28/2/17

28/2/17   TUE   COLD

今日臨揍子元出門口時仲爺先醒, 冇辦法要推番佢入去比老公, 見佢眼淚流流咁又真係幾慘! 返得上樓出門口唔知點解又咁遲, 返得學校都過哂8:30, 不過冇咩人都唔洗排隊! 今日返到公司都忙忙地啦, 老細又話要點改坐位呀等等, 時間過得好快又食飯啦, 掛住打機都唔記得落去入票, 唯有明天入! 下午就開始砌抽獎的人, 做吓做吓又一個下午! 放學就去接笨元然後入青衣, 今日嫲嫲西曆生日, 佢話煮飯返去食! 返到去覺得好亂好亂, 兩個又周圍走啦, 咁我都盡量咩都睇唔到, 因為想找找大包有冇裙啱我星期六著, 到開飯時本來我裝緊湯, 仲爺一個波踢埋嚟我塊面到, 結果我一郁就將枱邊碗湯撞咗落子元到, 好在已經涼咗, 唔係就慘! 叫老公捉仲爺埋一邊丙, 我地就清理現場啦, 之後都要打仲爺手仔架啦, 不過食飯時又係衰, 成日要捉番佢埋嚟, 好在都叫自己食哂! 執好枱咪食蛋糕, 大包話個蛋糕係喺日本好出名, 全部原材料都係日本嚟, 原價要600幾, 佢平買都要200幾, 咁你話超級好味又未至於, 若要600幾真係唔值! 食完都差不多老公去攞車, 我地返得屋企都9點多! 經過今晚餐飯, 我忽然覺得裝修時真係住唔到喺嫲嫲到, 一來其實地方真係唔大, 大包D嘢又多, 二來兩個細喺到好顛, 我怕最後係大家都成日發火! 所以都真係要重新考慮租地方住! 晚上對好哂兩個D功課都11點囉, 堅係攰呀! 沖好涼摺衫時繼續睇Harry potter, 差不多1點先瞓!

27/2/17

27/2/17   MON   COLD

今日真係好充實呀, 因為好多工作做! 朝早如常咁揍仔返學啦, 返到公司快手寫日記, 又要開會啦, 跟住就要開始係咁寫座位表呀程序表呀等等, 真係寫足一個下午啦! 午飯要去買飯啦, 食得飽飽都好攰! 下午開始要繼續寫啦, 做到放工先叫做停, 又要快手去揍子元, 佢今日去參觀, 所以冇時間做功課, 不過佢都算乖架啦, 等我嚟嗰半個鐘就做功課, 不過都做唔得哂, 所以去唔到踢波, 要返去做功課! 去惠康買咗D餸就撘巴士返去啦, 叫佢快手做嘢我就煮飯, 所以都早開到飯, 8點多已經可以洗碗抺地, 再幫仲爺睇功課溫吓書, 8點幾沖涼就瞓覺! 然後到笨元睇功課溫默書啦! 搞掂哂已經10點, 終於可以沖涼! 邊摺衫邊睇harry potter, 真係好鍾意睇呀! 睇到12點多都眼瞓要去瞓覺啦!

26/2/17

26/2/17   SUN   COLD

今朝其實7點就比仲爺叫醒咗沖奶, 但我完全唔想理佢, 到第二轉8點幾佢都係要我開奶, 最終我都要屈服, 叫子元食埋藥我再瞓, 但已經瞓得唔多好, 所以好辛苦! 10點幾一定要起身啦, 子元12點要學鼓, 帶佢去食個subway, 我地就揍咗佢入去先去食嘢, 等佢學完就應佢要求去科學館睇恐龍展, 不過原來所謂恐龍展根本就流流地, 全部都係電腦囉! 好在其他展覽都可以! 睇到3點多回家啦, 我頭痛到爆, 喺車瞓咗陣, 但返到上樓老公瞓得仲快, 我去完個廁所出嚟只係見到一地玩具, 周圍都亂七八糟! 個人好灰, 仲爺應該瞓又唔瞓又唔做功課, 陸生又淨係識瞓, 一時火起我又掉D哂衫呀被呀落地, 換哂衫著哂鞋想出去, 不過比子元攔住, 我灰到走咗入廚房喊, 子元真係大個仔, 快手清咗個廳, 叫仲爺攞功課出嚟做, 最終我都claim down到, 同仲爺做咗功課, 子元就自己溫默書同做我之前叫佢做的練習, 暫時信佢真係做到先啦, 默書可以放吓手! 因為我真係冇心冇力了! Hea咗陣就想睇電視, 結果就真係hea, 到6點幾7點叫醒陸生出去食晚飯, 去咗食COCO, 子元又可以玩吓機, 仲爺又學阿哥玩, 似模似樣咁囉, 但阿哥咁乖執玩具又唔見佢學! 9點多回家沖涼瞓啦, 我地11點幾都頂唔住瞓了!

