30/4/19

30/4/19     TUE.    HOT

今日都要返去面對吓件事，朝早又要早啲叫佢地起身，因為老公OT多一更，要嫲嫲接早更，我揍仲爺入青衣跟住返工，其實都冇咩，好在今日有個活動係整苔玉，總之就係調理農務嘢啦！咁唔係我地入咗房玩就係阿姐，我地午飯嗰節玩最好，因為唔洗被拍片！等第三節都完成就要去影相，以為喺大堂影完就算啦，點知又要換衫又要上平台又要拍位，仲要等埋𠺌日大粒佬嚟埋，結果由4點搞到差不多5點9先散得，攰死人仲要咬到一腳都係蚊！放得工就行去球場會合，點知笨元又踼到要早退，唉！佢真係要練吓意志力！咁去長沙灣食埋晚飯老公就送我地返屋企佢又要返工啦！

29/4/19

29/4/19.   MON.    HOT

今日係唔開心，一日都係嗰班仆街經理，佢地跟番佢地應該跟嘅嘢就唔會有問題，阿姐又係仆街，比阿sir話又將啲怒氣轉咗落嚟，人地隔離組大姐都明白件事唔關我事，同阿sir解䆁咗！人地阿姐都講道理，佢就淨係識插！唉。。。算啦，佢都出哂名喺咁，可以點啫！講番今日其他嘢啦，已經有半日比佢搞喎咗，都好似醒唔起其他時間發生咩事咁，反正由朝早忙緊一大堆嘢時已經出事，搞到我去咗OSO嗰邊喊，要抒發情緒呢，之後又忍唔住再喊多次，我都唔係咁易因為工作喊，但比啲仆街擺上枱真係好angry! 算啦， 講番放工，冇人同路就試吓再撘一次巴士直接返去，再喺鍾山壹行番落嚟都OK喎！晚飯後睇埋電視先趕佢地沖涼瞓覺，老公又係返夜10點未夠就出咗門口，我今日都攰架，希望瞓得好啦！

28/4/19

28/4/19.   SUN.    HOT

今日參加咗公司旅行活動，一早就要起身出門口，老公車咗我地過尖東先返屋企再瞓過， 我就要去簡介吓先，再去集合地點點名，9點就開車啦，個導遊好吹得，講到入錦田未停過，不過好多資料嘢佢都記得哂，好勁！入到去叫做行吓先，都係有田有羊有動物咁啦，睇完就等BBQ ready，10點幾11點就開始燒嘢食，不過我係一個人燒三個人食，笨元受唔到熱力燒唔到，仲爺係咁二燒過幾吓就算，即係又係我做哂，好在同組都有個小朋友佢地可齊玩吓，然後又買咗支弓箭比佢地玩，叫做過到吓時間，還要其他組有家人的媽媽走來問我地係咪住荔欣，原來佢住正我地樓上單位，世界真細小！差不多2點可以上番車啦，去埋恒香睇生產買手信就回程，但係返到尖東架咋，還要撘西鐵返美孚！本來想買餸煮飯，但真係攰到一個點，就算去沖個涼都係頭痛到爆，7點幾一定要出去食嘢啦，食咗粒藥叫做好啲啦，出去食到嘢，回來快手趕佢地沖涼瞓覺啦，明天要返學又要早早起身！

27/4/19

27/4/19.    SAT.    HOT RAIN

今日都係如常的星期六啦，一早子元又係要學嘢，原來8：20起身去學英文好趕！去食完早餐再去接佢，又要去畫班，跟住我就同仲爺返屋企做功課，做咗最難做的中文句子，不過呢份已經可以做足一個鐘，老公去接番子元回來，我同仲爺就去學音樂啦，都係食住午餐睇住劇咁等佢啦，買定麥記又接佢啦，撘171回程，返到來叫子元快手去泳池游水，點知落到去都係雷暴冇得入，咁佢又好開心咁返來砌Lego啦，仲爺就要做埋功課先有得砌，等佢做得嚟我都差不多要煮晚餐，然後就洗碗清潔沖涼睇電視，今晚做Advangers嘛！一路睇一路執嘢，明天要去錦田鄉村遊呢，希望朝早唔好落雨就得啦！

