31/7/22

 31/7/22     SUN.    HOT

今朝8點幾就起身啦，因為買咗飛10點半睇雷神，為免自己睇唔明，都係劇透咗先穩陣，去到又要買popcorn 咁，入到場仲要睇一輪廣告預告咁，又唔會睇唔切開頭，其實大致上都睇明哂，可能劇透咗又好啲！睇完就落樓下food court 食嘢順手打埋比阿媽傾咗陣。去幫阿哥買埋波褲同波鞋就回程，因為子元要練波，仲仲又一齊去，咁我可以專心做家務，仲有要去買餸呢，做好哂一休息嗰吓佢地就返，等老公煮晚餐，係窩蛋牛肉飯呢，但我覺得一般好味。

30/7/22

 30/7/22     SAT     WARM

今朝約咗10點去睇新嗰間屋, 因為想再睇清楚啲, 難得個agent咁快安排到就去睇埋先囉, 主力都係老公睇架啦, 我都係幫吓眼咁解啫, 最後睇埋花園嗰邊, 總之諗好有咩再問律師啦! 11點幾返去接埋子元再去補習, 我地喺附近食埋午餐就去轉窮人四寶行吓, 都有啲收穫! 接番子元我地就返屋企, Daddy就帶佢去踢波, 我同仲爺喺屋企都係無所事事, 不過我就叫做完成咗下星期旅行個plan啦, send埋比炮哥佢地, 晚飯等老公回來煮卡邦尼意粉, 明天一早又去睇雷神, 早啲瞓!

29/7/22

 29/7/22.    FRI.    WARM+

今日瞓到八點就起身，要整吞拿魚包做早餐嗎，琴日買咗日本麵包，真係令人好懷念嘅味道，以前都唔係咁鍾意食麵包做早餐，但間中食返啲咁有港式味道嘅麵包真係幾好！食完都係睇吓電視開電腦做吓嘢，律師話可以直接約地產鋪睇吓可唔可以去檢查下間屋，人哋真係好快覆喎，仲約咗聽日即刻去睇！午飯簡單地食咗肉片河就算啦，然後都係上下網睇吓資料，仲有就係搵吓下星期五南下旅行有啲咩景點，咁又一日啦！今日德仔好好笑，爸爸來接佢嘅時候，佢跟住仲仲跑咗出去，行咗一個街口，平時鐘鐘就會自己返嚟，佢就跟爸爸繼續行，點知今日佢唔肯跟爸爸行要跟重重返嚟，真係好好笑之後佢爸爸要夾硬抱佢走，佢仲喊到拆天咁！晚飯後沖完涼我又有按摩服務啦，呢個role play遊戲幾好我幾鍾意！

28/7/22

 28/7/22     THU     COOL

今朝都係瞓到8點多起身啦, 整咗簡單早餐食咋, 然後就開始再睇吓電郵, 再研究吓律師覆咗咩咁啦, 11點Broker打嚟問埋啲問題買埋保險, 我就踩單車出去日本鋪買麵包, 除咗買咗4個散裝外仲買咗袋軟綿綿的方包, 聽日就可以用嚟做早餐啦! 跟住再去超市買埋午餐同晚餐的材料就返屋企, 今日午餐食粥同炒麵, 仲仲都話好好味! 之後都係好努力咁睇文件啦, 仲仲就好努力咁打機, 不過佢都有做睇書同數學! 夠鐘就出去揍德德, 返嚟之後佢地又玩到顛哂! 我就煮飯比德仔食, 老公就負貴晚餐啦! 不過今日有個唔好的消息, 就係Mirror演唱會發生意外, 有dancer比高空掉下的mon掟中, 都好大件事, 基本上網上瘋傳, 希望個人冇事啦! 晚上仲仲又幫我做VIP按摩, 真係好搞笑, 佢整哂啲道具, 玩得好認真!

27/7/22

 27/7/22     WED.    COOL

今日繼續無聊地過日子！8點多起身整早餐，今日整火腿通心粉，仲仲話想食嘛！然後都係係咁睇電視，真係好嘥時間，不過又唔知做咩好，不過都有重重重溫下中文啊英文啊數學啊，都叫做有做過下野，午飯好求其整咗Pizza同煮麵就算！然後繼續睇電視，今日仲仲要學結他，湊咗佢出去之後，等佢放學時，喺音樂店門口見到有一間香港人，同佢哋傾咗一陣交換咗聯絡咁啦！返到屋企就整晚餐比德食，仲爺就同佢放電，然後老左返到屋公就煮晚餐，一日又差不多完啦！

