7/4/14

7/4/14   MON   COOL

今日嫲嫲過嚟, 所以起身都有時間跳番轉舞, 柏仲七點幾又自己醒咗, 就開奶餵住佢先, 等老公梳洗完就接手, 我地又趕住落樓, 今日有程生載埋我地入去, 同老師交代埋D嘢就可以返工啦, 又坐順風車, 不過要先載咗程太去油麻地先返轉頭! 買埋早餐返到公司都係hea吓吹吓水啦, 到差不多中午時, 公司D LIFT全部壞哂, 好在有帶飯啫! 午飯後都係睇吓電視咁啦, 老細唔返幾好! 下午悶到睇小說, 又冇人同我吹水喎! 放工早少少走呀, 要帶笨元去睇醫生, 程生車埋子元出嚟, 真係幫咗唔少! 即刻撘地鐵轉小巴過去, 都算快, 1小時內睇哂攞埋藥走得, 今次叫葉醫生開多一份藥, 以備不時之需, 回程時喺小巴已瞓咗, 搬到我死死吓, 落車都冇哂反應! 返到去即刻同佢沖咗涼先, 今晚阿媽煮飯, 奶奶睇住柏仲, 食完飯我洗好碗, 兩位老人家已回家, 我就一揍二啦, 先捉笨元溫咗書先, 然後本想打暈柏仲我就沖涼, 但佢又唔肯瞓, 於是放佢喺學行車, 叫子元幫我睇住先, 我快手沖個涼, 出嚟見到子元拉咗柏仲去睇電視, 唔怪得唔嘈啦! 叫笨元執好哂嘢就比佢玩5分鐘, 我就哄吓柏仲先, 佢條友眼瞓到暈都唔瞓, 結果講故事時就自自然瞓咗! 到11點幾叫醒佢食奶, 我諗佢真係好攰, 全程換片都冇咩反應, 好在放支奶入口都啜, 但臨尾嗰安就斷親啦, 見勢色唔對即刻將佢向住地下, 果然嘔番幾啖出嚟, 但最好笑係, 一嘔完…即刻瞓番, 真係比佢笑死! 好在佢肯飲埋嗰1安先瞓, 老公亦返嚟啦, 等佢沖埋涼抖陣就瞓啦!

6/4/14

6/4/14   SUN   RAIN

今朝柏仲又係八點幾先醒醒地, 等我梳洗完入去佢竟然瞓番, 好似嫌等得耐咁, 食完奶就叫老公煮早餐, 佢話不如食完早餐就出街, 可以就番柏仲食奶的時間, 咁快手食完早餐出去, 放咗柏仲喺車仔, 我地仲忙緊搞埋D手尾出門口, 但柏仲又喊緊, 好在笨元識搖住架車哄咗柏仲瞓, 咁就可以靜靜咁出發! 撘西鐵都好快到, 由中港城嗰邊行起, 最尾先睇玩具, 笨元初頭都唔滿意架, 好在講道理佢知都肯聽, 喺反斗城時順手買埋生日禮物比軒軒, 笨元睇咗勁耐玩具, 柏仲全程都冇咩嘈, 幾比面! 本來諗住撘巴士回家, 但落雨嘛唯有打的! 返到去叫外賣, 柏仲就飲奶後勁瞓, 笨元有得睇running men咩都唔理, 五點幾時佢兩父子都瞓埋, 我就執吓嘢咁, 冇人搗亂先執到嘢呢! 六點幾柏仲醒咗, 同佢玩咗半個鐘先開奶比佢, 跟住笨元醒埋就叫佢叫醒老公起身煮晚餐啦, 食完就先打暈隻仲, 再同笨元沖涼K.O. 埋佢, 終於自由啦, 打吓機咁幾自在, 要等到12點幾叫醒埋柏仲食奶先可以再瞓呢!

