14/1/14

14/1/14   TUE   COLD

琴晚進入咗深層睡眠, 咩事都唔知, 到聽到喊聲時望吓鐘原來已經6點, 即係蕃薯琴晚冇叫食? 定我兩個太攰聽唔到? 唔理咁多啦, 開5安比佢填吓肚先, 再叫兩個大爺起身, 而家朝早我真係鬧多咗笨元, 可能因為知道要趕車唔可以慢, 而佢一唔合作我就炆啦, 希望情況慢慢改善到, 我真係想買個計時器返嚟等佢習慣吓唔好咁慢! 佢兩個出咗門口我泵埋奶就煮早餐然後做吓公事, 差不多10點又要餵蕃薯啦! 之後咪搞吓D財務嘢囉, 錢…好似永遠都唔夠用咁! 中午叫老公買飯返嚟比我食咁就唔洗專登出去, 反正明天都返公司攞票, 出商糧嘛! 由於嫲嫲呢幾日都唔會過嚟, 所以老公接笨元放學, 但佢今日要過對面海做嘢, 未必趕得切, 所以就我帶埋蕃薯去接, 順手去幫笨元買埋星期五要用的餅乾, 趕唔切同敏瑩一班車, 不過都好唔洗咁嘈! 返到屋企快手同笨元沖咗涼就餵蕃薯, 然後捉笨元做珠心算, 又係做到又慢又錯咁啦, 老公返嚟接手, 一個煮嘢時另一個就教仔, 我仲要出埋份卷比佢練吓明天考數學! 食埋飯要泵多次奶再沖涼, 老公就餵蕃薯飲奶, 今晚到老公眼瞓, 所以臨瞓前餐奶到我負責, 不過蕃薯好衰, 一路係咁喊, 食住奶咀都喊, 仲要喊到嘈醒埋笨元, 搞到我都發哂脾氣, 見佢差不多12點嘈就比佢食啦, 但又係食得好衰, 仲要吐我冇幾多的人奶, 激死! 飲完都抱咗大半個鐘都係唔瞓, 搞到點幾我真係冇哂力, 同埋佢可能喊攰咗終於肯收聲, 到3點再嘈, 食完奶仲要疴大篤屎, 之前都唔知係咪疴屎唔出發脾氣所以勁喊, 但我已經比佢玩殘咗!

13/1/14

13/1/14   MON   COOL

又變番平常的日子啦, 今朝唔係靠蕃薯叫醒而係鬧鐘, 因為蕃薯又亂咗時間4點幾先飲, 7點叫笨元起身返學, 而蕃薯繼續瞓, 所以我泵咗奶先, 煮住早餐咁等蕃薯醒再餵奶, 然後到自己食早餐, 跟住就寫番哂幾日D日記啦, 一到星期六日就唔會有時間寫日記架啦! 不過蕃薯今朝就食得好差啦, 幾餐都食得好慢之餘又隔得耐都唔叫食, 都唔知佢想點! 中午時佢終於知醒, 先沖過涼再食奶, 不過都係食得麻麻地, 但佢今日好瞓得, 食完呢餐後又勁瞓, 於是我就走去清潔廚房, 今年都唔會做大型大掃除架啦, 因為換雪櫃同將傢俬移位時都執咗好多嘢! 4點多蕃薯才叫食, 餵完佢諗住玩陣點知佢又瞓, 不過嫲嫲揍笨元返嚟後佢好似知有人返咗, 就係到嘈啦, 不過嫲嫲準備咗D食材就回家啦, 因為佢肚痛咗幾日, 佢應該早D call我地搵人去接笨元放學嘛! 同笨元沖好涼就要佢溫多次英文, 不過條友成日話唔記得我就炆啦, 之前溫仲識, 點會今日唔記得, 老公回來後叫佢處理埋D雞翼, 我就煮埋飯, 今日簡單地雞翼菜飯咋! 食飯前同笨元溫哂, 食完飯洗埋碗我已經冇哂電, 好在之前已經沖好涼啫, 8點半已經喺梳化瞓著咗, 老公K.O. 咗笨元就叫我都入房瞓, 佢搞10點幾嗰餐, 入到房蕃薯喊住我都照瞓, 可想而知我幾攰!

