7/5/18

7/5/18   MON   HOT

今朝仲爺又因為見到我揍完子元校車上嚟就喺到扭, 真係好煩呀教極都唔明咁! 快手搞掂出門口仲好啦! 揍咗仲爺返學就閃了, 返到公司都係寫吓日記先, 跟住就開吓會, 聽佢地廢話吓! 跟住就同朋友skype吹水, 大家都有大家的煩惱, 互相呻吓啦! 午飯返咗屋企, 因為我唔記得食血壓藥, 總係覺得唔知點咁, 所以都係返去食藥穩陣啲! 下午全力找工, 個人好灰, 再唔逃離呢到我真係唔掂! 放工返去接笨元, 買埋餸煮飯啦, 到開飯時三催四請先幫手, 真係最乞人憎, 想做死我! 之後還要吸塵抺地, 不枉我教育子元要幫忙, 最終今日只係睇哂功課, 仲爺溫咗書, 子元就冇啦, 我去沖涼前佢已經瞓咗!

6/5/18

6/5/18   SUN   HOT

今日都係忙忙碌碌啦, 不過心情都係唔多好, 一朝早已經唔好! 9點幾先起身, 兩條友係咁睇電視睇機, 叫極都未郁到身, 又係到吵交, 唉…結果我又發顛, 我真係嬲到想死! 終於平息咗落樓啦, 去幸福邨食埋個早餐就各自揍仔學嘢, 我陪仲爺踢波, 老公揍子元打鼓, 咁仲爺踢完波就返去做功課啦, 惡夢開始, 佢今日唔知做咩做得好衰, 仲要又寫錯數學要寫咩字, 到我問到時又已經寫咗一半, 我又顛啦, 梗係啦已經做咗3個鐘, 大家都顛! 最終4點幾先出去食嘢, 都餓過龍啦! 跟住去咗新蒲崗個商場睇九巴展, 有兩樣嘢要排隊, 一個係影巴士司機位, 啱仲爺玩! 另外有個VR Game, 子元一嚟到就排, 但都等足個幾鐘呀! 等到我個人都吽哂, 又遲食嘢唔想咁快再食, 老公又好似要迫我去決定跟住去邊, 我個腦停哂機咩都諗到呀! 跟住又係到話我, 我真係灰到係到流眼淚! 去咗德福其實我都仲唔開心架, 但叫做好番少少, 再去睇吓家品又好啲囉! 最後去super sandwiches食埋晚餐就回家啦!

5/5/18

5/5/18   SAT   HOT

今日長周, 8點前起身出門口, 送咗子元去上英文, 就車埋我返公司, 買個早餐返去食, 都係咁做吓嘢啦! 收工前仲爺上咗嚟, 今日我揍佢去學音樂! 撘得地鐵過去剛好, 仲爺入去上堂我咪周圍行吓囉, 行咗咁耐都只係買咗盒咖哩今晚煮烏冬啫! 接番佢就快手去麥記食嘢啦, 跟住又要過小童報名, 4點多已經上到去, 發現仲爺個NURF已經full了, 不過笨爺的就有, 笨元上咗嚟就可以睇住仲仲, 我才可以安心填表報名, 落去等交錢時同個家長媽媽吹咗一輪水, 好在有個NURF counter喺到服侍啲細路, 差不多5點但又就到我交錢, 子元又要去游水, 放一放手比佢自己行去泳池啦, 好在今日係黃sir, 佢有覆我WhatsApp, 咁就知笨元順利去到泳池, 過咁多條馬路都OK呢! 比埋錢就落樓同老公會合, 去銀行入埋錢, 本來都冇咩, 深哥又打嚟話收到傳票話我地未交NR1, 唉…星期一時打比我咪算囉, 又處理唔到話比我知又點呢, 即係要我擔心多幾日咁解啫! 老公放低我地佢就去踢波啦, 我又冇咩mood同仲爺做功課, 準備吓晚餐咁啦, 7點落去接番子元回來就煮烏冬, 仲仲食得一般, 子元就食鬼埋佢! 洗好嘢吸塵抺地後佢地沖好涼就K.O.仲爺, 子元就要睇avanger2囉! 睇到幾咁夜呀!

4/5/18

4/5/18   FRI   HOT

今朝仲爺食麵包咋, 揍咗佢地返學就返工啦, 今日返去都冇咩, 開吓會咁啦, 但過去開會真係唔好受, 嗰兩條PK當你透明咁架, 你講嘢聽唔到, 回音小姐一講就有反應, 唉….我幾時先找到新工呀, 好灰呀! 午飯後落去寄咗兩封求職信, 一封係我的母校請clerk, 我堅係想佢請到我, 我要返我的母校呀! 下午都係繼續努力啦, 自己有做嘢, 天父會有安排! 放工去畫室接笨元, 今日佢撘咗校車返去仲自己上樓開門, 獨留咗10分鐘阿媽先返到, 嚟緊五年級可能都會咁架啦! 今晚去九龍灣踢, 本來都幾好有個大遊樂場仲爺可以玩, 點知咁啱落雨, 差不多踢完時就要捉番仲爺上車, 條友成日纏住人地爸爸玩, 真係幾唔好意思! 踢完同佢地食埋飯先走, 返去快手沖好涼K.O.哂佢地, 老公泊車唔知泊咗去邊, 初頭我估佢泊去長沙灣, 但原來係諗住泊荔灣時有警察, 咁啱又撞到炮哥, 兩個就等警察走咗再吹吓水咁囉!

