13/5/14

13/5/14   TUE   RAIN

今日都係阿媽過嚟揍柏仲啦, 起身後試焗麵包, 諗住比個新鮮笨元食, 點知佢係要食個隔夜GE, 是但啦! 奶都餵唔切就走人啦, 返到去唔太晏啦, 跟住我又趕返工啦, 買埋早餐返去嘆吓先! 都係上吓網等等, 冇咩特別嘢, 午飯後就睇吓電視啦, 下午chat得好忙, 又whatsapps, 又FB, 都唔知講得邊到! 放工馬上閃人啦, 因為要買料今晚煮晚餐, 由於得我同笨元食, 所以只係煮三文魚意粉, 再買埋腸仔火腿整麵包就返去, 阿媽已幫柏仲沖涼, 咁我就做少樣, 只係幫笨元沖啦, 不過柏仲一個人喺廳怕喎, 係咁想入廁所找我, 唯有抱一抱佢, 等笨元自己沖啦, 等佢沖好叫佢睇住柏仲我先可以安樂沖個涼, 然後邊預備晚餐邊同笨元溫習, 一得閒就抱一抱柏仲等佢唔洗成日坐喺學行車, 有時又放佢入床仔啦, 但佢近來勁練習反身, 叫哂救命咁好麻煩! 快手煮起個意粉食, 柏仲又喺你身邊痴住啦, 呢隻仔都係痴身! 洗埋碗就同笨元一齊整麵包, 都算幾成功, 搽蜜糖喺面好似樣, 笨元一整完已食咗一舊, 睇埋套too cute就要瞓啦, 柏仲就9點已頂唔住瞓咗, 我哄咗笨元瞓都喺梳化hea到老公返嚟, 食咗個甜品, 睇埋套韓劇就餵奶, 然後又喺梳化瞓咗, 因為老公想睇埋笑傲, 所以12點幾先瞓呢!

<好捧場呀!>

 

12/5/14

12/5/14   MON   CLOUD

今日只返半日工, 因為下午阿媽要去覆診, 所以我要請假揍柏仲! 朝早如常揍笨元返學, 之前餵咗柏仲食藥食奶先, 柏仲可能太早醒咗, 食完支奶又暈過! 因太趕買唔切麵包, 子元只係飲咗包奶咋! 買埋早餐返工, 我都係做吓自己嘢, 老細今日又飛啦, 真係好! 中午夠鐘就閃人, 買埋今晚餐餸就返去, 阿媽煮緊午餐, 柏仲就喺學行車到行去廚房門口等婆婆, 可愛到呢, 我地食飯時佢就走埋嚟, 真係得意起上嚟超惹人愛! 食完飯等我洗埋碗阿媽就去覆診, 我K.O.咗隻仲就準備今晚晚餐D嘢, 因為仲要出去揍笨元放學, 回來對住兩隻嘢點整得切! 簡單地焗雞翼同炒菜咋, 4點幾出去接笨元, 巴士又慢小巴又等客, 結果5點先去到接佢, 回程時笨元打瞌睡, 差不多拖佢返去咁滯, 辛苦得我呀! 等佢沖好涼醒咗睇陣電視休息咗, 就要溫習啦, 佢成日話唔知點溫習, 要靠呢幾個月訓練吓佢啦! 執埋書包校服就可以自由, 柏仲唔肯瞓, 喺床成日想反身又反唔到發脾氣, 準備好D料等老公差不多返嚟就煮埋少少嘢, 7點幾先食飯, 唔知係咪夠哂餓, 笨元好比面食哂一碗飯同5隻雞翼! 洗好碗我就整麵包, 嗰日買咗D麵粉同酵母唔整又過期! 整到發酵部份可以休息, 同笨元練吓合唱團表演的歌就瞓覺, 跟住休息吓到12點餵埋柏仲就再試焗麵包, 個衰仔寧願瞓得唔食, 飲得嗰2安!

11/5/14

11/5/14   SUN   RAIN

今日係母親節, 不過都係咁過啦, 朝早柏仲6點幾嘈過, 不過又瞓番, 咁到8點幾, 冇得唔理佢啦, 先餵咗藥, 過一陣就食埋奶, 跟住叫老公起身煮早餐, 收拾好就出去超市入貨, 老公話想整pizza, 因為上次煮嘢用淨D煙三文魚同ham, 咁就找食譜睇吓要用咩, 出去買埋啦, 好在朝早都冇落雨, 買齊嘢回來就捉笨元做埋D珠心算, 做running men之前做好一部份, 跟住就整個pizza餅底, 但D分量好似怪怪的, 好在最終都做得成, 要等發酵一個鐘, 咁就睇吓電視先啦, 柏仲點幾食咗奶後就勁瞓! 發酵好可以整啦, 都係怪怪地, 但點都焗成咗啦, 整餅一向都係要喺錯誤中學習架啦, 起碼食起上嚟都幾好味呀! 食完等到6點柏仲終於醒啦, 馬上餵奶食藥, 笨元就完成埋佢D珠算可以自由啦, 食埋奶又要出門口, 約咗阿嫲佢地晚飯, 不過等車時超大雨, 幾經辛苦終於去到酒樓, 比柏仲坐咗陣BB櫈, 都係坐唔穩, 正常GE, 等6個月左右應該先坐得穩! 上菜後都係抱番住佢好D, 因為開始扭眼瞓, 食咗藥嘛! 食到咁上吓阿嬸抱咗佢, 都瞓咗囉, 食完都即閃啦, 因為大雨呀, 好在我地上到巴士都唔會冧雨! 返到去馬上沖涼, 比笨元玩咗陣, 又要餵柏仲食藥食奶喎, 點都叫做分工合作到啦, 10點左右K.O.咗笨元, 就餵埋柏仲, 等老公睇埋場波11點幾瞓啦!

