10-11/12/13

10-11/12/13   TUE-THU   COOL

呢幾日都係已經比較有規律架啦, 老公就負責3點嗰餐, 我就負責6點嗰餐, 順手泵埋奶叫笨元起身返學, 我就繼續泵奶, 搞掂就自己煮個早餐食, 都係食個麵炒隻蛋咁簡簡單單, 之後就再夠鐘餵蕃薯粒, 而家最多三個幾鐘要餵佢一次架啦, 好在暫時都夠貨比佢餐餐人奶! 奶奶就十一二點過嚟, 幫佢沖完涼又再食奶啦, 跟住到我食飯囉, 午餐都食得比較簡單, 有時食吓粉有時食吓飯, 但真係唔可以食得多, 個胃會痛, 一係就嘔番出嚟, 可能個胃停咗咁耐食咁少嘢, 開頭嗰幾日食多咗都仲ok, 之後開始頂唔住胃痛啦! 到3點幾嗰餐後我都開始攰, 但未必成日有得瞓, 總係好多嘢做咁, 餵完奶又要泵奶, 邊有得休息, 盡可能4個鐘左右泵一次! 到五點幾笨元就返嚟啦, 星期二放學佢勁攰, 一返嚟已經瞓咗, 瞓到食飯後, 等契爺上嚟睇佢地, 齊齊睇電視到10點先瞓! 之後都係餵奶泵奶重覆又重覆! 星期三就下午要去健康院睇黃, 諗住應該OK, 點知仲話高咗, 個醫生又勁衰, 度到黃個指數係231, 比要求高咗1度, 問番我轉頭去唔去抽血, 搞到我都唔知點, 最終決定唔去, 要求再返嚟覆診算, 佢就比咗明早個期我, 抽血都唔知搞幾耐, 又要去揍笨元放學呢, 況且只係高1度! 睇完又未夠鐘去揍笨, 咁就上咗青梅樓hea院先, 4點時蕃薯叫餓, 不過我冇馬上開奶粉比佢, 而係比佢埋身啜吓, 最終佢都啜咗30分鐘左右, 揍咗笨元返去先再補兩安比佢! 食完晚飯到我勁攰, 瞓咗個幾鐘九點幾先起身沖涼, 笨元就已經瞓咗啦! 呢種混亂的日子要維持幾耐呢, 我諗滿咗月應該會好D掛!

9/12/13

9/12/13   MON   WARM

今朝又要去健康院, 又要揍笨元返學, 所以六點就要起身先泵好奶再餵埋蕃薯粒, 始於預唔夠時間都係要撘的士, 我都好想試吓一個人撘巴士揍哂兩個會係點, 總有機會GE! 返到去都係要等一陣先入到學校, 而家開始服務生唔洗家長陪入去, 喺門口放佢地入去就走得, 同程太傾咗陣就撘巴士去茶水站食咗嘢先再去健康院, 今日都係奶奶陪我去, 主力睇黃磅重, 重量算叻架啦只係兩日由2.65加到去2.68KG, 算有進步, 但黃都始於係有不過醫生話係正常喎, 咁就OK啦, 最緊要係佢肯飲奶有尿疴, 唔洗照燈但就要後日再返嚟覆診, 雖然蕃薯粒唔算早產都叫有37w2d, 但點都係輕磅D, 同埋有黃都係好普遍, 唯有每日都餵佢足D, 醫生話佢嘈就比佢食, 若掛住瞓就捉佢起身食! 搞掂就返屋企啦, 如常咁定時泵奶餵奶, 蕃薯粒就日頭掛住瞓, 開始天黑佢就醒, 真係頂佢唔順! 我頂到六點都瞓番轉, 但都係瞓得唔好, 所以7點聽到聲都起身食飯啦, 不過今晚食PIZZA喎, 食完就泵奶啦, 之後大包上咗嚟, 好似總係唔多方便咁, 因為泵完想沖涼又唔係咁方便去沖, 等佢地睇埋電視九點幾先沖囉, 至於笨元, 放學返嚟馬上搞掂佢D嘢, 食食吓嘢已經攰, 仲話要睇埋on call, 未夠8點半就已經喺梳化倚住我瞓咗! 我地又比隻蕃薯搞到冇覺好瞓囉, 明明11點食咗餐, 諗住佢瞓啦, 就開始係到喊, 不過我仲泵緊奶, 老公又瞓到就由得佢, 到我1點瞓得佢都仲係喊, 個奶咀又成日跌, 搞到我都瞓得唔好, 到2點時老公提早餵咗佢飲奶, 之後都叫瞓到, 但我就瞓得麻麻囉!