25/2/17

25/2/17   SAT   COLD

今日堅係凍呢, 朝早都要著夠衫先出得門口, 但因為遲咗起身, 所以去得畫班都已經9:30, 去食埋早餐買吓嘢, 點知仲爺又急POPO, 上咗阿媽到辦事啦, 上到去又唔疴, 又要換片咁囉! 等老公接咗子元才返來接我地, 跟住就開始家長日啦, 首先係仲仲見先, 都遇咗老師會問仲爺在家的學習, 睇到仲爺D卷, 真係冇眼睇架, 佢識圖識讀但係唔識字囉, 老師都話佢學習唔夠認真, 總之講到玩就冇得頂, 認真時就唔願囉! 見完呢到就返荔天到子元見, 不過未夠鐘就喺AEON行咗陣先啦, 1點去到周sir都未返到, 見得時又覺得佢由骨子裡hea出嚟, 因為都係冇咩講, 你唔問佢又冇咩講, 你問咗佢又好似唔知答咗D咩咁! 所以都算快見完架啦, 去咗睇吓視藝展同書展咁才回家, 買得KFC嚟仲爺又瞓咗喎, 但返到屋企佢又醒, 所以等我地食完就到佢食! 比子元抖陣就要溫書啦, 仲爺就留番比daddy搞, 我地溫完書就出發去打籃球, 約咗炮哥佢地呢, 雖然唔係打足成個鐘, 但郁吓都有出吓汗架! 打完就返番美孚食香港地, 可能打完波加上下子元食得少, 佢真係清哂枱咁滯, 好得人驚! 返去沖涼瞓覺啦, 我地就好夜, 老公仲要睇波呢!

24/2/17

24/2/17   FRI   COLD

今日都是如常的星期五, 都係咁揍仔返學啦! 返到公司都好忙好忙呀, 忙住做商會D嘢, 臨尾呢個星期會最忙囉! 做咗一朝都好冇咩做過咁, 又要開會又吹吓水, 結果下午先正式入肉! 所以下午時間過得好快呢, 夠鐘亦閃了, 返去攞齊嘢又去接我隻笨元, 仲仲可能聽到我返都醒咗, 但我都唔得閒理佢啦, 落到去等小巴等咗好耐都冇車, 好在子元都遲放! 老公嚟到樓下接我地, 揍咗子元去泳池就回家整嘢打邊爐, 奶奶又買咗好多嘢, 點食都食唔哂呢! 洗埋嘢老公就送嫲嫲回家, 我就K.O.兩隻嘢! 沖好涼睇吓電視摺吓衫咁啦, 明天都係要8點起身, 因為畫班呢!

23/2/17

23/2/17   THU   COLD

今日都係如常咁返工返學啦, 仲爺今日去濕地公園參觀呀, 唔知佢會參咗D咩出嚟呢! 今日返到公司都好忙碌咁做商會D嘢, 要排位等等係最煩, 不過就好充實囉, 勁快又放飯, hea吓睇吓電視咁, 下午又做吓勞動, 對面公司摺…有好多box file唔要比咗我地, 接近100個喎, 我地過濾吓邊D唔太靚就唔要, 都有五十幾個可以要番, 都要找地方收拾好! 跟住都係繼續做嘢, 食埋個tea就放工去接笨元, 今晚老公同同事出去食, 我就簡單地只係煮長通粉咋, 兩個都好比面食哂, 連仲爺都食哂真係難得! 跟住咪比佢地玩到8點半先沖涼囉, 然後又喺房玩一輪, 9點幾要仲爺瞓啦, 再同笨元睇埋功課, 10點多佢都瞓啦, 我都要沖涼! 老公11點幾先返到嚟, 佢先話我知佢同事頂咗飛上海嗰轉, 咁佢明天就不用飛, 睇嚟佢真係好想去兩個仔的家長日呢!