12/1/14

12/1/14   SUN   COOL

今日休息日, 蕃薯1點6點幾食咗, 我泵完奶又再瞓過到10點, 而笨元放假就7點起咗身, 吹漲! 由得佢自由活動, 到10點多起身後, 餵埋蕃薯就出去食早餐, 今日隻蕃薯好醒, 食完早餐去惠康買嘢佢都醒住, 買完仲要去埋圖書館就可以回家啦! 返到去係要幫笨元再溫一次中文, 明天評估中文嘛! 溫到我好攰囉, 同佢溫完佢就自由啦, 我又要照顧粒蕃薯啦, 仲要泵奶等等, 到6點幾就要出門口, 今晚阿媽生日飯嘛, 推住車仔過去, 食食吓飯又要餵蕃薯啦, 由於老公要去踢波早走, 阿媽驚我搞唔掂係都要同我返去, 其實都係撘程巴士啫! 返到去馬上同笨元沖涼比佢睇掌門人, 我就泵埋奶K.O.埋笨元先有得沖涼, 而蕃薯就係咁喊, 可能今日老公係咁陪住佢玩, 所以冇人陪佢就喊囉,不過都冇辦法啦, 得我一個又要沖涼, 由得佢喊吓先啦! 沖完涼餵咗佢就hea吓等老公返嚟先一齊瞓啦, 蕃薯都係要睇佢幾時醒先再飲啦!

11/1/14

11/1/14   SAT   COOL

今日係忙碌的一天, 蕃薯4點幾飲過奶, 到我地要出門口佢都仲未叫食, 於是熱咗支人奶先, 出咗門口再算, 笨元要去畫班嘛, 去到麥當勞買緊嘢時程生剛到, 安頓好佢地兩個食嘢, 我就餵蕃薯飲奶, 老公就早咗兩個站落車放好蕃薯架戰車去婆婆屋企先, 再過嚟同我會合! 兩個細路食完程生就帶佢地上去學畫, 我同老公去食早餐, 然後上阿媽到因為老公要幫佢整牆! 等佢整得嚟都差不多去接笨元, 因為下場喺嘉桓生日會, 所以又同程生一家一齊, 先喺樓下上咗車, 去接兩個小朋友放畫班, 接埋程太同小B, 架車變咗8人車, 齊齊入長發食錢樂園生日會! 有個波波池, D小朋友當然顛哂啦, 笨元唔係捉佢出嚟食D嘢佢真係唔會停! 蕃薯當然比人輪啦, 呢個抱吓嗰個抱吓, 12點多叫食咪餵佢囉, 但又食得衰衰咁喎! 切埋蛋糕玩到點幾我地都閃啦, 因為仲有下場去剪頭髮, 由於太多行李不得不撘的士, 去到髮型屋又人多要等, 咪去食咗嘢先囉, 反正求先生日會D嘢食真係好一般! 食完再返去都係要等, 蕃薯又嘈咪食住奶等囉, 一個多小時後終於搞掂哂, 真係有D幾經辛苦的感覺, 終於可以回家了, 撘地鐵返去後, 休息吓囉, 老公瞓咗, 我就睇住笨元, 見差不多時間沖好涼煮埋飯先叫老公起身煮咖哩, 我就去抖陣, 笨元可能真係好餓加上咖哩係佢至愛, 所以食哂呢, 比佢睇埋套橫衝直撞就瞓啦, 我地都攰冇睇哂Harry Potter就瞓啦, 因為唔知蕃薯幾點嘈嘛, 攰就瞓咗先啦!

