6/5/15

6/5/15   WED   HOT+

今日柏仲又一早走咗上嚟大床搞搞震! 揍咗哥哥返學就等嫲嫲嚟揍住仲仲, 老公要出去買返工用嗰D嘢! 一齊食完早餐我就返工先, 返到去又冇人skype, 好悶呀! 我又冇咩心機做嘢喎! 勁hea地過咗一朝, 的起心肝整埋D相去曬, 午飯後去咗曬相, 又去咗買麥記新的雪糕食, 好滿足! 下午老細返咗嚟, 又要開會咁, 所以都冇咩機會做自己嘢, 但我就無聊地喺到plan柏仲到時間房的床點搞, 雖則都係起碼4年後的事, 但就係想諗吓! 放工返咗美孚先, 夠鐘就過去接笨元放功課班, 柏仲瞓緊, 等夠鐘老公同嫲嫲會揍佢出去食嘢地方會合, 我揍咗笨元就撘巴士過曼克頓山啦, 今日係笨元舊曆生日, 嫲嫲話要出嚟食飯慶祝喎, 食完返去時又去咗買雪糕, 滿載而歸返去啦, 個天終於落得出雨, 快手跳上巴士就安全啦! 返到去忙亂地沖好涼, 叫笨元做埋功課, 條友一做功課就眼瞓, 激死, 做完叫佢瞓佢又話要食埋雪糕! 終於瞓得啦, 我地亦可以嘆雪糕啦, 睇埋新聞咁上吓就瞓啦!

5/5/15

5/5/15   TUE   HOT

今日都係如常咁起身揍返學, 入嫲嫲屋企然後返工啦! 返到去都係做吓自己嘢, 上網吹吓水啦, 夠鐘又食飯啦, 下午老細返嚟就要幫佢pack嘢寄過去比佢老婆, 4點多佢就走啦, 真係! 返嚟食埋tea, hea吓就閃人, 返阿媽到同佢D花澆吓水, 執番D滅蟲器等, 由於唔想開電器, 所以我都係早D過去YMCA等子元放功課班算, 起碼有冷氣嘛! 7點多都放架啦, 但子元又要做埋默書改正先走得, 佢真係咩都慢D架! 今日程生嚟接, 等埋我地先一齊走, 又陪我地等埋巴士, 返到屋企都7:45啦, 老公都揍咗柏仲返嚟, 咁快手叫子元沖涼我就煮飯先, 8:30已經食完飯, 真係好快手呀! 叫佢兩個一個吸塵一個抺地, 咁起碼可以快D睇子元功課, 遲D等阿媽返嚟可以早D返屋企, 希望有時間每日溫一溫書, 否則大考唔知點死! 柏仲9點就扭瞓, 快手餵咗佢K.O.埋, 就叫老公處理埋柏仲, 我就可以沖涼等等啦! 睇吓電視hea吓又瞓覺啦!

4/5/15

4/5/15   MON   HOT**

今日起我開始要揍柏仲入嫲嫲到啦, 老公去上完嗰D平安卡堂就開始返工, 都好GE, 有工返有收入先掂架嘛! 今朝柏仲瞓到差不多7點先起身, 叫做好少少啦等我瞓吓, 反而就要捉大嗰隻起身返學! 返上樓後又要摺衫, 搞掂出門口入嫲嫲到, 等咗一陣車就有啦, 去到喺麥記會合, 茶水站冇咗嘛! 但我都冇時間食, 快手返工啦! 朝早返去補番哂D日記, 不過最慘係冇冷氣, 只靠風扇勁焗囉! 午飯買回來食, 下午以為老細唔返啦, 點知3點幾先返, 好在簽吓嘢吹陣水就閃咗, 放工過咗Aeon嗰邊買餸, 因為7點先去接笨元放功課班, 最想係去買榴槤啫! 買好就撘巴士返過去等夠鐘揍子元啦, 過咗7點先放, 又轉咗miss, 佢又係話子元係咁講嘢, 就算唔比佢同人講, 佢都係咁自己講, 唉! 我明子元係唔想囉, 但人地一個睇幾個又好難容許你咁做, 頂埋呢兩星期啦, 等婆婆返嚟就自由架啦! 見佢都攰啦, 返到去都叫佢快D沖好涼, 我就煮飯啦, 比佢休息吓打吓機, 但都要同佢執番好個時間表! 老公8點多返到, 但我都仲煮緊飯, 咪叫佢沖涼先囉, 返到屋企個幾鐘煮好飯沖埋涼都算係咁, 食埋飯都9點多, 要分工合作啦, 老公拖地, 我洗碗, 子元執書包, 9點半叫做可以睇功課, 餵埋柏仲, K.O.埋笨元就可以休息, 食我個榴槤, 真係好味到唔知點形容! 享受完睇多陣電視都瞓啦!

