30/11/19

30/11/19.    SAT.    WARM

今日兩隻仔都要踢波，唯有一人帶一個，子元踢一早至下午，仲爺就冇咁早，所以老公放工回來接子元出去，我就瞓到9點幾起身煮早餐食完再捉佢做埋啲功課先出去，本來諗過撘巴士，但其實都係大圍轉，唔快得好多， 都係地鐵時間穩陣啲！差不多1點入到去，但都係上半場尾先出場，都係踢得怪怪咁啦，2點完成沖埋涼快走，3點就趕到去海怡，可以食埋個麥當勞先去學嘢，我就去咗食撒利亞，好滿足！接番仲爺就撘巴士返屋企，返得去老公又揍子元出去練波，仲爺又跟埋去，咁我就可以自由吓，對哂子元啲功課打吓機咁，7點幾出門口，本來諗住去球場會合，但老公又叫我直接去食嘢嗰到，仲要攞埋位呢，食埋吹水吹到10點多先走！

29/11/19

29/11/19.   FRI.    COOL

今日真係忙到從未試過咁忙！完全都冇吹過水，朝早自己出門口，又獨留兩個仔喺屋企，嫲嫲再過來睇住佢地，我都係返到去食隔夜麵包咋，仲唔快啲開工咩，結果一朝都係做，我只係想今日做好啲嘢今日快啲過！午飯後都係上去買咗轉湯包吹咗陣水，又係咁做囉，嗰啲咁嘅bill，坦妃擺明就係想喺親生女返嚟前處理好唔洗佢搞囉，總之都係煩到我地，下星期返job cert我唔理咁多啦，我要做我地嘅嘢！放工都冇即走，keep住嗰種你比咗好多額外嘢我地做，搞到兩個準時放工嘅人都要遲放！返到去嫲嫲煮緊飯，我就執好啲玩具，食住飯等老公回來交收，仲爺去合唱團，佢又返來食埋飯出去接仲爺，我就睇功課等等！今晚老公返多轉夜更，明天又唔洗請假又揍到子元去踢波了！

28/11/19

28/11/19.     THU.    WARM

今日係兩隻豬仔最期待的海洋公園旅行日，但笨元就好唔開心冇得同同學一架車要跟細佬，老公就同我地食完早餐就去接嫲嫲直接過海洋公園，差不多10點終於可以入到場，最搞笑係今日OLR都有活動喺嗰到，我都同其中一個老師打招呼，佢話認得我都唔知真定假！今日主要係先玩咗山腳，食完午餐再玩山頂！不過喺山腳的時間子元都唔多好面口，因為佢好想同啲同學一齊玩呢，但真係做唔到嘛，由得佢黑囉！睇完魚睇完熊貓，去咗威威天地就狂玩囉，仲喺嗰到接到婷婷，咁就全日都一齊囉，玩到12點幾出番去水都嗰邊食意粉，然後就上山頂玩，本來想坐完轉轉海洋生物撘覧車，但婷婷唔想坐之餘又要等30分鐘，所以最後都係去咗撘海洋列車囉！上咗去子元找到啲同學，就跟咗佢地玩，咁我地就睇企鵝囉，之後仲爺都去咗玩過山車，我又跟吓笨元，去咗玩激流，但都係喺上面用水射人好玩好多！之後分兩路我就同仲爺佢地落番山腳，老公就喺山頂陪子元，排隊撘覧車落番山腳，去威威天地玩多陣，等老公佢地落嚟就走啦，都已經6點！因為要去石門仲仲練波，結果7點先去到，踢完就去對面食埋晚飯回家，今日真係堅攰！

27/11/19

27/11/19.    WED.    COOL

今日都係好忙啦，其實為咩咁忙啦，咪就係比人局我地呢啲養女做咗親生女嗰邊啲嘢囉，係好灰架，但可以點啫！朝早揍仔返學再買早餐返去食，吹咗一輪水先開工，但一開就冇停過，連屎都冇疴囉，就係應付佢所追嗰啲bill！放飯梗係入房吹水啦，最開心係呢吓！下午3:30要開會，但嗰邊死要迫我做嘢，最終我入去開足2個鐘，仲開咗個「負能量太太團」啲group，一班飯腳可以吹水！開完會出來得番半個鐘都要即刻chur我做嘢，真係好無癮囉，唔理啦照準時放工，返屋企等老公揍埋兩個仔回來接我，出去食晚飯，因為都冇哂餸，回來就收拾明天海洋公園之旅的行裝呢！

