31/1/20

31/1/20     FRI     COLD

今日門口都冇出過, 老公返早, 基本上都冇地方可以去, 咁咪喺屋企吽囉, 瞓到10點多起身, 齊齊食麥片做早餐, 跟住就係hea啦, 到咁上吓的起心肝郁吓, 睇吓子元要溫習要預習的各科, 嚟緊都係要靠自己架啦, 教得幾多得幾多啦, 仲爺嗰邊就要等郭老師識唔識做, 比啲資訊學生! 差不多2點多就整午餐比佢地食, 都係食吓粉咋, 食完又hea, 幫子元溫習時就比仲仲做吓網上練習, 叫佢正經上堂冇可能! 子元叫做同佢預習咗一課中文啦, 又搵咗一堆練習比佢下星期做, 因為下星期我應該冇得在家工作, 衝番一個星期啦, 月中閒番啲都要夾番啲假嚟請下午, 唔係真係要獨留兒童在家先掂! 老公5點幾回來接子元去畫班, 所以8點幾等佢地返來先食飯, 之後都係清潔同睇電視囉! 明天仲爺又要畫班又要音樂, 對我嚟講係挑戰呢, 因為要撘交通工具, 自從咁嚴重之後都未試過!

30/1/20

30/1/20.   THU.    COLD

今日都係所謂在家工作，好在係阿姐冇出現過喺電話到，安全過度一日！朝早瞓到10點多，又係出去食早餐，仲幫晴媽買埋米送過去， 因為長沙灣嗰邊買唔到呢，好在我地樓下有間隱世惠康仲有存貨啫！食完早餐返去， 子元就鏽曲線，我就同仲仲做吓網上練習， 3點幾4點出去球場曬吓運動吓，本來都諗住煮晚飯，但因為唔記得解凍冇得煮，又要去程家攞口罩，所以出咗長沙灣食越南嘢，明天記得解凍唔係又冇得食！

29/1/20

29/1/20     WED     COLD

今日在家工作嘛, 我都真係有工作過架! 不過隔離行的事我地呢邊堅係幫唔到架喎, 又要出聲應真係好煩, 不過下星期返去又另一光境, 唔理得咁多啦! 朝早瞓到10點幾11點, 出去食個早餐, 去超市入埋貨就回家, 老公教子元做綉曲線, 我就同仲爺溫吓書, 做吓網上功課等等, 老公4點幾出去接埋嫲嫲就來接我們, 因為佢好想去食打邊爐, 咁人又少又近都係去VWalk啦, 食完都行咗個圈先回程, 返去都係沖涼收拾吓睇電視囉, 趕咗仲爺瞓覺, 又摺埋啲衫, 老公11點幾出門口去機場接程生機, 因為要迎接一堆口罩, 日本空運喎, 點都值啦!

28/1/20

28/1/20.    TUE.    COLD

改咗今日入沙田，所以朝早可以瞓晏啲，我都係10點幾起身煮麵比佢地做早餐，老公雖然朝早放工返來，但都唔係咁瞓得嘛！差不多12點先肯起身！12點幾入到去都係食飯啦，吹吓咁，但我地都係唔多啱吹架啦，我主力又要睇住仲爺，食完最終兩點幾就回程了，車埋阿媽返屋企，我地去買埋餸咁就回家了，子元話想放車就去放啦，老公就返咗去瞓，放完車回來休息吓咪開始煮晚飯囉，之後都係如常咁食飯洗碗清潔啦，老公9點幾就出門口返工！明天本來我要返工的，但晚上阿姐出通告，公司安排非緊急部門可在家工作，咁admin就係非緊急，所以下星期一先返，咁又賺咗幾日囉，我估唔會計AL的！