26/7/22

 26/7/22      TUE.    COOL

今日瞓到八點幾先至醒，佢哋仲衰唔叫都唔起身，子元瞓到九點幾添！食完早餐冇咩做，就開電視嚟睇吓等我暑假生活應該係咁嘅，不過仲唔中都要跟時間表做吓中英數，如果唔係放完個暑假咩都唔記得晒！中午出去買材料煮午餐，食完繼續睇電視，真係好頹廢嘅生活，仲仲有係咁叫我玩天天玩樂園，臨尾仲要激親我！出去湊左德德返嚟，整埋野比佢食，佢同仲仲兩個就玩到癲咗咁，晚餐食炸髀飯，因為食完就出去Ealing broadway嗰邊草地有個音樂節，不過見佢係好低嘅音樂節，我覺得有啲悶，但仲仲就睇得好開心！

25/7/22

 25/7/22     MON.    COOL

今日8:00先至起身，因為10點要去GP做檢查，所以起身整完早餐食，摺埋啲衫就差不多出門口！最終選擇踩單車過去，其實都唔係第一次做子宮頸檢查，不過就第一次喺英國做，相對地比香港嘅溫柔喎，基本上一去到就上房問D問題然後就做全程都唔使15分鐘完成，搞掂就走得，咁就去咗超市買下野，返屋企放低咗再落去Waiko買遮住後院雜物嗰塊帆布，然後返嚟叫大寶細寶一齊幫手執好咗個後院，換番塊新嘅帆布！整完都已經12點幾，又要煮午餐啦，都係將琴日用剩嘅物資整埋炒意粉同埋靸菜比佢哋食，然後打電話俾婆婆同嫲嫲傾吓電話，跟住就睇吓電視休息吓，差不多時間就落去湊得得，然後就煮晚餐俾佢食，上次空完佢之後，他出食嘢都乖咗好多！老公返嚟就煮晚餐啦，然後都係咁樣過！

24/7/22

 24/7/22     SUN     HOT

今日plan咗去沙灘玩, 或者應該叫做湖灘, 總之就有得玩水玩沙啦, 約埋張家一齊玩, 因為子元3點幾要踢波, 所以一早就去, 都係好事嚟, 因為早啲去冇咁多人呀! 個湖灘真係好靚, 正宗湖光山色! set好嘢啲細就出去玩啦, 得Letty冇落水, 大人就吹吓水啦, 其實個場都幾好玩, 仲爺最開心, 又有玩水設施同遊樂場, 玩到12點幾開始收拾走啦, 仲喺花田個位同仲爺影吓相咁啦, 然後就去咗事頭想去嗰間餐廳食, 性價比高呀, 因為叫主菜又可以自助沙律吧, 汽水又可以refill, 仲要好好食喎! 食完返屋企先, 然後到子元去踢波, 我返嚟洗番啲衫呀, 做埋清潔等等, 5點幾出去攞埋個龍門, 因為見有人free出嚟嘛! 老公去球場接番子元, 我就開始send吓email問律師, 點都要開始做架啦! 佢地返嚟沖哂涼, 8點幾先食晚餐, 因為午餐太飽啦! 

23/7/22

 23/7/22     SAT     WARM

今朝7點幾就醒咗, 咁hea到8點幾起身煮早餐, 食完諗住出去龍鳳買嘢, 點知叫極都未出得門口, 叫子元執嘢又執極都唔明咁, 佢話原來唔知我地要去龍鳳, 咁你成日係喺房梗係咩都唔知啦! 終於出到門口去買嘢, 都算買到應該要買架啦, 仲買咗料包餃子! 揍咗哥哥去補習就返屋企, 執貨時要放麵嘛, 諗住叫老公上番實廚房個層架, 點知仲倒塌咗, 但因為趕住要出去接子元, 整唔切要等佢地踢完波返嚟先整, 咁我順手執吓啲嘢換吓位唔好放咁多喺個架囉! 跟住掛住睇電視因為明珠930做明日之後, 正! 都有做吓嘢, 摺咗衫整料包餃子, 等老公回來7點幾, 仲要佢沖埋涼先整牛扒, 所以都8點幾先有得食, 之後又要執明天去沙灘啲嘢, 仲爺最開心啦, 話想去沙灘就有得去!

