31/1/22 MON. COLD WIND
今日真係好攰！心靈上同肉體上都好攰！點解年三十晚都仲係咁，我係咪要忘記下呢啲中國節日，等自己唔使做咁多嘢。今朝都係要湊仲仲去Mandy屋企先再返工，咁踩單車快手手腳腳都就快唔認得！返到去諗住好似上星期咁啦，點知我睇開個妹今日冇返學，咁就安排咗另一個俾我，雖然10點先開工，但呢個亦唔係一個易處理嘅人，佢又遲返喺課室又完全唔俾反應，基本上我冇聽過佢講嘢，原來自閉症係咁！都放break嘅時候，佢去咗一個角落頭坐低，坐咗喺地下就一路唔肯起身，最終要打電話叫佢媽媽來接返佢走，但佢就係咁坐咗喺度成個幾鐘，搞咗我哋好多工作人員。下午嘅時候我就轉咗去炒散，跟咗啲唔使一對一，即係未申請到嗰啲同學，純粹係個課室睇吓佢哋，不過都好挫敗，原來佢哋嗰啲唔想學習嘅，係真係完全唔會上堂，其實咁樣真係好浪費人生，我會覺得原來我嗰兩隻豬已經算唔錯！終於到放學去接返仲爺返屋企，係咁你食啲嘢唞一唞，又要出去接德仔，我真係攰到GG！晚飯後再整埋啲嘢洗埋碗，沖完涼老公又話要打去銀行，但係又搞唔到，總之我就搞到一鑊粥咁搞到我個人好煩好煩好煩！
30/1/22 SUN. COLD
今朝瞓到八點多就醒咗，之後都去做一吓早餐，因為阿哥今日踢12點幾唔使咁早出去，本來我都唔想去球場，老公想問清楚子元嗰對新嘅球隊究竟係點，佢怕問得唔清楚所以係咁叫我一齊出去，佢都車我返嚟。返到嚟同阿媽佢哋視像，佢哋食緊團年飯，都傾咗成個鐘，跟住我就繼續做大掃除，因為得返今日可以做，明天又要返工啦。黃昏嘅時候， Mandy佢哋過嚟一齊玩，食個團年飯，多謝佢呢幾日幫手湊住細佬，近幾個細嘅就喺房玩唔知乜嘢，我哋就開咗套最新嘅蜘蛛俠嚟睇，又係燒腦系列。七點幾八點開飯啦，不過如果真係整得好多，都食唔晒明天我哋繼續食。洗完碗佢哋又繼續玩緊遊戲機，結果玩到10點幾先肯走。
29/1/22 SAT COOL
今日7點未夠就醒咗, 反正都醒咗就起身啦, 因為諗住今日要蒸蘿蔔糕嘛, 本身買咗3條蘿蔔唔夠5斤喎, 最終再出去入吓貨, 又買咗一堆嘢返嚟啦! 買完返嚟好肚餓, 煮嘢食先! 老公同子元去練波, 我就開始整糕, 一整就整咗幾個鐘, 跟住上次成功嗰個食譜, 一樣成功! 只係今年連蝦米都要自家製! 佢地練完買埋samsam回來食, 食完再蒸多陣, 跟住就出去shopping, 好多嘢要買呀! 先去買條返工褲, 跟住又去Lidi shopping, 仲有去買寫揮春物資, 明天大掃除埋就可以寫揮春貼, 然後去咗龍鳳買番少少嘢, 返到屋企都6點, 又冇位泊車, 激死! 老公煮晚餐, 我就做吓公務等等, 差不多9點多先食完, 又好夜啦!
