16/3/14

16/3/14   SUN   COOL

今日冇出過門口, 我真係攰到邊到都唔想去, 朝早7點幾柏仲叫食, 餵完佢我要再補眠呀, 但笨元又醒咗, 又要我陪佢砌埋個LEGO先, 因為琴日老公帶咗佢去買禮物嘛, 佢評估又全A, 邊有得唔買! 砌咗一架先, 頂唔住要去瞓啦, 叫佢玩一陣就做埋D珠心算, 到我瞓醒11點幾, 老公煮咗早餐佢食, 我睇吓條友只係做得嗰幾題, 就趕佢入去做埋佢, 照樣係咁拖, 我地又係咁鬧啦, 12點幾同柏仲沖涼食奶, 又忍唔住影佢個豬樣! 食完奶又再瞓啦, 因為佢喊咗幾次都冇人理佢, 佢都廢事嘈! 子元喺做running men前都未做哂珠心算, 咁老公最終都放佢出嚟睇, 但一做廣告就要返入去做, 咁都算做得哂, 我就又洗衫又打掃咁啦, 叫老公換埋床單洗! 睇完running men老公決定唔出深水涉, 咁就叫Pizza食, 食完佢去踢波, 我又一揍二啦, 不過都唔係好洗揍, 柏仲就瞓, 子元就玩, 七點幾沖好涼, 柏仲開始醒, 都抱咗一輪架啦, 到九點都係嘈就放番佢入房喊, 喊咗陣老公返啦, 本來沖完涼想抱佢, 但又自己喊到攰瞓咗, 我食埋糖水都瞓啦, 12點多比老公叫醒, 半睡半醒咁餵埋柏仲就瞓啦!

<好好味的柏仲!>

 

15/3/14

15/3/14   SAT   COOL

今日係超勁忙及辛苦的一天, 朝早都係七點幾就要起身啦, 因為仲仲係到叫食啦, 叫醒老公搞掂佢我就揍笨元去畫班啦, 買埋早餐返公司食完就最後沖次啦, 係咁要印嘢啦, 其實時間都係啱啱好架咋! 1點買咗麥記食埋就出發啦, 2點多過到去都未有咩做, 等Nicho嚟到就開始搞D人名牌呀咁啦, 嗰時攞D花出嚟先發現佢全部都用咗針, 唔係扣, 我真係暈一暈呀, 點死呢! 最終打返去問佢, 佢梗推架, 話唔記得有講過要用扣, 我真係嬲到想殺人呀, 叫佢換過佢又話換唔到咁多, 最終叫咗深哥攞哂主禮同顧問嗰D返去整, 補救得幾多得幾多! 跟住都唔係好洗做簡介, 因為都係嗰班人幫手, 大家都做熟哂, 佢地都知應該點做, 做D咩, 加上今年不用就職, 司儀又係第二次做, 輕鬆好多! 係咁二化吓個妝再去開埋理事會都仲得, 今年D嘉賓都快齊人, 7:40已開始, 仲要台上流程都算順, 比預期還要快完成! 抽埋枱獎我終於可以坐吓食D嘢, 食完第二道菜又抽獎, 今年勁多獎抽, 所以佢地都唱得少咗歌! 我只知我係咁周圍走, 食一陣又郁, 命都冇! 由於上菜又快抽獎又快, 最後10點多已經完成, D人散得幾快呀, 我呢D梗係最早嚟就最遲走啦, 攞埋單可以走人, 好在有Nicho佢地載我地返去, 11點就返到去, 嫲嫲都返屋企啦, 我地沖好涼K.O.左笨元又到柏仲食奶, 搞到點幾鐘我終於可以瞓啦, 攰到咩都唔知啦!

 

14/3/14

14/3/14   FRI   COOL*

今朝小巴開始就要等車, 結果全日撘親車都要等, 因為已經趕唔切41A, 但估唔到等咗25分鐘先有車, 錯過呢班車, 我返工個時間班車又錯過咗, 朝早返到公司都閒GE, 加上我估到老細一定唔會比我好過, 明天商會D嘢一定會一改再改, 所以我咁早print定都冇用, 所以都係做吓自己嘢先! 午飯後喺番自己位食, 下午有客嚟嘛, 廢事搞到一陣飯味啦! 咁下午開始計劃吓點print嘢啦, 教咗明天幫手個同事後, 又要做妹仔去買咖啡, 回來後以為可以再繼續做好D嘢啦, 點知開始係咁有嘢改啦, 你改好一次以為搞掂啦, 又有電話叫你改嘢, 如我所料, 我搞到6:30都未收工, 但今晚要返去搞掂笨元D功課, 唔可以太晏, 同埋今日點都做唔哂架啦, 不如明天再做埋佢! 返到去原來老公已喺到, 搞掂埋笨元D功課就可以出去小童群益會啦, 安頓好佢地就去食嘢, 今日又試新嘢, 都可以啦! 9點多去接佢地時比佢地玩多陣就走啦, 回家後沖好涼就餵柏仲食奶, 明明平日食完奶放落床就瞓得, 但今晚放番落床就喊喎, 老公話由得佢喊, 咁最終係收咗聲GE, 但之後又再喊過, 老公先肯入去噯吓佢! 我就要執明天大龍鳳D嘢, 試埋衫等等!

