31/8/17

31/8/17   THU   HOT*

今日係強勢回歸後第一朝, 好多嘢都習慣緊, 老公車子元返學校田徑, 我就慢慢先梳洗出門口買早餐返公司食, 其實今日要出去開會, 所以朝早都要快手D搞掂D嘢, 11點幾又要出門口啦, 過去食完飯就返上去做嘢, 主要對番會計條數交, 等D老細齊人就開會啦, 我老細又要拖時間, 唔想開得太短時間喎, 所以都3點幾先講完, 又要D人發表意見等等! 等佢地走哂我都4點左右走得, 返到去見到個浴屏完成咗…一部份, 仲欠條膠邊未得, 可能玻璃膠未乾唔整得住! 但佢整完我又要清潔一大餐, 變咗都執唔到D嘢, 老公6點幾嚟接我, 本來想過阿媽到搬D嘢先, 但因為太大雨, 所以都係接咗子元入青衣食飯先, 食完返出嚟先再攞! 仲仲今日又好可愛咁唔比我走, 頂多幾日啦, 下星期一點都帶你返去架啦! 去阿媽到攞埋嘢, 9點幾已經返到屋企, 叫子元沖好涼執嘢明天開學, 佢就睇埋星星先肯瞓, 我地不停執執執, 老公就同個鐵閘收埋尾, 每日執幾個箱….要幾耐先清得哂呢!

30/8/17

30/8/17   WED   HOT**

今朝揍咗子元打籃球就返工啦, 今日都忙忙地啦, 都要做吓自己嘢先, 又要開吓會咁啦! 午飯前老闆返咗嚟, 阻住人地食飯乞人憎! 於是食完就洗碗走人囉, 去咗AEON買浴廉, 因為明天先裝, 今日要頂住先! 買完再行吓12蚊店就返去啦, 下午都係做吓嘢囉, 點知老細又叫咗去聽開會, 真係得個聽咗囉, 悶鬼死! 借D二唔關我事嗰D可以閃啦, 返去做自己嘢, 當然都係睇吓屋嗰D嘢, 因為仲爺個衣櫃又未settle, 又要買個櫃for堆寬頻, 最終老公話喺AEON見過有啱, 今晚再去睇! 放工返去接咗笨元就直返青衣食飯, 快食完就出去睇櫃嘛, 仲爺今晚又扭要一齊走啦, 都明GE, 2個月冇一齊返屋企啦, 係慘D, 頂埋呢幾日啦, 佢開學前一定搞掂! 喺AEON買到個櫃, 買完再返阿媽到搬嘢返去, 老公搬咗一轉叫我唔好再攞咁多, 放唔哂呀, 所以都要精選咗D必需GE先, 明晚先再搬! 返到去攞哂D嘢上去就開始執嘢, 老公個波友上嚟攞KEY, 明天上來裝浴拼! 我地執嘢執到12點幾, 趕咗子元去瞓, 沖好涼食咗個麵先瞓呢, 已經點幾2點, 真係好攰!

29/8/17

29/8/17   TUE   HOT

今日請咗假, 又冇人嘈我, 瞓到10點先起身, 真係瞓自然醒, 幾耐未試過! 梳洗完出去食埋早餐就過荔欣, 去到師傅仲未執完手尾, 咁我都冇咩可以做, 又清潔緊喎, 於是我攞咗D床單同被去洗, 又想去POPO喎, 但廁所又唔用得, 於是去咗Barry屋企借廁所同坐吓先啦, 因為上面沙塵滾滾嘛, 都執唔到D咩, 咪喺Barry到坐吓先囉, 等個寬頻等咗好耐先到, 老公打嚟話條友就到, 但上咗去等咗成個鐘都未見人, 最終Barry都落番去做公事, 我咪喺到check吓清潔成點. 差不多2點先叫做開始執嘢, 但都肚餓啦, Barry話一齊食飯, 就去咗香港地食, 佢仲請埋我食! 食完佢上嚟幫我睇埋個寬頻, 坐咗陣就走, 我就係咁抺同執囉, 5點幾一定要出門口, 去球場接子元, 等老公嚟接我地返得青衣食飯都7點, 仲爺又見得我地大半個鐘, 我地又要趕返去執嘢啦, 其實仲仲都好sweet, 有D位你係鬧佢唔落! 返去執執執, 老公就痴好鐵閘啦, 做到11點多, 睇完星星啦走啦! 子元話肚餓, 就去咗食松記先回家, 瞓埋今晚啦, 明晚可以強勢回歸, 仲爺….等多幾日啦, 我要安頓埋D電線先放得佢返嚟!

