7/3/15

7/3/15   SAT   COOL

今日如常咁返工啦, 都係做吓自己嘢吹吓水咁, 今日子元只學乒乓球, 所以只係我放工買飯返去食就算, 返到去柏仲仲瞓緊, 我地快手食完等佢醒咗餵完佢又執嘢出街, 其實都係揍子元去學乒乓, 然後我地行陣街去食tea咁啦, 午餐叫KFC分埋比兩隻仔我地都唔夠! 食完又夠鐘去接笨元啦, 等佢換好衫就去撘巴士, 老公話去圓方睇衫, 因為嚟緊要飲嗰三單都真係未有衫! 叫做買齊啦, 我都買咗對鞋, 雖然都三百幾蚊, 但老公話而家D鞋係要咁上吓價錢! 跟住上咗去遊樂場玩, 笨元都係好多game玩唔到架, 叫佢試又係話唔得, 有時都好激氣, 柏仲就唔知死咁, 兩兄弟撈番混D就啱! 玩到差不多8點要走啦, 本來想喺圓方食晚餐, 但人多到顛, 笨元又係到咳喎, 又唔知要等幾耐, 結果返番美孚先食米線, 柏仲瞓咗, 上半場可以食得清靜D! 食完子元又再咳, 梗係啦食得咁急, 所以叫佢企出鋪頭出面, 廢事佢嘔dirty人地地方, 跟住又話想飲嘢, 於是比錢佢自己去759買嘢飲, 其實都有少少唔放心GE, 但都放手比佢試吓, 最終好叻仔咁買咗佢飲開的朱古力奶返嚟! 回家後快手沖涼休息啦, 出半日街都已經好攰呢!

<見咩都爬! 我應該同佢轉件蜘蛛俠!>

 

 

 

6/3/15

6/3/15   FRI   COOL

今日時間過得好快, 可能真係多嘢做啦! 朝早帶埋柏仲落樓啦, 佢又走咗上校車坐, 真係好可愛, 唔願落車仲要bye我! 老公起身後一齊出去食完早餐, 我就返工了, 根本就忙到未停過, 老細又千里傳訊咁要我地找人幫佢抽HSBC的紀念鈔, 最終根本人人都自己抽哂啦, 所以得番三兩個可以幫佢抽, 但就已經搞住哂我做嘢囉, 所以今日都冇咩時間做商會D嘢! 午飯因為唔記得帶飯局住要去買, 簡單地食車仔麵咋! 下午又忙過啦, 放工即閃去買餸返屋企放低, 又即刻執嘢返出去接笨元合唱團再去游水啦, 老公同柏仲喺屋企瞓到豬咁, 程太揍咗敏瑩去游水, 上到嚟都瞓埋, 我就靜靜咁喺廚房煮飯, 雖然冇得休息, 但靜靜咁做嘢都係一種享受, 夠鐘就程太出去接番佢地, 我煮起飯遇番時間開飯, 食完煮埋就抺地再吹一輪水, 講個房點整張三邊落床GE床囉! 最後沖好涼休息都12點啦, hea 咗陣喺梳化瞓到1點先入房瞓!

<我返學啦媽媽!>

 <兩個走咗上床玩!>

5/3/15

5/3/15   THU   COLD

今日商會嗰邊團拜, 所以都冇返公司, 自己食個快早餐就撘巴士過去, 都要1個鐘, 過到去都算早啦, 寫吓票先, 點知十點幾已經開始有人嚟, 跟住咪好忙亂咁囉, 寫一陣嘢又要恭喜發財, 不過有得收利是就算啦! 12點多行落去酒樓啦, 呢餐足足食咗兩個鐘, 上菜上得好慢囉, 我地打工嗰D一枱, 可以傾吓輕鬆嘢, 講吓旅行咁都OK! 食完就返番上商會做嘢, 都做到4點幾先走得, 叫媽揍子元落巴士站, 咁我可以直接返屋企換好衫放低嘢, 再出發入青衣, 返上青梅切咗蛋糕先落青衣城食飯, 叫咗個6人餐因為奶奶想食片皮鴨, 所以都真係食得幾吃力呢, 柏仲又瞓咗, 搞到我要抱住佢食, 真係夠哂攰, 我今日午餐又食得飽喎! 食到9點先食完, 返得去沖好涼再快手趕笨元執嘢, K.O.埋柏仲, 11點多先到我可以沖涼呢, 超攰!

 

4/3/15

4/3/15   WED   COOL

今日都係如常咁返學啦, 揍埋柏仲落樓因為佢醒咗喺到嘈! 之後都係做埋D嘢叫醒老公就一齊去食早餐然後我返工啦! 中午前林醫生嗰邊打嚟話原來子元係今日做職業治療, 結果搞到踢哂腳, 又要找嫲嫲出嚟睇住柏仲, 又要叫校車姨姨放學時找子元撘校車返嚟美孚! 好在最終都安排到, 咁我就安心地做商會D嘢啦, 真係要的起心肝做啦, 因為迫到埋身了! 所以下午過得好快呀, 放工返去接更, 奶奶趕住返屋企收衫, 咁我就襯柏仲未瞓醒快沖個涼再煮飯啦, 煮起佢地都未返就叫醒柏仲食咗先, 等佢兩父子回來快手食埋沖好涼就入房督住子元做功課了, 快極都做咗1個鐘, 仲要餵埋柏仲食奶呢, 真係忙死人, 結果11點多先完全搞掂哂自由呢!