26/4/19

26/4/19.   FRI.    HOT

又到happy friday啦，真係happy埋今日，下星期阿姐又返，冇得咁free啦！朝早叫醒仲爺同老公起身，佢要揍仔返學呢，笨元就獨留等老公回來同佢去食早餐！我就買早餐返工啦，返到去都冇咩做，好在可以打機過吓日神咁啦，午飯有電視房可以食吓睇吓，下午又係hea過啦，等到放工老公嚟接我，返屋企同仲爺砌咗陣lego先揍佢去小童合唱團，咁啱可以用會員證換兩本書，我就換盡8本呢！老公揍子元踢完波返嚟，就去食晚飯！

25/4/19

25/4/19.   THU.    HOT

今日真係夠哂忙，朝早7點幾都要起身，因為8：15要去抽血，仲要揍埋子元一齊喎！過到去都要等，等到抽完血攞埋到診紙都差不多9點，趕到架巴士去到西九，食埋個早餐剛好去入境處同子元搞身份證，點知原來帶唔齊證件，頂。。。要馬上返屋企攞，咁就遲咗半個鐘，雖然去到馬上有得做番，但影好相打好指模，原來都要等一輪，11點多先完成，咁就趕唔切去補英文，咁就送咗佢撘巴士返屋企我就返工啦，返到去都12點多，都有做吓嘢架，午飯提早食，因為去德福買生果，我都買咗牛油果呢！下午真係冇咩mood做嘢，阿姐唔喺到喎，又冇咩趕喎咪hea吓囉！放工入青衣， 試吓撘42C原來都好快喎，可能仲係大假期後未塞車掛！去青衣城食埋飯食埋雪糕先回家，仲爺冇見1日當然好痴身啦，打暈埋佢地就摺埋啲衫才可以休息呢！

24/4/19

24/4/19.   WED.    HOT

出得嚟行真係遇咗要還，今朝揍哂兩隻寶寶比嫲嫲，我就要返去還，全日真係冇停過手，朝早做咗啲單又要出通告，已經食飯啦，食完掛住打機冇睇番倚天，又要等放工先有得睇，下午出通告又出到差不多5點先有機會做自己嘢，都係過埋啲相整埋屋企的更表啦，老人家們都要知下個月係點，放工返去買餸煮飯，老公揍咗子元去足球加操，我又唔想出去食，所以都係煮飯啦，估唔到街市咁早收得七七八八，搞到我都冇咩可以買，最終係鹵水雞翼同蒸魚啦，還有係炒一丁喎！食完要清潔啦，因為間屋實在太dirty, 老公飯後比子元捉咗玩大富翁，因為仲爺喺嫲嫲家留宿嘛，隻豬仔7點幾打嚟喊，又喺個whatsapps到send個喊樣出嚟話唔要喺嫲嫲到瞓，最終未夠10點咪又瞓咗！冇法啦我明天8點3就抽血，揍唔切佢返學架！

23/4/19

23/4/19.   TUE.    HOT

子元11歲啦，真係快到呢，我都真係老啦，個仔都攞小童身份證呢！朝早瞓到8點多起身啦，因為仲要食埋早餐先可以去玩呢，今朝都係玩啲體力嘢，真係攰死我！先係打網球，然後又打羽毛球，玩到11點又要停啦，所以去有冷氣的地方休息吓再返去執嘢走！由於天氣太熱啦，所以都係返屋企沖涼休息好過，但返到去沖咗涼其實仲有好多嘢要執要洗要消毒咁，邊有得休息，或者係得我一個冇得休息，其實我有時發老脾係鍾意走出走廊抖抖氣，兩個仔都明， 係老公唔明，係要去加劇件事，平時得我一個揍住佢地時都係咁架啦，你所以揍住佢地咪就係你自己打打打機囉，所有嘢都唔理，唔會幫輕我，而家仲嚟鬧我，仆你個街啦！搞到大家都唔開心，好乞人憎！當然最後都係平息番件事，但有時我真係覺得佢都要明白每人都有佢處理情緒的方法，咩叫做「佢唔執玩具咪由得佢囉」「佢要發聲怨人又由得佢囉」「你自己咪休息吓囉」咁其實我係咪可以咩都唔做呢，唔做嗰時啲嘢又邊個做呢，淨係啲衫唔摺一日兩日三日後咪齊齊冇衫著囉，唔會有人理架！所以我都係似一個工人多啲架啦！發完火都係要出去架啦，入去搵埋嫲嫲同大包一齊出咗去食tea，買生日禮物比笨元呢，條友買足哂4盒advanger呢，仲爺都比佢買咗盒，唉。。。是但啦我冇眼睇！跟住去咗美麗華飲咖啡，飲咗杯好正嘅cold bruw 呢！晚飯返咗長沙灣食上佳，不過真係叫得太多啦，飽到食唔哂呢！送番嫲嫲入青衣先發現唔記得攞claim保險嘢比CW，又要返美孚一轉！回家沖涼摺衫睇電視，老公返早瞓先，我就做埋啲嘢呢！