<好可愛的睡姿!>

 <比媽咪玩的柏仲!>

 <坐得愈來愈穩陣啦, 仲識玩腳!>

10/5/14

10/5/14   SAT   RAIN

今日都算是忙碌的一天, 朝早唔得閒理柏仲住, 因為要揍笨元去畫班, 柏仲留番比老公負責! 揍咗笨元去畫班我就買早餐返工, 返去都係hea 吓咁啦, 因為又要隨時預備老公要揍柏仲過嚟, 因為佢要去接奶奶出院, 好在程生幫我揍住笨元先, 咁已經幫輕咗好多! 12點時老公揍咗柏仲過嚟, 我仲叫咗佢攞車仔, 早知唔攞啦, 冇諗過走嗰時會咁煩, 一心淨係諗住仲有一個鐘先放工, 冇理由抱住佢一個鐘, 不過原來大家輪住嚟係可以抱足一個鐘架! 同事們玩柏仲玩得好開心啦, 差不多1點時程生揍咗笨元過嚟, 仲可以一齊閃, 送埋我上巴士先走, 真係超級多謝呀! 幾經辛苦終於返到屋企啦, 先餵柏仲食咗藥, 然後開水沖涼, 跟住餵埋支奶, 佢已經暈咗, 咁我就可以煮午餐比笨元啦, 柏仲都算合作, 一路瞓, 係喊醒過兩次, 噯吓都瞓番, 食完午餐就打掃, 跟住仲要摺衫啦, 總之就有做唔完的家務, 笨元亦都合作, 佢自己玩吓都OK! 柏仲5點幾醒咗, 都要理吓佢啦, 6點左右餵佢食奶但勁唔肯食, 不過又約咗7點去沙田食飯, 呢D時間就係好難夾, 最終都餵埋先啦, 怕佢去到先餵又咳又嘔整dirty人地地方就唔好嘛, 阿媽6點幾先嚟, 都差不多食哂啦, 咪可以出門口, 好好彩地兩程巴士都唔洗等, 7點幾已入到去, 馬上開飯啦, 笨元喺車瞓咗, 所以仲吽吽地, 食飽佢就自顧自畫嘢, 佢終於肯畫番畫唔打機, 不過就唔係好願叫人, 晚上問番佢先知, 佢係因為唔記得邊個打邊個所以先唔願叫, 我咪叫佢下次我逐個介紹多次等佢記得可以叫人囉! 晚飯後睇咗陣電視吹咗陣水, 柏仲比人玩咗一輪就走啦, 本來我撘巴士都冇咩問題, 不過阿媽話撘的士就是但啦! 返到去老公已在, 柏仲交比佢, 我同笨元沖咗涼先, 之後餵埋柏仲食藥, 再到12點到餵埋奶就瞓得啦!

<我煮的精美午餐!>

 <探班柏仲!>

9/5/14

9/5/14   FRI   RAIN

今日真係好大雨, 柏仲5點幾喊咗陣, 噯佢時佢啜到我隻手, 啜咗陣就瞓番, 笨元就4點幾時入嚟話佢張被亂咗, 真係唔知要幾時我先可以安樂瞓覺! 今朝覺得柏仲咳多咗, 睇怕都要睇醫生架啦! 揍笨元返學後都唔算太大雨, 買埋早餐返到公司就hea吓啦, 老細朝早返嚟, 好在只係喺樓下簽咗嘢就走! 咁感覺上今日都可以好free啦! 午飯後睇吓電視咁啦, 下午大老闆娘返咗嚟, 不過佢都係hea吓等個新抱嚟接番佢! 我咪上吓網無聊吓咁囉, 預咗早少少走, 因為要趕住同柏仲去睇醫生, 天雨關係撘小巴有著數, 用咗半個鐘就過到法國, 唔係好洗等就有得睇啦, 葉醫生都怕柏仲同子元一樣條氣唔好, 所以聽氣管時都好仔細, 話佢條氣都有少少緊, 所以開咗氣管藥, 跟住我講埋柏仲琴晚有少少燒, 葉醫生話咳咳吓有燒唔係咁好, 都係開埋抗生素, 最終嚟咗個全餐, 咳藥收鼻水化痰退燒抗生素噴鼻滴鼻, 五百幾蚊咋喎! 攞埋藥追到架42, 喺巴士可以休息吓! 7點幾去去小童群益會, 睇吓佢地練習, 子元比老師話唔夠專心, 不過整體嚟係唱得好好! 等埋程太嚟到就可以去晚飯, 勁餓呀因為已經8點幾9點啦, 近近地去咗板板到食咋! 食到差不多10點先回家, 返到去仲要沖涼, 餵柏仲食藥等等, 好在我地兩個都合作無間, 笨元11點已上床瞓, 柏仲食咗藥沖好涼亦都瞓咗, 咁我地就到12點先叫醒佢食一食奶再瞓!

