30/6/17

30/6/17   FRI   HOT

今日笨元唔洗返學, 但都係7點多就要起身, 一來仲爺係要返學, 二來又要搬嘢落車, 一齊去食個早餐就揍仲爺返學啦, 今個學年計, 下星期開始就係daddy揍返學啦, 開始裝修就要分兩邊瞓! 揍咗佢返學就同笨元一齊撘地鐵返去同婆婆交收, 我就返工啦! 今日都唔算有咩做, 所以都係做吓自己嘢自娛吓啦! 午飯後就睇吓電視再去入票, 又去759同公司入吓乾糧囉! 下午都係hea啦, 等收工就返屋企攞埋衫去樓下洗, 再去泳池接子元, 直接去小童合唱團! 仲爺今晚喺青衣過夜, 老公放工嚟接我, 本來想過長沙灣睇磚, 但已收了, 咁就返屋企攞埋放程家嗰3箱玩具運埋過去, 順手接程太一齊去揍兩個放合唱團囉, 送埋佢地返元州我地就去食米線, 食完都係返屋企啦, 都冇咩執嘢啦, 反正好多都係要等星期六日執! 都係沖涼睇吓電視咁啦!

29/6/17

29/6/17   THU   HOT

今朝仲爺都一齊揍笨元上校車, 不過就見唔到letty媽媽啦, 所以快D返上樓搞掂就出門口返學, 返到去先發現冇攞口罩, 唯有借住婷婷先! 揍咗佢我就返工啦, 今日要開會呀, 所以返嚟搞掂D嘢11點幾都出門口, 過去先食咗飯再上去做會計嘢, 抄抄寫寫咁手都軟, 2點幾開到3點幾D老細先慢慢肯走, 想早D回家都唔得! 返到去都4點幾, 沖個涼執住嘢先, 等拆乾衣機嗰個嚟, 問埋佢confirm order再拆熱水爐要點, 原來又要收3百幾喎, 裝番個乾衣機要收7點幾, 嘩…咁拆拆裝裝咪千幾蚊! 所以諗諗吓不如搵長沙灣嗰個同學仔爸爸都係做煤氣架嘛, 格吓價囉! 執好嘢等老公回來, 車D嘢過去阿媽到再接埋笨元返青衣食飯, 仲爺…又唔合作, 嫲嫲…又多多藉口, 對住佢兩個我都唔知可以點, 好聲好氣又冇反應, 鬧佢又喊! 佢喺屋企食飯係完全冇問題架喎, 原因係咩呢? 我真係諗唔通! 9點多回程了, 返去仲要執埋個廚房, 但都要搞掂佢地去瞓咗先, 執到11點幾我先沖涼呢! 真係攰到爆, 但沖好涼我又想睇陣電視打陣機先瞓呢!

28/6/17

28/6/17   WED   HOT

今朝仲爺要一齊落去, 咁等我吹陣水就上番去, 老公落樓借車仔搬貨上車, 快手食咗脆片就出門口, 返到學校剛剛趕得切入學校! 買埋早餐返公司, 今朝都要開吓會, 跟住就做自己嘢, 然後都係做吓自己嘢啦, 午飯後都係睇吓新劇, 下午又係做自己嘢, 因為老細們都冇不在! 放工返屋企執住嘢先, 又落去交收埋個足球機, 返上去再繼續執埋攞過阿媽到D嘢, 等老公返嚟又搬嘢, 不過先過去裝修師傅到傾清楚先, 最終傾掂數架啦, 希望冇咩問題啦! 去番接子元時佢仲瞓緊, 佢真係一隻豬嚟架! 放好哂嘢就去食米線然後接仲爺啦! 返到去沖涼休息啦, 都冇再執嘢住, 明早再快執攞D走啦!

27/6/17

27/6/17   TUE   HOT

今朝都係咁趕住整飯盒啦, 叫3隻嘢起身返工返學啦, 忙忙亂亂咁仲要搬埋D嘢落車就揍仲仲返學, 佢條友又搞事話要出去食早餐, 但邊夠時間啫, 扭咗一輪咪又係買麵包算, 都唔知扭嚟做咩! 去銀行攞埋錢換埋簿就返到公司今日都好自由, 因為老細出咗差, 一定唔會返嚟發顛, 所以都好放心咁做吓自己嘢! 午飯後都係睇吓電視啦, J2套劇大結局嘛, 琴晚邊執嘢邊睇都睇唔得完整! 下午都係做吓自己嘢又寫埋商會份議程囉, 都過得好充實! 放工接咗笨元回家又係繼續執嘢啦, 開咗個頭執住個廚房先, 老公返到嚟就搬D嘢落去, 搞掂都7點幾先入到青衣食飯! 不過返到去仲爺先起身, 又同阿哥喺床跳, 結果撞到頭又喊, 咁痛完咪算囉, 都要食飯架啦, 但就只係喊, 一見嫲嫲就喊, 最終我抱咗佢出走廊講數, 係講咗好耐架, 返去餐飯都磨咗好耐先食得完, 但點都叫做自己食呀, 大包返咗嚟會幫吓口, 因為嫲嫲成日幫仲爺搵藉口, 我真係最唔鐘意咁, 錯就要認打就要企定, 個個錯都有得賴仲得了! 食完飯又食埋涼粉睇埋射鵰, 9點半先返去, 都冇同仲爺溫書啦, 考天才啦, 佢咩都識係唔識字咋嘛! 返去搞掂就捉佢地去瞓, 我地就分批執廚房, 沖好涼摺埋衫都差不多1點, 過咗眼瞓時間所以唔眼瞓呢, 所以hea到點幾鐘先瞓!

