30/9/19

30/9/19.   MON.    WARM

返一日又放假，今日真係冇咩Mood開工架，但都要返工返學！朝早整埋飯盒，老公揍我地返工返學，食埋早餐返去開工啦！慢住咁嚟做又吹吓水，好快又到午飯啦，飯後收到啲風，今日有得早放，因為怕有集會影響到同事放唔到工，所以5點就可以走，咁梗係早走啦！但又好似少咗時間做自己嘢囉，諗住做埋個專題架嘛，星期三返去又趕job cert啦！叫咗阿媽早啲揍仲爺出來，但佢都係唔夠早，所以仲爺過得去石門都6：40，等佢踢完沖埋身返嚟都9點多，快手開飯啦，兩隻豬都好餓咁！飯後嫲嫲洗咗碗我就吸塵抺地，快啲K.O咗佢地就休息吓hea吓，明天又要溫書啦！

29/9/19

29/9/19.    SUN.   HOT

今朝8點幾醒咗，不如就早啲去畫班，早啲返嚟做埋啲功課溫習，估唔到一溫就溫咗差不多全日，仲爺的英文串字，真係足以令人死亡，我真係痴咗線咁，又自己走出走廊又趕佢出街，又拍枱打人咁，其實自己都傷哂，又撞到手臂手指咁，你話係咪痴咗線，全個下午基本上都係咁無限loop，唔識再溫錯再溫再唔識，期間食過少少嘢，又再嚟過！老公揍咗子元去比賽，條友仔都未做好功課溫好默書架，不過佢可以好快我都冇咩講！6點幾老公回來接埋我地，近近地去咗長沙灣食米線咋，然後就送我地返去，佢就去踢波！返嚟都要同仲爺再溫多次，子元有子元自己搞掂！我今日真係好攰，發顛真係好攰！

28/9/19

28/9/19.   SAT.    HOT

今朝8點多要起身了，因為笨元要補習又要畫班，都要揍佢去，我地就去食早餐，然後回家睇功課，溫默書，12點幾老公接子元回家後，食埋嫲嫲買的雲吞就去咗睇饒宗頤文化館，因為子元要做專題嘛，近到咁唔去睇吓都唔得啦，不過個導賞人員真係悶咗啲囉，但聽吓都好嘅知多啲唔洗我講！睇完3點幾去咗葵芳食tea，然後子元就去踢波，我就同仲爺返屋企執嘢去游水，今日我都游埋一份，不過真係好攰，差不多時間過去睇吓仲爺游成點，條友都係hea架啦激鬼死！返屋企沖埋涼等老公嚟接我地，去咗葵芳食嘢順手同張電話卡增埋值，食完嘢行咗陣商場買咗少少嘢就返屋企，老公就去踢波！沖好涼趕仲爺去瞓覺，子元就做功課， 我就摺埋啲衫休息吓，笨元話要睇足球小將，但我要佢等的過程做埋佢啲功課先囉，唔係明天又比賽冇時間架啦！

27/9/19

27/9/19.   FRI.    WARM**

今朝又係喺長沙灣食埋早餐先返工，不過今日又塞車，差不多55分先返到去，真係有啲趕！今日都係唔多願做嘢啦，不過又唔係係咁打機嘅，都有做咗份升中CV的大綱，午飯同阿姨佢地食完又走咗過catherine佢地嗰邊吹水，邊打機邊吹水先係放飯的最好時間嘛！下午啲人開會的開會，吹水的吹水，我就專心做埋份專題，反正都要交，這兩天好做好埋佢！放工返屋企後，仲爺都係比阿婆投訴呢樣唔肯嗰樣唔識咁啦，收拾好就出門口，過摩士接埋子元去食晚飯，本來想去食KFC新嗰款雞，但又冇得賣，唯有食番普通嗰啲！回來快手沖涼休息！

26/9/19

26/9/19.   THU.    WARM

今日老公提意喺長沙灣食埋早餐先車我返工，今日完全處於一個唔想做嘢嘅狀態，阿姐一唔喺位就作反， 係咁做自己嘢，真係好！因為要買番飯袋枱墊比仲仲，子元又要買筆袋，所以食晏時早啲出咗去Mega Box買，要喺車買咗啲壽司快食，返到去都係做吓自己嘢啦，終於捱到放工，快手去接仲爺入石門踢波，我又忍唔住去買嘢食，踢完返屋企就開飯，食完就叫佢地做好埋啲功課囉！

