20/5/14

20/5/14   TUE   RAIN

今日局住請假一天, 因為阿媽病咗, 臨時又唔想奶奶咁急找人幫手, 於是唯有我請假囉, 反正老細今日去澳門, 唔會煩我! 朝早柏仲6點開始嘈, 可能琴日得5安唔夠飽, 於是抱咗佢上床hea陣我就起身, 佢就同個daddy玩, 執好嘢餵奶, 勁快食哂, 我又唔想自己喺屋企煮早餐, 於是同老公一齊揍笨元返學, 趕得切去巴士站快手買埋個包比笨元, 上到巴士先見到程生同小B都嚟埋, 真係齊人, 原來小B今日去打針! 等緊巴士時發現柏仲臭臭地, 條友仔神不知鬼不覺咁疴咗屎喎, 於是返到學校按鐘叫佢比我地入去同柏仲換咗片先囉! 搞掂哂就同老公去太興食個早餐, 然後佢就返工我就揍柏仲返屋企, 喺車扭咗兩分鐘就瞓咗, 一路到返屋企繼續瞓到11點多, 都叫做比我摺哂D衫先, 11點幾已經好不安要開餐咁, 但都比我拖到12點多沖埋涼先至食, 見佢咁餓比咗7安佢食哂, 又再瞓過, 咁我就可以煮午餐食, 其實都係將D餸尾煮番熱啫! 開飯時開咗套步步驚情嚟睇, 一睇就睇咗3集, 到3點幾程生打嚟話可以車埋我入去揍子元放學, 不過就唔可以車番我出嚟, 都冇問題啦, 我正諗緊咁大雨點入去! 4:20去到學校門口都真係已經幾多人吓, 排到4:40先開門, 揍咗笨元馬上閃啦, 帶咗少少嘢食比佢, 有嘢食都定D, 返到屋大家都沖個涼先, 叫佢做珠心算我就煮飯, 柏仲就自己玩, 老公返嚟後不久開得飯, 食食吓笨元話隻牙好鬆, 老公同佢拔埋佢安心食啦, 之後仲去買雪糕, 我就洗埋碗, 老公回來後就K.O. 咗柏仲, 我睇埋笨元D功課, 笨元食埋雪糕就瞓啦, 我都勁攰喺梳化未夠10點就瞓咗, 老公12點幾先叫醒我起身餵奶, 太夜啦, 下次可以早D! 餵埋瞓覺!

<早上一覺!>

 <下午又一覺!>

 <偷食手中!>

 <再扮無知!>

 <哥哥話要同你一齊玩呀!>

 

<又冇一隻牙!>

 

19/5/14

19/5/14   MON   HOT
星期一多不願意返工呢, 但還是這樣一早起身, 柏仲又係6點幾就嘈, 抱咗佢上床同daddy 玩我就搞掂笨元返學啦, 之後如常買早餐返工, 做吓自己嘢又做吓公事咁啦, 午飯要去買嘢食呀, 不過食咗個麵麻麻地夠, 所以tea time又食過, 然後早10分鐘趕去學校接元放學, 今日佢地去迪士尼畢業禮, 幾開心呀, 不過就喺手足口病的陰霾下氣氛麻麻囉, 下午喺whatsapps上火藥味很重, 其實嘈都冇咩用, 不過學期未先嚟搞D咁GE嘢真係有D可惜! 接咗笨元睇住架41A走咗, 最終決定唔等去撘地鐵好, 咁啱Rachel去地鐵站就車埋我地, 真好彩! 回家後阿媽話佢發燒, 應該早D話我地知嘛, 仲要死頂, 時間關係我點都要沖好哂涼先, 咁阿媽就照煮飯先, 等我地沖好涼, 食埋飯佢就快快返去休息, 我仲要洗碗等等, 笨元其實都算乖會幫我氹仲仲, 但到叫佢做珠心算時就麻煩啦, 完全冇心機做, 真係激死人, 搞到10點幾先瞓! 我地就餵埋柏仲11點幾食奶就瞓!

