6/11/14

 

6/11/14   THU   WARM

今日冇返到公司, 但依然係一早出門口, 約咗小柏8點半返OLR Sports Day, 帶住柏仲去威吓嘛, 返去都見到好多老師, 柏仲就梗係比人輪住抱啦, 佢就好在抱咗去都唔喊, 輪完去行吓吹吓水啦, stay到9點半要閃了, 撘巴士入去交比嫲嫲, 我又要過海了, 慢慢過到去都係11點, 做咗一輪嘢Nicho先到, 不久竟然係李太上嚟喎, 又係攞蛋糕上嚟啦, 但之後就唔開會喎! Stay到12點多先走, 我地就等佢走咗先去食嘢, 又係去翠華啦, 今次我試個牛肩扒, 雖然要等耐D, 但真係好好食! 返去之後搞會計嗰份文件先係最大問題, 原來要N咁多個人簽名, 在場的簽到就簽, 但又要邊開會邊搞都幾係難, 總之簽到幾多得幾多啦! 到開會員大會時都唔算太忙, 係之後點票就最攰啦, 好在都順利點好哂, 應該入圍的都入哂啦, 咁執埋D手尾已經5點, 真係好少有咁晏! 最後返得屋企都差不多6點, 好在一早預備哂嘢比阿媽同子元溫書啫! 咁我返到去佢都差不多溫哂啦, 今日攰到我真係冇哂動力, 只係簡單地罐頭湯意粉加煙三文魚咋! 期間都冇要子元再詳溫, 係要佢串吓字我聽囉, 我信阿媽會同佢溫得好好! 比佢玩吓輕鬆吓好過仲係咁迫佢溫啦, 食完飯做埋網上功課同柏仲玩吓就瞓覺啦, 柏仲食埋奶亦暈了, 咁我地又可以hea吓打吓機囉, 12點幾先瞓!

<返OLR Sports Day玩吓!>

 <柏仲最開心!>

5/11/14

5/11/14   WED   COOL

今日都係如常咁揍仔返學啦, 又係要捉先起身啦, 細嗰隻反而自動波! 返上樓餵完奶就入嫲嫲到啦, 食完早餐就返工啦, 今朝早要開會, 所以早上快手做好自己嘢就去受刑, 開到中午又好多嘢要做, 午飯後睇吓電視咁啦, 下午又要開會啦, 今日真係開會日, 攞命! 之後亦都唔少嘢跟, 又要預備明天商會開會D嘢, 因為朝早唔返架啦嘛! 放工去接笨元啦, 阿媽話同佢溫咗做咗卷架啦, 但返去都係要再溫, 中文佢始終都係差D! 返去沖好涼就煮住飯嚟同佢溫, 又要再睇吓功課咁呢, 總之忙到自己都唔知做咩啦, 洗碗抺地期間就叫佢做網上功課, 而家佢大致都做到! 唔洗太夜就瞓得啦, 柏仲就梗係9點多就食奶瞓啦! 終於自由啦, 又要執明天開會D嘢, 話哂開大會嘛! 12點幾先瞓呢!

<有個人仔又頑皮, 爬床頭櫃!>

4/11/14

4/11/14   TUE   COOL

我而家6點幾好似就自然會醒, 陰公! 叫醒笨元梳洗啦, 佢已經慢架啦, 到食早餐時仲要發顛話攞唔起個蛋糕, 最終連老公都起身鬧佢, 可想而知佢係幾衰, 喊住咁食埋個蛋糕出門口啦, 好在落到去都仲未有車啫! 返上樓搞掂埋D嘢就出門口, 老公今日要入青衣買嘢, 所以一齊撘巴士入去, 唔記得提佢叫嫲嫲叫定早餐先, 咁去到我有得食佢就冇得食住啦, 食完我就返工啦, 返到去都係hea吓咁啦, 都冇咩心機做嘢, 總之要做的就照做先啦, 午飯後都係睇吓雜誌咁, 下午老細都唔返架啦, 所以都好free咁做埋份中文卷, 今晚要攞定比阿媽等佢可以明天比子元做, 放工返到去子元都叫做溫過書啦, 但返去都要再溫架啦! 返去沖得涼嚟都7點多, 先對咗功課再溫書, 今晚煮D餸都可以行開行埋, 咁咪叫佢做吓又煮吓囉, 老公差不多8點返到嚟食飯後, 我洗碗時就叫子元做網上功課, 等我完成哂家務就可以同佢再溫書, 咁10點前都完成哂啦嘛, 我見仲有時寧願比佢休息好過, 但條友仔又食蘋果又睇電視咁, 都10點半先瞓! 我都勁攰, 11點幾已頂唔住要瞓, 老公唔洗睇電視啦嘛, 咪一齊囉, 勁快瞓著後聽到柏仲喊, 我仲以為半夜, 但原來12點都未夠, 可想而知我幾攰!

