30/1/23 MON COLD
今日終於係做啲輕鬆啲的工作, 好似好耐冇諗過咁! 朝早有啲趕啦, 兩仔豬都唔肯起身咁, 返到去知道正式冇咁早要開工都hea吓先! 第一堂就可以同Holly佢地上吓都好, 有得吹吓水見吓都好嘛! 小息我又要吽吓大房無所事事咁, 之後好在期間有得放飯, 唔係其實要做足全程, 係咁叫佢醒叫佢做嘢, 都幾攰架! 同埋又去番啲低B班, 我都唔係好適應! 不過放工就可以準時, 因為佢阿媽3點嚟接佢, 咁我都可以準時走啦! 接咗仲爺買埋餸就返去, 開電腦做吓嘢咁, 仲爺就玩LEGO玩到食飯, 今日唔洗揍德可以早啲食飯! 不過要摺埋啲衫先瞓得都11點幾啦!
26/1/23 THU COLD
今朝都係有啲趕咁返工返學啦, 返到去先知Bella今日都係冇得返學, 我估學校想佢喺出面搵醫生證明佢合適返學先比返! 所以我今日繼續跟Jazzy, 其實跟佢係好攰, 成日要講嘢, 可能我同Bella的日子真係唔多洗講嘢, 全日都可以唔出聲, 突然要我講咁多嘢真係好攰! 期間搵到位可以走去同Letty佢地吹吓水講幾句都好! 睇番Facebook原來今日係返工一週年, 估唔到咁快一年啦! 放學有啲遲先走到, 見今日唔趕就由得佢啦! 接咗仲爺就返屋企啦, 點知子元今日要踢波又唔出聲, 5點先返嚟! 我地出咗去揍德時已經趕唔切電腦報名賓仔比賽, 唯有搖控子元喺電腦報, 好在最終都報到哂! 揍完德快手煮飯佢食再送佢返屋企, 回來仲要煮飯食!
25/1/23 WED. COLD
今日本來都冇咩，又係麻煩老師，佢總係可以咁乞人憎！唔想再提太多，諗起都憎，主要又係要我去AL1先，咁去到街市咁多人又做唔到嘢都唔知為咩，好地地去嗰邊房用電腦唔得嘅！仲有佢又將呢個電郵cc比輔導同訓導主任做咩呢關佢地事？真係好想麻煩老師有一日俾佢嘅上司話吓佢啲無謂嘢，等佢自己反省吓自己幾乞人憎，另外今日一個重點就係我同Bella都係冇人解釋俾我哋聽嘅情況下，佢返到嚟學校好想去上堂，但係又唔俾佢去上堂之後叫阿媽接返佢走，到而家都冇人講俾我聽究竟係點解，連佢自己本人都唔知點解，我覺得真係好過份，算啦啲高層係咁，自己諗自己做，就算完全唔理其他人嘅感受，希望佢哋喺高層嗰度跌落嚟感受吓有幾痛！我都唔想咁黑心沮咒佢哋，但係其實佢哋企得太高，好多時都唔知自己做緊乜嘢，一啲都唔貼地！算啦唔講佢哋啦！咁我今日就決定咗要跟另一個year Seven嘅學生，佢都係香港人，我覺得佢今日係我陪住佢嘅情況之下，佢算好合作好聽話，仲講咗好多嘢我聽，但係當中有幾多係真係唔知不過如果就咁聽佢講，佢個人生都好似幾慘，所以先造就到佢咩都亂咁嚟嘅性格，因為都冇人教佢！經歷咗咁多嘅一日，我淨係想快啲放學，接咗細佬之後去埋佢個家長日，其實都係講嗰幾句啦，英文就比較差數學都唔錯，總之都係不過不失啦，所以每日堅持要細佬睇英文書係啱嘅，點都讀吓拼吓字都係好事！返到屋企收拾吓，等老公返嚟再去揍德，揍咗德返嚟，我就快啲煮飯佢食，然之後老公就準備晚飯7.0鐘送返佢返去，我哋返嚟整埋個晚飯就開飯啦，一邊食一邊睇波！
24/1/23 TUE. COLD
