7/1/14

7/1/14   TUE   COOL

2兩點飲咗奶, 蕃薯6點半先叫食啦, 搞到我好趕咁出門口, 仲要餵埋泵埋奶, 都算係咁啦, 不過好可惜撘小巴出去時塞車, 趕唔到同敏瑩一班車, 仲要等到8:20先有車, 原來得我帶住兩個都幾吃力, 可能係因為對手要嚟抱住蕃薯好唔方便, 唔怪得而家咁興用Sling, NB都用得! 揍咗笨元返學, 我就撘番巴士出美孚, 買咗早餐同D豬肉牛肉就回家了! 返到屋企蕃薯仲未叫食, 咁我梗係自己食咗早餐先啦, 跟住就餵佢啦! 然後就做點公事等等, 差不多時間又要同蕃薯沖涼食奶啦, 然後到我煮午飯, 老公又買咗飯返嚟食, 不過食完一陣佢就出返去做嘢啦, 我休息吓又到下一餐, 見時間咁晏都冇午睡了, 因為笨元返嚟又好嘈, 點知佢返到嚟又勁攰瞓咗, 早知我都瞓啦! 跟住嫲嫲話林老師講笨元今日喺學校吐人口水, 唉…我真係比佢激死, 點解佢會咁呢, 我地已經教過佢好多次呢D行為唔啱, 等佢醒咗老公返咗嚟再教訓咗佢一輪先有得食飯, 飯後沖好涼又要溫書了, 我而家真係好忙, 所以交咗比老公同佢溫, 我又要泵奶餵奶沖涼等等, 我都攰到餵餵吓瞓著咗! 好在笨元瞓咗個幾鐘, 老公先同佢溫到咁夜, 但見佢有時溫得過咗火又好似唔係咁好, 會令佢怕咗溫習呢, 不過今次我真係分身乏術, 下學期應該可以我負責番, 希望唔好已經嚇怕咗佢! 11點多已頂唔住要瞓, 我已經攰到頂點!

6/1/14

6/1/14   MON   COOL

星期一笨元要做服務生, 所以可以老公揍笨元返學! 蕃薯2點食咗到6點再醒, 咁我餵好泵埋奶就叫佢地起身啦, 不過兩個慢世魔王真係會激到你死, 搞到我一朝早就心情唔好, 佢地出咗門口我都仲泵緊, 之後都係做吓其他嘢, 蕃薯又嘈啦, 但又未夠鐘食奶喎, 食住奶咀先啦, 到9點先再有得食, 之後到我食早餐啦, 然後又要開電腦開吓工再寫吓日記, 中午時又要同蕃薯沖涼先然後食奶啦, 佢食飽到我煮午飯, 本來都煩緊有咩可以煮, 好在仲有D臘腸可以焗飯食, 食完又到泵奶時間, 泵完本來想瞓吓, 但差不多到蕃薯食奶, 老公又返咗嚟, 所以都冇瞓到, 3點幾蕃薯食咗奶, 我真係頂唔住要瞓啦, 不過瞓咗個幾鐘笨元就返嚟啦, 嘈住哂唔起身都唔得, 仲聽到佢係咁蝦嫲嫲, 叫佢沖涼又玩嘢, 所以起身後都要丙佢! 沖好涼睇佢冇咩功課, 就要做咗珠心算先, 不過做得好差, 全錯咁滯, 撞啱我又要餵蕃薯, 好在老公不久就返, 叫佢接力搞掂隻笨, 咁先叫做好番D! 之後食埋飯我又泵多次奶啦, 跟住沖埋涼, 叫老公幫笨元溫吓中文先, 下星期評估啦! K.O. 咗笨元我都好想瞓啦, 蕃薯9點幾飲咗奶, 可以唔洗理佢住, 陪老公睇咗陣新聞我地都瞓啦!

