31/3/22 THU VERY COLD SNOW
今朝都係如常咁出門口揍仲仲返學啦, 踩車踩咗一個街口時, 見個天有啲白色嘢飄落嚟, 初頭以為係花瓣, 點知愈來愈多, 再睇真啲係雪呀, 真係雪呀! 但我地踩緊車唔停得, 去到橋時反正都要落地推車, 就順手同仲仲拍片, 因為唔係真係好大雪所以要拍片先睇得清, 同埋係我人生第一次見雪, 嗰種興奮真係非筆墨能形容, 仲爺都係啦, 我同我小情人賞了人生第一場雪呢, 好浪漫呀! 這場雪只係落咗10分鐘, 我都未返到學校就停啦! 返埋今日就放假, 加上今日負責個學生冇返, 我又輕鬆好多啦, 跟住佢個time table上堂幫吓手就得, 準時收工去接仲仲, 又唔洗揍德仔啦因為佢仲未病好, 所以比仲爺喺公園玩到4點多先走, 揍咗佢返去我仲出去買埋餸先, 老公都放工埋嚟! 5點幾時又突然再落雪, 大過今朝好多, 仲爺又出去玩咗陣! 跟住都係用吓電腦, 老公煮飯咁啦! 子元明明應該溫書又瞓鬼咗, 叫醒佢時佢竟然抽筋, 抽到好似變zombi咁, 叫咗佢平時要拉筋架啦又唔聽!
30/3/20 WED COLD
今朝都有啲趕, 每朝都總係趕, 不過頂埋呢兩日又放假啦yeah! 今日我跟Bella, 第一堂又去炒散啦, 自己搵嘢做吓咁啦, 因為都係代課上堂, 基本失控, 音樂堂都可以失控, 其實都幾痴線! Bella今日都準時返到, 咁照去上英文堂啦, 都冇咩, 但臨尾佢又要出咗去草地轉圈, 我都估到今日應該有啲嘢, 果然係! 到上法文時佢突然之間喊, 好在有個抒壓玩具, 佢喊咗大半個鐘, 到個cover lunch嚟到後冇事, 佢今日心情都係一般架啦! 因為最尾上History佢又呆咗, 好在佢朋友喺到, 老公又安排佢可以喺門口位坐, 過咗一陣都冇嘢, 咁我就安心收工去接仔放學, 玩咗陣公園回家又要準備出去學音樂, 我又要去買餸等等, 好在回來老公自動自覺煮飯, 加上德仔又發燒唔洗揍佢, 咁我可以摺埋啲衫, 足足四機咁多, 摺到開飯都未摺完! 搞掂洗完碗沖埋涼又要搞屋嗰啲文件等等, 其實都好攰架啦, 心靈上嗰隻攰!
29/3/22 TUE COLD
今朝開機睇唔到更表, 唯有whats apps同事求救, 咁返到去唔洗咁趕啦嘛! 揍咗仲仲返去快手閃啦, 本來要跟Aliya, 但因為佢冇返, 而本來跟Aisha的sir病咗, 咁就啱啱好就到啦, 不過揍佢都少嘢, 有時都係唔聽人講, 不過今日相對算輕鬆, 安全地上哂堂可以放工, 去到公園接仲仲, 比佢玩吓啦, 返到去我又趕住upload文件, 又要快煮啲嘢食咗先出門口去睇波, 今日去Wembley睇波呀, 係睇英格蘭喎, 場面同睇英超又唔同, 約咗炮哥喺泊車地點等, 一齊再行過去球場, 影吓相買吓嘢咁, 7點幾入到場, 我地坐龍門後, 上半場冇咩嘢睇, 下半場英格蘭又已經入咗兩球, 變咗冇咩強攻睇, 啲人就開始玩放飛機, 好好笑! 最尾完場前有球角球入咗, 咁都比我拍到, 勁呀! 散場要行返去攞車, 又塞一輪先返到屋企, 快手沖涼食啲嘢瞓覺啦!