27/1/20

27/1/20.    MON.    COLD

今日瞓到10點幾先起身呢，預咗中午後去到Joyce家玩，所以慢慢梳洗好出門口，先去食早午餐，然後再入去海怡，都唔洗12:30已經入到去，老公去泊車我地就自己上去先，要睇住仲爺唔好周圍搞真係好攰！食住吹住水等齊其他人，Joey媽媽佢地上埋嚟就開始亂啦，大家都係keep住打機食嘢咁，時間其實都過得幾快，個game叫overcooked真係幾好玩，我地大人仲玩得開心呢！到5點多拆埋禮物就收拾回程了，兩隻豬仔都瞓咗呢！返到去都唔諗住出去食啦，屋企有咩就食咩啦，晚上老公又要返工，佢都算幫手搞埋兩隻嘢先架啦！

26/1/20

26/1/20.   SUN.    COLD

今個年初二都係好唔同，去嘅地方唔同以往，香港的氣氛都唔同哂！老公今朝放工回來，就叫我地起身，因為8點半要去望彌撒，估唔到老公會為咗個仔咁積極，其實真係應該讚吓佢，咁今日反正假期冇特別活動就一齊去啦，估唔到又好方便亦都好自由咁，其實我中學畢業之後都冇望過彌撒，感覺既親切又陌生！完成找神父簽埋名落簿就回家休息，老公要瞓覺， 我地就hea，到點幾我都攰到瞓咗，但2點多就要起身出門口，約咗嫲嫲食lunch，入青衣食太興，然後返青梅，找到好節目就係玩十三張！玩到食飯睇埋愛回家，8點幾回程，仲爺話要食雪糕，老公就帶咗我地去荃新天地食一個黃店的雪糕，仲爺梗係第一時間做文宣啦，差啲雪糕都唔食！跟住真係回程啦，老公就返工，我地就回去好好休息！

25/1/20

25/1/20.    SAT.    WARM*+

今日係大年初一，今年真係處於一個勁冇氣氛的狀態下過，加上老公下午要返工， 更加冇氣氛！朝早瞓到9點幾，梳洗執得嘢嚟， 再食啲嘢先出問， 過到去剛好11點，都係hea住咁等到11點幾12點， 怡嚟埋就走， 去阿嫲屋企食飯，忙忙亂亂咁都唔記得影相，係忙亂到連電話都漏咗，返到樓下先發現，好在叫得切老公回來車我返去攞啫！返到屋企就抖吓先， 抖到3點幾要趕佢地去做功課，咁全個下午就喺到做啦， 晚飯食番琴晚啲餸咋，簡單啲嘛！食完都係清潔沖涼休息啦， 笨元就要睇埋電視先肯瞓！

24/1/20

24/1/20     FRI     WARM

終於捱到星期五啦, 又係年三十晚, 所以有得早放! 朝早自己返工啦, 食咗麥片出門口, 返到去都係買早餐食, 食完咪繼續Hea囉! 完全處於打機狀態, 吹吓水做吓嘢咁又放飯, 當然嗰三條PK唔會理我啦,經過老公琴日分析, 我亦都唔會再做啲咩, 所以喺位食完跟咗Ivy佢地出去買嘢, 買咗啲糖放全盒, 下午返多一個鐘就放得工, 所以都係執嘢咋, 3點準時收工, 老公嚟接我, 返屋企收拾吓啲手尾等等, 4點幾出門口入青衣, 嫲嫲話仲爺要食麥記咪去買囉, 上到去都係睇電視打機等開飯, 係幾舒服既, 又食又拎後, 就去VWalk 食埋雪糕回家了! 比佢地兩隻豬仔做埋啲新年嘢, 貼吓揮春比埋壓歲錢佢地就可以瞓了, 我仲要入利是呢!