28/1/22 FRI. COLD
好耐冇試過終於到星期五嘅感覺，其實工作嘅時間唔攰，但係來來回回同埋全日要做埋其他嘢就好攰，例如朝頭早要一早準備晒啲嘢，夜晚返到嚟又有其他活動，一係打波一係湊仔，根本冇咩時間，都真係需要啲日子重拾返咁忙碌嘅感覺。咁返平時喺香港都係咁上下，都係朝七晚11冇停㗎啦！今朝照樣揍咗仲仲去Wendy度，我就返工，因為單車踩得越嚟越好，所以都早咗去到目的地！返到去都係準備開工啦今日都係輕輕鬆鬆咁過，午飯忍唔住去飯堂再買啲嘢食，因為一兜菜同一個包，我頂唔到今晚八點。放學準時3點3就閃，3:30返到去，又要即刻執嘢同仲仲去巴士站，同佢先會合去球場，子元就自己搭車去踢波，都算順利！打完波炮哥車我哋返嚟，老公就接子元追嚟，晚飯簡簡單單食頹飯就算！
27/1/22 THU. WARM
今朝都係揍咗仲仲去Mandy屋企先，跟住先至再返學，因為唔使就開門時間，基本上可以預早啲返到學校，咁我就可以唔使咁趕！返到去其實都係9:10先正式開工，因為佢哋係嗰個時間先上堂，我今日都係跟最簡單嗰位同學！真係做個高級伴讀書童！照樣12點去上緊堂嘅時候我去食咗午飯先，咁到佢放飯時我又可以休息吓！午飯後，喺休息室有個同學做緊數，其實只係好簡單嘅數，我唔明點解佢哋咁都唔明，真係要努力啲教仲仲做數先得，唔想佢好似佢哋咁！三點鐘佢又放學啦，等佢上咗車，我就可以攞單車準備隨時拍卡彈閘！今日Chung仲喺Mandy屋企玩耐啲，所以我唔使去接佢，等老公放工先去接佢，我就直接返屋企，車手用咗15分鐘就即刻返到屋企喇，我已經越踩越純熟。返到去休息吓食啲嘢，四點幾又要去買菜接德仔返嚟，都係日常咁煮飯為佢食等佢爸爸來接佢。我就真係可以休息吓因為老公煮飯。飯後洗完碗同仲仲睇功課，發現佢啲數學好多都未做，今次係除數又教起晒火！
26/1/22 WED COLD+
開工大吉! 今日係我開工的第一天, 真係趕到GG, 重點唔係工作攰, 係來回路程攰, 因為我要先踩單車揍仲仲去比Mandy先, 然後再踩返去學校, 要由Mandy嗰到踩過去又要多另外10分鐘, 我真係腳軟! 不過最重要係準時返到去! 全新一日的開始, 先去reception登記吓影吓職員證, 然後去上safe guidance lesson, 跟住就同HR見埋面問吓嘢講吓嘢等等! 最後去埋我工作部門等安排, 今日我負責跟住一個只係disable同學, 有另一個LSA同我parter咁照顧, 其實...個工作係幾悶, 只係陪住佢上堂, 轉堂就跟住佢, 午飯可以去飯堂買嘢食, 價錢亦唔貴! 到個女同學放飯, 我地都真係可以休息吓, 學埋點樣上網睇email等等, 就自由一陣! 下午2:15才上一堂, 仲要係類似tutor嗰啲, 又係hea, 到3點就走得, 送到佢去reception, 基本上就係等拍卡, 諗住拍完仲有時間慢慢攞單車, 最終係NO! 因為到3:15啲學生就衝出嚟, 人山人海咁, 幾辛苦先推到架車出去, 好努力踩過去接仔, 今日要學結他, 快手返去等我抖啖氣又要揍佢出去, 再去接德仔, 去超市買埋嘢, 然後就去接番仲仲回家! 返到嚟好在有佢地揍住先, 我仲要煮飯仔! 之後除咗食飯洗碗, 都係休息時間, 我個肉體真係好攰!