26/11/19

26/11/19.   TUE.    COOL

今日老公揍，但都係好趕囉，明天要自己返更加要早！去工商食埋早餐就返去開工，今朝唔知點解都係未停過，真係好攞命！成日覺得我地冇嘢做的人唔該死開！午飯入咗房食，又吹吓水講吓壞話咁囉，下午又係好多嘢做啦，經理們一句就有排你做架啦！又要做埋appraise 喎，好在冇咩嘢講，都係講我轉經理啦，好在有呢個話題！放工撘巴士去南昌同老公佢地會合，因為嫲嫲話出嚟食嘢，咁就去咗食日本嘢，真係好耐未食過咁！之後喺個場到行吓，去超市買埋明天午餐的材料，老公車咗我地回來再送嫲嫲返屋企，沖完涼先發現仲爺冇攞書包返嚟，真係激死，唯有等老公回來才攞上來，溫住默書先，最終做埋功課都11點先瞓得呢！

25/11/19

25/11/19.    MON.    COOL

今日要自己返工返學呀，照例子元行得好快，其實都唔明點解要行咁快！揍咗佢地返學我就返工，今日有西鐵呀，但去到又冇早餐買好慘，都係要返番去買7仔陰公！咁返到去都係做吓自己嘢啦，要排咗個更表先，跟住做吓其他嘢啦，食飯時都係吹吓水打吓機啦，下午都係咁過，但臨放工又比二姐係到話啲電郵問題，話啲bill應該要點點點知追，真係好想小爆佢，佢而家根本係明目張膽咁張佢地條line的工作推哂比我地呢邊做，真係好仆街囉！搞到我要同阿姐告狀咁！買埋餸撘巴士返去又要煮飯，咁都未最慘，係教仲爺做功課先係最攞命，又派咗英文卷，文盲仲得35分囉，佢知唔好但又冇咩咁啦！教埋佢做功課都11點多先瞓，我仲要摺衫呢！

24/11/19

24/11/19.   SUN.    WARM

今日係香港一個好特別的日子，我都用咗90分鐘去排隊，排咩呢就係排隊投票！我地都衰架啦，瞓到10點多才起身，梳洗完出門口都差不多11點，趕唔切啲茶記早餐，要去食全日餐，然後老公就去攞射波紙，我就帶住兩隻嘢去票站，因為阿媽要出街，想放佢兩個上去都唔得，咁就一齊排啦，邊排邊同仲爺溫英默，因為明天要默嘛，但都係冇咩用，條友都係唔多記得囉，排咗個半鐘，終於輪到我！投咗咁多次真係未試過，大家都積極咗好多囉！老公睇完醫生嚟接番我地回家，兩位繼續溫默書，3點多叫老公煮嘢食比仲爺食咗先再去游水，我地就去長沙灣食，試咗間新嘅車仔麵！返去接番仲爺就入青衣買黑鞋比仲仲，終於買到了，咁隨時可以換冬季！返上青梅晚飯，係老公同仲仲的生日飯喎，我地主力負責食呢！仲爺就唔多合作啦，成日比我鬧比我罰呢！9點幾返去快啲沖涼瞓覺，我地就睇選舉點票！

23/11/19

23/11/19.    SAT.    WARM

今日都係如常的星期六，加上老公放假，都過得幾hea！朝早子元要補英文，8點幾要起身出門口啦，揍咗佢過去我地就去食早餐，老公攞車去洗，然後去接番子元再去畫班，仲爺就返屋企做功課，都係勞氣架啦，教唔聽咁！老公接番子元回家，又差不多時間到仲仲過海學音樂，今日老公同佢撘地鐵過去，因為冇紅隧又冇171嘛！我就同笨元喺屋企煮午餐，睇吓功課溫吓書又hea啦！仲爺回來做埋份常識就出去食晚飯，近近地去咗奧海城食food court，本來想幫仲爺睇吓有冇黑鞋，點知都係冇，咁唯有明天再出去睇！揍咗我同仲爺回家，佢同子元就出咗去踢波了！