10/1/14

10/1/14   FRI   COLD

今朝我仲早過蕃薯醒, 因為要叫笨元佢地起身返學呢, 叫咗佢地起身蕃薯都叫食啦, 咁餵咗蕃薯我先可以泵奶, 之後就食早餐做公事寫日記等等, 好快又到佢下一餐奶啦! 冇咩特別都係咁做啦, 同佢沖埋涼餵埋奶咁, 下午都係自己煮飯食咋, 日日都係咁真係幾悶吓架! 見唔係太攰就冇瞓晏覺啦, 仲要洗吓衫咁啦! 今日老公揍笨元放學, 仲買埋壽司返嚟比佢做晚餐, 因為今晚要合唱團, 嫲嫲又有嘢做, 所以先餵飽笨元, 等老公返嚟, 夠鐘就帶埋蕃薯一齊揍笨元去合唱團, 我地就同程生仲有程小B一齊晚飯啦, 3個大人兩粒B一齊晚餐, 真係要幾亂有幾亂, 夠鐘就返去揍番佢地啦, 點知程小B又辦大事, 要借房換咗片先走得! 回家後K.O. 笨元又到蕃薯食奶, 之後都係瞓咗先, 睇佢幾點起身再食囉!

9/1/14

9/1/14   THU   COOL

蕃薯終於正常番少少2點左右嘈, 咁食完咪6點又再嘈囉, 呢兩餐都比5安佢啦, 轉佢4個鐘先飲一次時間好用D! 不過食5安佢臨尾嗰1安飲得好慢, 搞到我心大心細都唔知好唔好同佢轉! 餵完叫笨元起身返學叫到我火都嚟埋, 最終趕趕地出門口搞到冇帶珠心算袋, 睇嚟我地屋企仲要D時間適應多咗個新成員後分唔到心下點運作! 泵埋奶就煮早餐, 然後做吓公事咁囉, 蕃薯6點多食咗5安, 果然4個鐘都未叫食喎! 不過飲5安佢就飲得好慢, 所以暫時都係未可以實行5安6餐! 本來老公話佢幫笨元攞番珠心算袋返學校, 但後來發現夾唔到時間, 於是我食完午飯後就要準備帶埋蕃薯一齊去攞嘢比笨元, 兩點幾出門口, 撘地鐵就可以全程用車仔, 我又唔洗抱住佢大家都辛苦, 不過全程係咁行都好攰! 回家後都差不多4點, 不久蕃薯又要食啦, 食完我又要泵奶, 然後笨元放學返嚟, 同佢沖咗涼就溫英文, 食飯前仲有時間玩陣, 飯後休息吓又到老公同佢溫數學, 我就泵奶沖涼, 之後真係好眼瞓, 10點幾嗰餐老公餵, 我瞓先啦, 蕃薯到3點幾先叫食, 佢幾時先搞清楚D時間呢, 10點幾食完應該1點幾食, 跟住就食6點架嘛, 以後朝早要出門口時點來到佢D時間呢!

8/1/14

8/1/14   WED   COOL

蕃薯D時間又亂哂, 又唔疴屎, 都唔知佢想點! 4點幾先知醒飲奶, 所以7點幾先再醒, 今日程生順路載埋笨元返學, 但笨元又慢吞吞, 搞到我又鬧佢啦, 近來真係控制唔到成日鬧佢咁, 係因為佢成日都唔合作同埋做嘢好慢, 定係我要求太高呢?! 佢地出門口時我仲餵緊蕃薯, 後來程太whatapps嚟先記得笨元唔記得帶水樽, 都冇辦法啦! 餵完蕃薯我都要泵奶食早餐做公事等, 蕃薯而家醒多咗, 唔知係咪真係大個仔咗啦! 老公午飯返嚟食, 所以我都等佢買飯, 點知蕃薯D食奶時間錯哂搞到我都要餵咗佢先有得食呢! 之後老公都返公司啦, 我咪先泵咗奶再做家務囉, 近來開始有D得閒, 本來應該諗吓係咪揾吓新工, 但又真係冇咩動力咁喎, 我係咪真係太懶呢! 笨元放學返嚟先同佢沖個涼再溫英文, 但溫咗一本佢就已經想瞓, 於是比佢瞓到食飯先, 老公叫呢餐試吓比5安佢飲, 點知個衰仔唔多願咁, 飲到衰衰, 因為未餓夠呢! 飲唔哂就算, 下餐要夠鐘先有得食呀! 咁食完飯我又泵奶囉, 然後沖完涼又要幫笨元溫埋下半場, 跟住仲要餵蕃薯食奶, 今餐比多次5安佢試又OK喎, 睇吓今晚點啦!