28/6/25 SAT HOT
今朝一早就要起身, 其實都係8點啫, 食完早餐就趕住出門口, 要去仲爺中學嗰到買二手校服, 其實佢唔多想架, 但真係平好多呀, 只係遲咗10分鐘到, 已經少咗好多嘢, 第一時間去搶校褸先, 跟住就係jumper, 呢啲最貴嘛, 然後就係PE衫, 可惜PE褸搶唔到, 得番啲細size, 唔緊要啦搶到幾多得幾多, 6件最後都唔洗30鎊, 真係慳咗好多, 揍咗仲爺返去就去買餸, 返到嚟都係12點咋, 早起身真係做多好多嘢, 不過下午就開始浪費時間, 仲爺開咗尤魚遊戲又冇睇, 但我就睇哂, 不過都唔係太明, 不過就一次睇哂6集, 所以黃昏先嚟做家務, 唔想拖到明天先做啦, 之後都係老公煮晚餐, 子元下午就已經出咗街同fd玩, 不過時間啱啱好, 佢返嚟都食得切飯!
27/6/25 FRI VERY HOT
今日係year 6 induction day, 仲仲都要去中學嗰邊, 早知可以正常時間揍佢返去我就唔請假啦, 早咗15分鐘返去蝕咗添! 返到去仲要兩個阿姐守門口位, 叫我搞掂就去sports hall集合, 諗住hea吓先都唔得, 可惡! 去到又要點名又要帶隊, 嗰個sixth form完全係偷懶hea做系列, 不過我嗰班人少, 又冇sen, 最多有幾個hea友咩都唔想做已經算好好! 有break 放有lunch time比平時已經唔錯, 只係熱到死死吓仲要PE堂好無謂, 我差啲曬到暈! 最尾放學環節都算順利, 我嗰組得一個未有人接, 最後阿姐見3:15就話我可以走, 好事! 快返去沖涼食嘢, 我都未食完佢地就出哂去踢波教波, 我就好好做隻蟲蟲啦!
25/6/25 WED HOT
今日又要跟顛妹, 都真係幾攰吓, 因為你同佢講啲咩, 佢promise啲咩, 都係冇意思, 總之唔出大事就算, 佢個死對頭今日又冇得返, 所以應該都冇咩大礙! so far都係算平安, 第一堂數學堂, 忍唔住同老師吹水, 咁啱佢又係letty同holly班主任, 都算有啲話題, 反正嗰班垃圾都唔係學嘢, 不如我地吹吓水! 之後都算平實咁捱到放工, 接咗仲爺返嚟沖涼食嘢, 仲爺好似唔記得自己要踢波咁, 慢吞吞係要比人鬧! 我休息到5點幾本身諗住出門口, 老公返到嚟食埋麵車我去仲仲中學, 因為要聽講座, 都係歌功頌德咁啦, 大概都係嗰啲嘢! 聽完同另一個熟啲個家長吹咗陣水, 再去埋Lidl買埋嘢就回家, 幫手煮埋飯食完已經9點幾, 之後先沖涼休息!
23/6/25 MON HOT
又要返工啦, 都知道今日唔太易過, 都係咁照開工, 基本上都係咁要寫低佢做過咩衰嘢, 又掟筆又大力閂門, 第二堂用筆掟到我隻手添, 佢真係好白痴, 都唔明佢諗咩! 第三堂本來係飯桶堂, 我亦諗住放飯, 見代課老師最後都handle 到, 咁我咪去食飯囉, 因為佢地午飯後PE我更加冇可能食飯, 點知就係呢半個鐘, 佢同顛妹就打起上嚟, 所以最終午飯時比訓導組帶咗去校長室坐, 我就可以閃人, 去咗大房打佢啲罪狀, 到最尾嗰堂先去炒吓散, 夠鐘就放工, 揍埋仲仲返嚟就食啲嘢再出門口去球場, 但去到等巴士又係冇車, 都係要等老公嚟接! 去完球場返嚟又要煮飯, 好攰呀!