25/9/19

25/9/19.   WED.    WARM

如常有老公車我地返工返學，去食埋早餐就返工！返到去都係做吓公事做吓自己嘢，吹吓水咁時間又過了，午飯後打吓機，下午就做咗陣專題，又過番啲相落hard disk等等，今日都係好悶咁過！放工即回家，要我返咗去阿媽先有得收工，子元就自己去踢波，我可以邊煮飯邊同仲仲做埋啲功課，笨元差不多9點先返到嚟，開飯食完就各有各做好應該做嘅嘢，今日的節奏都算幾好，10點幾就K.O.哂仲爺，睇埋子元功課做齊，然後又要摺衫啦，日日都係咁真係幾悶！

24/9/19

24/9/19.   TUE.    HOT

今朝都係老公車我地返工返學，不過好塞車，食埋早餐返到公司都差不多夠鐘，又係時候開工啦，做住嘢咁時間過得好快，食飯後都係打吓機啦，下午做得咁上吓就打吓機，攞咗幾個鐘free嘛！放工返到去樓下，老公就出門口約咗人食飯，然後就放吓兩隻嘢等我搞，又要煮飯又要睇功課，仲要喺仲仲本手冊發現到張紙條話冇交針卡，我真係想喊，我明明星期五就交咗，針卡呀係好重要架，想點呀，我真係唔識點處理！然後仲爺啲功課又一pat嘢咁，我又要煮飯，真係令人好混亂！最終叫子元睇睇功課先，我要煮住飯先，唔係今晚實唔洗食，跟住邊煮邊教功課，好在子元都算幫到手，開飯收碗吸塵等等都做到！然後咪再捉佢改埋啲功課囉，好多錯呀，仲要佢好似唔知自己錯咩咁，我真係好攰呀！

23/9/19

23/9/19.    MON.    HOT

又到星期一了，好彩今日係教師偷懶日，佢地三父子可以繼續瞓，我就返工啦！買咗個豐富早餐返去食，食完就做嘢啦，星期一都係多嘢做架啦，成朝都未停過，不停出通告，又吹吓水講吓琴日海洋公園囉！午飯後打吓機，跟住又做嘢啦！一抬頭都已經差不多放工，快手去九龍塘會合阿媽，揍仲爺去石門踢波，等佢時我又去咗買嘢食，咁都唔係辦法，踢完沖埋身就返屋企食飯，嫲嫲仲幫我地洗埋碗先走，我就同仲爺溫多次默書，快啲捉佢地去瞓就沖涼休息！

22/9/19

22/9/19.   SUN.    HOT

今日係海洋公園之旅，7點幾就起身！諗住過到黃竹坑先食早餐，但嗰間餐廳原來星期日得好少嘢食，求奇食咗個粉就算啦！過到去正門就開始派飛，開始打比啲人睇吓去到邊，10點多派哂飛可以排隊入場了，今日都幾冇方向咁玩，行到邊玩到邊，不過日頭都好曬，好在有帶遮所以叫做好少少架啦！玩吓啲兒童嘢先，又去掟公仔，老公好有方法咁掟咗兩隻特等獎，夾夾埋埋已經有3大隻，老公要去放番落車，我就同仲仲佢地去攞糖果，跟住就去睇吓魚仔先再去食午飯，然後就開始上出頂睇企鵝，子元仲要玩激流，玩齊嘢就又去掟公仔，行到土戈海洋天地掟都幾遠喎，但就掟到兩兄弟想要的都好啦，撘番車落山就去睇show，但今年呢套冇咁好睇，大包姑姐都入咗嚟，同佢影張相就分頭啦，又去咗睇熊貓都幾好，之後又去咗食嘢，叫做食個tea咁啦，天開始黑又多其他嘢玩！程家用咗年票入嚟，所女玩完哂就同咗佢地返長沙灣食晚飯！入黑多「鬼」出沒，仲爺又話驚啦，不過係幾好玩，再行咗一大圈先走，返出去食完飯就回家了，好攰！

