12/4/14

12/4/14   SAT   HOT

今日又回復番平日的星期六, 朝早起身後要揍子元去畫班, 開咗奶比老公叫佢餵柏仲, 同笨元過到去敏瑩都未到, 剛買好時佢地就到, 原來小B都過咗嚟, 但樓下冇位, 唯有抬埋佢上樓上, 食到差不多夠鐘, 我就帶咗兩個上去先, 撘lift時竟然壞壞地, 上到3樓又落番地下, 又再上番去, 好在開到門, 嚇死我! 揍好佢地我就馬上閃啦, 趕返工呀, 不過都係hea 過一朝! 12點幾老公帶哂兩隻豬仔上嚟, 柏仲係咁比佢地輪, 仲比人玩到喊, 好在我又冇咩所謂, 但柏仲個樣真係好慘咁! 夠1點就閃了, 落去食KFC笨元又要去踢波, 柏仲可能比佢地玩到冇哂電, 落到樓就瞓咗, 到我食嘢時又醒番, 瞓得半個鐘都冇! 返到去一陣kit就上嚟, 攞個新玩兒比柏仲, 因為未食嘢又順手係到食D嘢先, 好在我都仲冇D儲貨啫! 我就照樣吸塵抺地等, 柏仲食完奶又係唔多肯瞓, 到佢地走哂先瞓咗一個鐘左右, 由於佢醒咗, 咁就帶埋佢出去旺角睇LEGO, 最終買咗兩份比笨元做生日禮物, 話埋比阿姨知佢想要邊份, 佢係勁心急想拆嚟玩, 不過都要喺適當的場合, 返到長沙灣仲未夠鐘同敏瑩佢地食飯, 所以上阿媽到餵咗柏仲食奶先, 阿媽話可以放低埋佢喺到食完飯先嚟接佢, 咁就好囉, 可以食餐安樂茶飯! 食完上去揍番柏仲先再去食雪糕, 然後先返屋企! 返到去笨元馬上肯沖涼, 因為搞掂D嘢就可以砌佢D LEGO嘛, 今晚先比佢砌咗細嗰盒, 因為已經太夜啦! 我地都勁攰, 兩個喺梳化瞓著咗, 到點幾先知醒起身餵柏仲食埋餐奶再瞓!

<快叉中!>

11/4/14

11/4/14   FRI   WARM

今朝嫲嫲過嚟, 所以我都冇咁早起身, 但柏仲又好早醒咗喎, 冇得唔理佢, 咁搞掂又未夠鐘就開奶比佢啦, 餵咗一陣又係到玩嘢, 我見又差不多夠鐘啦就交比嫲嫲接手, 我地就出門口啦, 老公今日唔洗咁早返, 可以送埋笨元返學先, 跟住仲同我食埋早餐先客自返工呢, 我攞埋商會D相先返公司, 朝早都係做吓自己嘢先, 因為老細上午唔會返, 要做樣都要留番下午嘛, 午飯仲要落去買, 食完打吓機咁, 夠鐘又返去做吓嘢啦, 老細返咗嚟就攞埋D相比佢, 等佢地走咗都叫做可以自由番! 放工夠鐘就走人啦, 去惠康買嘢, 比錢時先發現張卷過咗期, 蝕咗12蚊, 可惡! 搬哂D貨返去又要睇笨元D功課, 柏仲又唔肯瞓, 好在老公陪佢玩, 咁我可以搞掂笨元D功課先, 但都搞到7:50先出到門口去合唱團, 今日得程生帶住小B嚟食晚餐, 簡單D去咗食吉野家, 婷婷真係冇時停, 柏仲都冇心情, 眼瞓又唔瞓係到扭, 食食吓老公接到大包電話, 話可以攞D紙袋, 咁佢就要出去攞, 得番我同程生返去揍佢地, 又要玩一輪玩具先, 9點半先走, 柏仲就比D工作人員玩咗一輪, 喺BB車時因為推住就瞓咗, 點知返到屋企我諗住同笨元沖涼時佢就喊啦, 唯有放佢喺學行車先, 然後再等笨元著好衫幫我睇住柏仲我再去沖, 不過柏仲應該係又餓又扭眼瞓, 所以咩都唔理係咁喊, 但我都要梳洗完先服侍得佢架, 真係沖完個涼頭都冇吹就餵咗奶先, 6安食哂瞓咗! 終於可以休息一吓, 搵吓西貢戶外康樂中心仲有冇日營位可以去玩吓, 但只餘下黃昏營唔啱玩!