22/7/22

 22/7/22      FRI.    WARM

今日嘅主要任務都係睇文件啦，所以基本上係冇出過街！朝早六點幾就比街外面嘅聲嘈醒咗，都唔瞓唔番！所以睇幾睇到七點幾八點就起身啦，整咗早餐食完，仲仲話佢想玩紋身，就同佢用筆劃上去，佢損咗啲圖畫俾我畫，我覺得自己都畫得幾靚！之後就開始睇文件，但因為上網係咁斷線，我Google Translate唔到，所以都唔係睇得好快，加上其實真係好難明，睇完都好似冇睇過咁，唯有繼續努力！11點幾去煮個午餐先，因為子元約咗同學出去玩，佢一點就出門口，咁食埋午飯先走呀嘛！下午都開始放慢速度，又要睇埋I swim大結局呢！之後都係安排吓今晚出去Web，因為要早啲送德仔走，又要去接埋事頭，然後去籃球場會合，再一齊去食日本嘢！呢間日本嘢真係好有水準，果然一分錢一分貨！傾緊暑假去邊，見到其中一個地點係Brighton，舅父仔咪喺嗰頭囉，佢哋講開話酒店好貴，我又好無謂咁話舅父嗰度有兩間房喎，我哋如果去住咪可以慳返酒店錢，咁就即刻WhatsApp問吓啦，最終就定實咗8月5號落Brighton 玩！

21/7/22

 21/7/22     THU     WARM

今日子元仲要返學, 所以都係要較鬧鐘叫佢起身, 廢事最後一日先遲到! 跟住差不多我都起身啦, 食完早餐就同仲爺一齊睇番I SWIM, 咁今日到電視播時就可以直接睇, 邊睇邊摺埋衫, 然後就要開始睇吓文件, 不停google translate啦, 睇吓停吓咁其實睇咗好多又唔係, 明天繼續啦! 等子元放學返嚟就煮埋午餐一齊食, 然後都係睇吓電視又睇吓文件啦, 4點幾出去買啲餸再接埋德仔回來, 今日比我喝完食飯咪乖乖地囉! 晚飯後都係咁啦, 放假日子就係留喺屋企多, 反正都冇咩地方好去!

20/7/22

 20/7/22      WED     WARM

今日開始放暑假啦, 不過都係要一早起身, 因為兩個仲要返學, 只係可以行路揍仲仲返學咁解, 今日仲有summer concert, 都係睇佢地唱歌跳舞, 我地啲家長係到傾偈吹水囉, 不過都表演到11點多, 去超市買咗啲菜咁就返屋企, 抖一陣就煮午餐自己食啦, 因為1:30又要去揍仲仲放學, 比佢去公園玩到3點先走, 反正返屋企都冇咩做就由得佢玩啦! 返屋企後見子元仲未返番學校, 諗住佢都趕唔切去練波, 但原來話今日又應該唔洗練, 其實都好因為要去到倫敦嗰邊仲要轉三程地鐵, 我自己都冇信心何妨佢自己去, 不過老公又係到話子元啲態度喎, 其實佢都要明個仔而家開始唔鍾意佢, 覺得佢自己又做唔到又要人做, 冇說服力! 佢自己都要留意吓! 揍仲仲去結他後又要揍埋德仔, 今日條友仔都係唔多食飯, 梗係啦個鼻都透唔到氣要用個口點食嘢呀! 老公返咗嚟我仲有啲嬲佢對子元的態度, 所以我都西佢面架, 西咗先再算! 

19/7/22

 19/7/22    TUE.    SUPER HOT

返埋今日終於真係可以放假啦！朝早湊左仲早返去我就返學校，但其實今日都冇咩做，完全係等時間過喎，放飯嘅時候我去咗日本譜買壽司同便當，仲有今晚整冷麵嘅材料，原來喺學校踩過去又唔算好遠喎，只係好曬！買完返去食完午飯基本上大家就開始吹水，因為得返我哋四個女士，所以就傾咗兩個鐘頭計，夠鐘就放工，之前仲影返張相交換埋電話，做咗咁耐嘢大家都冇彼此嘅電話真係搞笑！去學校接完重重就馬上返屋企啦，因為真係好熱，老公公司仲好笑，因為係咁跳fuse做唔到嘢，所以提早比佢哋放工！休息緊嘅時候，阿哥打嚟話想借Wi-Fi用，梗係冇問題啦咪俾佢照入嚟囉反正我都開晒門，然後我哋仲出咗去買材料整冷麵然後抽埋德，好心諗住整冷麵彼得仔食，點知佢又唔係好鍾意，唔理咁多啦焗佢食晒佢就算！等佢哋走咗我就開始整晚餐，原來整冷麵好麻煩，所有材料都要變成絲，然後啲面淥熟咗之後又要用冰整凍佢，費事失事，間中食一次算喇！

18/7/22

 18/7/22     MON     VERY HOT

 今朝其實真係唔算好熱, 但到咗下午就真係頂唔順啦! 今日冇學生冇咩做, 所謂的training其實都係做吓啲無謂嘢, 邊有人得閒train我地, 咁做文件嘢對我嚟講都係easy job, 只要知道咗點做就得! 到午飯時候, 就出咗去一齊買嘢食, 但都係去油站買, 好貴呀! 明天都係去買飯團算! 下午其實我得番好少要做, 所以跟佢地吹吓水咁, 話咁快就走得, 快啲接埋仲仲返屋企, 好熱呀! 入到屋涼好多喎, 真奇怪! 可以抖夠先去揍德, 直情叫埋老公返嚟車我地去接佢算, 我完全唔想行! 返嚟之後就照煮嘢比佢食啦, 等佢地嚟接咗佢就睇吓電郵, 但律師send嚟的我完全睇唔明, 要啲時間消化, 好在嚟緊放暑假有時間去做! 晚飯後就算食哂西瓜都熱, 捱多日就涼番架啦!