21/9/19

21/9/19.   SAT.    SUNNY

今朝子元要返學校開放日做英語大使，老公就車佢返去啦，跟住先回來叫我起身食早餐，然後返屋企同仲爺睇功課溫書， 夠鐘佢又要去踢波， 我就去學校揍番子元，順手去偷睇上年度的常專，偷得幾多就幾多，接番子元買啲嘢食就回家，完全冇心機同佢溫書，只係叫佢做埋啲功課，仲爺又回來了，老公揍咗佢返嚟就返工，整嘢比仲爺食埋又只係想hea！5點兩個去游水，我就準備晚餐，今晚決定煮咖哩，好好味呀！都係如常星期六咁睇電視囉！

20/9/19

20/9/19.   FRI.    HOT

終於到星期五啦，老公都係咁揍我地返工返學，子元又係喺到趕人快啲啦，食埋早餐開工，上午都仲會做嘢，因為始終都係要做，午飯冇入房食， 食完都係hea吓，跟住就上德福攞tat，真係少啲力都唔掂！分吓tat食吓hea吓咁，完全唔想開工囉，反正又未急到deadline，都係休息吓先啦！放工過去荃灣攞眼鏡，跟住又返樂富揍子元，真係遊地鐵河呢！副新眼鏡都幾靚，但真係要啲時間適應！返到美孚我就去揍仲仲，子元自己返去沖涼先，等程生車我地回來，整埋啲粉食就沖涼瞓覺！我就hea吓睇吓電視咁啦！

19/9/19

19/9/19.   THU.    HOT

今朝遲咗出門口，好在7：50佢地都返到學校，同老公一齊過工商食埋早餐我就返工啦，今日都係忙嘅，起碼都冇機會打機先，午飯都係冇入房食，因為要比心機做埋我啲功課，真係做人阿媽甚艱難，下午都係寫吓水樽做吓嘢啦，其實都冇咩，放工趕去九龍塘站同阿媽會合，再入去石門踢波，襯佢踢緊時還要睇定有咩功課未做，個豬仔唔太專心，又唔正經，比阿sir鬧都抵！返到嚟都8點幾9點，嫲嫲煮咗飯，一齊食埋仲幫我洗埋碗，等我可以教功課！

18/9/19

18/9/19.   WED.    WARM

今朝都係如常咁返工返學，不過都算遲咗去到九龍灣架啦，食埋早餐返工，今日決定係慢慢做嘢，話咁快又放飯，食完就做功課啦，得呢少少時間真係好唔夠，好在下午高層們去哂開會，我就自由地做我要做的功課，都算完成咗好多架啦，放工返到嚟聽到阿媽把聲又唔見佢喎， 原來佢冇帶Key入唔到門口，過咗對面屋坐，因為佢唔知子元出去踢波呢！同仲仲睇功課，今日又做得好叻仔喎，對好哂我就去煮飯，佢就做視藝功課，等笨元回來就可以開飯，食完飯子元沖涼做埋功課溫書，仲仲又話唔眼瞓，又話要等，最後喺梳化瞓咗，咬住個牙刷好好笑！不過我都好眼瞓，11點已經喺梳化瞓咗！

17/9/19

17/9/19.    TUE.    WARM

今日都係老公車我地返工返學，所以時間非常鬆動，喺工商食完早餐，就返上去開工啦，今日都係忙架，好鬼充實！午飯本來諗住快食完就做子元的專題，但Catherin叫咗我入房食，就入去食一陣再出番嚟做囉！下午都係努力工作時又努力吹吓水，聯誼吓咁啦！放工馬上回家接應仲仲，喺樓下就撞到阿媽可以交收埋仲爺啦！返上去笨元仲做緊功課，咁我就邊煮飯邊教仲爺做功課，今日唔知係咪夠精神，佢做得好好喎！教咗又明又識做，佢真係神經刀到一個點！最慘係佢個班主任都流流地，今日打嚟講咗仲爺喺學校個情況，都係傾偈寫得慢唔專心嗰啲，咁我都講明話仲爺的讀寫問題同專注力失調等等， 明天交埋封信比佢囉！有時都唔係想落佢面，但要家長教番佢點做就死火啦，一年級班主任唔易做架！晚飯食粉可以快手啲，連地都冇抺，快啲沖好涼再對好兩位的功課，可以睇電視摺衫啦！