<食手食到幾肉緊!>

 <食番斯文D先!>

10/4/14

10/4/14   THU   WARM

今日終於撘得切巴士啦, 朝早如常咁梳洗完叫醒柏仲食奶, 子元鬧鐘未響就起咗身, 佢都怕再同唔到敏瑩一架車呢! 送咗佢返學就撘車返工啦, 食埋個早餐又要開埋商會D票, 之後都係睇吓自己嘢, 午飯老細打嚟問埋D無謂嘢, 因為佢要去開會, 咁等唔到位泊車, 竟然叫我打去叫人地叫個停車場放佢架車入去, 佢話入面有D AM位, 你都識講係政府位啦, 咁係D官泊架嘛, 邊有得比你泊呀, 佢真係慣咗去到邊都有特權! 阻住哂我D時間, 約咗CW攞番柏仲的保單呢! 下午完全私人時間, 真好呢! 放工直接去葵芳食晚飯, 我勁肚餓呢, 等佢地嚟埋就可以叫嘢食啦, 試比D銀絲卷柏仲食, 都係未識, 再大個D先啦! 食完去新都會換埋架搖控巴士, 去實惠睇吓油壓床就走啦, 回家後柏仲一路都唔肯瞓, 但我地又有嘢要做嘛, 唔可以成日抱住陪住, 所以都要放佢喺床仔喊吓, K.O.咗笨元到10點多就餵佢, 條友仔食手都唔食奶, 扭眼瞓呢, 最終食咗4安多D就瞓囉, 我地就hea到11點幾先瞓呢!

<好溫柔的子元呢!>

 <嘆蝦毛中!>

 <近來勁食手!>

9/4/14

9/4/14   WED   WARM

今朝又超唔切撘41A啦, 本來都好準時, 未夠7:50就已經出到門口, 點知笨元隻牙甩淨少少, 要整埋出嚟先得, 但佢又係咁縮, 整咗好耐, 結果咪遲咗出門口囉, 又要撘地鐵行到隻嘢咁, 仲要問我點解兩日都撘唔到巴士, 我真係無名火起, 咪因為你囉, 頂! 返到公司都係做吓自己嘢啦, D lift都未整好哂, 但已經好咗好多! 上午都係做自己嘢多, 午飯後預備要開會囉, 真係好唔鐘意開會, 因為老細講D嘢廢話居多, 真係好浪費時間, 終於4點幾可以叫做開完, 自由啦! 夠鐘就放工閃人, 返到去老公已在, 所以早D食飯, 柏仲當然冇瞓啦, 同笨元睇咗功課就同柏仲玩吓, 到我地食飯時柏仲就辦大事, 咁益我!! 七點幾就閃人啦, 冇瞓咁多個鐘柏仲梗係瞓啦, 返到去都扭咗一陣, 哄咗陣就瞓番, 沖完涼本來應該同笨元溫默書, 但佢又攞咗交通安全隊D工作紙嚟做, 做得嚟都夜咪冇默囉, 瞓覺緊要D! 等佢瞓咗我地又自由吓, 11點幾先餵奶, 個衰豬又食淨, 唯有由得佢囉!

<冇牙笨!>

 <兩個開始有互動!>

 <主力子元玩柏仲!>

 <Daddy完成了的Pinata>

8/4/14

8/4/14   TUE   RAIN+

今日係我地入青衣啦, 不過樣樣慢咗就超唔切撘41A, 結果又要撘地鐵, 行到我隻嘢咁! 返到去仲要再排隊尾, 陰公! 好在趕得切撘開嗰班巴士返工, 但公司個lift仲未整好, 勁長龍, 諗住行上去算啦, 當做吓運動, 點知上到5樓防盜門lock 咗入唔到去, 唯有經停車場去番撘lift, 咁點都快過喺地下排! 返到去仲食緊早餐大老闆娘返咗, 因為佢地今日去拜山, 喺公司出車喎, 搞到我食早餐都食得唔自在! 不過佢地上午唔喺到又幾free GE, 睇睇吓FB, 見到家寶生得啦, 琴日先講緊16號開刀, 或者之前咩情況就要順產, 今日就生得! 午飯後都係睇吓電視咁啦, 下午老細返咗嚟, 又有公事要做, 好在都唔算太難做! 放工都算準時走架啦, 返到去先同笨元睇功課, 然後又要陪吓柏仲玩, 食飯時都係要放番柏仲喺床仔, 因為坐佢又想向前中, 但放床佢都係咁想轉身, 真係唔知點安置佢好! 差不多時間就回家啦, 喺巴士柏仲已瞓咗, 返去放落床照瞓, 咁就可以輕鬆搞笨元同沖涼, 到11點幾先叫醒柏仲食奶, 又係瞓住食囉, 好在冇嘔但飲淨一安, 寧願瞓都唔食咪由佢囉, 我地12點幾都瞓啦!