22/4/19

22/4/19.   MON.    HOT

今日係子元期待已久的宿營日子，朝早瞓到9點幾執埋嘢，老公去攞車我就再檢查清楚有咩要帶，跟住就出發啦！！老公話直接入西貢食個早午餐，於是入去才食，但真係餓鬼死！食完周圍行吓，老公見到有間西餐好似幾正，於是就book咗今晚嚟食，行到咁上吓太熱了，要上車抖抖，就用車去探吓險，渣咗入北潭涌八吓，2點多才去番西貢戶外康樂中心登記，又例牌要聽talk咁啦，攞到條key見係3樓仲要係靚位，真係幾開心，入房後安頓緊發現抽濕機壞咗又要去換，搞咗一輪先可以去玩！由於兩位少爺啱玩嘅嘢唔同，咁就唯有分開玩，老公揍仲爺我揍子元，佢地去踩單車，我就去玩吓室內嘢先，先玩攀石但笨元又係上到第3格就上唔到啦，又話痛呀庳呀冇力呀千千萬萬個理由啦，其實你話唔攰就假，但我呢個老人家都上到啦，雖然玩到出哂汗喘哂氣，但都叫做上到頂呀！然後就打乒乓球佢就係到巴巴閉咁，但都唔係咁易勝過我的！第3樣玩吓桌球呀等等等啦，5點幾又收檔啦，跟住就梗係出去食晚飯，買蛋糕買宵夜！返到去仲有時間玩，老公同仲爺去踢波，我就同子元去射箭，但個教練勁長氣講一大輪，同場幾個細路又學得慢，所以玩得9支箭就完場，可惡！去球場再一齊玩多陣就返去沖涼啦，但沖完都冇咩用，因為冇冷氣真係好慘，我地已經喺喺電視房嘆咗陣，但最終都係要返去房，食蛋糕影相，慶祝我的子元寶寶11歲生日！然後幾經辛苦打暈咗仲爺就可以食宵夜了！1點多攰啦就要入定咁放鬆個人先可以面對到冇冷氣去瞓呢！

21/4/19

21/4/19.   SUN.    HOT

今日係陪阿仔木足球日，瞓到10點先起身，梳洗出門口食早餐，食得嚟都11點幾，因為仲爺要1點喺長沙灣踢波，所以近近地去咗AEON行吓，去咗12蚊店買吓嘢啦！跟住就去球場啦，年紀大啦，都係攞把遮遮吓好，踢到2點多就要閃，因為子元又要入上水比賽，3點多開始玩到7點幾頒埋獎，真係攞咗我條老命，重點係要睇埋仲爺嘛，期間去咗隔離屋邨的商場買咗雪條食，仲有喺遊樂場玩完一輪，5點多過返去再睇，終於睇到勝出一場，攞到碗賽冠軍！但要轉場去第二個球場頒獎，所以7點幾先走！去咗沙田食咗晚飯，真人餓死我啦！返屋企快手沖涼，仲要執埋明天去camp啲嘢呢！

20/4/19

20/4/19.   SAT.    RAIN

今日係第二日假期，但都係好似平時星期六咁，朝早瞓到9點9真係要起身啦，因為子元要去畫班，我地就食完早餐先返去，老公去揍埋子元放畫班先回來交收人質，我同子元就買飯返去食，邊食邊睇番琴日嗰集倚天，到2點老公話原來今日唔洗音樂，唯有打道回府，但遇啱落大雨， 係紅雨嗰隻呢，真係誇張！反正都要留喺屋企的下午，做咗好多家務，係重型嗰隻呢！但同時又要教笨元做佢最怕的讀書報告，教到嘔血！6點幾出門口出去食嘢， 老公話去德福， 順手睇吓買唔買到風褸，果然比我找到價錢款式都啱呢！行到9點幾先返嚟沖涼瞓覺！

