14/4/14

14/4/14   MON   HOT

又要返工返學啦, 朝早再跳番鄭多燕, 跟住服侍兩位少爺, 趕得切出門口撘車, 送咗佢地返去又要返工啦, 買埋早餐返去快手食, 朝早做完自己嘢都有做吓公事, 午飯去買嘢食, 老細又一早返咗嚟, 嘈住哂人地睇電視! 下午又喺到喎, 不過算啦, 睇在佢明天就飛, 我又有個悠長假期就算啦! 下午都係prepare吓子元生日會D嘢, 諗諗吓都好似幾多嘢搞! 放工就撘地鐵去青衣城訂蛋糕, 然後返到上去笨元就掛住睇機, 柏仲就瞓咗, 差不多食飯先醒, 同佢玩咗陣老公返啦, 食飯食到半飽, 因為有下半場, 約咗幾個同學仔去戲棚, 好好地佢地已經排緊隊可撘單買嘢食, 食咗我最想食GE臭豆腐同榴槤冰, 超正! 佢地又玩得好開心啦, 柏仲比我放咗喺人地架BB車坐住先, 因為抱住佢冇手食嘢, 總括嚟講都好好玩好開心GE! 八點幾九點要走人啦, 又打的…好赤! 回家後未得閒理柏仲, 放咗佢喺B床, 佢可能比人玩到攰, 自我催眠咗, 咁我地沖好涼K.O.咗笨元又要開工整生日會D回禮袋, 貼好紙喺袋面, 零成本完成! 11點幾叫醒柏仲食奶, 不過佢都係瞓住嚟食! 睇埋套劇12點幾先瞓, 好攰!

 <食冰呀, 真係好正!>

 <子元要咗支薄荷味...>

 <鬥CHOK中!>

 <吹波中, 吹得夠大唔洗比錢!>

13/4/14

13/4/14   SUN   HOT

今日諗住出街架啦, 不過地點一改再改, 最終變咗近近地去荃灣咋! 今朝都算晏起身, 因為琴晚喺梳化瞓夠咗, 餵完奶到3點先再瞓, 今朝勁唔想起身, 好在柏仲食飽咗都冇起身嘈, 反而係笨元走過入嚟問呢樣問嗰樣! 老公八點幾起身去咗踢波, 我就照瞓冇理佢啦, 到我再醒時已差不多10點, 唔得再賴床, 起身發覺笨元喺到做緊珠心算, 應該係老公叫佢要做架啦, 咁都算乖仔! 梳洗完餵埋柏仲先煮早餐一齊食, 食完柏仲又扭, 就同佢沖咗涼先, 因為諗住老公踢到12點半, 差不多時間就入沙田會合, 但沖好涼隻仲又瞓咗, 於是唔出去住, 老公買D嘢返嚟我地食, 仲可以睇Running men, 笨元又可以砌Lego, 佢不知幾開心, 佢真係砌得叻咗好多, 係初頭砌咗變形俠醫隻手搞到我再出盡辦法幫佢拆出嚟啫! 睇完running men就執嘢出門口, 近近地去荃灣睇吓笨元張組合床, 仲有買咗D衫比柏仲, 見佢係有好多衫, 但都係大件嗰D, 而家只係得D夾衣, 找過都冇咩短袖啱, 所以去買番幾件比佢, 買得好開心呢! 睇埋組合床, 玩咗陣遊樂場再睇埋玩具就返青衣食晚飯, 奶奶話提早同大包慶生日! 返到去食飯前餵咗柏仲, 但食到一半又唔食, 唔理佢住我食咗先, 食完再餵咪食埋囉! Hea 到八點幾就回家, 坐kai哥順風車, 返到去沖好涼就比笨元再玩, 老公搞掂柏仲, 我睇埋笨元執書包D嘢就可以摺埋衫, 11點前K.O.埋笨元抖吓就捉柏仲食埋奶, 但佢完全熟睡咁只飲得4安! 我地都早D瞓啦, 明天又要開工!