21/6/25 SAT VERY HOT
今日係夏至, 即係最長日出一日, 哥哥就有更特別的活動, 去公園打麻雀, 簡直係宣揚國綷啦, 朝早佢就出咗去做gym, 約咗1:30去到公園, 最好笑一樣嘢係, 打麻雀最重要的麻雀, 竟然冇人帶, 好在都係10分鐘車程, 我就返去攞比佢地, 呢班友仔真係要學吓點清楚溝通! 終於settle好佢地, 就去janent嗰到攞埋丁麵, 再去broadway食嘢先, 買埋嘢再去超市, 返得屋企都差不多六點, 老公又要去車番啲枱返嚟, 子元佢地就去食飯, 老公就返嚟煮飯, 我就做清潔, 今晚簡單食牛腩麵, 未執枱佢同小施子已經返到, 咁洗完碗就食埋涼粉先沖涼, 我就返番我間冷氣房啦!
18/6/25 WED HOT
今日繼續係好熱, 又要跟3隻小天使, 又有PE堂, 仲要三隻小天使又嘈交, 加埋Ellie冇返, 本來跟嗰個同事就嚟咗一齊揍, 不過佢又好似冇咩跟過佢地咁, 唔係好知點做! 好在今日啲學生早放, 都好啲! 但跟住就煩啦, 我琴日明明睇咗email知我跟邊個, 咁今朝就冇再check email啦, 原來今朝又再send多次, 加咗話學生放咗學就返大房開個會先放飯, 咁都算啦, 再叫咗我入房話我又喺上堂時用電話, 頂, 咁都冇嘢做, 個個學生自己畫緊畫, 唔通走埋去幫佢畫咩, 加上我都協助完佢做哂嘢啦, 睇嚟我真係要搵啲嘢放喺個枱面做先得, 唔好收收埋埋, 要光明正大仲好! 之後係咁搵人呻, 真係好火! 終於放工時見到Letty, 佢又要呻, 考ART迫住喺個好熱的細房仲要有風扇但佢坐角落頭, 唔攝衫又比人話, 佢話我都畢咗業只係喺到考試咋! 返到屋企即係沖個身食啲嘢打吓機睇吓電視呻吓, 睇劇都係好事, 入咗戲唔洗煩!
12/6/25 THU HOT
今日咩鬼enrichment day, 都估到有改動, 但又要跟番琴日搞我燥底嗰條友, 不過好在叫做今日都唔會同顛妹有太多交集, 因為一有佢地就冇意義地對罵, 查實我係完全聽唔到佢地鬧咩, 我估都係小老母啲friend啦, 但總之就係煩又攰啦! enrichment day本身都悶架啦, 好就好在佢地早放, 我地又可以放早飯, 仲係放個長飯, 幾好, 不過我熱到要出去買雪條食, 返嚟就做埋個training, 都係上網click吓嘢就算, 夠鐘走人返去抖吓, 最終都係餓要食啲嘢, 摺埋衫咁啦, 跟住準備晚飯, 老公同仲仲踢完波返嚟先煮, 用開咗真空煲真係好方便!
9/6/25 MON WARM
又要開工啦, 今日都知喺難捱架啦, 揍咗仲爺就返工, 返到去都係照開工, 但跟顛妹佢係可以唔理你就唔理, 都冇咩可以做, PE堂有另類活動, 但主力顛嗰班都喺到, 又出事啦, 麻鬼煩! 最終去番普通PE堂嗰邊, 是但啦我都理唔到咁多! 之後都算normal架啦! 我午餐就11點半都未夠就叫我食, 太早啦! 捱完一日準備收工, 收到EMAIL話安排咗30/6可以照ultra sound, 咁就要請假啦, 但未找到阿姐簽名! 放工返到嚟終於有一個星期一係唔洗趕, 因為老公今日去攞架替用車, 所以請咗假, 攞架又係日本車, 老公話都係日本車好渣! 攤抖完煮飯, 老公返嚟整埋個雞就開飯, 但之後追劇又追到夜咗先沖涼!