19/4/19

19/4/19.    FRI.    RAIN

今日第一日復活節假，子元一早就自己去樂富同老公會合，因為要練波，我就8點幾先起身同仲爺食早餐再執好嘢出街，諗咗去愉景新城玩，要同仲爺撘地鐵再行過去，條友又係到話遠唔鍾意撘公共交通， 比佢激死！過到去玩咗幾個平時都唔會比佢玩的遊戲呢，難得假期又得佢一個呢！到12點多老公過到來會合，去食咗嘢就出發東九，子元要比賽嘛，但最最終都係取消咗，諗住可以閃啦，點知喺球場又有啲隊友喺到，老公就比佢喺到踢，我地去咗aPM行， 其實我就唔太想，始終佢比較弱嘛，冧住雨咁唔多好呢！行到4點多就叫老公返去接佢，我地喺商商場等！返屋企休息收拾， 主要執子元的書枱呢！老公瞓咗，差不8點先出門口去咗荃新天地食嘢行咗陣，老公車咗我地回來就返工啦！

18/4/19

18/4/19.    THU.    WARM RAIN

返埋今日終於都放假啦，朝早老公放工回來就叫埋我起身，兩隻豬仔已經起身，所以就一齊出門口揍我返工，去食埋早餐佢地就返屋企，我就努力返埋今日工！都有嘢做時間都算過得快，午飯叫咗KFC食，好邪惡呀！下午都係做嘢吓又吹吓水又打吓機咁啦！老公話今晚出去食，順手去crocs買過啲鞋，因為唔啱嘅唔嘅啱，爛的爛都要買架啦！然後去咗食Ivy介紹嗰間小籠包，真係超正囉！食完仲要報告吓呢！行返去Mikiki再行吓先，因為老公都要返夜，所以唔會返屋企啦，陪佢行到夠鐘呢，行完Mikiki就行過去九龍城食埋糖水，老公就返工我地就撘小巴回家， 仲爺都勁攰啦，沖完涼喺梳化又想瞓，快手捉佢刷牙食埋藥瞓覺！然後再叫笨元執好明天踢波啲嘢，又要練波又要比賽夠哂忙啦，執嘢執到錯哂，都唔知要教幾耐先識！

17/4/19

17/4/19.    WED.    WARM

今朝仲爺7點幾就起咗身，唯有帶埋佢揍我返工啦，老公揍咗笨元返學就回來接我地，去公司對面食埋早餐我就返工，今日都有嘢做呀，所以時間都過得好快，午飯後跟IVY上咗德福買360，又買咗好多嘢呢，可惡！回來後都好忙呀，所以做完就休息吓先，反正唔洗即刻出！放工行去地鐵啦，返到去都等咗陣先有飯食，老公煮咗咖哩呢！飯後邊睇電視邊執屋啦，沖埋涼摺埋衫都要瞓，好攰！

16/4/19

16/4/19.   TUE.    WARM

今日都係帶笨元返學，但條友仔好似唔多歡迎我咁，佢都係鍾意在路途上遇到同學，同佢地一齊行囉！都叫做揍咗佢返去我就食個早餐返工，今日試咗行去南昌再撘西鐵，都唔算好遠，不過去到紅磡塞車，好在都趕得切57分返到去！今日都忙忙碌碌咁，午飯後咪打機囉，下午都係做嘢啦，不過就有勁爆娛樂新聞，真係成為大家茶餘飯後的話題，全個下午大家都係到吹，好搞笑！放工回家有飯食，老公煮飯係唔錯，食完都係洗碗清潔睇電視啦，9點幾10點老公返工啦，明天揍笨元返學！

15/4/19

15/4/19.   MON.    COOL

今日老公同仲爺都放假，所以諗住比佢地瞓晏啲，點知仲爺又一早醒咗，都唔理得佢咁多，我揍子元返學，不過條友都好似唔多想我揍咁，行得勁快！揍咗佢返去都係7：50所以去大快活食個早餐先返工，不過撘荃灣線真係好迫！返去都係打吓機做吓嘢，午飯後繼續打吓機，下午都係做呀做，時間過得好快就放工，返屋企睇陣功課就食飯，然後都係清潔啦！