25/3/22 FRI WARM
終於又到星期五啦, 返埋又放假! 今日仲要係輕鬆, 真係happy Friday! 返到去都係照上堂啦, 數學堂有得幫冇返個同學份卷寫吓答案, 時間易過啲, 放break後上Science, 好在我可以放lunch啫, 唔係有排悶, 加上下半堂佢地去電腦室, Samia又有特權可以返AL1, 咁大家都有得hea吓幾好! 到最後一堂時就有笑話啦, 因為老師冇返, 有個代課嚟, 搞完一輪點名播片啦, 咁我都做完自己嘢覆完msg, 有時間處理吓佢地啲秩序, 咁梗係會喺個課室行嚟行去架啦, 個阿sir問我做咩可以行嚟行去, 好明顯佢以為我係學生, 跟住啲同學就齊齊答佢:"Because she is Miss", 阿sir應該好尷尬, 我覺得呢個絕對可以寫成笑話! 放得學即閃返去揍仲, 由於兩位大朋友都唔去打籃球, 又頭痛又腳痛咁, 所以仲爺都冇得去啦! 返嚟休息吓啦, 我就又要去寄信啦買餸啦等等, 回來又要整餸, 都冇停過, 等德仔閃咗又要摺衫, 然後食飯洗碗咁, 都好係忙呀!
24/3/22 THU WARM
今朝未夠8點突然之間冇哂wifi, 都做唔到啲咩, 唯有放工回來先算, 好在手痕一早睇定今日更表, 唔係又要返去先睇到就煩! 咁揍完仲爺返學就返去開工啦, 第一堂簡直係惡夢, 一來係supply teacher, 二來係三五個問題學生同一班, 根本就係失控, 3個老師喺到都唔掂, 又玩水又玩玩具又走出位大叫離開課室咩都做齊, 其實咁有幾好玩呢, 真係唔明! 終於捱完呢堂, 又遊一輪花園先肯去課室啦, 上宗教又係玩啦, 其實我都唔係好想理佢地, 但又唔可以咩都唔做, 你話係咪煩! 小息佢地竟然去咗圖書館, 我可以坐吓休息吓! 跟住history堂老師勁惡我係可以舒服啲, 午飯時間明明要排隊由老師帶去飯堂, 但佢三個又跑咗去啦, 最好笑係最唔合作嗰條囡跑到PK, 我堅想笑囉, 抵死! 等佢食完我就快手去飯堂買午餐, 然後去邊食邊打比Ivy同佢吹水, 我發覺同佢吹水係唔會停到, 吹到有少少遲咗架啦, 好期待佢年中過到嚟可以見面呀! 返去捱埋嗰大半堂本來以為要去上Geo, 點知個學生有得去踢波, 我又要跟埋去囉, 咁郁吓都好, 不過太劇烈運動我就真係唔得, 爆咗兩轉hand機啦! 唔太準時走得甩, 去到學校已經過咗3點半, 又要等一餐仲仲先落得番嚟! 好在今日唔太趕, 可以返去休息吓先再出去買餸同揍德! 今日個個都喺到我都可以輕鬆啲! 食完飯沖完涼又要督吓子元學習, 趕埋細佬瞓覺, 又要做公務, 搞咗都個幾兩個鐘, 車牌嘢又要小心睇多幾次, 搞屋嗰啲又好多嘢要email出去睇吓點, 總之做死我啦!