4/6/25 WED WARM
今日都好攰呀, 精神上體力上, 都好攰, 工作上攰啦, 屋企上都攰, 我其實都唔係好想再諗一次, 再寫一次, 因為即係要自己再重覆一次個疲憊, 反正就係現實永遠都係現實, 好多嘢都好實際, 你冇得唔低頭冇得唔選擇, 尤其是錢銀, 冇就係冇唔夠就係唔夠, 有時只可以去支付最基本嗰啲, 收入唔可以大過支出係基本原則, 但點解咁多年佢都係唔明, 呢樣嘢係令到我好攰架! 而家叫做個仔大咗, 會同我一齊分擔吓個情緒, 都係安慰的, 但最終都係要返番去同另一半講同討論, 我覺得我啲EQ其實真係已經高咗好多, 最終只係同大寶咗咗堆好Emo的文字, 因為嗰吓真係好絕望吓, 唯有用文字去發洩, 都唔知咁叫做EQ高定收埋收埋, 我淨係覺得自己淪落到只可以用文字發洩已經唔係一件咁健康的事, 喊都唔敢喊出聲, 咁真係好咩, 我真係唔知, 我唯有繼續令自己堅強落去, 期待光明來臨的一日!
3/6/25 TUE RAIN
今日先至星期二, 真係開始有啲攰, 可能今日係揍Ellie, touch wood佢今日都算合作喎, 冇咩屎比我, 反而係個textile老師, 痴撚線架, 重點係又唔比你幫個學生手, 咁我攞個機出嚟睇兩眼佢又出聲, 真係好仆街! 佢呢啲係專業咁我唔係咩, 調轉你做呀! 笨實! 除咗佢其實大至上今日都OK, 係最尾嗰半個鐘要扮工, 好在比我搵到三隻小天使, 個同事直情覺得我救咗佢咁, 因為數學堂, 佢應該有份卷咁要佢地做番, 但嗰個同事數學好差, 我嚟到基本上9成做哂, 佢只抄, 梗係救佢啦! 最後準時收工, 接埋仲爺返去就實行新時間表, 希望唔好半途而廢啦! 晚上掛住打機遲咗煮飯, 雖然只係用壓力煲煮肉骨茶但都要時間架啦, 所以洗得碗嚟都9點幾10點先去沖涼呢!
2/6/25 MON WARM
今日算係唔辛苦, 第一日開工算係咁, 同埋個個都好欣喜我個頭, 唔理佢真定假, 當係真先! 朝早唔洗揍仲仲, 可以遲少少起身, 慢慢出門口! 返到去開工, 算係簡單, 都有嘢做吓, 整吓仲爺個放學時間表! 係放飯喺大房時真係幾悶, 都冇咩特別, 反而係有個history老師問我中文識講咩話, 我話廣東話普通話都得, 佢就話會問我阿姐可唔可以去幫手, 因為佢有個學生真係完全聽唔明書, 我果然有好多客仔! 放學可以直接返屋企, 快手食啲嘢要揍仲仲去球場, 佢最enjoy呢程車我傾偈! 返嚟之後做好埋仲仲個放學時間表, 佢係時候要為升中做準備! 之後都係準確煮飯啦, 明明諗住整魚柳又冇咗回事, 最後唯有烚腸仔頂上!
