13/2/18

13/2/18   TUE   COLD

今日都係要返工啦, 差不多8點先知醒起身, 所以都好趕呀, 老公冇車我地, 只係揍仲爺入青衣! 我同子元搞掂就自己撘巴士過去阿媽到, 本來諗住叫佢自己撘多兩個站落車, 但見佢係咁講自己嘢, 都係唔放心, 揍咗佢就自己行返工囉! 今日都已經非常holiday mood, 加上明天請咗假陪仲仲去迪士尼, 所以更加冇心情做! 午飯食蘿蔔糕加個米粉咋, 跟住都係睇吓電視啦, 下午都係等放工, 嫲嫲叫我地返青衣食, 清吓星期日晚D餸, 唔係真係食到初一! 咁接埋子元就入去啦, 都要7點先入到去, 食完飯睇吓電視, 再落青衣城行咗陣, 幫子元買咗件衫過年啦, 返得屋企都10點多, 搞掂埋佢地我就整糕, 一整就整到12點先入爐, 我才去沖涼, 摺埋衫等等蒸咗一個鐘就可以, 等個糕放涼了就放雪櫃, 玩到點幾先瞓!

 

12/2/18

12/2/18   MON   COLD

今日子元同仲爺喺嫲嫲到, 所以送咗佢地出門口就可以, 我慢慢執埋啲嘢先出門口, 買埋早餐返去食! 今日又唔洗開會, 都好GE, 做吓自己嘢啦! 老細們返哂澳洲輕鬆好多! 午餐出咗去食日本嘢, 食咗個刺身飯唔錯喎! 下午都係做自己嘢, 本來想買戲飛但網上買去到最後嗰part又唔得喎, 頂! 最終都係冇買到! 放工要同奶奶會合接番兩個細, 明明話大包一齊揍佢地出嚟架嘛, 結果又唔喺屋企, 要嫲嫲同佢地撘車出嚟! 咁我再揍佢兩個去北角, 呢D時間撘地鐵真係好辛苦, 今次帶埋仲爺又要抱住佢, 喺金鐘等咗4部車先迫到上去, 過到北角都過哂6:30啦, 仲爺喺球場梗係周圍搞啦, 終於等到老公嚟到, 我可以上車打吓機啦, 仲爺就一時喺車睇機一時又要落球場玩! 等到8點幾終於散啦, 去食埋嘢就返屋企, 都係快手K.O.哂佢地沖涼瞓覺啦!

11/2/18

11/2/18   SUN   COLD*

今朝9點要起身, 叫佢地快手換衫出門口, 子元要學英文, 我地就去食早餐買吓嘢, 今年決定點都蒸吓蘿蔔糕, 所以買齊料返去! 接咗子元老公就帶佢去踢波, 我就同仲仲返屋企, 3大任務包括同仲爺做功課, 蒸蘿蔔糕, 洗衫摺衫! 2點幾老公都未返到, 我同仲爺就試食埋個蘿蔔糕, 除咗開粉個水多咗令到唔企身外, 味道係完全冇問題! 咁打比阿嫲問吓佢應該點整, 下次可以再試! 子元返到嚟換好衫又出街, 今次去奧海城, 終於喺NB買到鞋, 雖然買唔到童裝, 但買到貼的都可以啦, 老公又話幫子元買埋, 咁又成千蚊啦, 不過著一年的都OK啦, 比佢地去睇咗陣玩具就走啦, 返青衣食團年飯, 嫲嫲煮得好誇張多, 食極都唔完! 之後睇吓電視咁, 9點幾先返屋企, 搞掂佢地打吓機咁都12點幾先瞓!

10/2/18

10/2/18   SAT   COOL

今日長周, 老公就自己帶住兩隻仔去踢波, 主要係子元踢波囉, 今日子元要踢兩場, 真係夠哂充實! 我返工都係hea 吓啦! 放工老公就嚟交收子元比我, 不過因為仲仲都未攞音樂袋, 都係要車我地返屋企攞番個袋比佢, 咁仲仲就去學音樂, 我就同子元去食午飯然後返上樓大掃除啦, 其實都唔算好多嘢抺, 話哂裝修完都抺咗好多嘢, 主力係抺門窗同廚廁, 不過都幾攰吓! 抺完都4點幾, 帶子元去游水, 跟住就返去摺埋啲衫, 7點落去接番佢就出去行吓買吓年貨, 去咗荷李活廣場, 因為要等泊車, 我就自己去行住先, 買咗衫比我同仲仲, 但就買唔到波鞋囉! 食埋晚餐都回家啦, 返去沖涼休息!

