31/3/18

31/3/18   SAT   HOT

又係一年一度去camp的日子，去咗咁多年可能都有少少悶，不過可以比佢地平平地玩吓又係好事！朝早如常咁起身食早餐啦，跟住老公又要帶笨元出去做足球練習，我就同仲仲喺屋企執好去camp d嘢，執好老公返到嚟出去食啲嘢就出發，過到去啱啱去兩點幾聽埋talk就攞房，今次個位唔錯喺二樓又近主樓，等老公泊埋車返來就去玩， 最有體力喺呢個時間，梗係要玩啲體力勞動啲，去咗射箭，佢地就踩單車，仲爺踩得好得意架，笨元就成日都好挫敗咁好麻煩！然後我就同子元去玩繩網，老公就陪仲爺去玩遊戲室，玩夠就返去換衫出去西貢食晚飯，只係簡單地食泰國嘢，之後再食吓其他嘢咁，今次食咗個魚仔燒，再去食埋糖水就回程，返到去都冇咩玩，只係去玩左陣足球機等等，老公泊好車回來就去沖涼，再去咗電視室睇電視，睇到11點就返咗房瞓睇，又要打暈埋仲爺呢，最終點幾我先瞓！

30/3/18

30/3/18.    FRI.    WARM

今日係假期開始，瞓到8點幾開始比佢地兩隻嘢嘈醒， 不過都9點幾先起身，跟住又要捉佢地梳洗煮早餐等等，洗埋碗都11點幾12點， 又趕佢地去做功課啦，笨元自己搞掂，但就要督住仲爺做囉， 佢真係好麻煩架，不過喺我手上做到1點前算係做好， 差寫數字未做啫！做好功課老公就同子元去練波，仲爺當然跟埋去啦，我就要執一執自己先出得去，不過真係練好耐囉，差不多3點先返去沖涼再出去食嘢， 再去買嘢飲， 跟住就入藍澄灣康傑小聚會啦，原來我地做咗到，6點先開爐，所以慢慢搬埋啲嘢飲上去， 再周圍巡吓咁又等到大家嚟，細路們開始發顛玩，大人就開始準備食物，我今次完全冇理仲爺，由得佢玩啦，因為全層都包哂唔怕玩！邊吹水邊整嘢食，時間過得好快！影埋大合照就執嘢閃，唔比仲爺瞓著呀，因為佢地玩到好dirty，一定要返去沖涼先瞓！

29/3/18

29/3/18.   THU.    WARM+
返埋今日就放復活節假，真係好輕鬆，我今日都唔找工住啦，休息一天！朝早老公車子元過阿媽到再車埋我返公司佢就返工， 我買埋早餐返去食，然後都係做吓自己嘢啦，幾開心架，老細又唔返！午飯前老公打嚟話接埋子元找我食飯，咁就去咗青山道食麵，食完返公司做吓自己嘢，下午時間都過得快，等衛生署嚟睇埋嘢就可以出門口，又係過衛生署交文件，順手可以早啲過去紅磡，子元要睇林醫生嘛，都係冇咩特別啦，攞埋藥比埋錢就走得！返咗葵芳食晚飯，行咗陣去一田睇吓嘢，買咗支Oliver oil，諗住去排隊比錢時竟然見到火火，忍唔住叫佢同我影番張相，咁都比我集到郵！去嫲嫲到接埋仲仲就返屋企啦！

28/3/18

28/3/18   WED   WARM

今朝送哂佢地出門口我就煮早餐食, 跟住落去還埋個碗比Barry就返工, 今日都係開次會啫, 之後全日都好努力咁找工, 真係睇到眼都矇埋, 午飯後都係睇陣電視, 下午找工的時間過得特別快, 轉個頭放工啦, 返去接咗笨元就返屋企, 轉一轉裝就落樓, 嫲嫲話去AEON食, 佢要入貨! 泊好車時仲撞到程生, 佢而家都變咗遊牧民族, 所以泊入嚟攞單! 去COCO食完嘢老公就同兩隻細去玩卡睇玩具, 我就去同嫲嫲超市shopping, 都買咗兩大箱呀, 買完都閃啦, 已經8點幾夠鐘出車! 送咗嫲嫲返去, 仲爺又話要喺嫲嫲到過夜, 咁明天反正都係要送佢入嚟, 咁就由得佢喺到瞓囉! 我地返到去都係如常咁啦, 係子元真係一有個電視佢就呆, 唔理播緊咩佢都係呆架喎, 激死!