23/3/22. WED. WARM
今日本來心情都幾好，因為子元要家長日，所以老公請咗假佢可以車晒我哋返工返學，我仲專登用新嗰個Snoopy袋，返到去都好正常咁照開工，我今日跟Bella，佢又係唔跟時間返學，我已經等到佢10:20，咁我咪照以往做法，去佢課室幫手囉，其實本來都唔係好想㗎啦，因為又係嗰個好煩嘅Ms Rice堂，點知去到又唔係佢喎，不過課室秩序就嚴重失控，嘈到不得之了，所以我根本聽唔到Walkie Talkie把聲，所以我完全唔知Reception call過我話Bella到咗，最終佢哋可能搵咗Miss Rice帶返啤落嚟課室，我又俾佢過咗一棟，搞到我成日都唔開心，好似又衰咗咁樣！不過後來有個同事佢話其實日日都有新嘢㗎啦，唔需要咁介意，我諗我都要學下啲英國人思想，真係唔需要咁介意，認真便輸了！咁我就繼續完成今日嘅工作， 3:15簡直用逃跑嘅方法離開，因為要先去接仲仲，再去子元學校家長日，所有嘢要喺半個鐘頭內完成，家長日完重要揍揍去學結他，買餸接德仔返嚟又要煮飯，我就嚟攰死啦！
22/3/22 TUE WARM
今日學生唔洗返學, 但要上網課, 所以其實我都唔知我返去做咩, 所謂Training亦唔覺有咩train, 算啦返去坐吓有錢收就算啦! 揍咗仲仲返學, 我都有啲趕, 因為遲咗少少出門口, 仲爺又踩得慢, 真係好難搞! 返到去就係直去大房, 佢地已經圍埋, 所以我應該已經聽少咗半個鐘, 都係好事, 反正聽咗都唔知做咩, 最終都係開咗個電腦, check完email已經唔知做咩好, 但又要扮工都夠辛苦! 午飯今日只有沙律同三文治, 好過冇啦, 佢地又要出去曬住太陽食, 食完返去又聽上司吹水, 其實佢地呢堆對話, 我聽到7-8成架咋, 後來都開始想瞓! 終於捱到放工, 快閃去接仲仲, 返去又要趕出門口打籃球啦, 然後我又要買餸返嚟整定嘢再出去接德德, 今日條友仔都係唔多舒服, 成日要我抱, 好在都仲肯食飯! 等佢走咗我抖咗3個字又要煮飯, 真係日日都咁充實!
21/3/22 MON COOL
又要返工啦, 今日都算係輕鬆, 不過同樣地都係好悶啦, 記住悶但有錢收係幸運, 所以唔好咁多聲氣! 悶到我都唔知有咩好寫, 悶到我攞耳機出來偷聽收音機先掂! 午餐一見到今日係飯, 已經第一時間食沙律同意粉就算! 終於捱到放學啦, 快手去接仲仲, 好在佢都唔係最尾嗰個, 返到屋企都未有機會休息, 啲地產鋪就打嚟, 搞到我都冇咩時間休息又要出去接德仔, 今日仲要冇隔夜飯, 又要諗煮咩比佢食, 5點幾老公返到嚟又接咗佢地出去踢波啦, 得我一個又要煮又要睇住德仔咁好狼狽! 等佢揍走咗我又要開始摺衫同煮晚飯, 搞到7點幾抖咗唔夠15分鐘佢地又返, 又要忙忙碌碌啦!
18/3/22 FRI WARM
終於到happy friday啦, 今日都係happy架啦, 因為都係同Samia的一日, 基本上都係hea過! 再撞正三堂Science都係代課, 佢就直情可以去AL1 hea, 佢hea我又hea 啦, 係午飯都要買返去食囉, 冇得再chill啲咁喺staff食咁解! 午飯後佢有appointment同社工, 我真情擺明打足大半個鐘機到放工走得! 本來叫阿哥去接, 因為Megan出水痘返唔到學, 冇人幫我揍, 咪照叫阿哥揍囉, 點知話接放學要足18歲, 好在我咁啱攞個電話出來聽得到, 馬上去學校接佢地快手回家轉裝就出門口, 剛好趕得切巴士咋! 我又要再去超市買餸返去整定嘢才接德仔, 因為剛才太趕唔記得幫老公寄嘢, 總之就忙忙亂亂! 反而接咗德仔回來先可以閒啲, 只係餵餐飯啫, 都冇咩同佢玩! 佢地打完波我又要煮晚飯啦, 今個星期都過得幾快!