27/5/25 TUE RAIN
今日諗住都瞓到8點多先醒, 點知子元個鬧鐘6:45就響, 我醒咗啦! 瞓得番但都係咁發夢, 可惡! 梳洗完執好嘢, 準時9點多過到去May屋企齊齊煮早餐, 計埋So sir煮11人呢, 個個都係肉丁餐蛋麵/米, 食完繼續吹吓水先, 差不多12點先出門口, 車蘇sir去火車站, 佢又返番去曼城啦! 我地就西行去卡迪夫, 都要一個鐘頭車呀, 加埋又大風大雨有啲可惜, 一出室外真係吹得郁呀! 所以只係去咗泊車商場最近的Cardiff Market 同城堡, 食咗泰國嘢, 味係幾好但食唔哂, 太Spicy, 同埋個青咖哩撈埋啲飯口感唔得! 食完再行咗去城堡, 因太大風雨只可以快影幾張相就閃, 返商場, 行咗玩具店, 最後早啲去May想試的土耳其餐廳食嘢, 味道其實幾好, 但真係只會試一次, 始於唔係我地杯茶! 食到7點多真係要走, 唔想太夜返到去!
17/5/25 SAT WARM
今朝7點幾醒完再瞓番, 結果10點幾先起身, 食完早餐就出去, 好忙碌好多嘢要買, 本來諗住先去IKEA, 然後先Costco同去outlet買鞋, 但原來今日有event, 結果咩都要快, 試過上次因為event塞咗好耐就驚! 快手買完就閃, 去Costco買埋熱狗就走, 仲要去埋超市, 中超西超一次過, 返得屋企已經3點幾, 落完貨食完嘢, 仲要執仲仲間房, 因為要重組咗佢個書櫃同垃圾角落, 但望住啲嘢真係完全無從入手, 最終都係要哥哥幫手, 佢真係好有方法, 終於又整齊咗啲! 跟住仲仲就比人捉咗去練跑, 我就做咗清潔先, 然後都總可以攤抖一陣, 老公返到嚟都已經8點幾9點, 仲要煮佢個新菜色, 所以食得嚟已經10點幾, 眼瞓啦!
9/5/25 FRI WARM
返埋今日終於放假, 明明今個星期返得4日工但都好似好攰咁, 10點幾就已經好眼瞓啦! 基本上今日都係照常開工, 同埋好悶咁囉, 可能因為條腰都係痛, 所以周身自在咁, 最尾PE堂仲要玩rounder我真係頂唔順, 07分就已經閃人, 快啲收工啦! 老公就考完UK life test, 我都好緊張佢考成點, 好在最終都PASS 到! 又過一關啦! 以為要揍仲仲, 老公去接又冇講我知, 好在可以check番GPS啫, 咁去教堂望完就走人, 一齊返到去, 有外賣嚟到食埋, 佢地又出去教波同練跑, 咁我就自由時間啦, 繼續狂睇電視, 都有摺衫的, 佢地返嚟老公只係煮咖哩豬皮魚蛋, 咁咪撈麵算囉, 食完就沖涼啦, 我真係好攰!
8/5/25 THU WARM+
今日都冇咩特別啦, 條腰繼續係痛, 但都要開工, 好在呢兩日跟嗰個學生都唔係太難, 只係要上PE堂, 我真係冇咩做到, 因為都彎唔到腰, 唯有企喺到用口叫佢做就算! 跟住本身都冇咩特別只係悶, 同埋人事部出咗電郵寫到明話唔比著波鞋, 其實就幾唔公平, 咁你不如叫PE老師都唔好著啦笨, 諗起都火, 諗呢啲嘢的人都係唔會睇到真實人地工作喺點就諗啲嘢出嚟, 所以話有時真係要啲高層落去做吓嘢佢地先知實質工作係點! 悶咗一日終於收得工, 返去要食嘢, 好餓呀! 然後都係要仲爺做練習啦, 下星期SATS啦, 努力埋嗰幾日佢啦, 之後再算! 不過同佢對答案時唔識唔明又係到散發啲負氣令人想中佢一穫! 到佢去咗踢波我就要摺衫, 好多要摺呀, 搞掂都差不多要煮飯啦, 食完想快啲沖涼, 因為都眼瞓, 但搞掂得嚟都夜啦!