27/3/18

27/3/18   TUE   WARM

今朝仲爺冇一早起身, 搞掂子元上校車就返去叫佢兩父子起身啦, 等佢地出咗門口我就煮個福麵做早餐, 差不多時間咪出門口返工囉, 今朝返到去又講番大家好多唔開心嘢, 齊齊喊咗一陣, 有地方發洩到負面情緒係好事! 做吓嘢又食lunch啦, 睇吓電視咁, 下午好努力找工, 睇到眼都矇埋, 都叫做send咗幾份啦, 唔到價真係閃唔過, 唉! 放工快手去接笨元就過球場, 今日去海洋公園站, 真係夠哂遠, 其實車程半個鐘左右啫, 不過過得去等佢個幾鐘, 又催佢執嘢等等都幾係悶, 返到屋企都9點3, 仲爺已經瞓咗, 老公煮埋少少就食得, 都唔錯GE, 問佢買咗幾多錢餸, 都係$92, 合格啦! 其實都係要迫吓佢, 洗咗幾多就要慳番幾多, 唔好諗住走數! 跟住都係洗碗抺地沖涼休息, 老公攰得好緊要喎, 我沖完涼出嚟佢喺梳化已經瞓咗, 都係11點啫!

26/3/18

26/3/18   MON   WARM

今日仲爺開始放假, 所以揍咗子元校車我就返去叫醒佢地出門口, 送咗佢地出去我先慢慢食早餐, 其實都幾悠閒自在, 夠鐘就出門口返工, 今朝都係要開吓會咁啦, 之後都係做自己嘢, 老細今日又唔會返, 自由時間! 今日office人少少, 有同事請病假, 有同事屋企人突然有事要馬上閃, 所以午飯我去買咗個麥當勞就算, 下午主要都係找工, 同埋同淨下的同事傾嘢, 唉…好多嘢傾呀, 做人真係好煩! 放工去接子元返去煮飯啦, 返去同老公講番個財政問題, 其實真係有啲無限lop的感覺囉, 佢一日唔覺醒都係冇得搞, 我已經用盡方法慳架啦, 佢幾時先明呢! 食完餐飯我有點唔想郁, 老公指揮佢地執嘢, 但最終都係我洗GE, 佢兩個沖好涼就同仲爺做功課, 本身我今日都燥底架啦, 仲爺又做到衰衰咁, 我咪愈來愈燥囉, 老公入嚟都唔知係唔係幫拖, 我就出咗走廊冷靜, 但陸生梗覺得我發脾氣架, 我已經冇掟嘢冇大力閂門架啦, 我只係想冷靜, 最終入咗房喊囉, 咁人就係要發洩架啦, 最終仲爺係做得好核突咁做哂嗰份, 咁我就落去跑步囉, 我需要完全脫離個環境一段時間! 跑咗15分鐘啦, 出咗身汗舒服啲, 返去沖涼後摺衫休息, 叫做冇再鬧交啦!

25/3/18

25/3/18   SUN   WARM

今日瞓到9點幾要起身啦, 子元又要去學打鼓, 又係叫仲爺執嘢係好難GE事啦, 11點準時去鼓房, 跟住我地就去食嘢啦! 之後去咗買LEGO, 下星期約咗五條king嘛, 咪去買禮物囉, 子元都要買生日禮物比佢啦, 間LEGO搬咗去尖咀, 於是泊埋一邊我帶佢兩個去睇, 老公就喺車等, 都睇咗差不多大半個鐘, 子元勁長氣地煩住人地啲sales囉, 終於買咗2盒, 跟住就去咗海運再行! 都係睇反斗城啦, 子元淨係玩人地任你砌的lego, 最後再買多盒比軒軒, 仲爺亦有收穫! 然後就去太空館, 經過文化中心都好多嘢睇, 幾有文化feel呀! 去大空館睇show, 不過未夠鐘就去咗食嘢先, 其實個show都好一般, 仲爺更加係唔會明, 所以都係周身郁, 子元就OK GE! 睇完咪返去citysuper買嘢煮囉, 返去佢兩個就砌lego啦, 我係休息! 晚上食拉麵, 食完又要打掃啦, K.O.咗仲爺子元就係咁砌佢盒新嘢, 我地就睇電視, 睇到12點幾1點先瞓!