28/8/17

28/8/17   MON   RAIN

今日好忙, 因為預計明天會請假, 要做好哂D嘢先得! 朝早唔洗揍笨元去學嘢, 佢有佢睇電視我有我返工啦, 買埋早餐返去食, 又唔洗開會喎, 咁都好…多D時間做嘢, 淨係寫番幾日日記都夠啦! 午飯食完就閃, 因為老細又同佢兩個愛將開會嘛, 其實佢地都幾慘, 食個飯都冇自由! 我食完就去咗AEON買床單, 見到有套Fliex the Cat $399咋喎, 都係灰色啫, 哈哈, 老公話要買灰色嘛! 買完行多陣都夠鐘啦! 快手返公司, 下午做做做未停過手, 做到過咗5:30仲欠少少, 做埋先走呢! 先返屋企執吓嘢, 要執咗D衫返去先, 等老公嚟接我, 但冇攞嘢住, 因為過去睇吓整成點先! 如老公所料係點整都唔完! 所以老公叫師傅整好D吸咀, 執埋手尾, 明天12點要全部清場及清潔! 睇完我地就去食晚飯, 然後就過阿媽到執多幾箱嘢返去, 因為明天請咗假嘛, 佢唔清場我點執嘢! 搬好嘢上去執一執嘢就回程, 今晚我可以自己瞓哂張床唔洗比笨元踢, 因為佢去咗camp嘛!

27/8/17

27/8/17   SUN   8號風球

又打風! 有冇咁密呀! 今朝起身已經8號, 所以完全冇理會, 瞓到差不多10點先起身, 問吓老公點安排, 照梳洗hea吓食個早餐先啦, 然後等老公電話嚟, 搬咗部份子元D嘢過去, 反正佢嗰到都抺好, 等佢過到去有D嘢做! 等老公換好D燈蓋, 兩點幾落咗風球, 先過去接嫲嫲同仲仲, 直去Mega Box, 先食午餐, 再行反斗城再睇傢俬, 實惠真係麻麻地, 最終行IKEA買咗差不多2000蚊嘢, 但又櫃又櫈又配件等等, 好豐富! 買完已經7點多, 喺九龍灣附近食大排檔, 仲爺瞓咗…就咁放咗佢喺車瞓, 我地自己食, 子元都食咗唔係好多又上車瞓! 咁揍咗嫲嫲佢地返去就搬番D櫃上荔欣砌埋先, 11點幾先各自回家, 本來想執定衫入行李箱, 但因為太攰, 可能都係明天才算!

 

26/8/17

26/8/17   SAT   HOT

今朝8點老公就過到嚟, 先快食個早餐, 跟住就去商會搬嘢, 準時9點去到, 老公搬住落樓先, 我要寫埋D數先得, 咁啱個司機又早到喎, 所以9點幾10點已經搬好嘢上車, 10點半已經返到屋企, 不過要搬埋上樓都要時間, 先放哂喺走廊, 鋪好仲爺的地墊, 再放床及衣櫃入去, 跟住要預番時間去接番笨元, 因為阿媽要去打牌, 咁揍咗笨元去食D嘢, 攞埋架車去洗, 就返去做最大工程嗰樣, 即係裝鐵閘啦, 又鑽牆又燒扞, 搞咗幾個鐘! 另外又有人嚟裝煤氣, 個廚房又似樣咗! 我就主力抺抺抺, 笨元喺房玩吓又執吓嘢囉! 連我地房張床都抺哂, 咁先發現櫃筒位竟然有兩粒釘突咗出嚟喎, 梗係要老公同裝修講啦! 鐵閘好難咁叫做固定咗, 但未落膠唔郁得住! 時間唔早啦要去食晚飯, 快食完揍咗子元返去先, 我地再返去執手尾, 主要整上網線, 叫咗Barry上嚟整, 我冇咩做可以休息吓! 係要搬好魚缸, 電視可以歸位最緊要! 到12點多都係搞唔掂, call咗PCCW約時間上來整囉, 係時候返去啦, 因為隻笨已經打咗比我兩次話瞓唔到, 結果返到去見阿媽喺梳化陪佢瞓, 真係頂佢唔順呀!