<扮蜘蛛俠!>

5/4/14

5/4/14   SAT   WARM

今日好似好攰咁, 攰過返工! 朝早柏仲八點幾先嘈, 好好啦, 餵咗佢就叫老公起身煮早餐, 食完早餐老公就揍笨元去畫班, 我就同柏仲玩吓啦, 佢又唔肯瞓又要扭, 老公買埋嘢回來後就打暈隻仲, 我就打掃, 本來下午佢地去咗踢波我就好free, 但因為老公覺得笨元都係咳得勁咗, 所以都係唔帶佢去踢, 回家後我就好難安靜啦, 柏仲飲咗奶又唔肯瞓喎, 加埋佢兩個多多事實, 我又要搞掂笨元D功課, 真係心力交碎! 到六點多餵埋柏仲就出門口, 約咗程生佢地食壽司呀, 佢地7點已經去咗等位, 都等咗1個鐘呀, 不過食得好痛快, 兩家人食咗1K呢, 嚟緊又要食番慳D, 不過由於子元好咳, 唔可以比佢食咁急, 最怕佢獲利回吐咋! 食完老公帶咗佢兩個去睇玩具, 等我地食埋就行吓超市, 因為程生會車我地返去, 咁順手入埋貨啦, 仲買咗部份生日會零食! 返到屋企先搞掂笨元條氣, 聞咗氣食咗藥好好多, 柏仲瞓咗唔洗理佢住, 沖好涼K.O. 笨元可以抖一抖先, 點知柏仲11點幾就喊醒, 好在食完又瞓番啫!

<婷婷同柏仲交流中!>

 <牙痕中!>

 <呢D咪叫比人擺上枱囉!>

4/4/14

4/4/14   FRI   WARM
柏仲今朝六點多就係到嘈, 搞到我不得不早起身服侍佢呢, 6點半開始食食到7點多先食完, 但又到服侍隻大GE, 打亂哂我D時間, 做唔到運動啦! 跟住打電話比嫲嫲又冇人聽, 幾擔心呀, 原來只係佢出咗門口先發現個電話冇電, 佢嚟咗我地就可以出門口! 我地今日咁早架巴士就咁遲, 搞到過哂8:30先返到去, 仲要有K2交隊活動, 混亂到不得了! 揍咗笨元我就可以返工啦, 返到去都係買早餐hea咁啦, 午飯時間後係睇吓電視咁啦, 下午都係做吓嘢又做吓自己嘢, 食埋tea又放工啦, 老公今日揍得切笨元, 咁我唔洗去敏瑩到揍佢可直接返屋企, 不過返到去柏仲又唔肯食奶, 又要服侍埋佢, 又要搞掂笨元的功課, 其實真係冇咩得停, 到七點幾就出門口去小童群益會合唱團, 我地大人就晚飯! 接番佢地後就玩到9點半先走人, 返到嚟老公哄咗柏仲瞓, 我地沖埋涼就捉笨元瞓覺啦, 我都好攰喺梳化瞓到12點先叫醒埋柏仲食奶, 跟住就可以齊齊瞓!

3/4/14

3/4/14   THU   RAIN

今朝我要揍兩個入青衣, 都唔算太趕的, 不過揍咗笨元入學校之後就追唔切架43B, 唯有行遠D個巴士站, 多D選擇! 上到奶奶到勁熱呀, 揹住隻蕃薯周圍走都幾係嘢! 又追巴士返工啦, 買埋早餐返去都係9:15啫, 算係咁! 朝早都係做吓嘢又吹吓水咁啦, 午飯後落咗去入票, 順手行吓街先返! 下午老細喺到, 好在都冇咩嘢找我啫, 都仲可以自由吓! 放工又係時候返去啦, 老公揍咗笨元放學就冇再返公司, 所以好早食飯, 不過都要笨元做咗功課先, 然後等柏仲醒咗, 就可以食蛋糕啦, 柏仲負責做道具比我地影相, 哈哈! 今次我用櫈自拍, 老實因為嫲嫲的拍攝技巧唔多掂, 上個月冇咩相用得唔係咁好! 食埋蛋糕都要閃啦, 因為老公攞住好重嘢, 最終撘的士返去, 沖好涼都冇幫笨元默書, 因為要佢做珠心算, 做得嚟都9點半, 所以比佢玩陣都瞓啦, 柏仲9點多已開始好不安, 但我都拖到9點半先餵佢, 都唔知佢扭瞓定扭食, 不過今晚食完放落床都冇即瞓, 可能墊高咗佢右邊唔舒服, 唯有等佢瞓冧咗先再墊啦! 我好快都眼瞓啦, 又喺梳化瞓著咗, 等老公用完電腦叫醒我先再入房瞓!