25/1/22. TUE. COLD
今朝都係一早起身，搞掂阿哥返學，然後我哋三個就去搵司事頭食早餐，因為今日我要去CentralL London警署登記，所以老公一早請咗假，估唔到仲仲又要網課，結果要湊埋佢一齊去。同事頭食完早餐，攞埋子元部整好嘅電腦，就返屋企收拾下先，因為2:45先至登記，唔使咁早出去。預算要一個鐘頭車，都算順利去到停車場，但只可以泊到兩個鐘，計返唔夠時間，好在隔離仲有另一個停車場，又係可以泊兩個鐘，咁就先喺呢個等到差不多兩點，就拍去另一個停車場，然後行過去警署。都係要行半個鐘左右，所以2:30左右就去到，只可以我入去，最多帶埋細佬。入到去都係等幾個就輪到我，登記過程都好快，因為我半年前已經喺網上交晒資料，真係唔記得晒啦！好簡單咁對完資料印好份嘢簽埋就走得。行返去攞車，都已經三點幾，塞下車咁返到Ealing已經4:45，快手接埋德仔就返屋企，因為老公話帶子元去買過對釘boot，順手幫我買埋單車個腳雞，因為聽日正式要返工啊，真係好驚喜！估唔到佢哋咁急等人用，由interview到正式返工，都只係12日。不過仲仲冇得返學，初頭都唔知點安排，好在Mandy肯幫我頂，一早可以揍仲仲去佢屋企，等我放工先去接返。所以老公叫我請佢今個星期六過嚟食餐飯當多謝！
24/1/22 MON COLD
今朝第一次試同仲仲一齊踩單車返學, 算係成功啦, 都冇計用幾多時間, 總之套卡通一做完就出門口, 但開門前已經到學校, 咁而家唔洗趕就同佢一齊入學校啦, 8:45喺學校門口出發, 試吓踩去WKS要用幾耐, 睇埋個路面情況, 最終用咗17分鐘, 喺9:02到學校, 咁即係如果我一開門就放低仲仲入學校我即閃係趕得切9點返到學, good! 過到咁遠冇理由就咁回程, 所以我就去咗日超嗰邊買咗3個飯團先回程, 去埋買菜買蝦! 10點未夠返到屋企, 多架單車感覺上自己可以去的地方多咗, 非常好! 返到嚟又要大清潔啦, 仲有摺衫洗衫咁, 12點幾就煮埋午餐食, 差不多放學時間收到whatsapps話明天起drayton green明天起又停課一星期, 唉! 又嚟! 明天仲要去警署報到, 即係要帶埋佢去! 回家後預備埋德仔啲晚飯又要去接佢, 子元話又有得玩玩具啦! 老公OT埋6點多返到嚟, 等德仔閃咗就煮晚飯啦!
23/1/22 SUN COLD
今日瞓到9點多先起身, 子元比賽踢12點, 所以唔洗咁早出去, 蒸埋啲叉燒包呀蝦餃燒賣咁, 11點幾佢地出門口去球場, 我地都出去練單車啦, 先喺行人路試一圈先, 然後就佢行前我行後喺馬路試一圈, 最後就係佢跟我行一圈, 然後就直接踩過去Drayton Green試試, 算係成功架啦! 比佢喺公園玩, 順手打埋電話比嫲嫲, 都吹咗好一段時間, 手都凍僵! 喺時候回程, 試吓計時, 回程用咗10分鐘, 咁就預到要預幾多時間返學啦! 其實同平時行過去差不多啦, 又要上斜落地推車, 係咁上吓! 返到去就到同阿媽傾電話, 等老公佢地回來煮午餐食, 咁我又再出去超市買吓嘢, 回來就包雲吞包燒賣, 咁就消磨咗一日啦! 7點幾叫老公起身煮飯, 食得嚟都9點幾先洗完碗, 又話要食埋芝麻糊湯丸咁, 不過呢款芝麻糊一般, 下次都係要買番上次食嗰隻!
21/1/22 FRI COLD
今日揍完仲仲返學就去買餸, 返到屋企做吓公事先, 找找下星期去警署報道要帶咩文件, 跟住又覆吓電郵, 之前請我做SMSA間學校終於覆電郵, 但已經太遲啦, 或者呢啲真係天意, 我打電話去學校同佢講番因為有另一份工請我, 問佢應該點做, 佢話你就咁而家同我講咗就得架啦, 又話我有另一份更好的offer更係去做另一份, SMSA返得嗰一陣! 而家希望嗰邊快啲收到DBS check, 咁我就可以快啲開工! 12點幾食埋個午餐又休息吓, 然後整定晚飯啲嘢, 因為今日要帶仲仲去打籃球嘛, 子元就等老公揍去試腳! 喺球場同另一家香港人吹吓水咁, 但吹落其實麻麻地啱嘴形, 所以都冇諗住深交, 炮哥嚟到就同番佢吹, 等佢地打完就走啦, 炮哥車我地返去再攞埋子元部電腦去整, 我就馬上煮飯, 子元佢地都差不多回來! 食完飯睇埋電視咁, 明天又唔洗返學, 10點幾11點佢地先去瞓!