13/3/14

13/3/14   THU   COOL

今日又係已經早咗起身, 點解都係做唔到7:15就餵奶! 出得門口都唔算趕, 揍咗佢返學到我返工啦, 而家車程就睇星星, 都唔知幾時先睇得完! 返到去都係做嘢啦, 老細無端端打返嚟話明天有客上嚟, 要執咗佢嗰邊個OFFICE, 我地已經即刻執同找人搬D嘢落鋪架啦, 都好似仲有嘢嫌咁, 真係好煩! 執好佢嗰D嘢先可以做番自己嘢呢, 話咁快又食飯, 好在佢地今日冇早返, 咁可以悠閒睇我套星星囉! 下午又要做公事啦, 位是永遠排不完的, 一時呢個話唔到, 一時嗰個話加人, 真係我顛先! 反正改極都改唔完, 明天再算, 夠鐘走人! 返到去笨元有做緊珠心算, 但慢動作嗰隻囉, 係要我喺隔離睇住先識快! 柏仲又要人抱, 咪抱住佢嚟教子元囉, 到食飯就要柏仲坐梳化囉, 佢真係好搞笑會自己玩手! 差不多8點又要走人啦, 返到去仲要沖涼溫默書, 搞掂先比佢玩陣, 好快又要瞓, 柏仲玩咗陣就比老公打暈咗先, 11點先叫佢起身食奶!

12/3/14

12/3/14   WED   COOL WET

今日柏仲終於乖乖地飲奶啦, 所以都唔算太趕! 返到學校又周圍走啦, 揍完佢我又返工買早餐啦, 朝早都幾free, 但午飯都未食完佢地就返, 搞到我為咗唔想見佢地走番去自己office嗰邊! 下午就慘啦, 係咁開會, 又要做妹仔去買下午茶, 最後仲要比人屈, 咁出糧比我嗰個屈我, 可以點啫! 年年搞商會D嘢都係咁, 公器私用! 搞到我6點先走得, 撘車又難撘人又多, 老公又話打比我冇人聽, 搞到我好炆! 不過上咗車, 開番套星星嚟睇舒服番哂! 返到去睇咗笨元D功課又再同柏仲玩吓, 再將件事發洩吓, 之後都冇咩嘢啦! 食飯時柏仲又坐喺梳化食住手睇住我地, 好似佢冇份食好慘咁! 8點左右走人啦, 因為怕落雨最終撘咗的士, 返去沖好涼同笨元溫埋默書佢就自由啦, 我就係咁執嘢, 到九點幾先可以坐吓, 老公噯咗柏仲佢都仲係喊, 於是由得佢喊到攰就瞓咗! 但十點幾又再醒咗, 仲要抱住都好唔自在咁, 就開奶比佢啦, 食飽瞓得, 我地睇埋新聞都瞓啦!

 

11/3/14

11/3/14   TUE   COLD

今日都係6點9起身啫, 唔明點解搞到7:30先開始餵到奶, 加上柏仲扭扭地, 仲要臨尾續親嘔, 又要老公去清理, 結果出得門口已7:55, 趕巴士勁驚險, 去到橋底有少少塞車, 但41A已到美孚口, 好在紅燈頂一頂住, 馬上叫司機比我地落車先, 過得切馬路就安全啦, 不過由於太刺激, 眼前開始黑, 耳仔聽唔到嘢, 我知我會暈, 但又唔可以暈, 就係靠一丁點意志扶一扶住, 終於清醒番上到車啦, 我都覺得好危險, 萬一真係暈咗就大件事! 返到學校好早啫, 笨元又玩到顛, 比我罰站完入到學校又比關主任話! 到我返工啦, 繼續邊睇我套來自星星的你咁, 真係幾好睇, 人地個個睇哂我先開始呢! 今日都一般忙啦, 要做的都做得七七八八, 只係人數上有機會加減啫, 咁都唔會好大變動, 做到咁上吓又食午飯啦, 老細勁早返嚟又係到不停講嘢, 好煩! 下午都係做喺商會嘢啦, 放工返到去今日仲仲唔放過我啦, 要扭吓計咁, 睇咗笨元功課溫埋默書, 就可以抱吓柏仲啦, 到我地食飯時柏仲就係咁喊, 好似話佢冇份食咁! 8點又走人啦, 返到去笨元洗咗白白可以自由啦, 柏仲坐咗出梳人都喊, 所以之後老公捉番佢入房噯, 到11點多就餵埋奶, 12點前可以瞓覺啦!