<咁快砌哂D生日禮物!>

 <仲欠阿姨未送的美國隊長就齊!>

 <包面仲VS尖面元>

 <困住雙仲幾好!>

 <著番笨元的褲同鞋, 可惜找不回上衣!>

12/4/14

12/4/14   SAT   HOT

今日又回復番平日的星期六, 朝早起身後要揍子元去畫班, 開咗奶比老公叫佢餵柏仲, 同笨元過到去敏瑩都未到, 剛買好時佢地就到, 原來小B都過咗嚟, 但樓下冇位, 唯有抬埋佢上樓上, 食到差不多夠鐘, 我就帶咗兩個上去先, 撘lift時竟然壞壞地, 上到3樓又落番地下, 又再上番去, 好在開到門, 嚇死我! 揍好佢地我就馬上閃啦, 趕返工呀, 不過都係hea 過一朝! 12點幾老公帶哂兩隻豬仔上嚟, 柏仲係咁比佢地輪, 仲比人玩到喊, 好在我又冇咩所謂, 但柏仲個樣真係好慘咁! 夠1點就閃了, 落去食KFC笨元又要去踢波, 柏仲可能比佢地玩到冇哂電, 落到樓就瞓咗, 到我食嘢時又醒番, 瞓得半個鐘都冇! 返到去一陣kit就上嚟, 攞個新玩兒比柏仲, 因為未食嘢又順手係到食D嘢先, 好在我都仲冇D儲貨啫! 我就照樣吸塵抺地等, 柏仲食完奶又係唔多肯瞓, 到佢地走哂先瞓咗一個鐘左右, 由於佢醒咗, 咁就帶埋佢出去旺角睇LEGO, 最終買咗兩份比笨元做生日禮物, 話埋比阿姨知佢想要邊份, 佢係勁心急想拆嚟玩, 不過都要喺適當的場合, 返到長沙灣仲未夠鐘同敏瑩佢地食飯, 所以上阿媽到餵咗柏仲食奶先, 阿媽話可以放低埋佢喺到食完飯先嚟接佢, 咁就好囉, 可以食餐安樂茶飯! 食完上去揍番柏仲先再去食雪糕, 然後先返屋企! 返到去笨元馬上肯沖涼, 因為搞掂D嘢就可以砌佢D LEGO嘛, 今晚先比佢砌咗細嗰盒, 因為已經太夜啦! 我地都勁攰, 兩個喺梳化瞓著咗, 到點幾先知醒起身餵柏仲食埋餐奶再瞓!

<快叉中!>

11/4/14

11/4/14   FRI   WARM

今朝嫲嫲過嚟, 所以我都冇咁早起身, 但柏仲又好早醒咗喎, 冇得唔理佢, 咁搞掂又未夠鐘就開奶比佢啦, 餵咗一陣又係到玩嘢, 我見又差不多夠鐘啦就交比嫲嫲接手, 我地就出門口啦, 老公今日唔洗咁早返, 可以送埋笨元返學先, 跟住仲同我食埋早餐先客自返工呢, 我攞埋商會D相先返公司, 朝早都係做吓自己嘢先, 因為老細上午唔會返, 要做樣都要留番下午嘛, 午飯仲要落去買, 食完打吓機咁, 夠鐘又返去做吓嘢啦, 老細返咗嚟就攞埋D相比佢, 等佢地走咗都叫做可以自由番! 放工夠鐘就走人啦, 去惠康買嘢, 比錢時先發現張卷過咗期, 蝕咗12蚊, 可惡! 搬哂D貨返去又要睇笨元D功課, 柏仲又唔肯瞓, 好在老公陪佢玩, 咁我可以搞掂笨元D功課先, 但都搞到7:50先出到門口去合唱團, 今日得程生帶住小B嚟食晚餐, 簡單D去咗食吉野家, 婷婷真係冇時停, 柏仲都冇心情, 眼瞓又唔瞓係到扭, 食食吓老公接到大包電話, 話可以攞D紙袋, 咁佢就要出去攞, 得番我同程生返去揍佢地, 又要玩一輪玩具先, 9點半先走, 柏仲就比D工作人員玩咗一輪, 喺BB車時因為推住就瞓咗, 點知返到屋企我諗住同笨元沖涼時佢就喊啦, 唯有放佢喺學行車先, 然後再等笨元著好衫幫我睇住柏仲我再去沖, 不過柏仲應該係又餓又扭眼瞓, 所以咩都唔理係咁喊, 但我都要梳洗完先服侍得佢架, 真係沖完個涼頭都冇吹就餵咗奶先, 6安食哂瞓咗! 終於可以休息一吓, 搵吓西貢戶外康樂中心仲有冇日營位可以去玩吓, 但只餘下黃昏營唔啱玩!