17/3/22 THU. COOL
今日如常咁返工返學啦，要跟條妹都唔係好難，但今日佢啲朋友喺哂到，佢就比平時麻煩啲，又會乘機走來走去，想賣甩我，但我已經放棄咗追佢哋，間學校有幾大啫，你咪唔見囉，反正你都出唔到學校門口，都係你俾人罰又唔係我有乜所謂！最怕係放午飯時，佢個friend又唔知咩唔舒服，一日返學都唔舒服，去醫院啦返咩學校啫，見到呢啲細路，都覺得佢哋父母好慘，唔知係唔教吖定係教唔到！重點係阻住我食飯吖嘛！到放學之前嗰堂，個老師好惡又好嚴格，排隊入課室都要排直線唔好講嘢入去，一有人唔跟規矩就全部人一齊再行過，入到課室其實都講明唔俾傾偈，要好好上堂做嘢，但有啲學生就係唔聽教，最終個老師叫佢哋放學留低，嗰三個同學當然都要留低啦，但係到最後一刻先同佢哋講逼到佢哋死，我就心都涼曬咁走先啦拜拜！去到公園俾細佬玩到四點就要返屋企啦，收拾下又要出去接仔返嚟又要煮飯又要做家務又要摺衫，好在老公煮飯如果唔係真係做死我！九點幾沖埋個涼終於可以休息啦！
16/3/22 WED. RAIN
今朝出門口就落雨，真係唔老嚟！揍咗細佬返學如常咁返工啦，都知道我今日跟嗰個學生唔會準時返，所以攞齊嘢之後第一堂都要去佢上堂個課室幫手，不過呢堂係我最唔想上英文，仲要係Ms Rice堂，堅係唔想上架，因為根本唔明佢想要學生做嗟，咁點幫啫！我而家叫你去教中國文學，佢都唔識㗎啦，唔好話教， 明都未必明啦但你又要扮有嘢做真係好戇居，其實有時啲學生都想輕鬆啲去學習，我見有啲堂嘅老師可以令到啲學生上堂想得好開心又學到嘢，咪大家都好囉，你淨係識得叫人唔好嘈淨係識得叫人靜，我唔係學生我都覺得你煩啦！放break之後Bella都未返，咁我咪去上法文堂囉，午飯時間同佢哋一樣食足九個字先至返返課室繼續上，法文堂都可以，但之後嗰堂，我真係勁唔想上！咁岩有人踢咗啲水落我條褲度，咁我咪入去大房諗住清潔下先，見到Samoa 吹吓水咁，其實都有少少想拖時間唔上住㗎啦，但跟Samia嗰個supply LSA正一正義L嚟㗎，我都唔跟我個學生上堂關你咩事啫，傾吓計都唔得，仲叫我問上司應該仲有邊個學生需要照顧，仲有九個字都放學啦你唔好搞人啦，俾佢搞到心情差晒，唔怪得知Samia 都唔鍾意佢！最終我想去課室見到其實都冇需要我嘅地方，喺門口坐咗陣，就去咗廁所，等佢夠鐘就直接攞單車走人，因為今日放學時驚落大雨，我要直接去學校接細佬，費時佢等咁耐啦，夠鐘梗係即閃！返到屋企濕度落湯雞咁，換好衫其實都冇咩休息，仲仲又要出去學音樂！接埋德德返到屋企，又要煮定飯俾佢食，到佢走咗啦，又要摺衫抖咗一陣又要開飯洗碗，先至可以沖涼休息其實日日咁樣真係好攰！
15/3/22 TUE. COOL+
今日都係照常咁返工放學啦，做咗仲爺返學我就返工啦，返到去搵咗一輪先搵到個學生究竟係邊，成日都唔知佢哋幾時周會幾時喺課室真係好煩！其實今日都係簡單跟出跟入，數學堂可以教下數其實時間已經已過好多！叫做順順利利咁樣夠鐘就放學，仲早過佢哋返到屋企，發數準備好就出去搭巴士，去打籃球，我就去超市買餸，返屋企準備好，又要出去接德仔，得我同佢喺屋企，基本上我都冇咩同佢玩，大家睇吓電視咁食完飯，就等佢爸爸來接返。準備好晚飯嘅材料就開始摺埋啲衫，等老公返嚟煮埋啲餸就開飯，佢哋又要睇波但又收得唔係幾好，成日拎機！沖完涼都10點啦快手捉埋佢哋去瞓覺我都要休息！
14/3/22 MON COLD
今日本來簡簡單單跟一個學生咋嘛, 點知佢又冇返學, 搞到我人球咁做替更, 仲要1:45嗰轉先有得食飯呀陰公, 餓死我啦! 不過做替更有做替更好, 可以輕鬆啲! 然後再問埋HR, 可以點請假, 先知我地其實冇得放假, 除咗病啦, 因為一年已經放咗12個星期啦, 不過都會有childcare假3日可以請, 咁我呢個情況就可以咁請囉! 午飯後上多大半堂就放學, 回程時竟然落雨, 所以快手接咗仲爺就返去, 襯有時間check吓個電費煤氣費, 其實我都估到應該係要交多啲, 咁都正常, 最緊要搞清楚, 調番高每月自動轉賬個額就得! 跟住又要去接德仔, 老公回來接兩個仔去踢波, 我就揍完德仔再煮飯囉! 食完飯都8點幾, 沖埋涼休息啦!