17/7/22

 17/7/22     SUN     HOT

今日本來諗住去龍鳳買嘢, 但因為起身食得早餐嚟都差不多11點, 然後又有金像獎睇, 所以都係唔去啦, 出去買嘢返嚟食就算, 老公睇完哂先去球場, 所以子元就自己撘巴士過球場, 練到6點幾返嚟, 我就做家務啦, 吸塵抺地摺埋衫, 預備吓晚餐啲餸等老公煮! 邊食邊睇埋I SWIM, 已經追貼咗要等下星期先有得睇! 洗碗沖埋涼差不多又要休息, 因為明天係繼續要返工, 返多兩日咁啦!

16/7/22

 16/7/22.    SAT.    HOT

最好都係可以瞓到自然醒，起身等老公煮早餐食完，就出去Costco 買嘢，主要買啲消暑嘢，西瓜等等，再揍子元去補習，去咗食日本嘢後又要去broadway攞個磅去退番，再返屋放低啲貨，老公又要返去接子元，然後去練波，因為要帶埋仲仲出去，但佢又未換衫，所以唯有再返嚟接佢，佢哋出晒去我就開始將買返嚟嘅嘢放好，跟住又同家寶講咗成個鐘頭電話，佢話佢家姐都會過嚟，所以佢諗緊係咪都一齊！傾完電話就出去超市買冰，星期一已有月浪，整定個冷風機嘛，咁就梗係要冰啦！六點幾佢哋先返到嚟，晚飯整魚香茄子同埋煲咗花膠雞湯，魚香茄子始終都係要炸先至好味！食飯時睇i swim，結果睇到10:00先洗碗！

15/7/22

 15/7/22     FRI     HOT

今日係最後的學生返學日, 下星期兩日都係返去做training, 好在仲爺佢地繼續要返學, 咁就唔怕冇人揍住佢! 揍咗仲仲返學, 我返到去攞齊嘢等咗陣Bella就返, 頭兩堂都要上, 但又係只係睇戲, 完全無聊啦, 第二堂PE仲好笑, 因為個老師要去草地幫手收帳篷, 就帶哂啲學生過去由後佢地hea就算! 小息後又要排隊去sport hall頒豬肉獎, 最後就返課室開大食會, 好地道咁全部都係啲薯片cup cake咁! 我初頭都唔敢食, 只係幫手set吓嘢, 係班主任叫我一齊食我先敢食咋, 仲攞咗啲返去比仲仲佢食添! 差不多12點散水架啦, Bella攞住盆花出嚟, 原來係送比我架, 嗰吓真係諗唔到, 佢係多謝我呢幾個月照顧仲送定張生日卡比我, 佢記得我8月生日呢! 老實講真係超感動, 一個自閉症小朋友對你信任, 肯同你傾偈, 仲會送禮物多謝你, 呢種滿足感真係從未試過呢, 錢都買唔到! 所以攞住盆花返AL1時有少少曬吓命咁啦, 再放埋上FB! 12:45到職員們去front garden食午餐聚會, 頒吓禮比要走的老師啦, 我呢啲日常對話就聽得六成左右, 所以有時都未必知咩事, 食完嘢就回去等放工, 因為要等總部宣布先可以走, 我地收咗全日人工嘛, 最終2:40左右走得, 我仲要抬埋棵花返去呢, 好在單車都擺到! 返去放低嘢仲可以去接仲仲, 老公今日又早放可以車佢去打籃球, 咁我就出去買埋餸, 再去撞德仔, 返嚟有子元睇住我就可以整飯仔同晚餐, 今晚又係食肉醬意粉, 幾好諗少日! 沖完涼摺衫時搵埋I SWIM睇, 真係好好笑, 要追貼下星期放假後可以睇即時呢!