3/11/14

3/11/14   MON   COOL

今朝柏仲終於喺我鬧鐘響咗先起身, 又係半鬧半趕咁出門口啦, 落到去都仲可以等陣先有車到, 返上樓餵埋奶摺吓衫咁, 老公要過海8點就出口, 但我慢慢嚟搞到8點幾先閃, 本來等小巴架, 但見有42又即刻跑番去撘巴士啦! 過去食埋早餐就返工啦, 朝早要寫番幾日日記喎, 咁又已經一朝啦, 下午老細返咗嚟, 都要做吓嘢咁囉, 等佢走咗又做吓自己嘢啦, 係要時候再出吓卷, 但真係冇本書喺手好難出咁! 放工去接笨元啦, 阿媽話幫佢溫過書架, 但好似又唔識咁, 返到去沖好涼, 淨係著衫呢part, 用咗超過15分鐘我沖好涼佢都未著好, 跟住我叫佢入去溫書, 完全冇心機去溫, 但我已經冇力鬧, 到老公返嚟, 等佢沖涼時餵柏仲食飯, 但個衰仔又唔多食, 到大家埋位食再餵佢就BU, 今晚全晚我竟然冇發顛, 唔知係咪已經冇哂能量! 陸生唔知係咪feel到我股磁場唔對路, 竟然主動幫手執吓碗, 真係難得! 到我抺好地, 笨元都仲係一pat屎咁, 叫佢溫書要寫出嚟, 佢又唔寫又唔睇, 完全係容祖兒首歌--天然呆! 最終我冇同佢溫, 只係對好嘢執嘢叫佢做網上功課, 因為手冊話佢欠交宗教作業, 但我都找唔到而我又記得上個cycle時已交咗, 佢應該係喺第二日就交咗而唔係等下個cycle先交, 咁寫番手冊同老師講囉! 做得嚟已經10點幾先瞓, 可能我個心已經好攰, 真係冇力鬧佢, 加上未迫到埋身同已經咁夜, 你爆佢都係sai咗630-830嗰兩個鐘, 不如諗個方法明天我先嚟K.O.你! 睇電視hea吓咁到12點就瞓啦!

2/11/14

2/11/14   SUN   WARM*

今日係忙碌的一天, 我都真係好攰! 朝早又係6點幾比人嘈醒, 不過我都7點幾先起身, 餵柏仲食奶時又食得一半就唔飲, 唯有叫老公之後餵, 我要揍笨元去畫班, 跟住又要去買餸, 返屋企後見柏仲未瞓, 但原來佢喺已經瞓咗9個字咁大把, 我都唔理啦, 整好D嘢又要過去接畫班, 但冇巴士搞到要程生幫我接埋喺麥記等, 之後咪上珠心算囉, 又要交錢, 真係肉都痛埋! 放學就同敏瑩佢地食個快飯, 然後又要趕去踢波啦, 我就係到等, 因為老公佢自己去咗踢波嘛, 要我頂囉, 到點幾佢先過到嚟, 但又要食埋飯先再嚟, 到兩點多我閃先啦, 我要返去睇running man呀, 返到去嫲嫲就閃了, 柏仲瞓咗, 我可以休息啦, hea睇running man, 冇人嘈冇人煩不知幾爽, 3點幾佢地都返咗嚟, 又要催笨元沖好涼先啦, 等我睇完running man就開始溫中文, 我都係一路溫一路諗應該點溫架咋, 都溫咗個幾鐘, 抖咗一次咁大把啦, 6點幾就出去食飯啦, 都係近近地去美心咋, 食完就返去啦, 喺樓下撞到嵐嵐佢地, 又吹咗陣水比佢地喺遊樂場玩咗陣囉! 回家後沖涼做埋網上功課就瞓覺啦, 柏仲早早瞓咗啦, 終於可以打吓機睇吓電視, 係睇埋十級重案先瞓!

<今日畫作係萬聖節!>

 

 <較為似樣的傳球!>

<等出街!>

<柏仲11個月大啦!>

1/11/14

1/11/14   SAT   WARM

亂咗時間的柏仲繼續6點多就醒, 我又係完全冇辦法, 哄佢又哄唔番, 真係攞命, 到7點幾起身啦, 梳洗完餵埋奶就出門口, 返去都係hea都唔知自己做咗D咩, 放工買KFC就返屋企食, 本來想早D同佢溫吓書, 3點多先過去打乒乓波, 點知朝早叫佢做吓珠心算完全唔識喎, 咁食完嘢再教番佢時完全係到瞓, 最終集兩人之力先得, 又激到我顛咗, 最憎佢諗都唔諗就話唔識! 結果只係做咗呢樣就要出門口, 仲要遲哂, 出到去又等唔到小巴要撘地鐵, 行餐死去到已3:50, 學校關咗門, 好在都按門鐘入到去, 跟住我去咗Aeon買吓餸, 買D惠康嗰邊冇架啦, 折扣埋百四蚊左右啫, 忍唔住買咗底雞蛋仔先去接笨元, 撘巴士返去沖個涼又出門口, 因為約咗敏瑩佢地食晚飯, 又去上次嗰間打雞煲邊爐, 最搞笑係嫲嫲都叫咗我地book位佢同D FD嚟食, 去到先見到我地, 幾有驚喜呢! 今次食得有策略D, 不過要揍住柏仲就食得辛苦D囉, 食到7點幾要埋單啦, 返去後就沖涼K.O.哂兩隻嘢可以休息了!