7/5/25 WED COOL
今日除咗year 11其他都係返半日，本來都幾開心，但第二堂時突然條腰好痛，一起身一坐就痛，似扭親整到神經嗰種，除咗忍冇咩可以做，好彩係只在sport hall hea吓，老實悶到眼瞓架，最好笑係最尾條片，幾個老師拍咗個drama講番平時啲學生做的壞事，勁寫實囉，呢樣佩服！之後都係簽吓衫環節，出去企咗陣八吓就等收工，接仲爺時唔小心又比架車撞到腳，腰又痛腳又痛，快啲返去處理吓，點都係痛，唯有自己調節動作！最慘係今日約咗冼爸佢地嚟聚，好在出去食嘢都係坐，未至於太辛苦，本來諗住去酒吧睇埋波，但唔係冇位就係未夠18唔入得，簡單啲返我地屋企睇，都好，睇完快啲沖涼休息！
30/4/25 WED HOT
今日把心一橫對付3隻小天使, 但估唔到又轉咗人, 要我去跟個year12考試, 都冇咩所謂, 又當學多樣嘢咁啦, 其實都睇到啲唔應該的東西, 但佢又收得快, 又冇第三者在場, 我都隻眼開隻眼閉, 你好做時我又好做, 困喺個房4個鐘都幾喺嘢, 咁set好架部咪做吓嘢時又打吓機囉, 搞到1點先散場, 先去放個飯, 然後就要去開工, 不過都係跟Ellie多一個鐘, 我都係keep住今日個心態, 反正又唔係咩大人物的堂, 夠鐘就走人, 先去買啲餸, 返屋企抖一陣又要出去接番仲仲, 返嚟佢食完嘢就要學唱歌, 老公今日請咗假睇子元比賽, 順手溫書喎, 由得佢啦! 跟住我又摺衫又要搞掂仲仲做SATs, 我都算係咁啦真係盡量比佢做多啲, 盡人事聽天命啦! 最後老公煮飯, 食完攤咗陣先沖涼休息!
29/4/25 TUE HOT
今日好忙呀, 又朝忙到晚, 好辛苦! 朝早先要提早起身因為仲爺有boots up class, 揍咗佢返嚟又要倒垃圾同辦吓大事咁, 已經有啲趕, 返到去今日又要跟Ellie, 佢不停挑戰你底線, 要應付佢真係好攰! 終於放學啦, 但都要快手返去, 因為book咗4:20仲仲睇牙, 最終點趕都係遲咗10分鐘, 好在講完佢都比我睇, 仲爺就例牌緊張, 最慘係要照X-ray, 又要咬住舊嘢咁, 搞到巫婆發哂脾氣, 好在最後都拔了, 但原來仲有一隻BB牙未拔, 3個月後再覆診! 最難搞係回程, 老公本來過嚟車我地好快, 點知突然間塞車, 我唔想比錢撘巴士, 咁啱哥哥回程架車到就叫仲爺上車算, 哥哥接應佢! 我就等老公嚟接我, 估唔到等咗大半個鐘, 但返到去都係差不多時間, 又要快手食啲嘢, 老公揍仲仲去踢波, 我預備好餸就要去教會, 返嚟食得飯洗完碗已經10點幾!
28/4/25 MON HOT
今朝又改咗唔係跟三隻小天使, 變咗件麻煩友, 真係好麻煩, 叫唔停比二姐出嚟鬧, 重點係好似我唔做嘢嘛, 但我已經叫咗佢十萬九千次, 佢唔停都好難搞, 個老師又遲到, 痴線! 本來我都有方法處理佢, 最慘係最尾飯桶嗰堂, 真係最難捱, 總之我準時3:15走佢冇嘢可以講, 接完仲爺返去諗住快手搞掂食吓嘢就出門口去踢波, 點知一摸個袋我冇帶key喎, 嗰吓真係顛咗咁, 打咗比老公問佢點好, 佢叫唔好去踢波, 等佢地返嚟先入屋, 但我又唔想, 一來為咗咁唔踢波唔值, 二來太熱啦喺街等個幾兩個鐘唔掂, 博一博問隔離屋, 試吓後門有冇開, 但都係唔得, 最後, 鄰居竟然肯車我去搵子元攞key, 咁樣5點前已經返到嚟, 換好衫老公返到就可以揍佢去球場, 咁我可以休息吓, 7點多先開始煮飯食!