8/12/13

8/12/13   SUN   WARM

呢個冬天都算係咁, 唔太凍, 今朝6點蕃薯真係叫食喎, 都要比佢食架啦, 餵完我又冇瞓番啦, 泵吓奶先, 要4個鐘左右泵一次先得, 泵到咁上吓笨元就起啦, 佢有佢玩我有我泵, 老公九點幾先捨得起身煮早餐, 食得嚟都十點幾, 佢兩父子又趕住出門口去契媽婚禮, 咁我就同蕃薯粒兩個喺屋企囉, 不過中午嫲嫲都過嚟架啦, 老公就速遞吓現場的情況返嚟比我睇囉, 請咗crystal做MC, 睇見佢地就開心, 出席唔到真係有D可惜, 佢地三四點先返嚟, 笨元掛住玩, 老公就掛住瞓, 晚飯後叫沖涼佢又慢吞吞, 搞到我個人勁火, 叫你又唔郁又唔應咁, 但D嘢就係要配合嘛, 火到我又係到掟嘢囉, 大家都唔敢惹我住! 終於連笨元都安頓埋, 佢地睇掌門人時我就沖番個涼, 之後可以休息吓再泵次奶先瞓, 老公就睇波喎, 順手餵埋蕃薯嗰兩餐先瞓! 不過蕃薯晚上都係喊, 最終老公出絕招—奶咀! 我一向都冇所謂, 笨元都係咁食, 亦唔難戒呀! 咁大家都有覺好瞓總好過齊齊發顛!

6-7/12/13

6-7/12/13   FRI   COOL

今日要去健康院, 所以一朝早就要起身, 加上笨元要做服務生, 所以最終都係撘的士, 蕃薯粒6點食過一餐咋, 揍笨元返到學校, 佢未等我地就走咗入學校, 想同佢講bye都未得, 不過家長們都掛住睇蕃薯粒呢, 係咁問我做咩出嚟, 我咪答要返健康院囉, Social咗一陣就去茶水站食早餐然後先落去健康院, 因為怕蕃薯粒餓親, 就入去試吓餵奶, 叫做食咗dd啦, 磅咗重後老公就要去笨元學校有活動, 咁之後見護士同醫生時就奶奶同我啦, 好在黃嗰d今日都過關, 不過星期一要再覆診! 咁奶奶就同我返屋企囉, 返到去又係好刻板咁做一個窮奶媽啦, 為咗要儲貨, 老公提意咗個方法, 就係返去先餵住奶粉, 跟住我就KEEP住泵出嚟, 咁隨時餵人奶又得, 夜晚就餵奶粉等佢飽d! 於是我五六個鐘就泵一次, 成績都ok, 但始終都會谷谷地都係唔舒服, 臨瞓前泵多次, 半夜老公起身餵咗一次, 我地就完全唔知醒, 到8:15先知醒, 老公馬上揍笨元去學畫班, 我就照顧蕃薯粒, 先餵咗佢我再煮早餐食, 跟住就開始泵奶, 都泵到咁上吓份量啦但真係唔多, d人一人一句又話要2個鐘泵一次, 但我泵一次都要泵個幾鐘, 咁我係咪24小時坐喺到泵呢, 其實我真係有d想放棄ge念頭架, 同埋我暫時真係做唔到全人奶, 總之我會盡力泵, 我都好想蕃薯粒埋到身, 我做少幾多嘢呢, 但佢點都唔肯埋身, 就算係都只係好少量就唔啜, 陣間黃啦要照燈咁邊個可憐呢, 所以都係唯有每餐check住佢份量, 今日老公上下午都揍笨元去學嘢, 中間返過嚟, 阿姨又上過嚟探吓蕃薯囉, 仲攞埋個奶粉袋比我呢! 捉笨元做埋D功課又出門口去踢波, 我就泵奶餵奶休息吓寫番呢幾日D日記囉, 蕃薯粒今日飲奶都OK, 等老公佢地返到嚟都六點幾, 又係時候食晚飯, 食飽之後沖個涼我又要再泵奶啦, 總之都有得出但唔係勁多囉! 睇住電視嚟泵, 笨元做埋珠心算後都10點幾先瞓呢, 我地就餵埋12點幾嗰餐先瞓, 而老公就負責半夜3點半嗰餐啦!