7/4/14

7/4/14   MON   COOL

今日嫲嫲過嚟, 所以起身都有時間跳番轉舞, 柏仲七點幾又自己醒咗, 就開奶餵住佢先, 等老公梳洗完就接手, 我地又趕住落樓, 今日有程生載埋我地入去, 同老師交代埋D嘢就可以返工啦, 又坐順風車, 不過要先載咗程太去油麻地先返轉頭! 買埋早餐返到公司都係hea吓吹吓水啦, 到差不多中午時, 公司D LIFT全部壞哂, 好在有帶飯啫! 午飯後都係睇吓電視咁啦, 老細唔返幾好! 下午悶到睇小說, 又冇人同我吹水喎! 放工早少少走呀, 要帶笨元去睇醫生, 程生車埋子元出嚟, 真係幫咗唔少! 即刻撘地鐵轉小巴過去, 都算快, 1小時內睇哂攞埋藥走得, 今次叫葉醫生開多一份藥, 以備不時之需, 回程時喺小巴已瞓咗, 搬到我死死吓, 落車都冇哂反應! 返到去即刻同佢沖咗涼先, 今晚阿媽煮飯, 奶奶睇住柏仲, 食完飯我洗好碗, 兩位老人家已回家, 我就一揍二啦, 先捉笨元溫咗書先, 然後本想打暈柏仲我就沖涼, 但佢又唔肯瞓, 於是放佢喺學行車, 叫子元幫我睇住先, 我快手沖個涼, 出嚟見到子元拉咗柏仲去睇電視, 唔怪得唔嘈啦! 叫笨元執好哂嘢就比佢玩5分鐘, 我就哄吓柏仲先, 佢條友眼瞓到暈都唔瞓, 結果講故事時就自自然瞓咗! 到11點幾叫醒佢食奶, 我諗佢真係好攰, 全程換片都冇咩反應, 好在放支奶入口都啜, 但臨尾嗰安就斷親啦, 見勢色唔對即刻將佢向住地下, 果然嘔番幾啖出嚟, 但最好笑係, 一嘔完…即刻瞓番, 真係比佢笑死! 好在佢肯飲埋嗰1安先瞓, 老公亦返嚟啦, 等佢沖埋涼抖陣就瞓啦!

6/4/14

6/4/14   SUN   RAIN

今朝柏仲又係八點幾先醒醒地, 等我梳洗完入去佢竟然瞓番, 好似嫌等得耐咁, 食完奶就叫老公煮早餐, 佢話不如食完早餐就出街, 可以就番柏仲食奶的時間, 咁快手食完早餐出去, 放咗柏仲喺車仔, 我地仲忙緊搞埋D手尾出門口, 但柏仲又喊緊, 好在笨元識搖住架車哄咗柏仲瞓, 咁就可以靜靜咁出發! 撘西鐵都好快到, 由中港城嗰邊行起, 最尾先睇玩具, 笨元初頭都唔滿意架, 好在講道理佢知都肯聽, 喺反斗城時順手買埋生日禮物比軒軒, 笨元睇咗勁耐玩具, 柏仲全程都冇咩嘈, 幾比面! 本來諗住撘巴士回家, 但落雨嘛唯有打的! 返到去叫外賣, 柏仲就飲奶後勁瞓, 笨元有得睇running men咩都唔理, 五點幾時佢兩父子都瞓埋, 我就執吓嘢咁, 冇人搗亂先執到嘢呢! 六點幾柏仲醒咗, 同佢玩咗半個鐘先開奶比佢, 跟住笨元醒埋就叫佢叫醒老公起身煮晚餐啦, 食完就先打暈隻仲, 再同笨元沖涼K.O. 埋佢, 終於自由啦, 打吓機咁幾自在, 要等到12點幾叫醒埋柏仲食奶先可以再瞓呢!

<扮蜘蛛俠!>