23/1/20

23/1/20     THU     WARM

今日本來冇咩事, 開開心心開工, 但因為有3個傻人,做啲令人傷心的事, 令我今日係唔開心架,不過分析過後,其實係因禍得福! 因為咁蠢人令自己唔開心唔值得囉! 早上有同事話買詩樂氏,咁咪上去買囉, 講真我唔會專登問人要唔要買, 除非你之前問過我啫, 因為咁而話覺得嬲覺得咁就要反面, 咁呢啲朋友要唔要都罷, 真心覺得佢地冇腦! 午飯自己食完, 想同佢地三口六面講清楚咩事, 最終見佢地入咗房, 就入去同佢地講清楚, 聽完嗰啲所謂的理由後, 我覺得我已經盡咗我能力, 呢啲朋友我放棄! 但情緒都係要發咗出嚟, 本來想等Ivy回來同佢講, 但阿姐咁啱出現, 說話又咁啱觸動咗我情緒, 結果我就對住阿姐講咗出嚟, 咁佢都好聰明咁解答咗我安慰咗我, 真心覺得阿姐好聰明! 佢叫我唔好放太多感情去同事身上, 聽落都啱! 下午都係做咗嘢打住機咁, 等放工入石門, 等仲仲踢完波食埋飯就回家了!

22/1/20

22/1/20.   WED.    WARM

今日都係冇咩做，都係開心嘅，總好過忙嘛！早上揍咗佢兩個返學就返工啦，返去食吓早餐吹吓水咁，阿姐9點幾就出左去，仲要飯後先返，我地仲唔作返咩，係咁打機先啦，然後密謀出去打邊爐，最終當然成功啦，同Ivy, Ruby, Phoebe佢地去咗食，2點多先返到但都早過阿姐，下午轉咗玩摺紙，又教吓人咁，咁又一日啦，放工去啟業買蘿蔔買餸等等，返去整好佢地先返，非常成功！今晚好眼瞓！

21/1/20

21/1/20.    TUE.    COOL

今日再早啲起身，唔想再咁趕返學，加上要煮飯盒，都係要預早啲，最終都好順利，返到公司hea食早餐hea住開工， 因為要做嘅嘢都做得七七八八，所以今朝真係好hea，仲喺到玩整過年壁報咁，又炮仗又揮春咁，玩到午飯去咗飲茶，反正Catherine都唔飲，就我地三個今日自己飲啦！下午返去都係完全唔想做嘢，所以喺到摺紙，真係無聊到一個點！咁就捱到放工，買餸返屋企煮飯，煮得嚟佢地都踢完波返，食完諗住唔洗理功課，但仲爺都係有嘢要做，手冊又寫得少少咁，但老實睇完都唔明老師寫咩囉！最終11點多先有得休息呢！

20/1/20

20/1/20.    MON.    COOL

今個星期其實真係好holiday mood，今朝又係趕趕忙忙返學去啦，我帶咗蘿蔔糕返去比佢地試吓，大家都話好食呢！食飽去埋廁所就要開工啦，今日要入利是，真係做到食飯先做得完呢！今日冇入房食，個餸又唔得，只係有得食就算啦！下午都係做嘢囉，時間都算過得快，放工直接入石門，因為老公早收咗啲，可以去揍仲爺去踢波，但又要揍埋子元放話劇先，所以我仲早過佢地入到去，仲爺就7點先入到去有得踢！踢完喺石門食埋飯先，回家快手趕佢地去瞓呢！

19/1/20

19/1/20.   SUN.    COOL

今日可以瞓到9點都唔錯，老公揍咗仲爺主日學，我就同子元去補英文，然後買齊嘢回來做吓清潔和蒸蘿蔔糕，不過老公回來後話出去Mega Box，所以只係切好料就出咗去，都係行吓食埋午飯，同仲爺買番新的泳鏡，係喺食錢樂園又浪費咗錢咁啦，老公同佢地去，睇少眼都唔得！行到3點幾要快啲回程，仲爺4點要游水呢，襯佢游水老公又走咗去瞓，子元又唔肯落去接佢，結果都係要我出去接，好在蘿蔔糕整得好順利啫，咁都可以出到去接，回來後快手做埋啲功課，又要去嫲嫲到食飯，本來都冇咩，但佢食完又走番入嫲嫲房時，竟然攞支marker畫床單，老公咪鬧到佢仆街囉，我都捉咗佢去門口企，有時真係唔知佢想點！回家後沖好涼都係要趕佢地執嘢，全日流流長總係做唔到，係臨瞓前先一堆，真激氣呀！

