, 咁就可以慳番啲交通費, 其實都係剪得一般啦, 我但求剪短咗就算! 剪完要吸番乾淨個地, 另類體驗! 等佢地走咗, 開電腦做吓嘢啦, 跟住就係要整午餐, 求奇地整番之前蕃茄薯仔湯啲薯仔食就算啦! 然後都係追吓劇, 仲仲又要我同佢打吓機咁囉, 夠鐘就出去揍德, 返嚟佢兩個又鬥顛啦, 而家仲仲做咩佢就做咩, 好好笑! 食完飯都係沖涼休息, 仲有等老公換咗printer啲墨就print埋要簽的文件, 其實都冇咩好做架啦, 要明的都明, 唔明的其實都冇咩可以做! 信啦......吸引力法則, 你信一切順利就會順利! 晚上有仲爺的按摩服務, 睇吓佢幾時玩到悶就冇架啦!