18/5/14

18/5/14   SUN   HOT

今日係充實的一天, 朝早柏仲8點幾嘈就比佢開餐啦, 跟住叫老公起身就煮早餐笨元食, 因為10:15要去小童群益會集合, 勁催佢先出得切去, 我就執埋嘢直接去太興, 本來諗住同埋程生佢地食早餐架, 但婷婷嘔喎, 唯有遲D直接喺西鐵等, 我地食埋個早餐去咗超市買吓嘢就回家, 返去執一執嘢又要出發, 喺西鐵站同程生佢地會合過poly, 去到都仲要等因為遲咗放, 老公去探定路飯堂喺邊, 一放馬上就去飯堂, 快食完休息吓就送番佢地去會場, 我地繼續hea, 餵埋柏仲餐奶就過去入座, 本來話我地得樓座架嘛, 但由於堂座好多位淨要人去充撐要我地落番去, 不過我地喺樓座最前嘛, 唔想郁, 兩個細的又瞓哂, 我地賴死唔走佢都吹我地唔漲, 只係當佢地表演完我落去揍番兩個上嚟, 睇哂全部比賽以為話要影相, 但最終係冇得影, 好在冇地方去, 否則等咁耐原來唔洗影相都幾係嘢! 完哂就行過去尖東食日式放題, 不過除咗刺身, 燒物嗰D都係好一般! 食到八點到撘西鐵返去啦, 沖完涼分工搞掂兩隻嘢, 笨元話要砌埋盒Lego先, 都由得佢啦, 砌到11點玩咗陣就要瞓, 明天仲要迪士尼之旅! 12點餵埋柏仲先有得瞓, 今日真係夠哂攰!

<shopping仲!>

 <第一次坐購物車!>

 <睇哥哥表演呀!>

<合唱團表演!>

 

 <放題中!>

 <兩個洗唔洗咁sweet!>

17/5/14

17/5/14   SAT   HOT

今日都係忙忙地的一天, 朝早揍笨元去畫班, 睇住架6號走咗, 又已經遲, 唯有去撘地鐵, 行到隻嘢咁! 比佢食埋早餐送埋上畫室就買早餐返工, 做吓嘢無聊吓咁等放工, 老公差不多1點先嚟到, 所以佢放低柏仲比我地玩之後就落去KFC買嘢食住等, 食完佢就同笨元去踢波, 我就揍柏仲返屋企, 等巴士等我佢瞓鬼咗, 返到去同佢沖咗涼食咗奶又瞓過, 梗係啦, 朝早冇瞓過嘛! 佢瞓覺我就做家務啦, 真係要做足幾個鐘, 我唔喺屋企一朝佢地已經可以反轉間屋, 執死我! 到5點幾柏仲繼續瞓緊, 但約咗老公喺沙田會合嘛, 好在佢都知醒, 馬上食埋支奶就閃人, 入到去都差不多7點, 去咗一田睇BB車, 試就試啱咗但最終冇買, 因為下星期四開始做特價差3百幾蚊喎, 咁等吓先囉, 始終舊嗰架唔係坐唔到係收唔到啫! 食完晚飯跟住去咗荷花再望吓, 得D貴嘢冇咩啱咁就撘火車返屋企啦! 契媽過嚟比埋禮物子元, 但時間關係只係喺樓下講咗幾句就走啦, 返到屋企要笨元做埋餘下的功課先比佢開嚟玩, 做得超快! 砌咗一部份就要瞓啦, 明天又要合唱團表演!

16/5/14

16/5/14   FRI    VERY HOT

今朝柏仲6點就喊, 好在噯一噯瞓得番, 但我6點幾又要起身啦, 笨元都一齊早起, 所以早到出門口因為柏仲瞓番唔洗餵佢奶! 買埋麵包比笨元就等巴士, 返到學校都算早, 揍咗佢返去我又返工啦, 都係做吓自己嘢咁啦, 午飯就睇吓電視, 老細今日唔返, 不過就會搖控你做嘢咁啦, 下午食咗個豐富tea先, 因為今晚要等佢地合唱團完咗先有飯食! 返屋企前去萬寧又抬咗兩條片返去, 返到去阿媽就閃啦, 咁我就同柏仲沖涼, 幾日冇同佢沖, 發現佢背脊位紅咗同有點點, 唔滑啦, 係因為阿媽冇開冷氣, 蒸熟咗我隻仲仲! 唯有同佢再搽多D粉等D粒粒退番啦, 真係肉痛死! 沖完涼執吓陣間出去D嘢, 就同柏仲玩吓, 幾開心呀佢! 差不多時間就行出去, 老公未走得, 所以開始唱歌後佢都睇唔到, 不過阿笨唱得咁hea都冇咩好睇, 希望佢到時唱得好D啦! 唱完陸生同程太都未到, 終於嚟埋啦, 但活動仍進行中, 等我地執好家當, 都真係要走啦, 有咩問答遊戲都唔玩啦, 明天仲要一早畫班! 去食嘢時笨元已經想瞓, 食咗陣又唔想食要瞓, 咪由得佢囉, 點知返到去沖涼時嘔喎, 到瞓著左之後又嘔, 好在佢都識落咗床先嘔, 都係抺地啫! 應該係攰得滯啦, 今日真係全日未停過, 嘔完又冇事啦喎! 柏仲食埋奶11點都瞓啦, 我地都係12點左右就瞓, 不過柏仲2點又發夢喊醒, 好在噯一噯都瞓番啫!