19/1/22 WED COLD
今日如常揍仔返學啦, 返到嚟做埋啲公務, send埋email文件去學校嗰邊就係時候面對架單車! 始終都要試, 所以首先試咗喺行人路踩先, 圍住屋企踩咗一圈, 開始試吓落馬路, 有對頭車時其實都驚, 要停埋一邊, 慢慢試咗兩圈, 就試吓向Waitrose嗰邊行, 然後轉埋落菜檔條路嗰邊先回頭, 感覺已經好好多, 亦冇咁驚! 先返屋企休息吓, 再睇多次去麵包店條路, 仲有要整番乾個set位, 唔知係咪佢地一直放室外, 個set位墊濕哂, 唯有整番乾佢先再出車! 挑戰去Lammas Park嗰邊間日式麵包店, google map show出來話9分鐘去到, 最終我應該用咗14分鐘左右, 始於有啲位驚...出唔到車, 唯有行行人路, 然後就直接過到去買麵包, 估唔到佢真係淨得唔多, 所以我每款要咗一個, 都買咗差不多9磅, 慶祝第一次出車成功呢! 回程時信心大咗, 真係做到9分鐘返到嚟, 成功! 不過踩單車真係幾用力氣, 喘哂氣呢我! 完成任務可以整午餐食啦, 跟住休息吓夠鐘就去接仲仲放學, 返嚟睇陣電視又要去學音樂, 我就去超市入吓貨! 老公點幾六點回來, 又係時候煮飯食, 8點有賓仔對曼聯呢, 最終輸3-1!
17/1/22 MON COLD
今日佢地3個都返哂工返哂學啦, 我可以自由活動, 先係揍仲返學啦, 跟住回家後就先send email去問請我嗰間學校, 睇吓幾時可以快啲交埋啲文件, 快啲有得開工! 跟住做清潔, 做家務, 實在係太多日冇理, 所以都幾dirty吓, 努力完已經12點多, 快啲整午餐食, 但發現冇熱水喎, 暖爐又唔著, 同老公講完試咗啲方法都係唔得, 所以都係打去安裝嗰到問, 當然冇咁快覆啦, 唯有等! 之後再問老公, 佢話可能冇水入, 最終試咗將暖爐較到好低溫, 等有水入到去, 終於有番熱水啦, yeah! 去接細佬放學, 回來都係hea吓啦, 又唔洗揍德德啦, 佢地爸媽中咗要隔離, 德仔都冇得返學! 等老公回來差不多又要煮飯啦, 食完就睇電視囉, 佢地係咁睇男排女將呢, 應該要睇完先肯罷休!
15/1/22 SAT. COLD
今日要去遠地方，因為子元去到東倫敦嗰邊試腳，所以九點幾就要出門口，要揸個幾鐘車先至到，仲要唔識路，真係夠晒刺激。11點終於去到球場，交低佢比教練，我哋就去咗附近行街。其實都係好大嗰啲parking mall，真係大得好緊要，不過可以叉電都OK啦。行咗運動舖，為配合嚟緊有㗎新單車，都要買定個頭盔，見佢半價就入市。跟住你就要去睇仲爺啲玩具，行得嚟都差不多又要返去接返子元，遇着塞車，搞到唔可以睇吓佢踢成點，因為去到佢啱啱已經出嚟。本來諗住去飲茶，點知條路又封咗又勁塞車，最終去咗食IKEA，因為已經肚餓到一個點，終於食飽行咗陣買咗少少野，淨係排隊俾錢都排左半個鐘。跟住又揸過幾鐘車先至返到屋企，放低佢哋兩個去買少少餸，跟住就返嚟自己整晚餐啦，食飽我已經好攰，淨係搭車其實都好攰，因為要係咁留意住啲路，領航員都好辛苦。
14/1/22 FRI COLD
今日老公要返工子元要返學, 咁我就同仲爺喺屋企啦, 照教佢上堂啲嘢, 11點就in學校份工, 其實都覺得自己勁冇準備, 差不多連個職位喺咩都唔記得, 但佢問咩就照答照in, 都搞咗半個鐘, 見完都覺得自己見得差! 咁都冇放喺心, 照樣教仲爺做咩啲嘢就煮午餐, 本來諗住同仲仲去嗰間新發現的麵包店買包, 但最終佢唔肯去就自啦, 繼續睇吓電視咁, 點幾突然收到電話學校打嚟話請我, 真係喜出望外, 完全估唔到係咩玩法! 不過一日未落實真係去返工都真係未夠踏實, 但又算係踏出咗一大步! 等笨元返到就要準備出去打籃球, 今日德仔又冇返學我唔洗接, 可以跟埋佢地去球場, 坐一個鐘巴士都真係幾攰, 等佢地打完就去咗broadway食意大利嘢, 都算抵食架啦以呢到嚟計, 食完咪回家找明天子元去試腳嗰頭有咩玩囉, 佢要踢3個鐘喎!