8/5/14

8/5/14   THU   RAIN

柏仲琴晚足足醒咗3次, 12點, 2點, 4點, 真係nb時飲奶都唔會咁, 真係攰死我! 老公都算係咁, 我噯唔掂佢都主動噯! 到6點幾都係要起身啦, 餵埋奶我就閃啦, 又趕住揍子元返學, 叫老公起身睇住柏仲, 今日開始阿媽過嚟, 希望佢搞得掂啦! 我今日都好慘, 坐開office的, 要出去行咁多路真係辛苦! 深哥過嚟開好票, 執好嘢我就出門口, 去紅磡嗰邊睇吓有冇老細想要的飾物座, 老公refer咗條街我去找, 但原來係冇架, 唯有去番裕華睇, 去到時係有呀, 但又貴又未必啱用, 老細又係到whatsapps叫我做嘢, 咪話佢知我喺街啦, 最終同佢聯絡到, 佢都係要用相框做底座, 同配膠箱嗰種做法, 於是我沿上海街由佐敦道開始行, 先買咗個相框$150, 再一路行番鋪頭, 去訂膠箱同銅片, 好在有鋪頭做基地, 來來回回喺膠片鋪同獎牌鋪走來走去, 最終膠箱做咗$150, 銅片做咗$400, 貼埋張紅色絲絨$30, 搞掂哂已經2點, 先再撘地鐵返公司叮番個飯食, 真係餓同攰死我啦! 下午時段老細都有打番嚟eeoo, 唉…真係聽到佢把聲都煩! 4:45老公先打嚟話接唔到笨元放學, 結果我5:10就走, 飛去青衣接笨元, 落咗地鐵真跑咁滯, 5:30前接唔番仲要再比多$30托管費! 今日真係勁哂運動! 返到美孚去買埋蛋糕仔補番同柏仲慶5個月呀, 返到去要捉咗笨元沖涼先, 然後到我沖啦, 跟住比笨元玩吓先囉, 因為柏仲醒咗, 我又要同佢沖涼, 阿媽要煮飯嘛, 老公打返嚟話唔洗等佢食飯, 原來個客的大老細浦咗頭, 佢一定要整好埋部機先收得工! 咁我地3個食咗飯先囉, 清清地咁, 以為笨元會嫌棄, 不過個肚最公平, 肚餓就咩都食! 食完我洗埋碗先, 老公都返啦, 咁有佢接手阿媽就可以回家, 我就睇埋笨元功課, 溫埋默書就再比佢玩啦, 老公再叫咗外賣, 因d餸比笨元食哂! 笨元一路就係等緊Daddy食哂可以同柏仲影埋相佢就食個蛋糕仔! 咁柏仲自己喺房練轉身, 但轉極都轉唔到, 好搞笑! 影埋相食埋個蛋糕, 子元就瞓覺, 老公就哄埋柏仲瞓, 因為摸到佢好似有少少燒咁, 比咗退燒藥佢食咗瞓陣夜D先再食奶! K.O.笨元後就要摺埋D衫, 到11:30餵埋奶, 又再睇陣電視就瞓!

<意圖轉身連環圖>

 <柏仲5個月啦!>

 

7/5/14

7/5/14   WED
今朝柏仲未夠6點就喺到嘈, 老公又噯我又噯, 放埋佢上大床都冇用, 仲要坐喺到都唔肯, 見都六點幾就起身餵藥餵奶, 夠鐘就叫醒笨元同老公, 搞掂就出門口, 笨元仲要去買早餐! 揍完佢我就返工啦, 比老細琴晚個msg折磨咗成晚, 因為佢要個水晶座有lego喎, 搞到我又要問, 好在最終都搞到, 不過佢中午返嚟之後又整第二單嘢我煩, 買咗隻擺設嘢送比台灣個客, 要整個有座GE BOX嚟擺住佢, 結果搞咗我一個下午都得個吉, 明天繼續! 放工去咗曬大相, 唔係個贈卷又過期! 跟住咪返去睇我兩隻豬囉, 返到去奶奶話求先柏仲比條毛巾遮住咗個樣, 笨元又唔知要救佢, 好在最終佢都聽到柏仲求救咋! 我同笨元做好功課, 柏仲就醒啦, 又要抱住佢玩一輪囉, 老公今晚夜咗返, 我同笨元都好餓, 唯有食住等啦! 8點左右回家啦, 落住雨得一把遮咁, 梗係比柏仲遮啦! 回家後一時理吓個大一時理吓個細, 九點幾笨元瞓咗, 十點柏仲食奶, 之後先叫做可以自由吓!