 

 

15/5/14

15/5/14   THU   HOT

今朝開咗奶比柏仲先出門口, 留番比老公餵因為夠鐘, 都趕到巴士, 因為41A遲了, 返到去同老師交代咗放學敏瑩公公揍埋子元, 然後就返工啦, 今朝都有咩忙, 因為老細仲未返, 所以都係做吓自己嘢, 午飯後老細返咗嚟, 比哂堆嘢佢簽啦, 跟住做埋D手尾咁, 時間都算過得快, 放工去接番笨元, 上到去佢地仲食緊烏冬, 咪要等佢食埋先囉, 行去撘6號, 等咗勁耐都冇車, 笨元仲要瞓咗, 抱到我死咁滯, 落車真係抱唔郁啦, 拖住佢行, 佢又瞓住嚟行都得, 返去捉佢沖涼醒番哂, 好在琴晚買好餸阿媽可以煮咗先, 咁沖好涼就有得食, 柏仲醒咗就坐吓學行車睇我地食, 阿媽話佢用完架BB車收極都收唔到, 我按吓個制…點解鬆哂GE, 原來爛咗, 嗰吓真係肉都赤埋, 諗住架車仔用到柏仲唔洗坐就算, 咁先抵嘛, 結果都係要買過新, 唉…真係好赤呀, 或者係天意啦, 以前買呢架車仔時有私家車, 所以大架D都冇所謂, 而家冇車, 拖住咁大架車有時又真係好唔方便! 食完飯阿媽就閃啦, 我快手洗埋碗就要同笨元睇功課溫習, 真係想娛樂吓都唔得, 柏仲唔係好願喺床, 同埋佢而家勁愛反身, 放佢喺床仔就搞到張床打風咁, 唯有抱住佢玩吓, 咁一日都冇咩玩過, OK啦! 笨元溫埋書執好嘢陪我睇咗陣電視, 我其實已經勁眼瞓, 琴晚瞓得嗰4個鐘真係唔多掂! 9點半捉咗笨元去瞓, 再入房同柏仲做吓運動, 10點就開奶比佢, 早食嘛所以開咗6安, 飲哂就瞓, 我都好攰啦, 老公10點多先返, 沖埋涼食埋嘢抖咗陣都瞓, 我真係超攰呀!

<柏仲識抺腳仔啦!>

14/5/14

14/5/14   WED   HOT**

今朝如常咁起身焗個包午飯食, 因為琴晚嗰個比笨元食咗! 都準時出到門口啦, 今日班41A又遲咗呢, 返到去都排得後, 好在我都趕到巴士! 買埋早餐返到去, 都係冇咩做啦, 諗吓今晚整咩餸咁, 原來買餸都唔易! 諗諗吓又到食晏啦, 食完hea吓又開工, 不過老細們全部冇返, hea爆, 於是同笨元搞埋個書簿津貼, 份表都幾難填, 不過為咗千幾蚊, 都要填架啦! 放工就去買餸啦, 買兩日餸都幾重手呀, 同埋而家D餸都唔平! 返去第一時間開始煮飯, 但又要同笨元沖咗涼先, 柏仲冇法啦, 唔得閒理住! 煮起餐飯7點幾, 阿媽都有幫手開飯, 食埋洗埋碗沖咗涼先比奶奶走, 咁我可以沖得安心D! 沖好涼後又要幫笨元溫習睇功課, 老公終於都放工返嚟, 同笨元玩咗陣先沖涼, 柏仲就9點多瞓咗, K.O.埋笨元就可以休息, 睇完聽見你的聲音就餵奶, 嗰時先發現柏仲套衫好似同琴日一樣, 莫非今日阿媽冇同佢沖涼, 都探究唔到, 亦唔想咁夜幫佢沖, 唯有做一晚臭豬, 5分鐘唔洗飲哂支奶又瞓番, 不過到4點幾開始發夢醒咗唔肯瞓番, 我比佢玩死咗!