14/7/22

 14/7/22     THU.    HOT

今日都算過得幾好，順利踩到單車返學返工，Bella準時返學全日都好正常，因為都唔洗教書，個個老師都係睇戲玩吓遊戲就算，只係等到點幾鐘先有飯食有啲肚餓，準時放工走人，去公園坐下等細佬玩完遊樂場就可以返屋企，不過佢有啲同學又投訴佢拆間樹屋咁，真係好麻煩！返到屋企又要整蘿蔔牛腩，又要開視像等嫲嫲同仲仲佢哋傾電話，真係好趕忙！仲要出去湊德，好在返到嚟有人幫手揍住同佢玩咁，我都易搞啲！食完飯可以睇吓電視休息吓咁先瞓都ok！

13/7/22

 13/7/22.    WED.    VERY HOT

今朝出車時仲仲話架車都係踩唔郁，咁唯有佢唔踩之餘，竹要抬車過天橋囉，返到去confirm咗係跟Aisha就去開工，因為今日係sports day，同我地啲好唔同，一來好hea，二來只喺學校草地進行，只係有份參加啲學生玩佢哋嘅項目時，先至去運動場，其他時間其他學生都係留喺自己課室，整啲咩banner poster，都幾無聊！放break放飯時可以吹吓生風叫做舒服啲，搵到個有冷氣嘅地方，係學生食飯嘅地方，咁我放飯嘅時候都未有學生咪喺嗰度食，點知麻煩老師佢又走埋嚟話呢度係學生食飯嘅地方你應該去返staff room食，佢真係好奇怪，人人都覺得多管閑事，但佢真係唔覺自己麻煩嗰吓先死！下午最後項目係田徑跑，但喺草地嗰邊跑我覺得好求其！等啲學生終於走晒，我哋返去大房吹吓水等到夠鐘就可以返屋企啦，走嗰陣時發現架單車好似有啲問題，好在最後行行吓都得番！接咗細佬湊埋佢去學結他，買咗啲餸，再去接返佢同埋接埋都德，德德仲係好病，點解佢父母唔去睇醫生或者比藥佢食呢，淨係吸鼻冇用㗎，見到個仔咁有乜理由唔理啊！等老公返嚟煮飯食，本來可以早啲休息，佢又喺度研究個磅點樣用，又唔去沖涼，沖涼得來，細佬又要等佢沖完涼食西瓜刷牙咁，結果10點幾先至瞓得！

12/7/22

 12/7/22     TUE     VERY HOT

今日都係好熱呀, 所以照著短衫短褲返學, 都冇人理架啦! 揍咗仲仲返去再返工啦, 順利等到Bella返學, 如常咁上堂, 佢今日情況幾好喎! 上堂各樣都好合作, 我又算係避開到麻煩老師啲英文堂, 同Bella喺Japanese garden睇書時有個學生埋嚟問我係咪香港嚟, 原來佢嚟咗個幾月咋, 傾傾吓落雨我地要入番課室, 冇再講啦! 準時放學返去揍仲仲, 快啲返屋企啦好熱, 但佢架單車又有事喎, 要抬返嚟, 我試吓整啦都唔知算唔算整好, 條友成日急停架車個煞車碟梗係出事啦! 今日又係唔洗揍德, 所以有時間慢慢整再煮晚餐, 摺埋啲衫等等! 佢地去咗踢波又要分兩轉食飯嘛, 簡單整肉骨茶不過好好食呀!

11/7/22

 11/7/22.    MON.    VERY HOT

返埋今個星期就放假，加油！仲仲返學我就返工啦，等咗10分鐘Bella無返，咁我都去佢課室繼續等，其實都最後一個星期，冇咩野搞，大家都係一齊等時間過！放break之後，安排咗我去第二個學生，，不過嗰個學生都係無返，佢哋就話繼續留喺佢嗰間幫手，但佢哋上緊Textile，我都唔知有咩幫手，不過佢哋同我當年一樣都識用衣車，所以我都盡下綿力！午飯可以食足45分鐘，睇吓幾咁幾輕鬆，只係臨尾個老師又出現，但今日我都想快手見完佢，過埋個probation就唔使麻煩，所以食完飯之後快傾咗一陣就搞掂，反正佢都有嘢做，然後我就返上去繼續幫啲學生，最後一堂geography ，集中火力跟另一個學生，一放學就即走，去咗公園同佢地吹吓水，因為今日唔使揍德，可以好好用電腦整下野，晚飯後沖涼睇電視啦，不過咁耐都仲係好熱，嚟緊今個星期都係咁熱點算！

