13/5/18

13/5/18  SUN   HOT

母親節嘛….但完全唔覺得有咩開心事囉, 兩個係咁激我, 子元仲要病喎, 唉…比佢玩死! 朝早9點先起身, 本來都冇咩, 咁我見有時間咪煮早餐囉, 但老公又要過去長沙灣攞車, 諗住攞完車返上嚟先食, 不過煮得嚟原來已經10點, 可能我真係整得太多, 算啦…我唔煮早餐啦, 都冇人欣賞! 咁快食完老公就揍子元去打鼓, 我叫佢唔洗等我, 一來仲爺又未食完, 二來我又未換衫梳頭, 咁唯有我自己帶佢去球場囉, 都遲咗架啦因為我真係做唔切咁多嘢, 仲爺都踢得唔多投入咁, 不過完場時教練問今日教咗咩, 條友又識得答架喎, 你真係吹佢唔漲! 返到屋企就沖好涼比佢自由吓啦, 點知1點幾老公突然同子元返來, 話子元又嘔又肚痛喎, 唉…應該係腸胃炎啦, 沖完涼佢就入咗房瞓, 下午開始我又心情唔好啦, 又未買今晚煮飯啲嘢, 老公叫我去買, 諗諗吓係佢煮不如佢去買啦, 咁我就喺屋企囉, 仲爺又唔肯瞓…好煩, 老公買完嘢返嚟, 話唔記得買午餐, 咁就我落去買, 食完子元精神啲就同佢溫埋書先, 黃昏起佢又瞓, 到媽媽們過嚟食晚飯佢都仲瞓緊, 仲爺又唔合作, 踢到阿姨啲花等, 都係搏鬧架啦! 終於煮起食飯啦, 又中又西好fusion咁啦! 子元終於肯落床, 原來係因為好頭痛好熱, 一探38度幾呀, 好在有退燒藥喺到馬上食咗先, 又捉佢去沖涼啦, 沖咗涼好咗啲啦, 大家食完飯都走啦, 我仲要洗碗吸塵抺地, 還有睇住兩隻, 子元醒番好多, 仲爺沖好涼但一般合作, 都係迫我發難咗一次! 叫做K.O.咗仲仲, 子元就等老公買麵包回來比佢食, 11點多我地都眼瞓, 執埋嘢瞓覺!

12/5/18

12/5/18.  SAT.  HOT

今朝點都去見埋份工，雖然唔知佢比咩價位， 但應承咗就點都要去見埋先，所以7點幾就起身啦， 因為見9點， 到附近老公放下我就送子元去畫班，買咗三文治食就去見，都等咗差不多半個鐘先上去office，一嚟都係填表啦，然後要用電腦做封投訴信，老土啲講真係小菜一碟，仲話要20分鐘內做完，我真係唔洗20分鐘囉，呢啲信洗鬼長編大論咩，寫完就見人啦，唔知係咪冇咩負擔，所以見起上嚟好輕鬆，講嘢亦好順𣈱！見完去揍番子元放英文再同老公會合，上阿媽到攞番個書包， 返去休息吓， 老公就揍仲仲去學音樂，我就同子元喺屋企， 初頭温書又未得住因為佢未做哂工課， 到我做好家務佢都係未得， 咁我咪去買大快活返去食囉，跟住先開始温書，但仲爺又返，所以都𠰴一温得幾耐木， 佢又要去游水啦，我就去咗超市shopping，等子元遊完水就去找嫲嫲晚飯，回家後發覺有美國隊長做，子元就睇哂先瞓！

11/5/18

11/5/18.  FRI.  HOT*

今朝老公要早返公司， 所以揍咗我地入青衣佢就閃，送咗仲仲返學就痴車去撘地鐵， 買埋早餐返公司啦，都係咁做吓公事又做吓自己嘢啦，突然收到個電話， 係星期三喺牛頭角見嗰份工，話請找喎但要去驗身先， 咁我快極都要星期三先安排到，驗完差不多一星期有部報告，咁冇問題就24號可以辭工！當吓我真係好亂呀，真係請？我做得掂？時間地點真係配合到？原來都要時間去整理思緒， 咁重點係我係咪想離開呢到， 若果係就唔洗諗咁多啦， 去到邊做嘢都係咁做， 但起碼要有番個存在價值先， 好過比人炒先走嘛！咁經過啲時間諗清楚，就決定驗好身冇問題就辭啦！放工趕去接笨元畫班再去摩士選拔，仲爺嚟到就要睇住佢會辛苦啲囉， 選完就成班去食晚飯， 又飲咗啲酒咁啦，都吹到9點幾10點才散，真係夠哂攰呀！