23/4/25 WED COLD
今日係子元17歲生日呀, 不過早兩日慶祝咗, 所以今日我除咗出咗個生日post之外就冇做啲咩! 朝早如常返工返學, 今日下午要覆診, 所以請咗半日假, 都係好事, 啱啱開工唔好咁辛苦, 替埋飯更我就閃人, 返屋企放低架車再行過去GP, 都等咗一陣啦, 個醫生口音都幾重我有啲聽得辛苦, 不過叫做明, 簡單嚟講會幫我book照肝, 然後再驗多次血, 再開多咗維他命D比我食, 因為上次驗完血我唔夠維他命D! 睇完返屋企就整番熱個飯食咗先, 肚餓呀! 然後就hea到3點幾去揍仲, 返到嚟開始hea, 哥哥打完排球先返嚟, 等老公煮飯食完佢又睇吓波咁!
22/4/25 TUE COOL
今日要開工啦, 朝早起身都有啲困難, 都要啲時間! 今日只係training其實本來有啲怕, 因為會好悶, 但今日只係department training, 所以都算係唔太悶, 時間都過得快, 有嘢抄吓時間係過得快啲, 中間又放吓break咁, 食埋飯, 再聽多一轉talk, 3點就可以走人, 早咗少少我就去Lidl行咗轉先接仲爺, 返到去仲要倒垃圾, 然後快手煮嘢食, 午餐只係食咗個Pho真係唔飽! 點知之後叫仲爺快啲做埋英文同數先上唱歌堂, 條友唔識又唔出聲, 教佢時佢又趕住話上堂前要再練歌, 怪我好阻住佢, 但佢係咪應該之前就已經要練好唔係要上堂前先練呢, 激死我! 之後佢地去咗踢波, 我就睇機煮飯, 冇佢咁好氣, 真係好火!
25/3/25 TUE COOL
今日本來諗住hea住過, 點知返到去, Ellie又出事, 佢又鬧佢個LSA, 最終唔知點解要同我對調, 不過其實除咗都係會攰啲之外, 我又唔覺得好攞命, 只係唔知要上咩堂有啲失方寸, 好在冇飯桶的英文咁就算啦! 又唔洗上PE都OK的! 放工遇算可以準時啦, 唔可以提早囉! 接咗仲爺返去又要先倒垃圾, 跟住又要煮麵食, 再趕佢去做boots up class的功課, 跟住佢又要上音樂堂, 然後去踢波, 我就要準備定飯餸老公返嚟煮, 然後就已經要去教會, 完全冇時間囉! 查實今日有啲完全唔係好聽得到神父講咩, 但都捱完嗰個幾鐘, 今次終於要改聖名, 找到一個完全喜歡適合又有意思的就係Clara, 係中學時崇拜的師姐的英文名, 實在喜歡! 另外一樣好笑事係, 完咗教會抬番架車落樓時真係好重, 所以搬完都有個攰樣, 突然同班的一個媽媽佢講咗句: 好重呀? 我完全反應唔切, 佢係咪講緊廣東話呀! 原來佢喺香港做咗14年姐姐, 嘩! 我真係覺得好親切呀, 下次有機會真係要同佢吹吓水, 超正!