26/6/17

26/6/17   MON   HOT

今朝仲爺竟然唔一早醒, 琴日應該夠佢攰! 揍咗子元上校車就返去叫醒老公搬嘢落車, 然後揍仲爺返學啦, 今日趕唔切接更啦! 返到公司都係寫番D日記同開會啦, 原來星期四開始已冇寫, 一寫寫番4日真係差D唔記得發生過咩事, 寫得嚟開埋會都放lunch, 又要出去買飯, 今日食好D, 買咗壽司食! 下午老細返咗嚟, 問吓佢嘢咁啦, 點都有嘢做吓GE! 收到老公電話, 話佢公司嗰到突然放唔到D傢俬, 嗰吓我真係頭都大, 係咁諗仲可以放邊囉, 首先係諗到廠個倉, 我知有個係放唔值錢嘢, 打咗入去問個同事都話有位, 但就要星期五攞入去, 不過重點係要問老細, 咁就死啦問佢就好煩! 跟住我就諗到放去商會, 反正嗰到有個房吉咗喺到, 時間又控制得到, 星期日先放去都得, 就咁決定囉! 放工接咗笨元返屋企, 老公會過來接我地, 因為要搬埋雪櫃D嘢過去, 都要沖個身先出門口, 笨元濕哂! 過到去已經差不多開飯, 咁咪幫手開飯囉, 食完睇埋電視睇到9點多先回家, 老公又要去銀行等等, 最終10點先返到屋企, 仲爺又唔合作, 呢條友要教架啦, 最終入房瞓時就入去教訓佢一餐囉, 唔好意為過到骨, 我係唔會放過架! 沖完涼都11點, 點執嘢啫, 只係叫老公收拾咗梳化附件D嘢囉, 睇埋11點套劇大結局都攰啦, 所以都冇睇哂妙手就瞓啦!

25/6/17

25/6/17   SUN   HOT**

今日遇算咗係執屋, 所以除咗子元學鼓外應該都喺屋企, 仲爺8點幾起咗身我冇理佢地啦, 到10點多先出去調停吓, 咁咪梳洗煮早餐食囉, 食得嚟睇吓電視都11點幾先開始郁, 嫲嫲又過咗嚟, 佢諗住我地會唔會要出去想幫手睇住仲爺, 但我地主力都係執嘢啫, 所以都唔會出去! 今日執咗子元書枱啦, 仲有全個床下底, 真係要執一日囉, 3點幾出去食咗D嘢又繼續, 醒起子元要補泳班又即時補啦, 等佢游完上嚟都執得八八九九, 咁就出去食晚飯, 諗唔到去邊咁就去長沙灣食算, 試咗間教嘢又幾好味喎, 食完仲食埋松記先送嫲嫲返去, 兩隻嘢已經喺車瞓咗, 仲爺唔唔沖涼就瞓, 笨元都10點鐘捉佢去瞓啦, 我地仲要鋪番好床單先有得瞓呢!

24/6/17

24/6/17   SAT   HOT**

今日短周呢, 不過都好忙碌, 朝早起身揍子元去畫班, 食完早餐就返屋企, 同管理處申請埋個裝修證, 原來要交按金架, 咁都要照做架啦, 申請完老公就去接子元放畫班, 我同仲爺就喺屋企囉, 我就休息吓先啦, 等佢地返嚟再收拾吓就揍子元返學校, 佢下午開始要童樂同歡, 不過我地只睇晚場呢! 揍咗佢去學校就揍仲爺入青衣, 放喺嫲嫲到, 本來想返去執床吓底, 但老公話想出去睇D料, 結果就直接出咗旺角囉, 行一輪買咗廁所D嘢, 洗手盤, 水龍頭, 花灑, 置物架都買齊, 又去睇吓D磚咁, 3點幾都睇哂, 就返咗屋企先攞咗架BB車放定喺車陣間交收, 跟住就入去接番仲仲再去接子元啦, 仲要幫手揍埋子慧, 直接上程家, 程生同Gloria落去買嘢食, 上到嚟快手叫3個細食嘢先, 6點又要返去啦, 我就睇住仲爺囉, 佢有婷婷D玩具玩唔會悶啦, 等婷婷醒咗就一齊玩, 食嘢都唔係好食! 我地都要快手食啦, 因為又要落去睇表演嘛, 話7點開場但6點幾已經開始入, 我地去到都係後面D啦, 冇所謂啦都睇到架啦, 但要揍住唔坐定GE仲爺真係最攞命, 到子元做嗰時就老公睇住我要拍片呀! 仲爺臨散場時已斷電, 咪由得佢瞓囉, 揍埋子元老公先去蓋飛, 我地就喺車等, 快手出車剛趕得切, 只係比兩個鐘錢啫! 返到屋企由得仲爺瞓啦, 今日我已經好攰, 沖好涼就瞓覺啦!