10/7/22

 10/7/22.    SUN.    HOT

星期日明明可以瞓到自然醒㗎嘛，但仲仲要比賽所以8點斷就要起身，快手食咗個早餐，跟住就出門口，今次係作客，所以去一個新球場，好大個草地好好太陽，戴咗帽都仲覺得好曬！雖然最終都係輸咗一比三，但係我覺得仲仲做得好好，尤其係守龍門時候好似樣！踢完波都11點幾，返屋企沖個涼先出去食嘢，仲有同阿媽傾埋電話先，去食完嘢仲要去Primark幫細佬買褲，咁啱Letty佢哋都係broadway所以就約埋一齊再去hea吓！最終五點幾先返到屋企，門口個車位又俾人泊咗，搞到我哋拖咗三個拖把去叉電，好在之後個人走咗，我哋可以泊返原位叉電！晚飯食叉燒燒肉鹹蛋三寶飯，可能唔係太肚餓，所以覺得一般！

9/7/22

 9/7/22     SAT     HOT**

明明星期六應該瞓晏啲, 點解要早起身, 仲爺去練波咋嘛又唔係我, 起咗咪叫佢地快啲出門口唔好浪費我啲時間! 煮麵做早餐跟住就摺衫, 太多未摺! 仲爺踢完回來又要出去, 本來老公話去Broadway食嘢再車子元去補習, 但邊夠時間呢, 所以攞完錢交學費買個包比子元食就送佢去補習, 我地就去costco入貨, 因為又冇哂肉啦! 食埋嘢就買埋嘢, 但都遲咗去接, 要交學費所以老師都要等埋! 本來諗住返屋企架啦, 但兩隻嘢聽我講完話想剪頭髮佢地又話想剪, 最終咪帶咗佢地去剪囉, 反而嗰間冇得剪女士, 咁我唯有遲啲再去囉! 仲爺難得肯剪, 不過佢又好有要求又要undercut咁, 但最終佢都覺得人地剪得太短喎, 不過我地都覺得好好! 因為子元要去試腳, 老公車唔到我地返去, 我地就要自己行返去, 順手去超市買埋菜呀等等, 所以回來後好忙咁pack埋嘢, 仲爺都算合作自己做功課, pack好嘢我就煮埋飯啦! 但佢地8點幾先返到, 踢咁鬼死耐! 食完沖埋涼休息啦, 今日其實都冇咩停過!

8/7/22

 8/7/22     FRI.    HOT

返埋今日又放假啦，捱多一個星期多啲就放暑假啦！今日子元去睇音樂劇，所以唔使咁早返學，咁我同細佬就出門口，去到見到日本媽媽咁我就可以即時返工啦！今日都係湊住Bella BB，不過今日係特別活動日，除咗頭兩堂相正常課堂外，其他都係做吓活動咁，第一堂西班牙文因為教晒書所以佢哋睇卡通，我諗我返屋企都會搵埋套卡通睇完佢因為真係幾好睇！第二堂音樂，個老師應該因為有咩活動，完全唔記得咗有學生要上堂，所以最好求其搵咗個老師來代課，佢哋又求其繼續開電腦做吓嘢咁有完！放完break就去返自己班房，做吓手作就放飯，我咪繼續睇書囉，12:30應該已經到我放飯，但一路冇人來接更，我等到1:15已經餓到死死下，好在轉房時見到個同事，即刻同佢講，佢之後就搵咗人提我半個鐘，我先可以去食嘢，如果唔係飯堂收咗真係食風！最咪係喺草地行圈，類似步行籌款，幾無聊！佢哋兩點就放學，難為我哋要等到3:15先走得，返去AL1其實咪又係做埋啲無謂嘢，最重要係個麻煩老師白癡到話今日應該都冇時間同我傾，咁不如聽日先啦，但我話今日星期五啦喎，佢先至醒覺，其他人咪一齊笑囉！準時放工去接細佬放學，跟住再走返屋企執好嘢換衫去籃球場，原來巴士真係好熱，好在有把風扇叫做頂到一陣，今日亦都冇咩塞車好早就去到，佢有去打波，老公買咗炸魚薯條嚟我哋就一齊食，咁仲仲打完波回程時順手買埋晚餐，買咗間中餐，又幾好食喎！

7/7/22

 7/7/22     THU     WARM

今日都係如常咁返工返學啦, 等唔切仲仲學校開門啦, 見到日本媽媽就交咗比佢算! 返到學校少有地Bella竟然9點就返到, 我地仲要搵一輪先搵到佢個form room喺邊, 跟住第一堂上西班牙文, 幾經相勸佢起碼肯入課室坐, 好過企出門企成個鐘呀! 反正都係代課, 咪由得佢睇書算囉! 第二堂PE本來打吓籃球咪好地地, 唔知邊個又挑釁佢, 佢又發顛啦! 之後兩堂Geo, 我先放飯半個鐘, 返去時間都好快過, 只係課室好焗啫! 放飯我就睇書囉, 時間過得快好多, 返去捱埋嗰堂, 最尾food technology遇咗佢唔上, 但都的咗佢上課室門口先, 嗱我努力過架啦! 佢就喺花園睇足一堂書我就只可以企! 放學閃人返去佢地全部都返哂屋企啦, 咁我就有門口入, 因為原來我今日冇帶銀包同key! 老公去咗買嘢食, 因為佢睇仲爺運動會嘛, 都冇食嘢, 子元就去咗公園的波先, 趕住返嚟打機! 我就去揍德, 都係嗰句其實佢應該睇醫生囉, 勁唔舒服咁, 但佢冇發燒學校都拒絕唔到, 唔比佢返囉! 為免有機會傳染, 仲爺出去玩完波回來我都叫佢上房好啲! 之後都係等老公煮飯食, 洗碗沖涼瞓覺!