18/1/20

18/1/20.   SAT.    WARM

都係一個忙碌的星期六，老公一早就帶咗子元去比賽，我就8點幾帶仲爺去畫班，然後食早餐，本來諗住返美孚買整蘿蔔糕嘅料，但諗諗吓今晚都返阿媽到食飯，不如喺長沙灣買完放上去今晚先攞啦！接咗仲爺回家後，快手做咗少少清潔就出門口，要去石門踢波呢，今次早咗到，好在喺1號場比塞唔洗咁曬，仲爺今日踢得好落力，咁踢完就過海怡學音樂，我就去食嘢，走嗰時又唔記得攞番ukalili, 又要上咗巴士先發現，激死！好在我又用到方法唔洗再比錢啫！返到去快手做咗少少家務，7點幾出門口，去接埋阿嫲就返阿媽到食團年飯，還要洗埋碗呢！

17/1/20

17/1/20.    FRI.    COOL

今日又係趕頭趕命咁返學啦，其實咁行法真係好攰！揍咗佢地就行過南昌站啦，試咗間新嘢的咖啡三文治，因為佢買咖啡送三文治，咁我咪試一次囉，因為今日冇麥片食！返到去都係食早餐吹水開工啦，今日都真係全日有做嘢架，下星期放假前想輕鬆啲，所以今日快啲排埋啲更表出埋啲通告就預備放假！午飯都入咗房食同打機，下午好專心咁出通告，但因為隔離位個MT走咗後又吉咗個位出嚟，彭師傅又坐過嚟，係咁講電話好嘈，搞到我後來頂唔住要戴耳筒，佢嗰種聲真係會令人煩悶不安！終於放工了，老公嚟接我返咗屋企先，再去球場接番子元！返到屋企捉仲爺快手做功課，跟住就去合唱團啦，打足一個鐘機，可以休息吓，晚飯同程家食，兩位細路不停講嘢真係好嘈，大嗰兩個就電視送飯！睇夠吹夠水就回家！

16/1/20

16/1/20.   THU.    COOL

今日都係如常咁揍仔返工返學啦，係有啲趕，跟住咪撘西鐵返工囉！食住早餐吹吓水咁，又要開工啦，冇咩特別事，係午飯要食自己，跟住上咗德福買老底！返去又要開工啦，真係幾唔想做！終於捱到放工，自己返屋企，撘巴士迫到一個點！返到去就煮住飯等老公返，子元仲爺都有踢波呢！今日真係勁眼瞓，個人又攰，但都要做好哂嘢先休息得！

15/1/20

15/1/20.   WED.    WARM

今朝揍咗仲仲佢地返學，我就去校務處搞掂埋張學生津貼申請表，叫咗郭老師落嚟攞過比我，但就搞到我勁趕返工，去南昌那條路都快跑咁！返到公司食早餐吹水，朝早都係hea過，午飯早啲出去，因為winnie請食升職飯嘛，去咗ET食西餐，又係吹住水咁囉！下午啲大人物全部出哂去開會，我真係打足一個下午機，好開心呢！放工行去球場，食番平時路過會食嘅嘢呢！去到球場仲爺跑完，跟住就嘔啦！清理完佢就捉佢落車做埋啲功課先，有中文同數學卷派返嚟，中文得25.5分，但數學有60分合格呀！好叻仔！等子元踢完波就去食KFC，食完返去都係沖涼睇功課執書包瞓覺！