22/11/19

22/11/19.    FRI.    WARM

今日都係有老公揍返工返學，所以慢慢食埋早餐就返工，今日著得比較hea，點知阿姐話group老細嚟開會，返埋位同ivy講唔夠兩分鐘大小姐叫咩名，佢就殺到，好在我認到，帶佢去A房，真係比佢嚇死，大家都feel到我好緊張呢！由於今日著得太Hea，去咗借衫著，等自己變番斯文啲！跟住都係做嘢啦，今日都好多嘢做呀！午飯後上咗31樓shopping，今次係位元堂呢，我地都係主力買湯包，買完一轉又上去陪catherine再買過，阿姐又話仲想要某隻湯包，佢地衰到話叫我跪都要跪幾盒回來，咁我都找到兩盒回來比佢！開心shopping完又要做啦！捱到happy friday的放工，就尤行過去球場搵番我啲豬仔，帶仲仲返小童上合唱團，我就hea吓囉，唔想煮飯所以等佢地唱完就返咗長沙灣食元朗冰室，回來仲仲好似有啲燒，可能因為今日打完針，唯有比藥佢食啦！

21/11/19

21/11/19.   THU.    COOL

有老公揍返工返學真係輕鬆好多，去到食埋早餐我就返工啦，今朝都係好好咁做嘢啦，臨近年尾都係乖乖地好！都有同佢地吹吓水，分享吓子元琴日九華試完腳可以直入面試環節的喜悅！午飯又入咗房同Catherine佢地吹水啦，真係八婆咁！下午襯阿姐去咗開會時就整吓相先，之後都係做嘢囉！放工就慘啦，諗住撘巴士ok，點知42c同38都上唔到車，諗住去撘40又滿坐，最終等到架6D照上，但7:45先返得到屋企，真係好漫長！完全唔想再煮飯，去咗pizza Box買Pizza食，老公 同仲爺踢完波回來，食飯沖涼做埋啲功課，10點半前打暈埋佢地可獎人好咁睇全民造星呢！

20/11/19

20/11/19.    WED.    COOL

今朝等老公回來就車我地返工返學，找啱路都好快返到公司，仲可以同老公食埋早餐先返上樓！跟住就開工啦，呢幾日都好多唔知咩要做咁，忙死了！午飯後都係一齊吹吓水咁，下午又係開工啦，呢幾日真係好多嘢做呀，所以時間過得好快！放工去撘地鐵，因為要接埋仲爺返屋企！老公就揍咗子元去九華試腳然䶃水konter練波，我就同仲爺回家邊做埋啲功課邊煮飯，又係好似唔夠時間用咁！今日兩位少爺都派咗卷，子元派咗英文有84.5，四捨五入都有A，仲爺派咗數學得41分，嗰種差別真係一半都冇囉，不過我都接受咗遇咗，總會進步的！8點幾9點佢地返到嚟就開飯啦，老公話九華收咗子元的cv，自行交埋表就包有得interview，15個人去試腳，收得9份表咋，即係你踢得都冇用，一樣要成績好，所以文武雙全真係好重要！

19/11/19

19/11/19.   TUE.    COOL

今日仲係要停課，老公又返夜，好在佢都算準時返到嚟，咁我就可以7點9出到門口，選擇咗撘40號，不過龍翔道塞車，所以落咗巴士都係要急得嚟要跑我先安心，好在8:56都返到，但就真係跑到出哂汗呢！朝早可以用未停過嚟形容，加上ivy去咗開會，有人上嚟攞job cert我都係要做埋，還要開門聽電話等等，真係完全做唔切！午飯入咗房同catherine佢地食，吹水講八婆嘢最開心，話咁快又要開工，下午都係冇咩停手啦，冇法啦呢排積埋太多嘢，又成日早放等等邊做得切嘢！放工見巴士又唔知咩狀態，見到官生佢地我膽粗粗問佢地架車會去邊，咁又真係啱路喎因為OC嘛，轉兩個站就返到去又唔洗迫，真係舒服好多！返到美孚等老公來地鐵站接我，因為要過元州出糧比工人，咁就喺嗰到食埋日本定食餐啦！又抵食又好味！回家沖涼休息，老公差不多10就出門口返工，兩個寶寶都瞓哂，明天終於復課，好好去學習！