<食手食到幾肉緊!>

 <食番斯文D先!>

10/4/14

10/4/14   THU   WARM

今日終於撘得切巴士啦, 朝早如常咁梳洗完叫醒柏仲食奶, 子元鬧鐘未響就起咗身, 佢都怕再同唔到敏瑩一架車呢! 送咗佢返學就撘車返工啦, 食埋個早餐又要開埋商會D票, 之後都係睇吓自己嘢, 午飯老細打嚟問埋D無謂嘢, 因為佢要去開會, 咁等唔到位泊車, 竟然叫我打去叫人地叫個停車場放佢架車入去, 佢話入面有D AM位, 你都識講係政府位啦, 咁係D官泊架嘛, 邊有得比你泊呀, 佢真係慣咗去到邊都有特權! 阻住哂我D時間, 約咗CW攞番柏仲的保單呢! 下午完全私人時間, 真好呢! 放工直接去葵芳食晚飯, 我勁肚餓呢, 等佢地嚟埋就可以叫嘢食啦, 試比D銀絲卷柏仲食, 都係未識, 再大個D先啦! 食完去新都會換埋架搖控巴士, 去實惠睇吓油壓床就走啦, 回家後柏仲一路都唔肯瞓, 但我地又有嘢要做嘛, 唔可以成日抱住陪住, 所以都要放佢喺床仔喊吓, K.O.咗笨元到10點多就餵佢, 條友仔食手都唔食奶, 扭眼瞓呢, 最終食咗4安多D就瞓囉, 我地就hea到11點幾先瞓呢!

<好溫柔的子元呢!>

 <嘆蝦毛中!>

 <近來勁食手!>

9/4/14

9/4/14   WED   WARM

今朝又超唔切撘41A啦, 本來都好準時, 未夠7:50就已經出到門口, 點知笨元隻牙甩淨少少, 要整埋出嚟先得, 但佢又係咁縮, 整咗好耐, 結果咪遲咗出門口囉, 又要撘地鐵行到隻嘢咁, 仲要問我點解兩日都撘唔到巴士, 我真係無名火起, 咪因為你囉, 頂! 返到公司都係做吓自己嘢啦, D lift都未整好哂, 但已經好咗好多! 上午都係做自己嘢多, 午飯後預備要開會囉, 真係好唔鐘意開會, 因為老細講D嘢廢話居多, 真係好浪費時間, 終於4點幾可以叫做開完, 自由啦! 夠鐘就放工閃人, 返到去老公已在, 所以早D食飯, 柏仲當然冇瞓啦, 同笨元睇咗功課就同柏仲玩吓, 到我地食飯時柏仲就辦大事, 咁益我!! 七點幾就閃人啦, 冇瞓咁多個鐘柏仲梗係瞓啦, 返到去都扭咗一陣, 哄咗陣就瞓番, 沖完涼本來應該同笨元溫默書, 但佢又攞咗交通安全隊D工作紙嚟做, 做得嚟都夜咪冇默囉, 瞓覺緊要D! 等佢瞓咗我地又自由吓, 11點幾先餵奶, 個衰豬又食淨, 唯有由得佢囉!

<冇牙笨!>

 <兩個開始有互動!>

 <主力子元玩柏仲!>

 <Daddy完成了的Pinata>

8/4/14

8/4/14   TUE   RAIN+

今日係我地入青衣啦, 不過樣樣慢咗就超唔切撘41A, 結果又要撘地鐵, 行到我隻嘢咁! 返到去仲要再排隊尾, 陰公! 好在趕得切撘開嗰班巴士返工, 但公司個lift仲未整好, 勁長龍, 諗住行上去算啦, 當做吓運動, 點知上到5樓防盜門lock 咗入唔到去, 唯有經停車場去番撘lift, 咁點都快過喺地下排! 返到去仲食緊早餐大老闆娘返咗, 因為佢地今日去拜山, 喺公司出車喎, 搞到我食早餐都食得唔自在! 不過佢地上午唔喺到又幾free GE, 睇睇吓FB, 見到家寶生得啦, 琴日先講緊16號開刀, 或者之前咩情況就要順產, 今日就生得! 午飯後都係睇吓電視咁啦, 下午老細返咗嚟, 又有公事要做, 好在都唔算太難做! 放工都算準時走架啦, 返到去先同笨元睇功課, 然後又要陪吓柏仲玩, 食飯時都係要放番柏仲喺床仔, 因為坐佢又想向前中, 但放床佢都係咁想轉身, 真係唔知點安置佢好! 差不多時間就回家啦, 喺巴士柏仲已瞓咗, 返去放落床照瞓, 咁就可以輕鬆搞笨元同沖涼, 到11點幾先叫醒柏仲食奶, 又係瞓住食囉, 好在冇嘔但飲淨一安, 寧願瞓都唔食咪由佢囉, 我地12點幾都瞓啦!