14/1/20

14/1/20.   TUE.    WARM

今日揍咗兩隻豬返學，老公就揍埋我返工，因為要幫Joe買早餐呢！咁我地都食埋早餐先返工，今日都係有嘢做的，但是可以唔急就慢慢做！吹吓水咁又一朝，入房吹水食飯，下午都係做嘢，不過擺明係慢慢做，有啲報復心態，唔想幫手包禮物，上次一個爛攤子就要我執，我一個人要入起哂幾百份，搞到我要打人情牌找人幫手呢，所以我今次一包都唔會幫手入！所以今次個photo report就做足一日！放工直接入青衣城所以撘地鐵，因為要買電腦所以入去食呢，喺Mr Steak叫咗嘢食就上去豐澤買，食完嘢就去儲埋分，送嫲嫲佢地返去就回家，沖完涼又搞一輪行政，都係未收到學校份津貼申請表，真係令人覺得好煩惱，唯有明天直殺入學校問，16/1要交但你冇比我交條毛呀！

13/1/20

13/1/20.   MON.    COOL

今日又要正常返工返學啦，晨早起身整飯叫佢地起身出門口，老公放工回來接我地，揍咗佢地返學就到我地返工啦，返到去都係食早餐吹水然後開工！今日都冇咩mood做嘢，一來開咗free time打機，二來已經諗住過年啲嘢，好多未做但就快又過年啦！放飯梗係入房吹水啦，時間過得好快呢！下午又要開嗰個爛鬼優毅集個會，雖然只係開咗一個鐘，但要做都係煩啦！出返去做嘢又係到等放工時間，買餸返屋企煮飯，等老公揍仲爺踢埋波回來就開飯啦！今日冇咩功課要對，或者係只搞掂咗仲爺啲嘢，冇咩理笨元啦，佢都大個仔要試吓自己會唔會甩漏！早啲趕佢地去瞓，明天又係要晨早起身！

12/1/20

12/1/20.    SUN.    COOL

今朝老公去埋慕道班才回來補眠，所以都11點先起身，呢啲時間唯有食個早午餐，梳洗完出咗去荃灣，本來想去買電腦，但因為荃新天地間豐澤變細咗，冇電腦賣，唯有星期二去青衣城買啦！咁就去咗玩，又洗錢！去左夾公仔囉，可能真係太耐冇玩過，都想盡興而歸，結果都玩咗好多錢呀，算啦都冇幾何！玩到兩點幾老公車到我地去美孚，趕時間子元過跑馬地比賽嘛，咁我就同仲爺行返去算，仲可以去圖書館幫子元借埋書！返去執吓嘢咁，差不多4點先醒起仲爺要游水，好在都趕得切！襯少少時間執吓屋，得太少時間大掃除！接咗佢回來又再抺啦，子元趕唔切畫班，咁就回來接埋我地出去食飯，今次去葵芳，食茶記可以明天帶飯，還有就係行吓商場！之後老公就要返工啦，咁我就返去趕嗰兩隻嘢沖涼瞓覺，明天要返學啦！

11/1/20

11/1/20.   SAT.    WARM

今日係同老公兵分兩路的一日，因為兩個豬仔都有各自的活動，咁唯有一人揍一個！老公放工回來就接子元去足球比賽，我都冇得瞓咁晏，因為仲爺都要上畫班，咁8點幾出門口都準時過到去，佢就食麵包，我就去咗食粥做早餐，但唔知係咪呢排操細咗個胃口定啲粥唔夠好食，我食咗半碗同啲蘿蔔糕就唔想食！咁見時間許可就返番去美孚買餸，因為今晚阿媽生日飯嘛，買埋餸返去放低又要出門口去接番仲爺，佢第一幅畫作終於完成，係獅子但個個都以為係舞獅，哈哈，佢好唔開心人地唔明佢畫咩呢！子元今日就足球比賽加英華面試加試腳，佢就話面得幾好，不過有咁多人in，真係冇咩可以估到，所以都係博吓啦，希望佢啲運仲有，不過我地最終目標都係九華，我真係好緊張！回家後得大半個鐘時間又要出門口，仲爺傑志比賽嘛，不過佢成日都係舊雲咁都唔知佢踢咩！比賽完又要去海怡學鼓，今日ukulele 阿sir病假，得半個鐘我食個飯都好趕，接咗佢先去買麥記，上到巴士食咗陣佢都冇精神食，想瞓覺多，我都瞓得好冧，塞咗耳機好瞓好多，冇環境聲嘈！返到去兩個細只係入房睇機，我同老公就煮晚飯，我仲摺埋衫添！7點多阿媽佢地上到嚟，都要等多陣先開飯，好比面大家食哂，等我快手洗埋碗就切蛋糕呢！9點幾佢地都閃哂，咁老公都返工啦，我地3個咪齊齊睇明珠劇囉，今日做bb Boss，好好睇！完場趕哂佢地去瞓我就沖涼休息！