14/4/19

14/4/19.    SUN.    WARM

今日都係好忙碌的一天！老公返早，即係我又要揍住佢兩個啦，子元朝早仲要過海足球比賽，所以9點就出咗門口，巴士上食包做早餐，未夠10點就過到去，等到夠鐘1030先到佢地踢，我就同仲爺喺到玩住遊樂場先！子元踢得一般啦，但到下半場又話兩隻腳都痛要出場，唉。。。我真係好憎佢咁態度，最終等佢執埋嘢就撘905返屋企，諗住返去煮午飯，煮咗肉絲麪，3點幾老公返嚟，又要出去啦，揍埋包姐嫲嫲入咗元朗，先食西餐做晚飯，再去咗反斗城用埋張$50卷，跟住去B仔食埋小食，再去食埋我個「大雪」就回家了，。仲爺瞓咗我未理佢啦，放佢入房瞓就得，係要搞掂埋笨元！

13/4/19

13/4/19.   SAT.    COOL

今日真係夠哂舟車勞頓！朝早8點就要起身，首先係子元去補英文，我就同仲爺去對面大家樂食早餐，然後去咗遊樂場玩到10點多就過去接番子元，到要上畫班！揍咗佢去樓下佢就自己上樓啦，我就同仲爺去阿媽到攝時間做功課，我太高估仲爺，帶哂咁多功課出去，因為佢寫完中文生字就已經過咗一個鐘，基本上又要返去接子元，直接過海怡半島到仲爺學音樂，我就同子元去咗食撒利亞，因為早咗過到來，攞得切位夠時間食，回程時都係撘巴士啦，本來仲爺要去踢波，笨元要游水，但最終兩個都冇去到，都好嘅可以做多啲功課先，7點幾老公瞓醒就出去食晚飯，然後佢又去踢波，我就回家搞掂兩個細，沖涼做功課囉，都唔知死幾多細包呢，明天老公又返早，我仲要帶住仲爺揍子元過海足球比賽，諗吓都攰！

12/4/19

12/4/19.    FRI.    COOL

終於到咗星期五啦，今日又冇咩忙，真係hea到一個點！朝早都係如常起身返學返工啦，早餐只係買咗燒賣牛肉，好似唔多滿足咁，悶咗一朝到食飯啦，都係吹水打機啦！飯後更悶，打機都打唔到咁耐，所以都係開番尋秦記小說睇吓！放工返美孚自己去咗食米線，因為仲爺合唱團表演日包埋晚飯，老公就揍咗子元去踢波，我就食完去萬寧買埋洗頭水，回家放底嘢換件衫又出番小童睇我隻小仲仲表演呢，佢都係keep可愛啦，睇到9點影埋大合照，同另外啲家長吹吓水，本來想同程家去食雪糕，但因為大小姐咳， 全部都冇得去呢！咁我就揍仲爺回家啦，老公食埋飯先返，仲攞埋我介紹佢去買嗰個Uekilele返嚟呢！

11/4/19

11/4/19.   THU.    WARM

今日要返工啦，返去都唔算好交戲，是但啦請日假啫！返去買埋早餐食就開工啦，做好嘢就自由活動吓啦！午飯出咗去食，因為今個月Mandy生日嘛，去附近試咗間西餐，都幾好食啦！食完就返去啦，下午都唔忙，所以主力都係打機，放工返去有飯食，跟住就約咗Letty佢地去遊樂場玩完再去食雪糕，我就冇去遊樂場啦，因為仲要洗碗抺地，邊行返去邊食，好滿足呢！返到去沖涼啦，還要照顧埋佢地呢，笨元啲功課又要執一大餐，真係跟少陣都唔得！

10/4/19

10/4/19.   WED.    HOT

今日請咗波假去支持子元運動會，但估唔到佢咁玩嘢！早上先送佢去運動場，我地再入青衣揍仲仲返學，食埋個早餐就去運動場，一路等隻笨上線啦，點知一出閘就脫腳，跑咗30米左右就知佢出事，去到終點要救護員抬走， 唉。。。老實我係好失望，又覺得佢隻腳冇咁嚴重，又係右腳腳眼位，最終早退去睇醫生，連4x100都要失場！去到法國我順手攞埋醫生紙啦，子元就睇才骨科照X Ray，但都睇唔到有咩，佢就建議要照埋MIR，但要出去照，下星期三再覆診，我就攞埋藥返去囉，返長沙灣食咗嘢就回家，老公入青衣接仲仲，然後交換人質，佢揍子元出去照MIR，我就同仲爺去咗買餸，回來想做功課先發現唔見佢個功課袋，原來漏咗喺嫲嫲到，所以比佢自由活動先，等老公同子元睇埋就回青衣攞！晚飯後直落要洗碗清潔等等！咁又好似冇咗一日咁！

9/4/19

9/4/19.    MON.    WARM.

