31/5/17

31/5/17   WED   HOT

今日又要返工返學啦, 仲爺近來為咩咁早起身呢, 我真係唔知, 但起咗身咪去疴尿囉, 為咩要喺廳賴呢, 唉! 老公聽到我慘叫都有出嚟幫手, 因為我又要整飯, 實在分唔到身! 揍咗佢地返學就買埋早餐返工啦, 今朝都係做吓自己嘢啦, 午飯後去咗入票, 再去759入吓貨, 公司缺零食呢! 下午先係執吓嘢, 因為約咗4點幾洗地毯, 真係好快洗完喎, 期間去咗買tea食, 放工就返去接笨元回家, 仲可以睇埋功課先, 因為嫲嫲話出嚟食粥喎, 咁就去咗食粥囉, 食完就送嫲嫲回家, 8點幾返到去子元就快手沖涼要睇射鵰, 見佢喺婆婆到都做好嘢咪睇完就執嘢瞓覺囉, 我今晚都勁攰, 沖好涼摺好衫都玩唔到咩機就喺梳化瞓咗, 咩劇都冇睇到!

30/5/17

30/5/17   TUE   HOT

今日係端午節, 但對好多學生同家長嚟講, 應該只係多咗一日可以溫書咁解! 我今日都早起身呀, 因為仲爺6點就搞事, 搞到我之後都冇覺好瞓, 9點未夠就要完全清醒, 因為又要出去鬧人, 先係叫子元入房做嘢唔好再睇電視, 跟住就係叫仲爺執嘢, 然後就係煮早餐, 出去咁食個早餐要百幾蚊, 都係食丁麵啫, 屋企煮平靚正, 只係冇奶茶咁解! 食完早餐子元仲未做好未做完的功課, 冇得同佢溫書住, 咁咪吸吓塵發吓顛先囉, 我覺得若我喺屋企而唔搵D嘢做的話就覺得好浪費時間! 11點多終於可以開始溫書, 今日溫咗中文先啦, 都係睇吓佢D修辭識唔識, 再比練習佢做, 詞語嗰D佔分數唔多, 我想佢做吓閱讀理解重組句子等等, 佢做卷時就同仲爺溫吓數學, 到2點多終於完成, 我地本身又plan咗出去ikea, 所以做好卷就放人, 先去食銀龍食晏, 再要去補呔入油再入沙田, 等車位時仲爺瞓咗, 咁借到商場的BB車, 所以可以放佢喺車, 我地就可以慢慢睇要睇GE嘢, 睇咗個幾鐘返去攞車時仲爺就醒咗, 變咗佢記憶中完全冇行過街又返屋企啦, 都幾慘! 今晚返嫲嫲到食飯, 返到去都差不多食得啦, 仲爺又唔係好合作食飯, 我都冇眼睇啦! 8點幾返屋企沖涼瞓覺!

29/5/17

29/5/17   MON   HOT

今日返一日, 明天又放假, 令人幾冇動力! 朝早都係如常咁起身啦, 都要整飯帶架啦, 因為婷婷病咗唔返, 所以可以慢慢! 買埋早餐就返公司, 今朝都唔算有咩忙, 都係做吓公司又做吓私事, 午飯後就幫子元scan吓D常識練習, 放工先返去接笨元, 跟住直接入青衣, 小圈子有波踢, 先同佢地食飯, 再直接去球場, 子元都一齊踢嘛, 咁未開波前仲仲又一齊玩, 佢都好滿足架啦, 8點佢地開波, 我就同仲爺返屋企, 又買嘢飲又買雪糕比佢, 開開心心咁行返屋企啦! 同佢沖好涼玩咗陣, 9點幾要瞓啦, 咁我都可以做吓自己嘢, 老公同子元食埋宵夜返屋企都11點幾12點, 子元眼瞓到隻嘢咁, 沖完涼就瞓啦, 我地睇埋妙手都瞓啦!

28/5/17

28/5/17   SUN   HOT SUNNY**

今日閉關日, 但都只係溫咗英文咋, 仲要係進評咋, 作文嗰D都未溫! 朝早仲爺又6點morning call, 我就嚟顛! 本來8:30要接婷婷, 幫手揍佢小童的活動, 但因為婷婷病咗唔上, 咁我地就唔洗咁早出去, 我8點幾起咗身見到一廳都係嘢啦, 梗係火起架啦, 總之做好咗D嘢先可以出去食早餐呀! 近近地喺北海道食完去圖書館借埋書做功課就回家, 我同笨元好勤力喺房溫書, 老公揍住仲爺, 佢竟然喺廳瞓咗, 由得仲爺睇機, 我12點時望鐘驚覺子元要學鼓, 馬上衝出廳叫醒老公, 快手衝到去都要12:20, 咁啱miss今日下一堂又好似冇人喎, 於是可以上番足半個鐘! 上完堂去美孚買車仔麵返去食, 食完老公負責K.O.仲爺, 我同笨元繼續作戰, 溫吓又做練習咁, 佢做時我又可以摺吓衫做吓家務, 做咗幾份都係錯D無謂嘢, 希望改正完正式時冇問題啦! 到5點多放生佢啦, 比佢玩吓玩具, 留番端午先嚟溫常識! 6點多叫醒老公佢地出門口去阿媽到食飯, 老公8:30又要踢波, 所以都係快手開飯食, 仲爺今晚可能真係餓啦, 所以都算合作食完飯先搞事, 笨元仲搞笑, 食完飯食朱古力時因為有拖肥, 竟然痴甩咗隻牙, 咁又換咗隻第二小臼齒啦, 都唔聽佢提過話有牙鬆! 回家後都係沖涼再K.O.佢地, 仲爺唔肯瞓架, 走咗出嚟好多次都比我趕返入去, 笨元就真係攰架啦, 10點多入去都好快瞓, 我呢…hea囉, 唉…近來都好hea, 冇咩動力!

27/5/17

27/5/17   SAT   HOT

今日係表演日呢, 仲爺同笨元都有表演活動, 所以今日出咗一日街, 書…明天才溫啦! 朝早7點幾就要出門口, 先將子元送去比敏瑩姨婆, 等佢揍去畫室, 我地快食個早餐就入青衣, 仲爺的父母親節獻禮活動, 睇就係睇佢唱幾首歌GE啫, 咁都幾好睇GE, 隻傻豬呆吓呆吓咁, 人地轉佢先轉, 走位又慢咁好好笑! 睇到10點幾散場啦, 快手去攞車返去長沙灣接笨元, 然後要過海, 到笨元唱歌表演! 過到灣仔要搵地方泊車, 足足等咗差不多1個鐘, 走開咗架啦, 但轉個圈見到嗰架車走喎, 我馬上跑落車截位, 個司機好好人等老公渣架車返嚟先走, 終於等到個位囉, 可以去行陣街先返球場報到, 原來係做D地區活動的表演, 冇咩人睇又好曬咁啦, 不過至在有得唱吓囉, 佢表演之前有魔術表演, 仲爺佢地睇得好開心, 玩攤位又好認真, 睇哥哥唱歌亦好投入, 3點多終於完成, 先返去入標再行玩具街, 行兩個鐘又要返去入標然後去咗pizza bar食嘢, 仲爺好識食呀, 話pizza yammy! 食完回家, 喺車兩個瞓哂, 仲爺瞓到沖涼都係洗車咁快沖著番衫繼續瞓! 我都好眼瞓, 老公要睇波…我瞓先啦!