10/1/20

10/1/20.   FRI.    COOL

終於到星期五啦，今日要返全日啦，不過因為已經冇緊急嘢，所以都唔算太忙，有嘢就做咁啦，可以輕鬆啲！一朝早返去就吹水會，最開心的時光呢！跟住就做嘢啦，時間都過得慢喎！午飯入咗房邊食邊講番之前開咗個topic，外遇！都係過咗去嘅事啦，當故事講番出嚟囉，佢地聽得好開心囉！放完飯又要回歸現實，但真係冇咩心機開工，3點多又有tea食，所以都係吹水多做嘢少！放工叫咗老公嚟車我，因為要搬番啲清潔用品返去嘛，之後老公返球場接子元，我就執好嘢揍仲爺去合唱團，我又去咗萬寧掃貨，真係平先買架，只係個量多咗啲咁解啫！晚飯同程家食，子元今日放咗學去咗同學家會所玩，玩到踢波老公接番佢去踢波！明天要去in英華，都冇咩可以再幫佢，隨緣啦！

9/1/20

9/1/20.   THU.    COOL

今日都係返半日，所以都係忙忙碌碌的！朝早返去食住早餐吹水，最開心就係咁，夠鐘就開工啦，基本上全朝都在忙，行出行入咁！放飯入房快食埋先走，今日係溫數學，主力都係做數啫，我返到去時老公已經返咗工，今日佢返兩更呢，要明天先見到佢！休息到兩點幾開始，主力睇仲爺咋，因為又教到發洗哂火，打到佢隻嘢咁，真係忍唔到！佢幾時先開竅呢，咁落去真係我激死先！6點多出門口入嫲嫲到食飯，慳水慳力呢！食完回來沖完涼，仲爺已進入「我要瞓覺」的狀態，所以打住佢都唔做得多，算啦。。。放佢啦反正都冇用！

8/1/20

8/1/20.   WED.    WARM

今日都係揍仔返學，老公車到我去南昌站就自己撘車，返到去吹水食早餐啦，然後就忙足一朝，本身真係有嘢要今日交比會計，跟住因為Ivy去咗開會，阿姐要人出去買西餅，咁就輪到我啦，呢啲工作都要小心做，唔好出錯！順利完成回來又要趕report比account，然後又要分貨，分喺樓上買的清潔用品呢！做得嚟都差不多放工，快手食埋個飯回去做書僮，但仲爺今日唔知做咩咳得好勁，所以都唔迫到佢啲咩，講一次課文比卷佢做吓就算，都要跟吓子元，雖然有卷佢做但都唔夠，條友成日以為自己識哂！老公瞓咗一個下午就起身煮飯，晚飯後仲爺就走咗上床瞓，但都要捉番佢落嚟沖涼食藥先得呢！