今日有老公車佢地返學，我就唔洗咁辛苦啦！買埋早餐返公司，食住吹吓水咁又開吓工， 今日都忙架，除咗整相又有啲濕濕碎碎嘢做吓咁！午飯後都係打吓機，下午做足一個下午都係OC2啲相，跟住都係等收工啦，行過球場期間又食吓嘢啦，仲有打住機，因為唔覺意開咗個任玩3個鐘！等笨元踢完波就返長沙灣快食後回家，明天運動會又要早起！

8/4/19

8/4/19.   MON.    HOT

今日好忙，淨係整photo report都夠我做！朝早又要整餐盒，又要叫醒笨元返學，因為老公返早，佢要自己出門口，又係到話趕又要我早啲叫佢起身喎，但我都未整起飯盒點出門口呢！叫醒埋仲爺又要快手啦，因為要入青衣先呢！買埋早餐返公司就開工啦， 做到午飯後又去咗樓上買清潔嘢，下午真係冇停手整相，係咪都要做架啦，快手做咗佢！放工老公嚟咗接我，嫲嫲話子元生日喎出去食，結果去咗Mega Box， 又食壽司又買玩具，開心到呢！返到屋企老公同子元去練吓跑，我就同仲爺喺屋企！

7/4/19

7/4/19.   SUN.    HOT

老公今日返早，所以一早起身出咗門口，我就梗係繼續瞓啦，9點幾真係要起身啦，梳洗完煮早餐，但嗰兩條友仔好似慢活咁，完全唔知咩事咁又唔執嘢，又激到我發火，火到我淨係煮咗麵，咩都唔再煮呀！10點幾叫子元快手出門口去畫班，喺手機睇住佢去到邊啦，點知條友遲咗一個站落車，要行返轉頭，咁鬼唔小心！同仲爺做埋功課溫習等等，又要出去接子元，反正都要食嘢，食埋KFC先返去，等佢兩個做吓嘢，我又要揍佢地出去，因為老公話konter踢Nike 5，出去打吓氣，好耐冇睇過比賽啦，真係好刺激呀，最終贏了，好勁呀，睇得我好緊張！睇完就去咗新世紀行吓，老公就去入標！晚飯食咗牛涮窩，都幾好食架！食完都差不多8點，返屋企休息睇電視啦！我今日都係周身痛，咁樣跌一跌原來咁傷！

6/4/19

6/4/19.    SAT.   HOT

今日主要活動係仲爺運動同樂日，擺到明係玩阿爸阿媽啦！7點幾起身快手出去，食埋個早餐就去集合上車，仲爺好似唔知我會一齊上車咁，知道嗰吓好開心！去到運動場去個廁所先再受刑，要玩10個遊戲呀！都係啲體力勞動嘢，但我玩到第二個就出事，因為要拖住仲爺行完平衡木再爬，第一轉都冇嘢，第二轉就出事啦佢一嘢跳落地時拖行我向前跌，真係跣住嗰隻，結果隻手損咗要去急救囉！但都要完成埋啲遊戲架，真係玩到12點幾，抺身換好衫等老公嚟接，去青衣站放下我地，佢就揍子元去足球比賽，我就揍仲爺過海怡學音樂，真係攰到一個點，同joyce食埋午飯， 揍咗仲爺上佢屋企攞玩具，還要玩到四點幾先捨得走，撘得巴士返去都差不多六點，老公剛想同笨元出門口食啲嘢，見我地回來佢就等我地執埋嘢才出去，近近地去咗葵芳食嘢同行咗陣，又比笨元買咗兩本書啦，跟住佢地就去踢波，我就同仲爺喺屋企休息！