12/1/22 TUE COLD
今日都係咁喺屋企同仲爺困獸鬥啦, 不過比起琴日大概知道咗應該點做, 相對地易過咗架啦! 照樣起身趕子元返學後就到仲爺要起身上堂, 不過都係自己睇自己做啫, 但佢今日有得同老師視像, 所以12點幾佢已經催我整午餐比佢, 1點就同老師視像, 不過原來係會教一次佢地今日post出來嗰啲嘢, 咁佢已經做哂, 冇咩好做! 差不多4點又喺時候佢出去學音樂, 然後又要去接德仔, 好在今日有佢地幫手, 德仔唔知係咪都仲係病病地, 勁痴身囉, 加上又冇胃口咁, 食得唔多再係咁要我抱! 搞掂佢我又要煮飯啦, 不過老公喺到就交比佢大廚煮啦, 反正我都prepare好哂, 都係蒸吓餸啫, 食完飯又係睇吓膠戰啦, 真係好好笑, 佢地有時笑到好大聲囉, 誇張!
11/1/22 TUE RAIN
今日都係要做埋老師嗰份啦, 不過都好啦, 起碼知道仲爺啲乘數表唔記得哂, 等我print番比佢背吓先掂! 成朝差不多就係比哂佢喺到教功課, 又收到電話上次間學校叫我去見工, 但星期五我點見啫, 仲爺喺屋企, 好在最後佢肯改下星期一! 午飯後睇吓電視咁, 但仲爺係咁阻住哂, 我都知佢好悶但都幫唔到佢啲咩! 預備吓今晚晚飯的蘿蔔牛腩, 要煮定先啦, 陣間唔夠時間做! 等子元回來換好衫, 差不多要揍佢地出去巴士站會合, 第一次試子元仲爺+勤少自己撘一個鐘巴士去打籃球, 所以我同loletta各自送佢地上同一架巴士一齊過去, 然後老公放工直接去球場接應, 算係成功啦, 可以喺apps睇住佢去到邊都OK, 平時佢自己出入其實我一向都放心, 都大個仔架啦要慢慢學識! 不過今次要揍埋仲仲, 但見佢都睇住個細佬, 應該冇問題! 咁我返屋企清一清潔吓間屋就出去揍德仔啦, 得我同佢兩個你眼望我眼係有啲悶架啦, 但都冇法啦啲哥哥去哂wet! 不過今日食飯食得一般可能仲病病地掛, 同埋好似喺學校食得好飽喎, 總之佢父母唔介意就得, 6點幾佢阿爸嚟接番佢我就可以煮飯啦, 啱啱好佢地返嚟沖埋涼就開得飯! 食完飯咪又喺到翻睇膠戰囉, 真係好好笑, 睇幾多次都好睇!