3-5/12/13

3-5/12/13   TUE-THU   COOL

本來以為3日2夜就出得院, 點知最終住咗4日3夜, 原因是蕃薯粒收數超過8%, 體重跌得多過標準, 所以唔出得院! 其實呢幾日幾夜都係過得好似, 半夜蕃薯粒就喊, 餵佢又唔係好餵到, 但我都冇咁好力氣, 最終佢有佢喊我有我瞓, 其他媽咪都有係咁, 大家都習慣咗嗰種喊聲, 7點著燈就梳洗食早餐餵奶, 小B們洗白白, 大人就等醫生檢查, 然後隻B比番你又餵, 12點就食午飯, 因為撞啱香港有人有H7N9, 搞到取消咗12-1個探期, 我就午餐要食醫院飯, 難食咗好多但為咗飽肚都要食架啦, 果然一生完就對飯冇哂反感仲好肚餓添! 午飯後的時間最聞, 除咗餵奶就係餵奶, 我去到第3日開始谷奶, 仲辛苦過冇奶, 因為對胸變咗石頭咁, 幾更姑娘都有唔同方法, 有個幫我按然後徒手擠出嚟, 痛到人都顛, 但谷住喺入面又係唔得, 簡直係進退兩難, 咁都唯有擠啦, 起碼蕃薯粒有得飲, 因為唔夠重出唔到院都好煩! 另一個姑娘就提意我補奶粉, 因為再咁輕落去都唔係辦法, 老公都話照補! 喺醫院期間都叫做識到吓人吹吓水咁, 首先相認咗個facebook的媽媽, 因為佢對係孖仔所以先估到喺佢! 仲有對面床嗰個比我仲早一日入嚟, 佢個B因為黃所以冇得走住, 我地D有相依為命咁囉, 睇住D人可以返去真係有D唔開心GE! 去到第三晚, 個護士唔肯比我補奶粉, 一定要我自己餵, 真係痛死, 蕃薯粒又衰喎, 半夜12點幾開始就喊, 餵完一陣又喊, 最終我冇理佢去咗瞓, 結果3點幾護士捉咗蕃薯粒埋我床邊要我瞓喺到餵, 餵咗半個鐘放番落床, 終於肯瞓, 到6點幾先再嘈, 咁梳洗完咪餵佢囉! 轉番另一更個護士, 知道蕃薯唔夠磅就出唔到院, 於是用咗個方法, 先叫我餵咗泵出嚟的10ml, 再補支奶後馬上上磅, 終於過到關, 可以出院啦! 兩點多奶奶嚟接我, 因為老公未放得工又唔想我留喺醫院辛苦, 咁都係GE, 接咗我返屋企可以休息吓, 執好D嘢又係餵奶泵奶等等啦, 笨元放學返嚟好興奮, 因為知道蕃薯粒同咪咪都返咗嚟, 不過要佢沖好涼先可以摸蕃薯粒! 佢全晚都仲好興奮架, 不過由於我地太忙, 冇機會比佢兩兄第玩吓食完飯又要瞓啦, 我地就要努力餵奶, 因為星期五返健康院就要過關先得, 所以半夜都再餵咗次, 但由於我地太攰蕃薯粒又唔叫, 所以半夜只係餵咗一餐咋!