7/1/20

7/1/20.   TUE.  COOL

今日佢地開始考試，但笨元一朝起身同我講佢發燒，馬上處理，食藥沖涼刮痧敷額做齊叫做過到關先，叫咗佢準時食藥，一鼻水倒流就係咁麻煩！今朝車到我去南昌站就算，我撘shuttle返去食減肥麥皮餐，一齊減！今朝都多嘢做架，始終今個星期要半日做一日野，所以冇得hea!一返去阿姐仲要呻佢琴日返去做書僮嘢，咁我點都要奉陪！放工前做好預計要做的，入房同負能量太太團食埋個飯先走，返去做書僮，但今日到我發顛囉！首先笨元睇錯時間去補習，老公又唔睇清楚時間就揍咗佢過去，咁佢又病病地都算，跟住仲爺溫英文又係令人痴線，文盲點考試呢，總之我就又顛又打又鬧咩都齊啦，其實真係好辛苦！子元被Ms Yu提早收留後可以早點回來，咁就快啲做埋我啲練習囉，7點多出去食咗米線，回來又係時候快啲沖涼，都係唔甘心要同仲爺做埋份卷，10點多放佢去瞓啦，我真係好攰，心靈上嗰隻！

6/1/20

6/1/20.   MON.    WARM

今日只係返半日，得半日做好哂啲嘢，其實真係冇咩機會吹水做其他嘢！同老公一齊食埋早餐先返工，但可能真係剛病好，胃口都係一般，明天都係跟老公咁食keep fit餐啦，有人陪住一齊可以試吓！返到去真係吹咗陣水就開始做，快手咁都做到放飯先做得完呢！今日個飯真係超唔掂，好在有Jackie的黃酒雞，咁先有啖似樣的餸食吓咋！食飽就閃人啦，2點返到嚟，老公都同佢地食完飯揍咗佢地返來，咁休息一陣就開始溫書，主力係同仲爺溫，子元好多都可以自己跟，仲爺重點都係一樣嘢，唔識字！因為到臨尾做卷時又開始令人失控，加上食咗藥又攰啦，所以最後老公叫唔好再做快啲瞓算啦！咁都要放佢啦，反正都冇咩用，冇嘢可以輸！子元就再睇吓佢哦練習仲有咩要執啦，中文都唔係一朝一夕有得救，都唔明有幾難！

5/1/20

5/1/20.   SUN.    COOL

今朝出到汗，叫做好番少少，9點幾起身，仲爺已經醒咗，老公就出咗去，為咗仲爺要入教，佢都要去上慕道班呢！咁梳洗後我都仲係好病咁，但都要煮早餐比佢地食，子元就自己煮丁麵啦，我煮咗通粉同仲爺食，然後都係食藥啦，老公回來後買咗啲麵包又一齊食啲啦，佢就入咗房瞓，瞓之前有個重任就係同仲爺塞肛，條友仔燒到差不多40度，又呆哂啦，塞咗藥佢就自由活動，因為我好似又燒番，食咗藥喺梳化瞓吓先掂，子元就自己做數！到點幾真係要郁吓，同子元對吓卷先，跟住就出去食啲嘢，不過我都冇胃口，食完就回來同仲爺溫吓英文，子元4點幾要出去華夏盃比賽呢，我可以好專心咁同仲爺溫囉，字都係唔識串咁，但起碼叫做認得多咗好多字！老公佢地返到嚟，7點多就出去食晚餐，我又想食粥，子元又想食其他嘢，所以去咗深水埗食，大家都滿足哂！回家後冇再溫書啦，沖涼食藥瞓覺啦！