6/7/22

 6/7/22     WED     WARM

今朝如常咁返工返學啦, 學校都算準時開門, 加上冇熟人在我唔想就咁放仲仲喺學校門口算, 所以都係等佢入咗學校先走! 返到去咪如常開工囉, 不過今日夠哂特別啦, 因為佢地個Band的學生基本上都出哂去science trip, 所以全日基本上係冇堂上, 只係去咗啲課室, 睇吓有冇老師在, 所以除咗頭兩堂因為都有老師喺到仲可以留喺課室, 之後三堂基本上只可以留喺AL1, 其實我都開心的, 因為完全唔洗上堂喎, 佢有佢睇書我有我睇書就可以啦, 加上麻煩老師今日又冇返, 心理上都輕鬆啲! 放學準時閃, 返去整埋個湯才出門口去公園接仲仲, 佢又唔知做咩啦, 又係話人地話唔同佢做朋友嗰啲, 我都明呢到啲小朋友麻煩架啦, 另外又比人偷咗個朱古力包, 唉....有冇咩多嘢呀! 學完結他接埋德德返嚟快手整飯佢食, 因為6點要同Broker講電話, 原來佢會服務我到我收到key為止, 早知早啲問佢可以點追吓雙方律師啦! 某程度上佢比律師更用心囉, 同炮哥講的完全唔同! 晚飯後本來想快啲洗埋碗沖完涼睇宵夜, 但個VIU又睇唔到, 可惡!

5/7/22

 5/7/22      TUE     WARM

我諗我真係好想放暑假, 因為一起身以為今日係星期五啦, 但其實只係星期二, 揍咗仲爺返學就返工啦, 更表又改咗, 今日又係跟Bella啦, 佢今日準時喎, 唔洗難為我! 今日啲堂都算可以, 冇咩好悶的堂, 係放飯同事遲咗嚟cover啦, 我都係唯有等! 食完飯差不多閃又見到兩位上司上咗嚟staff room, 好在我都冇做啲咩, 都係執緊嘢準備閃啦, 快手啲做埋個meeting 唔好心掛掛啦! 下午順利完成放工閃人快手接仲仲, 因為Mandy今日都唔到我接! 回家後抖抖食啲嘢, 4點幾又要出去買餸同接德德, 佢今日狀態唔多好, 又扭又喊咁, 但我都冇咩人性咁, 總之維持佢唔好整dirty我的地方就可以了! 等佢閃咗我又要煮飯, 仲仲踢完回來同我食早場, 老公就遲啲食等子元踢埋波, 但最終又係我洗埋啲碗先可以沖涼, 仲仲都等唔切瞓咗, 又要我講故事喎, 但講咗兩包佢又瞓番!

4/7/22

 4/7/22     MON.    WARM

今朝揍咗仲仲返學就去開工啦，聽話等咗Bella就去課室，咪又係行行企企，只係成日要掛住個walkie-talkie有冇通知Bella幾時到，第二堂開始嘅時候，我再去Reception通知一聲，順手問吓take attendce嗰位知唔知佢返咗未，最終10:45左右佢哋通知我Bella唔翻，幾開心！放break嘅時候可以通知返上司一聲，都唔比機會佢指派我，我就話咁應該都係照跟返佢個時間表啦，我發覺呢個方法都幾好，因為我睇過佢個時間表今日有兩堂同Letty一齊，應該幾易過！Science因為有一半同學去咗參觀，所以班班都係代課老師上，咁啲人又作反啦，我其實都想盡量唔理，只係維持返正常班房運作就算，可以同Letty佢哋吹吓水，咁時間都好快過，放飯可以放足45分鐘，之後返去再等多一個鐘就可以，最後想買數學，嗰個日本妹又捉住我要教佢，有時老師叫我繼續做數，其實佢都可以自己做到，但又想我坐喺隔離，不過都唔可以太縱容佢，我叫佢自己做住先！準時放工去學校揍仲仲，返屋企就休息吓，差不多五點先至出去接德，老公返到嚟淨係抽咗重重去練波，因為子元運動會完冇晒力，今日就唔練啦！處理完德仔，老公返嚟就可以煮飯，賺咗一日我唔使煮，食完飯洗埋碗睇吓電視就沖涼瞓覺啦！