18/11/19

18/11/19.    MON.    COOL

今日都係要停課，老公返中所以我下午都要請假，真係好想話可唔可以帶埋佢地返工，我覺得呢啲特別日子真係要通融吓囉，不過梗係冇可能囉！一家揍哂我返工食埋早餐，佢地就返屋企我就開工囉，因為要半日內做哂全日嘅嘢，唯有開行油門做嘢！食完午飯就返去，買埋餸今日唔出門口架啦，老公同佢地食埋早餐就揍佢地回來佢去返工，今日佢仲要踩兩更，所以我們都閉關！比佢地hea到3點就要開始上堂，其實都唔知可以點教，總之溫故知新咁啦，到5點幾放生佢地啦，比佢地自由活動吓，笨元梗係睇機，仲爺就喺到畫嘢囉，6點幾7點煮晚飯食，然後都係沖涼休息，仲仲食埋藥都瞓啦，見到仲爺畫咗支旗，應該心痛的吧，一個6歲的小朋友，似懂非懂的支持著香港人，雖然在佢眼中好多問號，但我都似解答唔到佢咁，真係好無奈，我地呢地廢中淨係識得返工，除咗不抱怨外仲識咩呢？

17/11/19

17/11/19.   SUN.    WARM

今朝只係子元要畫班，但我又唔想咁早起身，所中以都係學10:40嗰堂，10點多先出門口食早餐，所以都唔係好夠時間，只可以喺畫室附近快食，回家後同仲仲溫中默，但老公突然話唔新聞報咗明天又停課，不過都要仲爺溫哂先呢！最灰係明天老公都要返中，我要請半日假呢，好在我都仲有假期啫！老公揍番子元回來，然後都係無無聊咁過，3點多出去食嘢後就到仲仲游水，黃昏到老公踢波，我地就一齊去球場，反正有地方比仲爺放電，不過單車場勁細，有輔助輪又唔比踩單車徑，所以最後都係去咗遊樂場玩！真係放哂啲電，晚飯後就喺回程車瞓咗！

16/11/19

16/11/19.   SAT.    COOL

今日老公要返工，咁我就要揍住兩隻豬啦，冇補課冇嘢學，原來會變得咁hea！子元都仲有得補英文，所以8點幾出門口，我同仲仲喺大家樂食埋早餐，跟住去遊樂場玩，接番笨元之後就去街市買埋嘢可以回去煮午餐用！返到去都係hea住先啦，不過都要做吓家務換咗床單等等，煮埋午餐食又係hea，但發覺仲爺開始有燒，於是等老公回來接埋我地就去法國睇醫生，本來以為好多人又冇葉醫生，點知又人少又有得睇葉醫生，咁又6百蚊啦！返去食藥瞓覺，我就摺埋啲衫，老公同子元去咗踢波，晚飯去咗食粥咋，回來又沖涼趕仲仲瞓覺啦！

15/11/19

15/11/19.   FRI.    COOL

今日要一家大細揍我返工，經過琴日咁真係冇辦法唔咁做，8點幾過到公司樓下，計計時間都係上去拍咗卡先穩陣，食完都準時上到去，跟住就開工啦，估算今日都有機會早放，都係快啲做好啲嘢啦！不過時間就好似過得好慢咁囉！終於捱到放飯啦，又有加餸所以12點幾已經出出入入去整餸呢！一邊食一邊吹吓水啦，2點開工後聽到VW嗰邊講有得早放，果然3點-4點開始可以放人，咁就叫老公過來接我，順手車埋Phoebe因為佢都係返荃灣，老公佢地未食嘢，咁不如過愉景食嘢順手行一陣啦，5點幾6點先返屋企，hea到7點幾先煮飯食，不過仲爺好似唔係好舒服，佢話喉嚨痛又有鼻水，應該係少少傷風囉，食完飯快手同佢沖咗涼食埋藥就瞓啦！等佢瞓咗我地先慢慢做其他嘢，10點多都趕笨元去瞓，明天都要補習的！