10/1/22 MON COLD
今日叫做回復正常番少少, 但仲爺又唔洗返學校, 因為老師要自我隔離, 只可網課! 老公就一早出咗門口, 子元就有啲趕, 見到6分鐘有車, 好在佢都跑得切去巴士站, 不過啲車好難估, 有時又早有時又delay咁! 到仲爺網課啦, 原來唔係好似香港咁上, 而係upload咗啲嘢比你上網做, 咁即係我又要伴住佢啦, 好在都唔算有咩忙, 只係唔可以出去囉, 午餐食埋啲廚餘, 我只想睇吓電視hea吓, 等子元回來我就可以出去買埋呢幾日啲餸, 最緊要有奶, 咁我先可以沖咖啡, 今日冇飲, 下午就攰到瞓鬼咗! 因為德仔病咗今日冇返托兒所, 咁我就冇工開啦, 咪早啲煮飯食囉!
9/1/22 SUN. COLD
今日冇咩特別，老公帶子元去比賽，我就同仲仲喺屋企，食完早餐開電視睇，睇到佢哋返嚟！跟住到阿妹打電話嚟因為佢哋同阿媽食生日飯，所以開視像，傾咗一輪，我哋差不多又要準備出去，食午飯同埋買野，點知原來留咗件外套喺球場，咪諗住返去搵囉，但都搵唔到，我就喺group問吓，原來阿Sir攞走咗，下星期先俾返佢。跟住就去咗Broadway 食午餐同埋買仲仲嘅泳褲，不過今個星期都用唔到，因為三年級啲老師全部都要隔離，搞到要上網課，幾經辛苦我先至問到仲仲過Google Classroom究竟係點樣login！買埋食物返屋企，跟住就打咗一輪機，老公煮晚飯，食完大家都早啲休息啦，唔使返工返學咩！
7/1/22 FRI COLD
今日都係凍凍地架啦, 只係冇琴日咁凍啫, 只係捉仲爺起身返學, 本來想去超市買埋嘢, 但都係覺得凍, 快啲返屋企先, 完全唔理嗰兩條友, 鍾意幾時起身就幾時啦, 我有我做自己要做的事, 11點幾出去藥房攞埋藥, 再去Acton嗰邊食拉麵, 真係好好味個湯底! 然後就係去超市買埋今晚啲餸, 回來都要預備啦, 因為仲爺放學返來差不多就要出門口, 今日老公試吓跟住佢地撘一次巴士, 跟住我4點幾就要去接德德, 因為今日得我一個人睇住冇小幫手, 所以遲少少又要全程陪住佢玩, 不過一個有一個揍住的揍法, 單手一樣可以煮好飯仔, 不過今日6點幾佢爸爸先過到嚟接佢, 搞到我都冇賺! 等佢閃咗我就開始煮飯, 今日煮簡單蒸嘢同煲雞湯烚菜啫, 所以都好快手! 晚飯後又因為雪櫃內食物問題引起誤會爭執, 真係好煩, 其實間屋而家真係幾大, 老遠點知你地講咩啫, 啲嘢喺雪櫃有本事就食到架啦! 問咩鬼啫!
5/1/22 WED COLD
今日是比較特別的一日, 因為我要去做差不多一日的first aid training, 所以要子元揍仲仲返放學, 老公就車我去學校, 咁我就唔洗撘大半個鐘巴士, 到時日日返先再算! 趕得切8點半去到學校, 先交咗文件, 雖然唔夠但都可以再補電郵去搞! 差不多時間就去上堂, 原來係學校的其他人都會一齊上, first aid好在廿年前上過, 只係而家變咗英文版咁去上啫, 上咗個幾鐘有得放break, 其他職員都好好, 帶我地去staff room, 比我地飲吓茶休息吓, 更加加深咗我喜歡學校的工作環境呢! 上到12點有得放飯啦, 原來有埋飯食, 真係好驚喜, 雖然都只係pizza同千層麵咁簡簡單單, 但都已經好好! 休息完下午上的部份比較難, 因為好多生字, 搞到我要喺咁查字典先明, 最後做埋test, 10題中8題已經pass, 咁我都算叻真係中夠8題, 另外兩題係唔太明題目所以唔識, 咁都夠用啦! 叫老公嚟接我, 去超市買埋餸再去接埋德仔就回家, 又要整飯又要快速清潔一吓, 好在可以叫老公煮晚飯啫! 好耐未試過咁忙, 完全醒唔起我喺香港的日子係點過!