2/12/13

2/12/13   mon-thu   cool

又是一個估不到的前零後10的開始, 2號朝起身去廁所, 見紅喎, 但我一d都未痛, 只是急popo, 去咗popo捉笨元梳洗, 佢今日又要做服務生呢, 跟住入去同老公講, 佢又係比兩個選擇我, 而家送我入院, 食埋早餐先入院, 咁梗係食埋先啦, 執一執嘢揍咗笨元返學先, 時間關係只可撘的士, 去到揍咗笨元入去, 就同APPLE講咗幾句, 佢都叫我入院啦, 咁就去太興食埋早餐先, 開始痛得密咗, 但諗諗吓都係返公司交代埋先, 咁都係撘的士返去, 可以執埋個HARDDISK返屋企都有得開工嘛! 跟住就撘的士上PMH啦, 都係去產房架啦, 因為見紅佢都要收症, 於是就開始痛苦的產程! 打發了老公去辦手續入院咁佢都要走先架啦, 換好衫我就入咗產房等, 由10點入去到12點, 我都只係開得一度, 所以冇咩可以做, 但其實我已經每5分鐘陣痛一次, 不過嗰種痛係仲可以忍受, 所以12點放我去咗次廁所食咗個飯再繼續, 唔食D飯邊有力呢! 食完飯開始痛得勁咗, 姑娘本來想送我上產前房, 但檢查後已開到2度, 而且愈來愈勁, 所以都唔洗上去, 仲要換衫及找人嚟種豆吊抗生素, 又要抽我血, 不過做呢一切時我已經開始聞氣啦, 笑氣真係好正, 雖然明知聞咗會有咩感覺, 但都係忍唔住要聞, 咁真係好痛呀嘛, 不過你暈得嚟又聽到佢地講嘢架喎, 真係好得意的感覺! 我都仲間中唔痛時會望吓鐘, 大概知到咩時間, 我今次Feel到穿水啦, 點幾鐘左右, 一股暖流沖出嚟架喎! 穿水後痛得仲顛, 開始失控嗰隻, 我只知自己係咁捉住床邊的扶手, 一痛就叫啦, 又聽到助產士叫你唔好叫, 不斷重複, 愈來愈痛就愈來愈想疴, 顛咗兩個鐘, 又比人鬧吓咁, 到三點幾先疴到出嚟, 仲要再比人剪, 今次feel到佢剪我啦, 聞住氣係唔痛GE但就係feel到囉! 今次生完佢抺乾淨打好針就比蕃薯粒伏喺我心口呀, 又係一隻黑黑的小B仔得2.91KG, 重過笨元少少! 等到聯針啦, 我唔理三七廿一攞住支氣聞啦, 今次係學生仔聯, 好在有個老師喺到教, 都聯得唔錯! 其實完成哂都未夠5點, 但等上番產後房足足等咗兩個鐘, 因為冇人手嚟接, 不過探訪時間老公同阿媽都嚟過, 因為我打電話比佢地通知嘛! 等到差不多7點先上得到去, 食咗D飯可以啦, 都未開胃口! 7點半佢地要走啦, 我就要做埋哂D後期工作, 夠6-8個鐘要vv到先可以落床, 然後隻B就推埋你床邊自己搞掂架啦, 不過可能佢都攰, 唔係好願食, 但大家都好努力咁學緊架啦! 好在個位都可以睇吓電視又休息吓咁, 就開始咗與蕃薯粒相對的日子!

30/11-1/12/13

30/11/13-1/12/13   sat – sun   cool

呢兩日都係如常咁啦, 星期六咪返工, 中午等笨元嚟就去KFC食lunch, 然後佢地就去踢波, 我就返咗屋企打掃啦, 仲有洗吓蕃薯粒D嘢, 慢慢做都要幾多時間架, 做得嚟佢地都差不多返囉, 今晚食外賣啦, 晚上都係睇吓電視咁啦!

星期日老公話去AEON嗰邊行吓, 咁反正都要食晏咪去囉, 朝早瞓到咁上吓, 笨元實起咗身架, 睇吓電視咁囉, 老公煮咗早餐食咗先, 執嘢嘢整吓嘢, 出開去還咗書先, 就撘小巴過去AEON囉, 都係比笨元睇吓玩具, 食個午飯咁解啫, 之後又返番屋企, 洗埋蕃薯粒D被就大功告成, 晚飯打邊爐, 最好架啦, 簡單方便, 之後都係睇電視囉! 不過都攰11點幾都瞓啦!