3/3/15

3/3/15   TUE   COOL

今朝又係拖子元出門口咁滯啦, 放咗兩星期假, 係難回魂D架啦! 老公今個星期off, 齊齊出去食早餐佢就揍番柏仲回家啦, 我就返工啦, 今日未有mood做公事, 所以開始寫吓新加坡之旅的執行李清單! 又要找吓網上有咩check list可以參考吓囉, 午飯後睇吓電視咁啦, 時間過得好快呀! 4點時阿媽打嚟話子元冇著外套, 話喺校車但又冇校車姨姨電話, 總之搞完一輪原來唔喺校車, 咁我咪同佢返學校找囉, 叫嬸嬸上課室找過又冇, 佢就叫我去講台嗰到找, 當然都係冇啦, 但我攞番兩件啱size又不太舊的就算了! 返去都有丙佢呀, 真係個頭唔係痴住佢都漏得呀! 回家後都係沖涼煮飯, 叫咗子元溫書架, 都唔知佢有冇溫啦, 星期六日真係要搵番時間溫! 飯後抺完地終於到我沖涼啦, 之後餵埋柏仲對埋功課默埋書咪放佢瞓囉! 終於有D自由時間啦, 睇埋電視12點多就瞓啦!

2/3/15

2/3/15   MON   COOL

今日回復正常生活啦, 又要6點幾起身, 好辛苦咁捉隻笨起身, 三催四請咁先出到門口, 返上樓摺埋衫先理柏仲, 食完奶叫醒老公起身入嫲嫲到, 食埋早餐去銀行攞錢比佢返上去打金就返工! 今日都係做吓公事又做吓私事咁啦, 午飯去買飯勁多人, 好晏先有得食! 下午都係做自己嘢, 總監返咗嚟不過佢都勁忙, 找我傾完少少嘢就算! 放工返去接笨元, 回家後奶奶就閃了, 趕住返去收衫喎, 咁好在柏仲瞓緊, 於是快手叫笨元沖涼同煮飯先, 不過笨元都係慢, 做功課又話唔識, 咪教佢找書囉, 終於煮完飯食得, 叫醒埋柏仲一齊食, 唔比佢瞓咁晏啦, 陣間唔肯瞓咪死火! 洗碗抺地時叫笨元睇住柏仲都OK, 但都係玩得太顛! 之後齊齊喺廳玩, 但我攰到瞓鬼咗, 玩到9:30要執嘢啦, 笨元又嘆慢板啦, 叫佢刷牙洗茶點袋, 又係定哂格望住個電視唔郁, 控制唔到自己啦, 於是咪爆佢囉, 開咗兩次門話趕佢走佢就唔喊, 終於做好嗰兩樣嘢, 我都餵完奶, 老公又返咗, K.O.咗柏仲, 入房同子元講數啦! 希望講完佢明白自己問題係邊啦, 樣樣嘢都唔夠自動波真係好煩, 倒退哂咁! 終於搞掂D嘢就拆吓利是啦, 今年收入都唔錯, 夠去新加坡的現金洗費啦! 12點多喺梳化瞓著咗, 老公就差不多1點先叫醒我入番房瞓啦, 見到柏仲瞓到打哂風咁!

1/3/15

1/3/15   SUN   COOL

子元的悠長假完結了, 但今日如常的忙碌! 朝早都係要拖佢起身, 冇法啦要去畫班嘛, 齊齊出去食早餐, 送咗笨元上畫室我地就去茶餐廳食, 然後我就帶笨元返美孚買咗餸先, 回家後諗住K.O.柏仲我可以整餸啦, 點知條友仔係都唔肯瞓, 咁我諗住放佢喺床仔喊陣就瞓著啦, 照去廚房整餸! 過咗陣聽到冇聲以為佢瞓咗啦, 想入去同佢蓋被, 點知一開門條友企咗喺地下喎, 仲要笑住口嗰隻, 原來佢自己喺BB床爬咗落嚟, 至衰冇cam拍下, 我真係好想知佢點爬落嚟! 再試一次K.O.佢, 同樣地入番廚房做嘢, 又係靜咗喎, 一開門…今次喺我地張大床, 仲攞咗我支火酒係到玩, 真係比佢激死, 我投降啦唔迫佢瞓, 煮飯仔佢食算啦! 陪佢玩到咁上吓食得飯啦, 食完又玩囉, 2點多頂唔住啦, 食完支奶就瞓啦! 終於可以抖吓啦, 不久老公揍咗子元返來佢又去踢波啦, 幫子元沖好涼食吓嘢睇吓running man, 柏仲喊醒喎, 以為佢瞓夠啦, 點知仲係扭, 咁抱住佢坐吓梳化佢又瞓番, 但放落床又喊喎, 搞咗一輪先肯再瞓多一個鐘! 差不多6點醒了, 就約老公去荃灣會合食晚飯, 然後行陣商場就回家! 沖好涼執嘢瞓覺啦, 明天又開始要6點幾起身啦!

<想用哥哥引柏仲爬一次出來!>