21/8/22

 21/8/22     SUN.    WARM

今日主要節目係晚上約咗33屆康傑會，本來諗住直接搭地鐵出去，但因為罷工，我哋一定要揸車，收費區又難泊車，最終決定食完午飯就揸到出去收費區外，再慢慢行入去搵地方玩！朝早九點幾先至起身，早餐食咗西多士，但都要加個麵至夠飽！然後就好努力咁搵吓Central London有咩玩，重點係盡量唔使使錢！最終我哋就行海德公園，再去大英博物館，前後行咗個幾鐘先至到，都係打卡吸收下靈氣！估唔到咁都撞到子元Konter嘅隊友，吸收完靈氣就要去飲下珍珠奶茶，又試咗間新嘢今次都冇伏到！然後行出去泰晤士河，因為想近距離睇吓倫敦眼，慢慢行出去都係20分鐘左右，近睇倫敦眼，再加埋大笨鐘，喺條橋上面睇，真係好靚！時間差不多又要行返去唐人街，約咗佢哋6:30食晚飯，四個家庭10幾人，叫咗啲嘢食每人都係試到少少，不過傾吓計吹吓水咁又幾好玩，啲小朋友好快就熟絡返，始終細個好似玩得返埋，唔知琴日嗰啲少年人，好似唔識咁！食到八點幾終於捨得行，去咗買雪糕食，嗰間係日本舖頭，所以食咗抹茶雪糕，好好味！最後玩到九點多先至捨得散，大家都要再搭地鐵，不過佢哋就返酒店我哋就返屋企！倫敦嘅tube真係好難撘，路在口邊問人哋先至知道我要搭嗰條線喺邊， 10點幾返到屋企沖涼瞓覺！