10/5/18

10/5/18   THU   RAIN

今日如常咁揍仔返學, 買埋早餐返去食, 跟住都係做吓自己嘢, 都係搵吓工啦, 其實我又開始迷茫, 咩工先啱我, 我又要就時間, 到時要返得早, 老公又係返早更, 咁仲爺點呢, 子元晚上要踢波咁邊個揍佢呢, 地點亦不能太遠, 唉! 我好似要做一個後援咁, 好多嘢都困得好死, 時間不能有太大改變! 所以真係好難搵咁, 但呢到又真係做唔落去, 老細下星期返我又好大壓力架啦! 午飯後都係無聊吓啦, 下午繼續搵工, 放工快腳返去接子元, 今日九龍灣選拔, 落住雨咁真係夠哂辛苦, 好在今次呢個球場有看台, 可以舒舒服服咁坐吓睇吓手機, 又睇吓隻豬仔選成點啦! 8點多老公打嚟話冇帶key, 結果過來接埋我地返去, 嫲嫲整咗紙包骨, 咁煮個麵就食得! 快手K.O.埋仲爺我要沖涼休息!

9/5/18

9/5/18   WED   RAIN

今日要去見工, 所以朝早搞掂佢地三父子出門口, 我就煮吓做餐執吓嘢換好衫化埋個妝出門口去見工, 某程度上我唔係太知今日份工做咩, 所以見嗰時可能都準備得唔夠, 同埋聽完佢介紹, 其實我係一般想做, 但你上得去見你又好難開口話: 我諗唔係好啱做! 所以都係照見囉, 只可以話攞多個經驗! 見完返去都12點幾, 快手整好午餐煲啖粥, 然後摺衫等等, 又開住我個步步驚心邊睇邊做囉! 差不多時間又要返工啦, 返去都係做吓自己嘢, 又寄咗一份CV出去, 我都係想做學校post囉, 除非有啲真係好啱, 所以都係唔好亂send啦! 放工同老公會合接埋子元去球場, 今日要選拔, 都踢得OK GE, 不過照顧住仲爺就辛苦啲囉, 成日要走嚟走去同人玩又嘈喎, 終於捱到散場叫老公帶咗仲爺上車, 我就去聽埋教練有咩講! 晚飯去譚仔快食完就返屋企, 子元仲要做功課, 仲爺就對埋功課好瞓啦, 佢地3父子瞓哂我就自由啦, 又唔眼瞓喎, 咪再睇吓電視先, 12點幾才瞓!

8/5/18

8/5/18   TUE   RAIN

今日都係咁揍仔返學啦, 朝早買埋早餐返去食, 做吓自己嘢send吓工啦, 今日好勁喎, 有4份嘢叫我見, 但最終都係安排2份, 一份明天見, 一份星期六, 係學校同信和, 睇吓點啦, 一講要見工就總會覺得驚, 始終都係煩氣嘢嘛又要請假! 午飯後都係睇吓電視啦, 下午繼續努力, 放工前子元打比我話佢已經走得, 於是叫咗佢過來公司樓下找我, 都叻仔做得到喎, 我都慢慢要放手架啦! 撘地鐵過到黃竹坑, 今日早咗可以自己踢吓先! 等佢兩個鐘真係幾辛苦, 又好多飛蟻等等! 終於走得啦, 要揍埋漢褀去長沙灣同老公會合一齊食晚飯, 等朱欣嚟接番個仔, 都10點幾先返到屋企, 仲要沖涼執嘢等等, 真係攰到顛!

7/5/18

7/5/18   MON   HOT

今朝仲爺又因為見到我揍完子元校車上嚟就喺到扭, 真係好煩呀教極都唔明咁! 快手搞掂出門口仲好啦! 揍咗仲爺返學就閃了, 返到公司都係寫吓日記先, 跟住就開吓會, 聽佢地廢話吓! 跟住就同朋友skype吹水, 大家都有大家的煩惱, 互相呻吓啦! 午飯返咗屋企, 因為我唔記得食血壓藥, 總係覺得唔知點咁, 所以都係返去食藥穩陣啲! 下午全力找工, 個人好灰, 再唔逃離呢到我真係唔掂! 放工返去接笨元, 買埋餸煮飯啦, 到開飯時三催四請先幫手, 真係最乞人憎, 想做死我! 之後還要吸塵抺地, 不枉我教育子元要幫忙, 最終今日只係睇哂功課, 仲爺溫咗書, 子元就冇啦, 我去沖涼前佢已經瞓咗!