14/11/19

14/11/19.   THU.   COOL

今朝諗住停咗課，由得老公同兩隻豬繼續瞓，以為同之前一樣交通點都掂，點知就出事啦，西鐵又唔得，等咗一輪先出要等20分鐘先有下一班車，已經趕唔切去得到紅磡轉shutle，咁就轉去荃灣線，但上咗車都係冇用，因為唔開車！唯有上番地面再試吓撘小巴，去到小巴站見到起碼有百幾二百人排，但巴士又冇，我唔想喺地鐵撘兩個鐘，所以決定路面！但等極都冇車，咁啱pest team嗰邊問開齊人未，我就撘嘴話我仲喺美孚呀，文哥轉個頭就打嚟話救我啦，真係好感激，不過佢地都要去攞咗車先可以嚟車我，9點幾過到嚟，所以10點多我都返得到去，因為下午請咗病假去覆診，所以都要快啲做好嘢，食埋個飯就落樓，叫咗老公嚟接我，好快就去埡弓葵涌醫陣啦，睇完叫咗我試吓加半粒藥睇吓點！等老金嚟接埋我就回完，仲爺啲功課都未做哂就返去做好埋佢，跟住就去咗球場踢波，踢到7點多就去食米線才回家休息。

13/11/19

13/11/19.   WED.    WARM

今日應該有咩心態呢！一起身睇到啲message都心知不妙，交通等於冇，冇東鐵之餘仲封埋吐露港，真係北區唔洗出嚟！我地呢，咁啱老公今日放假，有車可以先車咗兩位少爺返工，跟住就到我去返工，出奇地順𣈱！因為路面冇咩車呢！返到公司附下食埋早餐，返上去睇吓有幾多人返啦，咁最終都有24人，兩位阿姐都返唔到，但我地都自動波做應該做嘅嘢，做到飯前我問咗阿姐可否2:30走，因為要遇番時間接放學，咁佢地都放人，我仲揍埋青衣同事一齊放！放飯時開心吓啦，佢地又帶餸返嚟加料！飯後執埋啲手尾就閃，最終3點未夠就去到學校等，接咗佢地老公要去食嘢先返屋企，又喺樓下撞到Janice，於是上去同bb玩吓，跟住又入青衣食飯啦，嫲嫲叫我地入去食嘛！本來諗住之後返去踢波，但老公收到call要去接番joe兩公婆回來，所以陪佢地踢咗陣就走，我就同佢地踢多陣才回家，明天不用返學但笨元就可以自己做咗功課先，仲爺就交比哥哥明天幫我跟啦！

12/11/19

12/11/19.   TUE.    WARM

今日都係好辛苦咁返工返學，等地鐵等到7:45先有車，又要跑返學啦，跟住又到我要去南昌站，好在有車係站站都要等先開車囉！返去買埋早餐，又要開工啦，朝早都好勤力咁工作架，午飯後同人吹吓水咁，有個同事兩日都好邪咁坐著會著火的港鐵，所以我都算係咁！下午都真係做嘢，明天有得自由活動半日喎！放工有得跟車走梗係跟，去咗紅磡撘西鐵返美孚同老公佢地會合，入青衣接埋嫲嫲去咗大窩口食泰國嘢，但冇之前咁好食，同埋食完都快啲走，又唔知出面交通點，好令人擔心！返到去都係趕佢地沖涼瞓覺，個人好攰啦所以都好惡咁趕佢地快啲！晚上的新聞真係睇到人地好心痛，無力感太重了，同蘇sir吹咗一輪水，大家都係呻吓咁啦！

11/11/19

11/11/19.    MON.    WARM+

沈重的一天，老公返早，我要揍仔返學，本來都冇咩特別，但今日發起三罷，所以交通都好大問題，首先係去到美孚站月台已經不尋常地人多，等咗起碼5分鐘先有車，大家梗係迫哂入去啦，我唯有保護住佢兩個上車囉，之後子元都快跑咗返學，我就同仲爺慢慢行！揍哂佢地就行去南昌站撘西鐵，但等咗10分鐘先有車，之後都算順暢，8點9已經反到去，朝早都係如常咁做嘢啦，午飯又有加餸，食吓吹吓水咁，點幾時阿姐話公司提早比我地放工，因為各區都好多事，學校又冇得課外活動，3:30準時放學，即然有得早放就去接佢地放學，等老公放工過來會合！車咗我地返去佢就去嫲嫲到，兩隻豬仔就去咗放電，喺樓下遊樂場玩餐飽先返屋企做功課，晚飯等老公煮，飯後都係早啲做埋啲功課休息啦！