16/9/19

16/9/19.   MON.    WARM

今日開始返全日啦，琴日整定咗飯團，可以瞓多一陣，但都要快啲叫佢地起身，順利返到學校，但之後先發現唔記得比錢佢地買早餐，有啲失策！同老公喺公司樓下食埋早餐，差不多夠鐘先返上去！馬上請咗放早半個鐘，要去配眼鏡呢！然後都係開工啦，又係冇停過手，轉個眼已經放飯，快食完要做功課，真係好命苦，又要找資料又係打嘢咁，真係好慘！下午都係做嘢，忙到想做吓自己嘢都好難！5點半已經即閃但都要6點半先過到去配眼鏡，驗埋眼選埋框就比錢啦，都好快手，7點半已經返到去，同笨元會合，回家收拾煮飯，等仲爺踢埋波回來食飯都已經9點，之後還要洗碗清潔，再到最慘的對功課，因為仲爺又係好多都未做哂又要眼瞓啦，搞到11點幾先瞓得，我仲有大把嘢做呀救命！

15/9/19

15/9/19.    SUN.    HOT*

老公放工回來嘈醒咗我，所以都早啲叫埋笨元墻巳身去畫班，食埋早餐買埋餸接埋子元就返屋企，都係要對功課嗰啲啦，仲爺中午又去踢波啦，不過今日我就想整定飯團比佢地明天帶飯，所以係咁喺到研究，等老公揍咗仲爺踢完波回來都係未整好，因為冇紫菜，所以出去食晏後順手去超市買埋，回來再試，叫做整起咗，但一啲都唔靚，算啦冇工具係咁上吓，但味道OK嘅！下午都係偷吓懶又同佢地溫吓書咁啦，笨元自己溫得到，默書嗰啲都要放手，但今個星期冇溫到每周溫習，要追番進度呢！晚上有啲不愉快，都係嗌吓交咁，實有架啦，不過我太激動時就整爛咗個眼鏡，都係時候換，比個機會我咁解啫！

14/9/19

14/9/19.   SAT.    HOT

今日都好充實，朝早瞓到9點幾，完全唔知老公回來揍咗子元去補英文啦，咁起身就梳洗再出去揍子元，我同仲仲快食個早餐，老公先車先子元回家再回來接我地！11點幾老公揍子元過海踢波，我就要同仲仲做功課，其實都幾辛苦，因為要伴做，佢又多改正喎，做到差不多兩點，終於可以煮午飯食，都是簡單啲食麵就算，收拾好地方等大家嚟開常識專題會義，傾咗差不多3個鐘，開始係佢地傾到，但最終咪又係我地啲大人做，但都叫做傾掂架啦！返麗寶食晚飯，食完返屋企啦，去咗樓下睇Barry 個囝，NB真係好耐冇玩過，仲餵埋奶添，仲爺就睇到好hig呢！10點幾返去先打暈仲仲，我還有好多衫要摺呀嘛！

13/9/19

13/9/19.   FRI.    HOT

今日係中秋節，所以返工都冇咩mood做嘢！早上都係老公回來揍仔返學再揍我返工，食埋早餐先走啦！返到公司都係做吓公事做吓自己嘢，同埋計劃午飯點樣逃走，要去食牛陣呢！但最終都等到1：20先有位，要食得好快呢，都唔睇時間啦，點都遲架啦！不過我地有借口，就係要去攞雪糕啦，分頭行事，阿姐總算冇鬧，仲係咁講唔該哂！好反常呀！跟住嗰一個鐘都係處於準備放工的狀態，知道老公過咗嚟啦就要攞定哂要攞走嗰啲嘢，入埋落車仔攞返去！會合後先去mega box行，老公買咗幾件衫，Roxy做特價喎！再去ikea買埋應買嘅嘢就走，但估唔到塞車塞得咁緊要，子元踢波結果遲咗差不多大半個鐘先到，但都冇法！睇完就快手回家執齊嘢，今晚去賞月嘛，去荔枝角公園！總算早到找到地方settle好就，等大家嚟就開始玩，我地大人就食嘢吹水囉，玩到差不多11點開始要執嘢散水，我要拉住車仔再揍兩個返去，真係好吃力！但老公要返工都冇辦法啦，快啲搞掂佢地就瞓覺！