18/3/25 TUE COLD
今朝本來如常咁返工，仲仲係有啲咳但都冇咩，照開工都有啲攰，仲要冇咁早放飯但又睇住啲學生食，幾辛苦，捱到點幾都差不多，上PD時代課，咁個assistant嚟講番要上堂做咩，我見佢張證個姓係wong就肯定佢都係香港人，咪吹吓水，點知吹吹吓reception個同事嚟搵我，初頭我聽唔清楚關我事，原來仲爺學校打過比我聽唔到，打咗去reception 通知我，細佬發高燒要我馬上接走，咁我就酚先搵人睇住條顛妹，再搵我啲阿姐，幾經辛苦終於攞到premet走得，接番隻仲返去先處理好佢沖涼食藥瞓咗上床，我先去煮嘢食，已經3點多，餓死我啦！食完仲要倒埋垃圾先休息，摺埋衫，7點多煮飯，仲仲瞓咗一覺退咗燒，但仲係咳，明天我都要請日假揍店佢架啦！
3/3/25 MON COLD
今日又要返工啦, 朝早都幾凍, 但到中午又暖番, 真係好難搞! 個學生今日都好難搞, 食錯藥定冇食藥咁, 總之就唔合作啦, 查實我都唔係好想理佢架咋, 但都要交戲架, 不過我已經可以做到冇咩情緒, 我都覺得EQ高咗! 不過琴晚真係太夜瞓啦, 今日成日都好眼瞓, 所以都唔可以坐咁多喺到, 唔係我怕會瞓著! 放學梗係要醒目令自己準時, 既然個學生係早走, 你梗係要搵位攝, 收埋自己再喺適當時候先閃出嚟走人! 揍咗仲仲返去食啲嘢換衫就出去, 揍佢去跟波! 期間啲家長開始話收到派位email, 其實都坐定笠六, 但都係想快啲知道, 都要襟個掣, 最終都係返屋企直接開電腦, 順利入到架啦, 都要馬上confirm咗先! 等仲仲踢完波返嚟食完飯沖涼休息!
20/2/25 THU RAIN
今朝要揍仲仲去試腳football camp，9點半放低佢就去食早餐再去藥房買埋嘢，返屋企都12點幾，又同老公一齊煲劇，今次開咗viu套原創劇睇，二次元好睇，期間只係各自煮麫食，煲到2點幾要去揍仲，接咗佢，條友原來今日冇戴con，又打爛咗個眼鏡，馬上去broadway即配個框，買埋嘢食再買埋星期六去生日會份禮物回程！返嚟仲要同佢洗鞋洗衫，條友沖涼時走去玩個香紛爉燭，用廁所去點個火，再將燒焦咗嘅廁紙掉廁所，重點係我發現但佢唔認，咪比我地片餐死，呢啲邊有得唔認，激死！幾時先學識唔講大話！早啲煮飯因為肚餓，最終煲哂套劇到最新嗰集，好痴線但超好睇！
15/2/25 SAT COLD RAIN
今日係阿May佢地過嚟玩, 上次去完佢嗰到, 今次到過嚟我地呢邊, 終於張家都肯一齊出嚟, 算係難得, 約咗兩點喺central London食日本嘢, 但朝早我地都好忙, 仲爺又激我又鬧情緒咁, 我由得佢自己梳理吓, 要長大就係要咁冇得幫! 食完早餐咪執好屋先, 仲要摺埋啲衫, 今晚佢地嚟都要簡單收拾吓! 老公揍完子元做gym返嚟就快手繼續整食物, 整到1點真係要出門口, 估唔到又咁塞車, 真係個幾鐘先到, 明明只係半個鐘路程! 2點幾去到, 食嘢都食咗個幾鐘, 咁呢間日本嘢都幾好食! 食完就去Notting Hill書店打卡, 都幾好玩, 周圍好多攤位, 回程就去咗tenpin篤波同玩食錢樂園! 到7點幾先返嚟屋企, 煮嘢食都煮咗好耐, 9點先開到飯, 但都OK的, 最終食吓蛋糕等啲大打埋啤牌, 12點先散場!