10/11/19

10/11/19.    SUN.    WARM

今日覺得好無聊！朝早好早醒咗去咗個廁所又再瞓過，但係瞓得唔多好，老公揍咗子元去踢波，今日有兩場，所以要黃昏佢地先返，我就同仲爺係咁無聊啦！首先煮早餐，都係煮個麵咋，跟住就收拾現場，仲爺又喺個廳起咗間屋囉，順手叫佢換埋床單！收拾好地方，就要佢溫英默，但都係抄咗一次，同默咗次背默咋，然後就食午餐，又係煮麵只係今次加咗餐肉！食完就帶仲爺去游水，等佢游完就要去睇戲，睇未來戰士，點知完全唔掂咁，仲要有啲悶！真係可惜！睇完就去咗深水埗掃街式晚餐，返到去趕佢地沖涼瞓覺，明天又要返學啦！

9/11/19

9/11/19.    SAT.    WARM

今日都係一般的學習日啦，朝早老公揍咗子元返去補課就來接我地出去食早餐，然後同咗仲爺喺荔天隔離個遊樂場玩住等笨元，跟住揍佢揍佢去畫班啦，我同仲仲就返屋企，找仲仲的冬天游水衫，變咗執咗好多冬天衫出來，都啱架啦要換季！執得一輪再入石門踢比賽，仲爺都踢得幾好嘅！但食咗吓波餅就出咗場，踢到2點散得快閃，又要去海怡學音樂，好在買定個包比佢食，因為過得去又上堂，邊有時間食，學完撘巴士返去，仲爺攰到食咗個包食得一半就瞓，瞓到落車都瞓咗一個鐘啦！回到家hea 吓執埋佢啲衫，7點幾煮好飯食，其實都係煮麵同整番星期四啲餸！食完都係晚上如常做法，清潔沖涼瞓覺，我地就摺衫，等老公回來做外賣仔！

8/11/19

8/11/19.   FRI.    COOL

今日都係老公車我地返工返學，下星期返早，我又要一揍二行餐死！食埋早餐返上去都冇去吹水，今日氣氛應該唔係咁好嘛，都係努力做嘢好啲！午飯後入咗房同catherine佢地吹水，八婆一餐幾開心架！下午都係做嘢啦，點知又話今晚會有社會運動，提早5點可以收工， 快手做好埋啲嘢收工，撘地鐵返去接埋仲爺，就回家局佢做哂啲功課先出去合唱團，我就係咁打機囉！等佢地放咗就揍哂仲爺婷豬去曼山，程家已經攞咗位打邊爐，我地食到10點幾11點先肯走呢！

7/11/19

7/11/19.   THU.    COOL

今朝都係老公揍我地返工返學啦，食埋早餐返公司，忙碌咗成朝呢，月頭係咁架啦！午飯都係喺位食，因為又有得加餸嘛！食完去咗吹吓水咁，時間都過得好快，下午都係做，氣氛唔好都係專心做嘢好，反正都大把嘢做！放工馬上去會合接仲爺去踢波，我就睇埋琴晚瞓咗冇睇到的全民造星，踢完波返到去嫲嫲煮好飯，大包都上咗嚟食，食完就迫仲爺做咗功課先可以食雪糕，所以做得勁快呢！10點幾沖好涼瞓覺，我就可以休息吓啦！

6/11/19

6/11/19.  WED.    COOL

今日最後一日返半了，因為今日溫埋就可以了！朝早送咗佢地返學，老公就送我去英華嗰邊交表，然後就自己去撘車返工！買咗麥當當返去公司食，然後就要開工啦，今朝都好忙咁冇停過，得番半日做全日嘢，午飯後就閃人，返屋企等佢地返！今日子元學界要比賽，全級就佢地幾個提早考試呢！又溫咗3個幾鐘數，子元都係錯嗰啲無聊嘢，仲爺比想像中好，6點幾放監，入青衣找嫲嫲一齊去青衣城食西餐，食到飽到上頂！回家快手捉佢地沖涼瞓覺，我又喺梳化瞓鬼咗！老公攞咗架車去比人研究air bag個燈點解著咗，所以晚上又係我一個人咁！