 

9/2/18

9/2/18   FRI   COLD

今朝阿媽過嚟揍兩隻細, 奶奶下午先來接手! 我今朝要抽血, 阿媽早嚟到, 我可以坐老公車去醫院等抽血, 搞得嚟都9點多先走得, 返到長沙灣廣場食埋早餐先返公司, 廢事暈咗! 返到去都係等開會啦, 開完會又出現麻煩事啦, 因為啲果籃問題, 大咪又爭嘢嚟做, 咩都識人…唉…算啦…放長雙眼睇吓咩叫花無百日紅GE道理! 對住呢個對人唔對事GE老細嚟講, 佢鍾意GE你買啲爛嘢返嚟都話好! 其實都冇話心唔心淡, 我都變咗old seafood架啦, 不求有功但求無過, 個個月有糧出就算! 午飯都係睇吓電視, 琴晚瞓咗冇睇哂! 下午老細都喺到阻頭阻勢, 算…佢下星期走足一個月! 捱到5點半走得, 老公嚟車我, 已經接咗仲仲, 去畫室接埋子元就可以過球場, 不過今日真係周圍都塞車, 過到去都過哂6點半! 仲爺瞓咗我喺車睇劇陪佢, 7點幾醒咗就帶咗佢去遊戲室玩, 但其實真係冇咩玩, 佢又要我陪住佢先肯玩喎, 好在8點要閂門, 咁子元都踢完, 咁就一齊去食團年飯, 阿sir已經book咗酒樓, 都係比啲細路一齊團吓年咁啫, 食得嚟返屋企都10點多囉, 快手捉佢地沖涼瞓覺, settle哂都12點多, 打咗陣機都瞓!

8/2/18

8/2/18   THU   COLD

今日開始提早放農曆年假嘛, 我都想有得放! 朝早瞓7點幾, 鬧鐘響咗都冇起身, 好在聽到仲爺把聲, 唔算遲咗好多, 不過起身後好多嘢做, 要處理佢地再出門口已經差不多8點半, 都已經趕架啦, 我話子元去買麵包先佢又話去到婆婆到先買, 咁我就駁佢話其實你攞車佢買包唔影響架喎, 佢先冇聲出! 送咗子元去婆婆到, 我就買早餐返工, 仲爺去嫲嫲到! 中午前老細就返咗, 真係好唔想見到佢架, 但都要比嘢佢簽吓浦吓頭, 午飯時間都喺到阻住哂, 唯有喺番個位食飯睇劇囉! 下午都要搵啲嘢做吓, 夠鐘馬上收工去小童接番笨元, 條友又唔喺小童等我落咗樓下, 好在我都啱啱到啫! 一齊去買埋餸返屋企, 佢就自由活動啦, 我就煮飯囉! 7點幾8點食得, 之後就要禁食, 因為明早要抽血! 咁做好哂啲家務就可以沖涼啦! 仲仲冇食晚飯因為瞓咗, 子元就掛住睇平安谷, 不過佢都有啲用GE, 睇完叫佢落去管理處攞吓垃圾袋咁! 今晚好眼瞓, 都冇睇哂劇就瞓啦!

7/2/18

7/2/18   WED   COLD

今朝又要整午餐比笨元帶, 時間都有啲趕但佢肯快手就已經好好多! 落樓買埋包仲爺食就返學啦, 今日出去參觀, 直接喺迴旋處等, 佢地一痴埋就好嘈! 上咗車我就去食早餐, 跟住就要去佐敦照腎, 見法國醫院咁貴, 把心一橫book普通醫療中心嗰D, 馬上有得照有得攞! 照個過程都幾得意囉, 其實都唔知佢照咗啲咩, 真係唔識睇, 但之後睇番佢張紙話樣樣都正常, 咁到時見醫生再算啦! 然後就返工啦, 返到去不久就係咁收到不同group send出嚟話今日教育局宣部明天開始全部小學幼稚園停課, 初頭都以為假, 但之後新聞都出埋就知係真, 家長界真係引起一片混亂, 咁都真係架, 雖然話小朋友健康係緊要, 但好似我地咁放咗假佢地都要去不同地方, 都係要出街, 所以都係煩架啦! 下午都係做吓自己嘢, 放工去學校接笨元, 直接過Aeon等老公佢地嚟,帶咗卡比子元去打卡機, 我就可以行吓12蚊店, 都買到啲嘢GE! 老公佢地嚟到就去COCO食, 跟住老公帶兩個睇玩具, 我同奶奶行超市入吓貨咁, 行到8點幾都走啦, 襯佢地沖好涼前又要執嘢咁, 仲要睇埋有咩功課要做等等, 我都10點幾先有得沖涼, 摺埋衫睇吓電視都12點幾啦!