5/2/25 WED COLD
今日都係要正常開工, 個學生又好似打回原型咁乞人憎, 咁我又繼續做番應該做, 對佢地冇得好啲, 冇好報架! 所以我都係做番本份算了! 點都算係順利收工啦, 雖然今日唔趕揍仲但都想準時走, 返屋企抖到咁上吓就去接佢, 先去超市買多少少肉, 唔係今晚又唔夠食! 接咗仲爺, 佢自供出自己去咗打籃球冇去到補課, 激到我呢, 返到去完全冇啋佢, 嬲到老公返嚟, 講咗佢聽, 然後仲爺勁少有地自己做哂應做的今日功課, 根本就係知做錯咗, 但都係要片佢一餐, 叫咗佢明天返學校同老師講, 自己的錯自己認! 老公煮飯, 我就上網更改埋GP, 登記都要搞一輪呢! 食完飯又掛住睇電視, 10點幾先沖涼!
4/2/25 TUE COLD
今朝又要早起身, 仲爺要返boots up class, 咁就順手倒咗垃圾先返工, 第一堂就PE, 真係好唔想, 因為條麻煩妹又返咗, 不過我都盡量唔理佢咁多, PE堂仲話要出去行, 大佬我地已經喺室外啦玩嘢呀! 到第二堂佢話仲係好唔舒服, 最終小息我帶咗佢去reception叫人打電話比佢阿爸嚟接佢走,咁我就可以輕鬆啲, 佢又走得甩我又走得甩, 係佢老豆慘啲啦, 但人地家事我唔理得咁多啦! 之後都係頂轉飯更, 再hea吓咁啦, 因為都有另一個妹要跟, 嗰個易搞好多, 不過佢2點都有appointment走埋, 咁我最尾嗰堂都真係free! 所以可以準時收工, 不過返到屋企食咗嘢反而開始連個胃都唔舒服, 周身痛等等, 完全係作感冒, 真係唔想返教會, 一來又凍二來真係有啲悶, 同埋愈來愈少人返咁, 我不如集中三四月搞埋個領洗佢算啦! 所以食咗藥喺屋企休息, 摺哂啲衫洗好米等老公返嚟煮餸!
27/1/25 MON RAIN
今日都係好攰啦, 星期一仲要跟個顛妹真係好攰! 返到去都係照常開工啦, 冇咩特別, 佢有佢顛我有我做番自己, 盡量令到自己好似做緊嘢咁啦, 最辛苦反而係PE堂, 大風到一個點仲要喺室外, 痴線! 好在我下半堂去咗放飯, 因為落大雨, 我唔知佢地點啦, 反正我唔洗淋雨就算! 最難捱係最尾英文堂, 因為係飯桶堂, 好在顛妹2:45走得, 我同佢都恨不得快啲走, 因為個飯桶又遲到又係咁鬧人, 又send哂啲學生走, 最終應該得番4個人喺課室, 我盡可能唔理啦, 夠鐘就走人! 接咗仲仲返去可以休息, 因為今日唔去踢波, 一來落雨二來佢腳未好得哂! 咁就到7點多先煮飯食啦!
4/1/25 SAT VERY COLD SNOW
今日係Bristol之旅, 不過都係瞓到自然醒先, 然後收拾埋啲嘢食埋早餐先出發, 所以都已經12點先出到門口, 今次好叻冇停Services一口氣過到去May屋企, 先出去食咗意大利嘢先, 跟住我地就去check in咗酒店先, 再返去佢地屋企, 都係開始吹吓水打吓牌咁, 跟住就係食住羊腩煲等落雪, 但其實都係落冰粒嗰隻雪多啲, 唔夠軟, 不過佢地都夠哂玩, 食食吓又走出去玩, 最好笑係啲嘢飲唔洗放雪櫃, 就咁放出出面就得! 然後都係繼續打牌咁啦, 今日夾埋打咗8圈呀, 玩到兩點幾先走, 好在走嗰時已經冇雨雪, 咁都安全啲, 返到酒店排隊沖涼, 仲仲又要浸浴玩浴球, 所以差不多4點幾先瞓, 等緊時順手打比阿媽, 否則又冇咩時間啱打比佢!