5/1/14

5/1/14   SUN   COOL

今日又係街街日! 不過真係好攰, 攰到我想快D返屋企, 少有呢! 朝早餵完點嗰餐泵埋奶本來可以再瞓架嘛, 但蕃薯勁唔合作喺到扭, 搞到我都發脾氣啦, 老公醒一醒睇咗陣, 咁我地就瞓到10點, 笨元入嚟叫過我地, 咁蕃薯都差不多醒啦, 又係時候餵奶, 然後出去食早餐, 不過都食得幾趕吓, 趕出去11點半前要叫嘢食, 跟住又要圖書館借書, 回家後又趕住出去啦, 但蕃薯係到扭, 可能係因為之前回咗太多奶所以早咗嘈, 若去到黃埔先食奶又怕太耐, 所以咪餵埋先囉, 老公之前又諗唔到, 所以約咗嫲嫲12點半就喺美孚等, 結果我地點幾先出得到去, 咁多行裝咪又係要撘的士! 都算早咗去到KFC, 子元咪可以同敏瑩玩吓先囉, 我地又玩吓敏婷咁啦, 愈來愈多人嚟, 笨元就愈來愈顛咁啦, 我地就主要坐喺到, 冇法啦要睇住蕃薯嘛! 之後開始食嘢, 但D嘢食真係一般, 同埋佢係好似自助餐咁預備哂, 而唔係好似麥當當咁各自叫, 所以都幾浪費囉因為個餐for75人架, 太多啦! 食到咁上吓就玩遊戲, 蕃薯都係時候食奶, 食完奶就比D家長們抱吓傳吓咁啦, 4點要清場, 笨元同敏瑩鎵樂去咗食錢樂園玩, 我地就喺KFC等程生佢地執哂嘢先一齊去食錢樂園join佢地, 期間同敏婷玩真係幾好玩, 出年呢個時候我隻蕃薯都係咁架啦, 好期待! 喺食錢陪佢地玩咗3個game就走啦, 去埋行toyrus抽咗扭蛋就走啦, 老公本來想喺黃埔食埋嘢先返屋企, 但我已經勁攰, 笨元又係, 陣間佢夠鐘去踢波, 我得一條友又要揍住兩隻仔加埋架BB車, 我點返屋企呀, 所以決定返咗屋企先! 喺的士笨元小睡咗陣, 返到去先同佢沖咗涼, 老公去買外賣, 奶奶就幫我餵蕃薯食奶, 我就教笨元做埋少少功課, 然後就晚飯啦, 飯後泵奶, 等佢地閃哂我就沖涼, 然後陪笨元邊睇掌門人邊餵蕃薯! 由於勁眼瞓, K.O. 咗笨元後我就喺梳化瞓住等老公返嚟, 佢話買咗糖水比我嘛! 食住等佢沖埋涼12點幾就瞓啦, 反正唔知蕃薯幾點再叫食!

4/1/14

4/1/14   SAT   COOL

今朝都係如常餵咗蕃薯就泵奶, 差不多時間就叫佢地起身, 笨元要去學畫班嘛, 揍咗佢過去我地就去食早餐, 然後上阿媽到老公要幫佢整廁所的防漏, 咁蕃薯就喺婆婆屋企食餐奶囉, 不過條友仔食得好衰囉! 搞掂就去接番笨元然後返屋企, 下午笨元又要去踢波, 時間唔夾老公煮唔到嘢比我食, 咁咪搞掂蕃薯再自己煮個粉食就算囉, 之後泵多次餵多次奶就等老公電話喺沙田會合, 本來諗住入阿婆到食飯前喺市中心行吓, 但等得老公電話出得門口都五點幾, 等唔到車入得去都六點幾, 冇時間行市中心, 咁就直接入第一城算囉! 比笨元喺樓下踢咗陣波就上去啦, 蕃薯又差不多時間食奶, 不過都係食得衰衰咁, 到我地食飯時佢又扭喎, 搞到我食都食得唔安樂, 之後仲要辦大事, 疴完叫做靜咗一陣啦, 咁多人大家又想抱吓, 點會肯靜靜瞓喺到呀! 之後撘巴士返去又係全程抱住, 幾開心呀! 回家後佢兩父子沖咗涼先, 我就泵埋奶先有得沖, 餵埋餐奶又係時候瞓啦!