5/4/19

5/4/19.   FRI.    WARM

今朝老公先放工返嚟，7點幾3個喺廳到嘈住哂，搞到我想瞓晏啲都唔得，所以9點多就梳洗好出門口，先去食個早餐，然後去咗做運動，同子元train體能，我都練吓啦，但真係太少郁動，加上天氣熱，好快已經頂唔住，梗係唔死頂啦！上看台休息吓，11點幾先走，返去沖個涼執好嘢就去奧海城買禮物食埋午飯先入去Amanda家，幾條King慶生日嘛，入到去咪開始顛玩囉，老公坐多陣就要去接梓朗出院，我地繼續喺屋企hea，又係咁食囉！晚上打邊爐，梗係食到飽到上頭頂啦！啲細路又係玩到顛哂，碰撞吓實有，由得佢地自己解決都係成長的一部份呢！9點幾10點回家啦，仲爺一上車就瞓咗，返去捉佢起身沖個涼先瞓，我就仲要執埋明天仲爺運動會啲嘢！

4/4/19

4/4/19.   THU.    COOL

返埋今日放3日假啦！朝早仲爺肚痛，疴咗屎又冇事啦，點知一齊出門口，揍咗子元返學，佢就話急， 最終又仲要賴咗，但都要捱到公司先可以停車，已經馬上同佢清潔，但佢仲係賴，叫做處理咗，但老公都冇得一齊食早餐，要揍佢返青衣比嫲嫲，估算到應該係琴晚食咗東海堂嗰個大雪出事！結果老公都冇比佢返學，私佢喺嫲嫲到休息！我今日都輕鬆咗好多，唔算太忙可以打吓機，午飯同咗OSO嗰邊食，大家一齊打吓機咁幾好呀！下午都係做嘢啦，時間都好快過！放工返屋企等開飯，然後都係洗碗清潔沖涼瞓覺啦！係發現我和子元房燈唔著，打比老公又冇人聽，嚇得我呀，原來佢瞓咗囉！

3/4/19

3/4/19.    WED    COOL

今日都係忙碌的一天，早上如常咁返工返學，買埋早餐返工啦，跟住就要做嘢啦，轉個眼就已經半日，午飯前Ivy話Uniquo有減價，結果就快食完約咗佢地一齊去，仲買咗6件新底衫比子元，又買咗件風褸比仲爺！下午返去都係做做做，真係做到有啲攰！放工返屋企有飯食，老公要子元去踢波，其實我又唔係咁想，因為我覺得隻笨其實都冇時間溫習，點解仲要去踢呢！等佢回來沖埋涼等等，仲爺呢， 攰到等唔切我沖涼喺廳瞓咗，抱返佢入去都要講個故事先肯瞓，明明都瞓住嚟聽！子元又係，叫佢溫埋中默先瞓又唔肯，雖然明天校隊比賽唔洗默，但都唔可以唔溫架嘛！

2/4/19

2/4/19.    TUE.    COOL+

今日都係老公放工返嚟就揍仔返學，我就返工啦，今日就真係忙啦，一朝都未停過手，咩都有做咁！見到yoko喺康傑group話梓朗開始做手術了，我都覺得好心痛好緊張！希望快啲有好消息啦！午飯後打吓機，下午又開始忙啦，真係除咗吹吓水輕鬆吓外都冇停手，不過都係未做完，長命功夫長命做啦！放工行過去球場同老公會合，等子元踢完波，返長沙灣食個快晚餐，老公就車我地返去，佢去葵廣幫子元攞番個手機，因為爆咗mon要整呢！回來我都快手捉佢地沖涼做埋啲嘢瞓覺，老公攞番部機上來就要返工啦，我就搞掂埋兩位少爺，還要摺衫等家務才可以休息呢！

1/4/19

1/4/19.    MON.    COOL

又到月頭的日子，但真係唔算太忙呢！朝早老公放工回來當然係要揍仔返學啦，我就返工呢！整咗好有益的早餐返去食，因為子元都係食呢啲做午餐呢！食完就開工啦，時間都過得好快，一朝都冇停過手但又好似冇啦做過嘢咁，完全唔知發生咩事！午飯後打吓機啦，下午開始要入job cert啦，所以下午又係時間過得好快！放工後返到屋企竟然冇哂人，老公帶咗佢地去踢波，搞到咁晏先返，煮得飯嚟8點幾先開飯，之後的清潔工作咪又好似做極都做唔完咁囉，還要睇埋子元的試卷，睇到我眼火爆，係有唔小心錯，但改卷嗰個都太吹毛求疵吧！我寫哂紙仔返去問呀，雖然要追番3分返嚟有難度，但我係唔甘心呢啲都叫做錯囉！笨元還要做埋個浮雕，又做咗幾個鐘，等佢仲打機呀啦，激死我啦！