12/9/19

12/9/19.   THU.    HOT

今朝老公放工回來就接仔返學，因為早咗好多嘛，子元可以7：35返到去佢就好開心啦，我就太早啦，叫老公車到我返公司，隔離食埋早餐先返去！夠鐘開工就做吓嘢咁囉，有嘢都係要做架啦，今日阿姨又請病假，擺明玩嘢啦！午飯快食後同咗Joey佢地去行朗晴間就執的奇趣天地，買咗兩卷雞皮紙比仲爺做枱墊！下午上半段時間都係要做，等阿姐出咗去開會，勁free但都係做正經嘢，幫子元佢地常識個專題做定份第一階段報告用，咁又放工了！快腳返到去執好嘢又要去接笨元放游水，再入石門食做節飯，因為仲仲要踢波，所以就一就啦，不過間室內大牌檔幾好食喎！食完就返屋企啦，還要睇功課同捉佢地沖涼瞓覺！今日派咗學生相，笨元影得好大個，仲爺影得好可愛！

11/9/19

11/9/19.   WED.    HOT

 老公今晚先返夜，所以今朝可以揍我地，唔洗拖住兩隻豬再行九里路係好好多！仲可以喺紅磡站食埋早餐先撘車！返到去都真係要做嘢，又以為唔見咗份單，好在最終浮番出嚟，但都足夠嚇死我！午飯入咗房同catherine佢地食，開心吹水！因為阿姨放病假喎，我地仲開心！下午都係主力做嘢間中吹水中和吓！放工老公嚟接我。。。交仲仲比我再車我地去撘巴士，佢就返球場揍仔，我同仲仲返到去先找找本中文作業喺邊， 咪喺櫃囉有冇咁難找呀！跟住教佢做埋再煮飯，老公買咗啲好煩複去煮的飯，搞到我煮到8點幾先煮完！但佢地都9點多先返到嚟，食得嚟又要趕佢地去梳洗瞓覺，老公就返工，我就做工人加補習，即係做清潔同對功課，11點先有得去沖涼，但唔好諗住休息，仲有一堆衫等緊我摺！

10/9/19

10/9/19.   TUE.    HOT

今日都係一拖二揍佢地返學，笨元琴晚游水強度太勁，今朝都未復原得哂，所以冇行得咁快！揍完佢地就返工啦，今次買咗麥當當食，食完早餐就開工啦，又係邊到有得停呀！做到放飯入房同Catherine入房食啦，當然係吹水打機啦！下午又係做餐死！放工撘46小巴去到旺角，再行過楓樹街球場會合，還帶咗仲爺去太子站睇嘢，佢成日喺電視睇又想睇現埸呢！返球場會合等子元比賽完，就去長沙灣食晚餐回家沖涼睇功課，我真係好攰啦！

9/9/19

9/9/19.   MON.    HOT

又係一個一揍二返學的日子，照樣明明遇到時間出門口，但出得嚟又已經7點半，子元又趕我地又追咁，真係好辛苦！揍咗佢地就到我返工，行去南昌站時，見到學生們拉人鏈，都忍唔住支持吓，真係有啲眼濕濕，同佢地講我呢啲揹住頭家嘅幫唔到你地啲咩，辛苦哂！佢地就話冇問題架，你支持就得架啦！平復咗就返工啦，早早返到去食埋早餐就開工，忙呀忙走一朝，呢種咁忙嘅日子仲要捱幾耐！最搞笑係食飯時，連阿姐都串話阿姨發佢脾氣黑佢面嘛！食完個飯就去買餸，有啲熱咁啦，買完返去又係時候切生果，忙完呢啲都要做paper work架，臨放工仲要搬件，放工返去煮住飯等子元仲仲佢地回來，子元游完水回來攰到好唔正常，應該係體力透支啫！食住等仲仲佢地返來，還要對功課洗碗抺地沖涼趕佢地去瞓，咁又差不多11點先閒少少！