3/1/14

3/1/14   FRI   COOL

今日係星期五, 笨元要做服務生所以老公可以揍佢返學, 蕃薯6點又嘈啦, 所以餵咗佢泵奶就捉佢兩個起身返工返學啦, 不過佢地慢吞吞, 所以都係趕唔切做服務生! 之後我都係喺屋企hea囉, 中午阿媽過咗嚟煮嘢, 咁我又有得食啦, 跟住都係泵奶餵奶咁啦, 奶奶到咁上吓就揍笨元放學返嚟, 今日要合唱團, 所以第一時間同佢做好功課先, 星期六日又有好多活動冇時間做! 做到咁上吓就食晚飯啦, 食完老公帶笨元去合唱團, 本來我都想出吓去, 但奶奶喺到若帶蕃薯出去陣間又比人話, 所以都係冇出去, 泵埋奶等老公返嚟佢兩個沖好涼我就有得沖啦, 然後咪瞓住等蕃薯嘈先再餵奶囉!

2/1/14

2/1/14   THU   COOL

琴晚隻蕃薯點幾食完奶係都唔肯瞓, 要人抱, 眼碌碌咁望住你, 真係比佢激死, 我真係發火, 最終到差不多3點佢先肯瞓, 最慘係到6點佢又叫食啦, 我瞓得3個鐘又要起身啦! 餵完又要泵奶然後叫佢兩父子起身返工返學, 搞掂就出門口, 今日蕃薯要去健康院打針呢! 去到學校嫲嫲攞埋紅雞蛋嚟學校, 交比老師派比同學仔呢! 跟住同嫲嫲去太興食完早餐先上健康院, 見有時間就餵埋蕃薯食餐奶先, 啱啱好可以去磅重, 好有進步呢有4.1KG, 即係9磅啦! 見埋護士都係度吓頭仔, 睇吓你有冇問題咁, 然後就去打針啦, 條友仔真係瞓得好熟, 比人除開條褲都冇咩反應啦, 然後咪打嗰吓喊一喊, 都未出到門口已經收咗聲, 同子元有得揮呀! 見埋醫生睇黃, 終於退哂啦! 搞掂就撘巴士返美孚, 返到去執吓嘢咁仲有打掃埋, 就同蕃薯沖涼食奶, 阿媽過咗嚟佢就煮埋飯一齊食, 然後我又泵奶啦! 食完飯佢就返過去, 我就做吓嘢囉, 都冇咩機會瞓, 因為下午餐奶後要整醒蕃薯, 等佢半夜唔好咁精神, 不過整極佢都係瞓, 點知放棄咗之後就開始扭, 初頭抱住都OK, 之後抱住都喊, 都唔知佢想點, 不過呢D時間點都好過半夜先係咁, 嫲嫲揍埋笨元返嚟就煮晚飯, 我就搞掂笨元功課嗰D啦, 嚟緊評估都唔知點幫佢溫書好, 又冇得做卷比佢練習, 集中一個同有兩個真係唔同, 會分心架! 下星期開始要晚晚溫書啦! 食咗晚飯佢兩個都沖涼我就泵埋奶先沖, 之後餵奶囉, 柏仲10點餐奶之後開始扭啦, 初頭都有理吓佢, 但理咗佢都仲係喊, 可能我太攰啦, 照瞓!! 咁佢喊喊吓就收聲, 老公餵咗1點幾嗰餐之後終於乖乖咁瞓, 咁算唔算我地個做法有效呢!

1/1/14

1/1/14   WED   COLD

新一年啦! 2014年的願望當然是一家四口身體健康啦, 仲有蕃薯粒可以快D戒夜奶, 我同老公可以一覺瞓到大天光! 蕃薯兩點幾嘈完都算係咁瞓到6點先嘈, 咁呢餐就叫老公餵啦, 之後就9點先再嘈, 不過佢就玩嘢囉, 因為疴咗好多好多屎, 漏哂出嚟, 老公要幫佢沖埋涼呢! 食好奶我地都出去食早餐, 已經好晏啦, 食完早餐回來又要執嘢, 準備去同學仔生日會, 主題係公主王子, 老公幫笨元著咗套禮服裝, 其實都幾誇, 不過呢D衫都冇咩機會著, 有需要就著多幾次呢! 廢事撘巴士等得耐, 最終都係撘的士, 爵悅庭又吊腳呢, 早咗到都啱, 蕃薯又係時候飲奶, 佢都算好嘢, 全程咁嘈佢都照瞓, 笨元就梗係玩足全場啦, 我地就周圍吹吓水咁囉! 4點要交場我地就準時走啦, 蕃薯又好準時咁叫食奶囉! 餵咗佢我就泵奶, 沖埋涼就叫外賣食呢! 之後都係hea吓睇吓電視咁囉!