5/3/18

3/5/18   THU   HOT

如常咁揍仔返學啦, 仲爺又係慢吞吞, 點樣可以令佢自動自覺呢! 老公見冇脆片就走咗去食早餐, 比佢激死, 咁明早就冇得食豐富早餐架啦! 返到公司先做吓自己嘢, 今日都冇咩公事忙, 可能我真係閒得太耐, 愈來愈唔知自己識做咩! 午飯後都係睇吓電視囉, 下午又努力搵工, 都係向教育界進發, 睇過啲course, 要讀多張cert又真係有啲難度, 所以都係諗admin! 放工返去接笨元, 買埋餸返去煮飯啦, 老公喺到唔係應該更加幫到手GE咩, 點解進度好似仲慢咁GE! 9點多先做好嘢, 同仲仲溫書睇功課後K.O.埋佢, 沖咗涼先再睇笨元的功課, 臨近考試啦唔可以再咁懶, 結果睇佢數學錯哂啦, 又唔睇題目, 喺學校做就貪快, 叫佢返來要覆一次先再比我對又唔聽! 差不多11點終於可以自由……摺埋啲衫咁, 邊睇電視邊做, 跟住再要睇埋星期六去小童報名時可以報啲咩等等!

2/5/18

2/5/18   WED   HOT

今日又要返工囉, 佢兩個都要返學啦, 朝早仲要炒埋飯比子元帶, 真係夠哂忙! 今日仲爺下午才去參觀, 所以朝早老公揍佢入去算, 我就食埋早餐行返公司, 今日唔算有咩趕做, 嘢就點都有啲架啦, 差不多時間開吓會咁, 跟住都係返去做私事啦, 午飯後去入埋張票, 財政上係又出現緊張, 但始終都要面對的, 努力啲啦唔好逃避, 又唔係你錯, 辦法總比困難多! 下午又係找吓工啦, 不過近來都冇咩啱, 可能個天都覺得我未適合找另一份工! 放工返去接笨元啦, 今晚老公又去踢波, 咁佢揍咗仲仲返嚟就閃, 我就煮粉佢地食囉, 我煮緊時兩個又玩到顛, 我間屋又唔係大, 真係唔可以跑架囉, 最終我都係變惡魔鬧咗一餐, 咁仲爺咪坐好睇吓書, 子元咪幫手開吓飯囉, 係要我變身, 真係好乞人憎! 食完飯就一貫做法, 笨元都算合作, 兩個沖好涼我亦打掃完, 叫仲爺寫吓字我就去沖涼, 其實只要控制到, 佢兩個係OK架, 但真係要強勢啲囉! 10點半前K.O.哂佢地, 連子元都對埋功課添啦! 老公11點幾返嚟, 睇多陣電視都瞓啦! 今晚得我一揍二, 唔知點解啲嘢做起上嚟仲順暢咁, 原來陸生好似真係冇咩幫到手咁架!

1/5/18

1/5/18   TUE   HOT**

今日勞動節嘛, 我覺得真係幾夠勞動啦! 朝早買咗9點飛睇戲, 還要送咗仲爺比嫲嫲先, 所以7點幾又要起身啦! 仲爺依依不捨咁, 但我相信佢轉個頭已經唔記得咗! 附近快食埋個早餐就去戲院, 兩個幾鐘好快過, 重點係…原來上集嚟架咋, 做到啲正派死咗一半咁, 即係點呀, 睇完好灰喎! 12點前已經接番仲仲, 佢冇將我交代的功課做好, 我都嬲緊架啦, 老公車咗我地返去後佢攞架車去洗, 咁我就返去睇住佢地囉, 仲爺做功課係要人陪喺隔離, 但我就係要同佢戒囉, 於是我邊摺衫邊用把口控制佢, 又係咁行吓入去, 軟硬兼施啦! 我又放縱吓睇吓電視先, 到差不多3點先同子元溫吓常識, 點都好叫做的起咗心肝去做! 老公洗完車買咗少少嘢返嚟食, 咁食完再溫吓書先, 佢夠鐘就去攞番架車, 今晚子元都要練波, 咁就一齊過去啦! 路上仲爺瞓咗, 老公又找到個地方有標位, 不過就要等, 咁我同子元就落車睇吓有咩食, 等仲爺醒咗就去附近食咗啲嘢再去球場! 早咗過去架嘛, 我就同仲爺去遊樂場玩, 玩咗個幾鐘我真係好攰, 因為要全程陪實架嘛, 玩到7點有多就帶佢過去球場, 然我就去入標, 預佢地都8點幾先走得! 返長沙灣食埋粥就返去沖涼瞓覺, 我今日夠哂攰啦!