3/5/15

3/5/15   SUN   HOT

今日柏仲7點先醒, 真係要感恩啦, 起碼可以hea到8點多先起身, 子元又走埋入嚟玩, hea到差不多9點幾先出門口, 因為今日唔洗畫班, 所以過去食早餐後, 再上阿媽到幫佢滅蟲, 老公去搞我就揍住兩個喺遊樂場玩陣, 之後就我揍柏仲回家, 老公揍子元去學珠算, 柏仲就係回去嗰程瞓咗大半個鐘, 返到屋企一陣就醒, 咁我就煮埋飯仔同佢一齊食啦, 然後都係玩吓囉, 玩到3點幾老公同笨元踢完波返, 咁大家睇完Running man就各自搞掂一件, 我同笨元溫書, 老公打暈柏仲, 溫完書做埋視藝, 就比子元玩吓, 我就hea吓囉, 約吓程生佢地晚飯, 由於細嗰兩個都瞓哂, 最終7點半叫醒佢地就過去海麗邨食五十嵐, 日式茶記咁, 但又幾好食喎! 食得嚟返屋企9點幾, 返到去快手沖涼K.O.柏仲, 笨元又掛住睇Iron man 3, 比佢睇到10點幾11點先瞓, 沖完涼其實我都想瞓, 但老公陪柏仲瞓咗晏覺唔攰, 結果點幾先瞓!

 

 

 

2/5/15

2/5/15   SAT   HOT

今日請咗半日假, 因為老公要揍子元去足球比賽, 冇人揍住柏仲! 咁7點多老公起身揍子元, 柏仲扭計就放咗佢落大床, 我就同佢瞓吓玩吓咁囉, 係唔比佢出房, 到8點幾時又扭扭地, 想瞓番喎, 咁咪齊齊瞓囉, 咁就再瞓到10點幾我先醒, 不過咁醒完再瞓又比柏仲依住都係瞓得麻麻, 但難得係我好似冇同佢咁喺大床一齊瞓過, 我一向都唔同意同床架嘛! 我醒咗擺脫佢起身梳洗後, 煮咗個麵食, 食到尾聲柏仲就醒啦, 冇咩啱比佢食, 只係食咗支奶咋! 打比老公約咗不如喺學校嗰邊等, 一齊食午飯, 因為子元踢完波再返學校乒乓球, 過得去都差不多3點, 食咗大快活就去行吓Aeon, 買咗仲仲的罐裝飯仔, 因為今日都煮唔切嘢佢食! 行到夠鐘就去接笨元, 馬上又要趕下場, 去林醫生到, 剛好5點多去到, 佢就上堂我地就揍住柏仲喺出面等囉, 之後都係講吓進度啦, 可以再下個月先嚟睇, 7月先覆診, 希望到時唔洗再嚟睇啦! 搞掂就打道回府, 今晚煮牛扒配杯麵, 但笨元又話個麵辣, 之後又要再煮個福麵佢食, 總之食嗰時就煩煩地啦, 食完就K.O.柏仲, 又要同子元整個mask, 我都要啦, 靚靚完就瞓!

 

 

 

1/5/15

1/5/15   FRI   HOT
今日明明係假期, 但6點就比人嘈醒, 真係好殘忍! 8點幾出去食早餐, 笨元又話要試吓唔用輔助輪踩單車, 咁老公咪幫佢拆咗囉, 去食早餐時踩一陣唔多成功, 但都冇咩GE, 但食完落去再試, 係咁唔得又整到就喺到顛啦, 仲要發脾氣, 我咪火囉, 鬧佢仲要惡番你轉頭, 仲要走咗去, 真係火到我顛, 最終係找得番佢, 但都搞咗一輪先肯返上樓啦, 我真係未試過咁嬲! 咁返上樓後同佢對埋功課, 老公就負責仲仲, k.o.咗仲仲又對哂功課後, 我就頂唔住入咗子元房瞓覺! 瞓到點幾柏仲醒咗先約程生佢地出去食TEA, 落樓先知A座有人跳樓, 唉...又嚟! 不過我都睇唔到D咩, 都係聽到! 跟住出到大家樂食完嘢就去荔枝角公園玩啦, 遊樂場隔離就係單車徑, 大細都有得玩, 大人又有位坐吓輪吓更! 玩到5點幾返去啦, 諗住各自返屋企沖完涼再去曼克頓山食晚飯, 但撘緊巴士返去時見好多消防車向屋企方向走, 真係荔欣苑火燭, 不過就係C座, 老實講真係鬆咗口氣先, 跟住就係大家打電話通消息, 都真係燒得好勁, 十幾層向上都黑哂, 我地可以照返屋企, 但C座就要梳散! 返去沖好涼就休息一陣出門口, 本來想食元氣但勁多人, 最後轉咗場食茶記, 都好食呀! 食完去掃埋貨就回家了!