今朝返學都有少少趕，我返到去得返5分鐘，其實唔係好夠時間囉，可能真係要早啲出門口！返到去都係照常咁準備工作，點知出去reception接Bella嘅時候，佢阿媽都喺度，咁我就知道今日應該可以提早收檔，果然琴日嘅情況冇改善，佢基本上唔肯上課室，要去搵麻煩老師，都要陪佢去睇啦，等佢處理都好，因為已經唔屬於我能力範圍，最終佢11:30俾阿媽接走，麻煩老師本身叫我寫返電郵講返成件事，好在仲有Elaine幫手，佢叫我口述佢去打，免卻咗好多麻煩！之後嗰三堂就去咗跟一個year Seven，嗰條友都幾麻煩，真係想一錘打暈佢就算，但係我冇你咁多啦佢唔聽就算啦，我冇佢咁好氣！今日可以食過長時間啲嘅飯，慢慢行睇吓幾咁幾自在！自己預返時間準時收工就去接細佬放學，因為今日要直接入學校接佢冇人幫我手，返到屋企又要準備食晚飯，等佢哋踢完波返嚟食，然後又要煮定德個飯喺車食！不過佢食到一半就瞓鬼咗，都唔理啦，有得佢算啦瞓覺佢就起身，車咗佢返屋企我哋都返去，我同細佬食飯先，老公就再走一轉接埋阿哥先至返，好在仲有位叉電，非常好！
23/1/23. MON. VERY COLD
今日真係好凍，朝早起身體感得返負9度，有冇搞錯？又話會暖番，呃人嘅！預知咗咁凍就著夠衫加上冇風，感覺上都可以！返到去學校竟然拍唔到卡，好在喺另一個房可以拍咁都趕得切！做咗一陣嘢Bella就返翻，咁咪去課室囉，佢有佢睇書我又冇溫習，第一堂相安無事，第二堂本來都幾好，但係嗰個Science老師過嚟要去做吓嘢，之後佢就開始好緊張咁，本身我都以為冇乜嘢落咗堂咪去平時小息個地方囉，點知佢突然之間掉晒啲嘢落地，然之後衝咗去火車嗰邊個欄杆度，見到有個窿佢好似想爬出嚟咁，同場有其他老師見到，都即刻call人過嚟幫我，我亦都係Walkie Talkie搵人嚟幫手，最終安頓咗佢返課室，第三堂叫做喺室內渡過，但係佢都情緒麻麻，搞到我冇得去食午飯，麻煩老師叫我繼續睇住佢先，佢再安排我食飯，但其實我真係好肚餓，聽日記得帶定啲零食返去，如果唔係又餓死！第四堂佢都係唔肯去上堂，咁咪去圖書館楚囉，有另一個同事喺度，佢都幾好人嘅吹吓水咁時間都好快過，我終於等到兩點可以食午飯啦，不過原來替我更嗰個都仲未食飯，其實啲安排真係幾差！食完飯本身諗住數學堂佢應該都會上，但係佢都係唔肯上，佢今日都講過再叫佢上堂，佢就殺咗自己，我心諗條命你嘅你鍾意啦，但又唔可以講出聲，最終去圖書館坐埋嗰個鐘，我都溫咗好多書㗎啦，放學快快手手閃人，因為今日係will媽媽幫我接，唔想人哋等咁耐！返屋企之後都有少少無所事事，間中無聊吓都好嘅，老公接埋志遠差不多六點就返到嚟，即刻叫我煮飯，好在佢繼續煮埋啲餸，不過我就要試撕埋隻手撕雞，食完飯都係八點，咁先至沖涼休息！
18/1/23 WED VERY COLD
今朝返學都有啲趕, 仲爺囉, 樣樣都慢手慢腳, 跟住今日又塞車喎, 我都要行行人路, 又再慢啲, 好在都冇遲到! 返去等咗一堂bella都冇返先知原來佢唔返, 咁都要返去問吓阿姐點做, 但點都係輕鬆架啦, 跟啲簡單學生又唔洗趕住放飯咁, 加上個學生又咁啱好多堂代課, 完全hea! 準時過準時放工可以接仲爺, 但佢又要玩陣公園, 見佢幾日冇玩就比佢玩陣啦, 返去settle完又要出去買藥, 又要揍德! 今日睇清楚哂邊條路塞車先再行, 順利揍到! 返到嚟德德食飯時間老公就準備晚餐, 到我地出去時就叫子元蒸定啲肉餅, 返嚟快啲有得食! 食飯時佢地就睇波, 所以食完洗碗我就睇自己嘢, 沖埋涼趕埋仲去瞓覺, 仲要摺埋衫先瞓得!