5/11/19

5/11/19     TUE     COOL

今朝都係老公揍我地返學返工啦，今日返到去真係做到冇停手啦，唯有盡量快盡量做好先，唔好要人地幫咁多手！放工前食埋飯先，又有琴日加餸嗰啲未食哂可以再食，真係超正！撘地鐵去長沙灣同老公會合，佢揍埋仲爺放學去食什飯，車埋我地返屋企佢就返工，我就開始常識之旅，子元先做練習，我就同仲爺做功課同溫咗常識先，之前睇都冇睇過，真係唔知佢考咩，但條友仔比起其他科係知道多啲教咗咩架喎！

4/11/19

4/11/19.   MON.    WARM*

今日開始考試了，我都好緊張囉，真係好替佢地擔心，尤其是大嗰個啦，呈分喎幾緊要先得至架！揍咗佢地返學就食早餐返工啦，今朝竟然冇咩做，因為啲人都冇交job cert上來，於是咪吹水做自己嘢囉，午飯前要做阿四，因為今日應SEML的大人物要求，搞咗個大食會咁，所以要係咁翻熱食物啦，切生果等等，差不多1點開飯啦，但完全冇食到飯盒，只係食哂大家整返嚟啲嘢食已經飽！1點半左右都走啦，要返去溫書呢，等佢地兩隻豬仔食飽嘢就開工，都係係咁做練習啦，到6點幾佢地要求煮飯，咁7點幾有得食啦，食完沖涼再做paper，笨元其實有補住英文我又不太擔心，只要小心啲就得！仲爺就例行唔知自己做咩架啦，好令人心灰意冷呢！

3/11/19

3/11/19.    SUN.    WARM

今日都係被困的一天，因為要溫書嘛，都冇咩地方可以去！朝早瞓到9點幾，起身出去食早餐，回來就開工了，仲爺交咗比老公，咁佢當然係教到喊打喊殺咁啦，我都唔理得咁多，搞掂笨元先，老公2點多出門口返工，我就煮午餐食，子元3點多要出門口去奧數比賽，好在有程生揍佢地，我就同仲爺溫書，但我覺得點溫都係咁上吓架啦，但都要書吓力，5點去游水，我就去咗超市買吓嘢，6點又去接番佢啦，跟住回來邊煮飯邊趕佢地再溫吓做吓練習，太hea會連心都散埋！食埋晚飯清潔埋沖埋涼就捉佢地溫馥至幾多得幾多啦！

2/11/19

2/11/19.   SAT.    WARM

今朝子元要補英文，老公先揍咗佢過去再來接我們食早餐，然後要行過去接番佢，因為cube cube仲未沖好涼，回家後開始要溫書，老公就被指派了去同仲爺做功課，溫到1點幾就出去食嘢，然後交收仲爺比cw，佢幫我揍過去學音樂，咁我就有接近3個鐘溫書，主力搞哂散科啲嘢，原來都幾難搞，尤其音樂，都唔知咩係大調小調等，可以背的就背啦，5點多出去接番仲爺，佢又話要瞓就比佢瞓陣，然後就過阿媽到食晚飯，阿嫲生日嘛，仲爺仲整咗卡比佢添，食完飯洗埋碗食埋晚飯就返去，沖完涼趕佢地去瞓，我可以hea吓！雖然今日唔係溫得好甘，但其實都有用力的嘛！

1/11/19

1/11/19.   FRI.    COOL

終於捱到星期五啦，揍咗佢兩個返學我地就食早餐返工，返到去都係吹吓水啦，嘢都有啲做吓嘅，午飯同咗catherine佢地食，都係講事非啦，不過講得多就開始覺得佢地太小心眼，好多嘢都唔想比人知咁，船頭驚鬼船尾驚賊咁，不過算啦，唔管得咁多！下午真係要做嘢囉，做到差不多放工呢，行過去球場同老公佢地會合，因為老公要車梓朗返屋企，所以子元都遲咗去球場，冇所謂啦踢少陣，我就揍仲爺返去小童合唱團囉，程生車埋我返屋企換衫休息吓先，晚飯就同程家去晚飯，食埋麥記先回程，明天入冊啦今晚食餐好啦！