24/3/18

24/3/18   SAT   WARM

今日短周, 不過老公一早同子元去足球比賽, 咁我就同仲爺單打獨鬥囉! 8點幾我都起咗身啦, hea吓先煮早餐, 本來諗住之後就同仲爺做功課, 但醒起佢開始放復活節假, 就的唔起心肝同佢做啦, 於是比佢玩完玩具就出去遊樂場玩! 玩哂幾個場去埋超市shopping, 已經買得好節制, 真係冇平的都唔買住架啦, 推車仔裝貨返屋企, 跟住落好貨不久老公打嚟話佢地差不多時間返到, 於是就執埋嘢落樓, 過麗寶攞埋子元個書包就回程, 上去放低嘢才落大快活食TEA, 返上嚟佢有佢做功課我有我摺吓衫休息吓, 5點子元就自己落去游水, 仲爺返咗後又好煩, 佢又唔瞓老公就走咗去瞓, 又要我同佢砌車場, 要行人又唔執嘢, 真係火到我去一個點! 我落去接子元先, 佢地後join, 出去食晚飯! 本來諗住比佢地喺葵芳行吓, 但仲爺又扭扭地瞓, 子元又想返去睇電視, 我又燥底, 於是叫老公直接車咗我地返去佢先去踢波! K.O.咗仲爺感覺好咗, 我同子元hea住咁邊睇電視邊睇手機, 11點幾Barry打嚟話攞啲桑子上來, 吹咗陣水老公都返, 佢地又吹一陣啦, 子元就睇哂套戲先瞓!

23/3/18

23/3/18   FRI   WARM*

今日都係如常咁返工返學啦，揍哂佢地返學就買早餐返工啦， 跟住都係要開會呀咁啦，然後我就好勤力咁溫習, 因為下午要去做typing test!  午飯快手食, 2:00要去到北角喎, 好在嗰到都唔難找, 出地鐵一條直路就到, 上到去先登記然後等入座, 都開始緊張架啦! 一開始考中文打字真係最EASY, 我打完都仲有時間check咗兩次, 但到英文時我真係唔夠時間, 聽到話1分鐘我仲欠3-4行, 真係機關槍手咁, 打完有啲抽筋! 到做word同excel, 雖則今日都惡補過, word叫做做得哂, 但excel就真係投降, 一來做唔哂, 二來都做錯, 因為實在係唔識, 唉! 算啦都盡咗力, 冇辦法! 不過今轉真係令我個心臟負荷好大呀, 打英文時我真係心跳加速到差啲暈! 終於考完返屋企啦, 因為要揍子元去踢波, 所以都係返去換吓衫執吓嘢摺埋衫就出門口去畫室接子元, 今日要去中山公園踢, 行過去都幾遠呀! 老公接埋嫲嫲同大包同仲爺一齊過嚟, 仲爺喺遊戲室玩去遊樂場玩, 完場先去接哥哥, 食埋嘢送埋佢地返屋企, 我地返到去都10:30, 快手同佢地沖哂涼趕得切睇劇呢!

22/3/18

22/3/18   THU   WARM

今日仲爺唔願起身, 梗係啦琴晚賴尿搞咗一輪啦! 終於搞掂出門口, 都係遲架啦冇遲咁多咁解啫! 食埋早餐返工啦, 返到去都係做吓公事, 今朝老細11點多就返咗嚟, 所以我都好忙, 幾難得忙呀! 午飯要落去買, 嗰邊嗰兩隻嘢一早返咗嚟, 搞到我地買完飯都唔想過去食啦! 下午大老闆娘返咗嚟, 又有嘢要做, 老細的機票酒店又要跟, 又有廣告嘢要跟, 幾難得呀, 老細叫我積極啲嘛我咪積極囉, 未找到工之前都要做吓戲! 放工要等6:45才可接子元放英文補習, 於是去咗759行吓, 已經好忍手咁只係買咗七十幾蚊咋, 都係啲麵呀咁啦, 都唔買咁多速食啦! 過去買埋餸就返去接笨元, 佢今日派咗英文同常識卷, 常識有84都可以啦, 但英文得74, 佢話佢返到婆婆到喊呀, 咁都係低分, 雖然Ms Yu話份卷係深但都係因為佢成日都唔做練習造成, 小考當教訓啦! 返到去快手煮飯, 因為老公仲早過我地返到, 早知叫佢嚟車埋我地啦! 食完都係洗碗抺地等啦, 仲爺尚算合作, 10點前K.O.咗佢, 睇子元功課時就激心啦, 倒敍法咋喎, 真係咁難明咩, 講到尾都係唔明啲詞語點解出事, 叫咗佢睇多啲書架啦, 咁簡單唔明, 簡單到「分別」都唔知可以有兩個解釋, 真係比佢激死! 沖完涼摺埋衫瞓啦, J2套劇開始悶, 我又劇透完冇咩心機睇!