4/1/20

4/1/20.   SAT.    WARM

今日真係夠哂忙碌，亦夠哂估唔到！朝早兩位少爺一個補英文，一個學畫畫，本來諗住襯仲爺畫班時間去交哂兩份子元的自行選校表，但又要食埋早餐怕去哂兩間唔夠時間，所以食完早餐去咗近的長天交咗表先，接番仲爺之後佢有啲唔妥，主動瞓咗就知出事，所以先過咗九華交表先，去到學校都唔識搵校務處，我真係好想好想子元入到呀，諗番自己十一二歲時又係派位，我足足幾個月晚晚祈禱希望入到OLR，我諗今年我都會咁，為咗阿仔入到九華呢！交完表就同仲爺去睇醫生啦，估唔到冇人睇喎，一埋去就有得睇，反而係攞藥等得耐！搞掂哂返到屋企12點幾，快手比仲爺食藥再瞓啦，燒到火爐仔咁陰公！咁今日就主力同子元溫吓書，但都唔溫得好多，仲爺瞓醒咗就精神咗好多，但5點幾開始到我唔舒服，唔知係咪個車仔麵呢，瞓咗個幾鐘都唔得，起身後又嘔咁，老公被頭仲話我，都要出去食啲嘢架，我咪話我根本出唔到囉，轉個頭就嘔啦！最終佢去BBQ前買咗粥返嚟比我地食，咁全晚我都好辛苦咁全身骨痛，但都要搞掂佢兩個架，好在笨元夠大個幫到手，11點幾我入咗房瞓，但都瞓得好差，因為又沾寒沾凍又周身骨痛咁！

3/1/20

3/1/20.   FRI.    COOL**

又到happy friday啦，雖然月頭都多嘢做，但總冇話非今日完成不可！朝早子元起身話冇咩事可以返學，咁見佢又真係冇事咪比佢返囉，留番放學先睇醫生！揍咗佢地返學就車我返工食早餐，返上去吹吓水就開工啦，努力了一朝又放飯，入房吹吓水咁食飯係最開心，啱傾的飯腳好重要！下午本來都應該乖乖做嘢，但因為我提出咗訂樓上的清潔用品，就要搞掂啲手尾，好在有Ivy幫手整咗個表訂，咁放工前都做咗8成嘢架啦！回家後執吓仲仲啲嘢，轉個頭又夠鐘出門口去合唱團，然後又要去畫室接番子元，佢轉咗成人畫班的時間，可以學吓其他嘢！返小童接埋仲爺就同程家食飯，10點多才回家，沖好涼打暈佢地後，還要填好自行兩份表，明天去交表啦，反正都冇咩選擇，專心一致啦！

2/1/20

2/1/20.    THU.    COOL

又要返工啦，今朝都係自己起身撘車返工，原來時間都係有啲趕架！買埋早餐返去食完都係做嘢，真係冇Hea架，忙忙碌碌咁好快又放飯，本來入房食就係想靜吓，但今日好多訪客囉，真係好奇怪！午飯後都係做嘢，先做自己嘢，因為阿姐下午請咗假，梗係做私務先，填好咗啲自行表格星期六交，跟住就做公事囉！放工即閃去撘巴士，但等咗好耐都冇車，好在最終迫到架沙田車，咁先可以入到石門，仲爺踢完波喺附近食埋飯，見到有間西餐都價錢合理就試吓，估唔到性價比都高，生蠔買一送一下都抵食呢！回家後還要檢查功課齊唔齊，仲爺原來要英文oral等等，又搞到11點幾12點呢！笨元仲要又咳， 唉。。。佢一咳就好麻煩，明天都係睇咗醫生先好啲！

1/1/20

1/1/20.    WED.    COOL

新年進步呀！又到咗新一年了，老公朝早帶咗仲爺去主日學，我竟然瞓到11點幾先起身，笨元梗係唔會自己做嘢啦，所以起身後就馬上煮早餐，但老公佢地都差不多回來，我又想出去行吓，所以出咗轉荃灣，但又多車又多人，想行吓嗰間新嘢咩激安都唔得，多人到都唔知點行好，加上老公又要返工了，所以都係返屋企算！本來諗住幫兩個溫書，但原來子元要4練波，即係3點幾要出門口，返去又要煮飯佢地食，咁即係完全溫唔到，所以唯有同仲爺溫！好在子元有補開英文我都有信心，但佢都真係要比個心出嚟，令我覺得佢想考好個試！佢去咗練波我就同仲爺溫英文，開頭都ok咁架，但之後又開始激到我火起！轉個頭又已經5點幾，要出去接子元，喺樂富食埋丸龜食埋烏冬先回家睇903頒獎禮！