17/1/23 TUE VERY COLD
今朝真係好凍呀, 又負幾度, 但都係要出車, 好在只係凍, 唔大風都冇咁辛苦! 細佬好在都冇咩事可以返學啦, 我都順利返工啦! 今日都算幾好, Bella合作我就輕鬆好多! 有時間就溫吓書啦, 放學快車去接仲仲, 同阿sir講咗逢星期二都會遲接, 佢話冇問題, 咁又幾好喎! 揍咗仲就馬上返屋企, 真係好凍呀! 本來有人會嚟睇吓個廁所, 但因為有時佢要改明天, 咁冇所謂啦! 子元話學校有嘢要交費, 咁就開電腦整吓嘢, 老公回來本來就係去接德, 但點知塞車塞到根本郁唔到, 唯有打比佢阿爸叫佢自已接番, 今日冇得賺錢! 返屋企老公話佢整B仔雞翼, 又真係整得幾好喎, 今晚淨係食雞翼就夠啦! 整完佢就揍子元去練波, 我就繼續用吓電腦填吓仲爺入學申請表, 等飯煮好就食得! 然後都係hea吓咁啦!
16/1/23 MON. COLD
仲爺瞓到半夜無端端大喊，以為佢發惡夢啦，都要落嚟睇佢，佢話頭痛痛到瞓唔到，唯有比退燒藥佢食，再陪佢一陣先，結果到我冇覺好瞓，朝早見佢都正常返再俾多次藥佢食就照返學，估唔到12點幾學校打嚟話佢好唔舒服又有啲發燒，要我即刻去接返佢，啱啱遇着剛剛， Bella今日第一堂PE跑完步之後都唔舒服，我交收好佢，就即刻去學校接返細佬返屋企，食咗藥瞓咗覺，叫做好返好多，我就出去再買藥俾佢，返嚟屋企之後第一時間食咗嘢先，真係好肚餓，之後諗住出去買藥嘅時候又落冰雨，唯有等佢完先再出去買！之後下晝都冇做啲乜嘢，只係洗咗啲衫，等老公接埋子元喺學校練完波返嚟就煮飯，仲爺就係咁叫我陪住佢！食完飯算啦碗沖好涼都早啲休息啦！
3/1/23. TUE. RAIN
今朝本身安排揍仲爺去Mandy到，我地就返工返學，點知子元半夜起身話佢好肚痛又嘔，比咗藥佢食，但佢朝早都係返唔到學，所以仲爺都留喺屋企算，反正子元喺到！我安頓好晒佢哋，就直接返工，原來高爾夫球場中間條通道，落雨係完全唔適合行，有個大水坑，我要攞住架車跳過去，基本上啲褲都俾啲嚟整到濕晒，真係好狼狽，不過咁都好，起碼而家知道唔適合行，就要搵替代方案，放學再計劃下點樣！啱啱趕得切時間返到學校，今日training都係無所事事，題目係reading，我更加冇興趣，總之捱完幾個鐘放學就算，雖然今日學校有午餐提供，但真係好細瞓，完全唔夠飽！唯有放學返去再食！準時放工睇定咗條數返屋企，計算過都係20分鐘左右就可以由仲仲學校返到屋企，我諗帶埋佢都係多5分鐘，咁星期四就可以試吓行！返到嚟就馬上預備晚餐，好簡單咁雞湯就算，反正仲爺又要踢波，子元又唔可以食咁多嘢！等老公返嚟，先去湊就德，再揍仲去踢波，跟住返屋企煮飯俾德食，然之後就車埋佢去接細佬，先至再湊佢返屋企，唔知係咪成個月冇見咁滯，佢全程都呆呆滯滯咁！返屋企就開飯啦，食完都有啲攰，快啲沖涼瞓覺！