8/9/19

8/9/19.    SUN.    VERY HOT

今日都係平凡的星期日，老公返早，我瞓到9點幾醒咗，叫醒埋笨元跟住煮早餐，食完佢就去畫班，我就梳洗清潔好，再同仲仲溫書，都係溫番今個星期教咩啦，還有要溫吓中默，佢都算合作，因為溫好可以自由嘛！12點多出門口先去接咗子元，再過球場仲仲要踢波，我地又要乾煎1個鐘，踢完去對面茶記食完就回家，到子元要沒溫書，沖好涼又會要抖，差不多3點半才開始，但條友又hea我咁，咪比練習佢做囉，結果又發脾氣咁，因為夠鐘游水我就放佢走，今晚繼續！老公回來執咗衫又去踢波，等子元游完水再去咗奧海城食晚飯，行埋反斗城就回家，做埋啲嘢休息了！

7/9/19

7/9/19.   SAT.    VERY HOT

今日真係出汗日，老公返早，我要揍住兩個全日活動咁滯！首先子元要補英文，咁一齊出去，我就帶仲仲去食早餐，然後去遊樂場玩咗陣啦，返去接番子元回家又要收拾下半場的白豚游泳比賽及Konter足球聯賽！有點趕地出門口，去到深水涉游泳池剛12點，子元仲覺得咩都唔洗理等叫到佢嗰組先郁，我就話記得是有熱身的，你去問吓啦，但佢就係唔肯問，我梗係唔肯過佢迫佢去問啦，見到有個鄰居咪叫佢問人囉，根本就係要去熱身！佢游第3 heat，真係可以好快完，因為對手超強，子元都係游番42秒啫，但小組都尾3！所以一定咩獎都冇，可以換衫走人，撘6F過土瓜灣踢波，見住走咗架車，焗等20分鐘再撘40分鐘車程先過到去，好在真係遇鬆時間，去到找到間食清湯腩的就試吓，真係唔錯喎又唔貴，食完買埋嘢飲行過去，又係時候等等等，其實我已經濕完又乾咗唔知幾多次，自己都覺得辛苦，然後又太陽又落雨咁，真係最辛若的天氣！等老公嚟咗，我就帶仲爺去咗遊樂場玩，但又落雨咁！到咁上吓返過去球場睇比賽，睇到子元踢喎，仲要係踢得好好，動作流暢只係入唔到波啫！最終贏6：2呀！終於可以返屋企，返去先叫Pizza外賣，沖涼休息！我完全進入save mood！老公8點幾出咗去又踢波，我就努力簽通告，兩份量真係夠哂攰！之後還要摺衫等等，到12點幾先瞓！

6/9/19

6/9/19.   FRI.    HOT

今日忙到甩轆！朝早揍咗佢地返學，老公就車我去南昌站，我自己撘車返去，喺紅磡站食咗美心先上shuttle，返到去真係全日都未停過，多嘢做到一個點，梗係啦，4個人嘅嘢而家兩個人做之外仲有額外嘢，想做死人咩！午飯冇腳嘛，就跟ivy入咗房食，食完去咗啟晴嗰邊買零食，仲爺小息要食嘢嘛！下午返到去就切生果，好在Florance出手快好多！食完又係做，放工都遲咗走得，因為要去收埋仩口， 一啲平時唔關我事的收信等等！好在老公嚟接我， 返到去就準晚飯，好在有程生揍出揳入，咁我就唔洗走咁遠！等佢地8點幾9點返哂嚟可以開飯！玩到11點多先走呢！老公就約咗人食飯，12點多先返嚟！

5/9/19

5/9/19.   THU.    WARM

今日請咗下午假，因為要去荔天聽小六家長會，咁上午就要好努力工作啦，老公揍我返去，一齊食埋早餐先，然後好勤力咁做，又係未停過，點解我咁忙啫！食lunch前先叫做好少少，食完晏就出門口過荔天，今年有啲唔同，要講升中啲嘢，所以都好多家長嚟聽，咁都真係有益的資訊！喺hall聽完又要去課室，見吓主科主任，講得嚟問得嚟都5點幾，返去揍埋仲仲，佢就去踢波，我就返镸企，諗戈住煮飯，但唔記得攞番啲菜返嚟，所以都唯有出去食啦，回來同仲爺做埋功課就瞓覺，條友仔連功課袋都漏咗焁竹學樣，激死！今晚好攰，早啲瞓啦！