<兩父子似嘛?>

 <有人話三個人, 一個樣喎!>

 <加埋我落去如何?>

 <又食到西瓜口啦!>

 <牙痕中!>

2/4/14

2/4/14   WED   RAIN

今日請咗下午半日假, 柏仲要去健康院嘛! 朝早如常咁餵埋柏仲就出門口啦, 去到青衣勁大雨, 早一個站落馬上走上天橋! 返到去一陣就開門啦, 之後我又追巴士返工啦, 買埋早餐返到去, 總監好緊張咁打嚟, 會計又話老細會一早返嚟, 跟住又好神秘咁入咗廠嗰邊, 真係唔知做咩, 不過我上午都係做吓自己嘢, 夠一點我已即閃了, 天雨關係唔敢撘巴士, 走咗去撘地鐵, 返得青衣已1:40, 買埋個包返上奶奶到食咗就即刻帶埋柏仲去健康院, 2點先去到, 所以要遲少少, 首先磅重, 幾驚佢超重, 好在都係7.39KG, 即係16.258磅, 因為重量跟住生長線, 所以冇得度高喎, 之後就問埋護士有關柏仲條頸的問題, 佢話摸落就唔似肌肉性斜頸, 因為冇粒嘢喺頸, 不過見佢真係主力望右邊, 都照樣轉比醫生睇一睇, 睇之前打埋針, 今次喊得好可憐喎! 等咗一陣就有得見醫生, 都係幫佢摸咗先, 係唔似肌肉性斜頸, 不過由於佢側到一邊後尾枕扁咗, 影響咗個頭平衡, 所以要幫佢側番另一邊瞓, 唔係會嚴重架, 咁唯有墊住佢右邊等佢轉唔到過去啦! 比人舞完一輪都攰啦, 所以我地去食嘢時佢就好乖咁瞓咗, 仲諗住賣甩佢去揍笨元放學, 點知佢又醒咗, 咪帶埋佢落去囉, 見吓龍校長陳主任咁, 為未來學位鋪路呀! 比佢地玩完一輪先走, 等埋老公又走咗架43B, 於是撘的士啦, 柏仲夠鐘食奶啦, 食完奶又唔肯瞓, 要人抱住先瞓著, 放番落床瞓, 等我地食完飯佢又醒咗, 就一路都唔肯瞓啦, 今日真係冇咩瞓過呀! 七點幾撘的士回家, 返到去放佢喺車行吓, 都幾好心情架, 到老公沖涼時放番落床就勁喊啦, 但未搞掂救佢唔到呀, 喊咗15分鐘仲未收聲, 唯有抱住佢同笨元溫書囉, 咁佢又唔喊喎! 最後捱到9點半先開奶比佢呀, 唔可以咁早飲, 唔係好似今朝咁五點幾就醒醒地嘈醒我呢! 好在飲哂呢餐就瞓到豬仔咁啦, 我地都11點多就瞓啦, 而家咁大家都可以早瞓, 好事呢!

<等打針都咁開心!>

 <知驚未呀?>

 <接咗哥哥放學啦!>

 <洗唔洗咁肉緊呀..你睇你隻手臂, 引人犯罪呀!>

1/4/14

1/4/14   TUE   RAIN

朝早奶奶過嚟, 但柏仲喺我出門口前已醒咗, 咁又想食咁GE嘢咪餵咗佢先囉, 但已七點幾, 餵咗大半叫老公快D起身接手, 我要揍笨元出門口嘛! 入到青衣好大雨, 局住要行天橋! 好在我等巴士時又停番雨, 買埋早餐返到公司都係做吓自己嘢啦, 午飯後段老細已返咗嚟, 好嘈! 最慘仲要我將商會D相逐D選擇番出嚟曬比D會員, 咁又搞咗一大輪啦! 放工就返屋企, 柏仲食完奶都冇瞓, 笨元叫咗十世先沖涼, 之後叫佢做珠心算唔知點解係到扭, 最終老公返嚟時話同佢鬥快先好D, 明明就可以好快搞掂! 食飯又唔願意食, 因為放學時食咗魚柳包嘛! 咁由得佢冇食啦, 放佢休息吓, 等我洗埋碗就溫書, 執好嘢就自由啦! 柏仲發夢醒咗, 咁就喺床同佢玩咗一輪, 九點三已經好不安, 試吓開5安比佢, 食咗4安又唔肯食, 好在放落床都冇喊亦好快瞓番! 我地都好早, 未夠11點就瞓!