3/7/22

 3/7/22     SUN     WARM

8點幾起身梳洗完, 睇埋租屋個電郵簽埋佢啦, 然後都係hea吓先, 因為老公講咗今日去榮業一次食哂兩餐, 出去之前打埋電話比阿媽同契爺, 關心吓契爺隻腳點啦! 出去榮業食飽就過去買埋嘢, 今日主要係買丁麵, 遇咗佢冇原味架啦, 不過有牛肉味都好! 我地又幫炮哥買嘢, 佢又喺龍鳳幫番我地買, 再找個地點交收, 冇得頂啦! 跟住返屋企之後老公要佢地出去練波, 咁我就清潔啦, 點知老公返到嚟又話洗車, 所以我都有啲不悅, 因為個地實會dirty番! 晚飯時又有啲誤會, 我諗住炸餃子代替飯, 但都照煮啲明天仲仲帶飯嘛, 佢就以為我煮哂全部人飯, 其實我都喺佢面前洗米啦, 都睇唔到煮幾多人飯, 奇怪! 算啦食完就算啦! 明天又要開工, 捱多兩星期就放暑假啦!

2/7/22

 2/7/22       SAT.     COOL+

瞓到七點幾就醒咗，因為太陽光實在太猛！咁就早啲起身睇陣電視就煮早餐，仲可以早啲食完出門口去練波，我就摺衫休息吓，老公買埋子元嘅午餐回來，等佢食埋可以去補習，炮哥有地方介紹我哋去食午飯，所以放低子元補習，我哋就去試新嘢，都係食西餐嘅，其實都好大份亦算價錢合理，食吓坐吓傾吓計，坐到四點幾先至走，仲即興去我哋嗰度玩韓燒，各自返屋企準備，我哋就去買材料，預備好，佢哋就去攞個爐過嚟，老公就去接埋子元放補習，差不多七點半佢哋就嚟到喇， set好打牌嘅陣式，就可以又燒嘢食又打牌，今日玩到11點前就散喇，因為lolita都攰喇！唔算太多嘢要洗，我哋仲食埋啱啱整嘅羅拔臣啫喱，真係好好味！

1/7/22

 1/7/22.    FRI.    COOL

今日本來跟Bella係冇咩問題，但又係麻煩老師，煮係因為喺reception等幾耐嘅問題，我今日等到9:30啫，佢又出現，話上次咪講咗等10分鐘就去佢地課室，但我都只係等多咗10分鐘啫，其實問題喺邊呀，咪就係佢係上司我係下屬囉，佢走埋去Reception同職員講，人哋雖然講緊電話都認佢，但我之前提出要求佢哋其實左推右，我都好難做，其實都好炆憎㗎，不過唯有改變自己思想，就係佢唔係針對我而係佢對所有人都係前言不對後語，自己嗰刻鍾意點就點，好多人都唔鍾意佢，佢自己又唔知，正白癡正仆街正低能！總之佢唔返學大家就最開心！去咗課室咪又係無所事事，同張樂銚佢哋吹水吹左半個鐘， Miss又同我講返下個月補習啲時間，完全喺度做私人嘢！其實都幾好笑！跟住果糖PE，我去reception再check一次，原來Bella媽媽星期一已經send咗電郵俾麻煩老師，講咗今日Bella10:30至11點先至返，咁佢又唔講返俾啲下屬聽，自己知有鬼用咩都唔識安排！咁我驚未夠鐘陣間喺度等俾佢撞見又喺度嘈，咪返去啲同學，但因為體育館太嘈聽唔到Walkie Talkie，我都係企喺出邊睇吓手機！神推鬼我今日個Walkie Talkie原來唔啱 Channel，好在有另一個同事過嚟話我知Bella到咗咁我先去接佢！今日大致上啲課堂都過得幾好，總之我但求平平安安返工放工出糧，就係咁簡單人不犯我我不犯人！放學返嚟又要趕出去搭巴士，點知4:15先有車，搞到我遲咗買餸返屋企，不過我都頭到五點先至出去接德德，真係好攰㗎嘛！今日佢又係病樣，好心佢阿爸就俾佢食藥啦，個鼻又可以噴啲鼻涕泡出嚟核突呀！食飯嘅時候又想扭計，但都比我喝止左，啲眼淚係個眼框又唔敢流出黎真係好好笑！晚飯又係整肉醬意粉，佢哋好鍾意食！