4/9/19

4/9/19.   WED.    WARM

今日老公請咗病假，條腰整親喎，咁就可以車我地返工返學啦，今日交通又出奇地順暢，揍咗佢地返學都係7：45，我返到九龍灣都係8點多，所以一齊喺工商食早餐先，8點幾我先返上公司，佢就去九龍城睇醫生啦！今朝都係忙架，因為有果籃月餅嚟要分嘢，午飯竟然好多水吹，突然覺得同阿姨關係好番啲咁，或者學ivy話，佢冇哂左右手，仲夠膽對我唔好，唔怕我都唔同佢做嘢咩！下午都係真工作到放工，等老公嚟接我，查實似係交收仲爺多啲，佢車我地去巴士站，我同仲仲撘巴士返去，佢就去番球場睇子元！落車時仲爺本來都講嘢講得好開心，但佢望望吓個地點點解咁怪，咁鍾山臺又真係冇咩人又黑，對佢嚟講係幾得人驚！返到屋企休息吓7點幾才煮飯，今日又煮得唔錯喎，要重拾番個節奏呢！差不多9點子元佢地先返到嚟，食得飯嚟都冇咩時間，又要清潔收拾執書包等等，而家未有功課就可以咁hea啫，之後都唔知點算！

3/9/19

3/9/19.    TUE.    HOT

今日老公放假，但車我地返去仲慢過我地自己行，周圍都塞車咁，明天要再早啲啦！幾經辛苦返到公司，同老公喺對面食埋早餐先，返到去就係做啦， 十九幾萬樣嘢要做，真係轉個眼就放飯，不過今日我就同Joey，Catherine佢地食，講吓仔女經咁幾開心！下午又係狂做Job Cert，一陣就放工了，常然其間都有郁動吓，吹吓水食吓嘢！放工過荃灣食泰國嘢，送埋嫲嫲返屋企就回家了！又係要處理「家」務，捉佢地做好功課執書包咁！都係好火氣的事！

2/9/19

2/9/19.   MON.    RAIN

真正開學了！仲爺笨元齊齊做小學雞的一年，今朝落住雨咁天，我要揍佢兩個返學，基本上以後只要daddy返早揍唔到佢地都係我揍架啦，子元就趕頭趕命咁，仲爺同我追到死，有時真係覺得佢好唔識體諒，咁多人你一個人快閃梗係得啦，但齊齊行就唔係火咁架啦嘛！終於返學校門，點辛苦都要影張相先啦，難得嘛！送咗佢兩個入去我就行過南昌站撘車返工，今日反而比預計早咗，可以喺火車站買埋麥記返公司食，今日只有一個字形容：忙！上午係咁跟番啲電郵，下午就入哂啲job cert，真係忙到水又冇飲更加唔洗去廁所！放工撘24號過旺角，子元要踢比賽，老公又要揍仲仲去踢傑志，所以我要喺旺角等笨元比賽完接番佢，本來以為咁大雨唔洗踢，但最終開得成仲輸好多呢，不過原來呢隊好勁架，咁冇得講啦！踢完同笨元撘地鐵返長沙灣同老公會合，去君日快食個晚飯就算，回家搞回條都搞咗我大半個鐘，嚟緊日子會點過呀！

1/9/19

1/9/19.    SUN.    RAIN

今日心情都係麻麻地，又要預備開學啦！朝早瞓到9點幾先起身，煮早餐再叫笨元起身食嘢，仲仲午後要足球，但佢兩個十食完個早餐已經激死我，叫佢地郁又唔郁，激到我要離家出走，最終鬧完佢地一輪，一齊落咗去就惠康買嘢，又要回來攞埋嘢去踢波，踢完返去煮午餐，整個雞肉繪麵好好食呢！3點幾老公返咗嚟，本來有波踢但最終又冇！於是喺屋企同仲爺做吓練習，子元就去咗游水！晚飯後出咗荃灣Aeon睇吓有冇仲仲的飯盒賣，子元又要買水樽，搞到10點先返到去，快手K.O.佢地瞓覺先沖涼！