13/3/22 SUN. COLD
今朝一齊去睇子元踢波，因為地方都有啲遠，順手去附近行吓，都好多個星期日會出去行！不過場波真係唔好睇，所以我同細佬睇咗20分鐘就放返上車等，又可以同婆婆講吓電話，又可以打下機咁！ 11點幾佢哋踢完啦，咁就直接去商場附近嘅街泊好車，再行去商場！不過啲商場其實都冇咩行，睇咗一陣搵到地方食嘢，都算抵食， 30磅已經四個人食仲有嘢飲！最後行吓超市細佬又行吓玩具店咁就返屋企啦！返到屋企都好多嘢做，仲仲要做功課，我就要做清潔，然後都係一齊睇吓波咁啦，就預備吓晚飯，今晚整咗個好好味嘅花膠螺頭煲雞湯，真係甜到不得之了！晚飯後老公幫我掩埋頭髮，真係老啦多咗好多白頭髮！
12/3/22 SAT COLD
今日都係如常咁揍佢地兩個去跟波啦, 食完早餐差不多就出門口, 今日戴埋cap帽冇咁曬! 仲爺踢到11:45都未放, 子元又早放喎, 咁就唯有提早走啦! 買埋飯團先回家, 可以大家食啲嘢先, 我同老公再去shopping都唔怕, 其實都係買食物啫, 諗住整生炸雞肶同西多士! 返到嚟老公用廁所竟然塞咗, 最終要再出去買強力通渠水K.O.佢! 終於有得食炸肶同西多, 差杯紅豆冰! 星期六其中一個節目就係睇波啦, 而家啲日子幾咁英國! 邊睇邊打機, 7點幾老公先去煮晚餐, 簡單食海鮮通粉, 煎吓餃子咁! 明天子元去遠少少踢波, 就一齊出去行吓啦!
11/3/22. FRI. RAIN
終於到星期五喇，今日都算過得好休閒，揍咗仲仲返學就返工，因為個學生仲未返，又唔使特別請示要點做啦，所以頭兩堂都係好自由咁過，第一堂躲藏喺sixth form個大房，第二堂去咗做瑜伽，小息之後去班房等咗陣，個學生終於返啦，係咁要跟進下佢，我又喺度發吽豆！提早1.3就放飯，咁我就足足食咗一個鐘頭飯，係咪好休閒呢！要跟另一個學生，但係佢都係冇返學，所以只係坐咗喺佢個課室，臨放學前5分鐘就閃，攞埋單車打排球啱啱好夠鐘走人，返到屋企先發現，哥哥仲未揍到細佬返嚟，一輪操作之後終於返得切嚟，一來二天就特別麻煩！送咗佢哋上巴士我就去買餸，返嚟準備好啲嘢又去接阿德，今日得我同佢所以佢都係同我一齊呆喺度睇電視！佢走咗我就煮晚飯，佢哋打完波返嚟食飯睇電視沖涼瞓覺！
10/3/22 THU WARM
今朝見到又係跟Amira當然唔多like啦, 但返到去我差不多想入課室時, 比人叫住話轉咗更, 我今日跟Bella, 呢個仲難估, 要睇佢今日開邊樣, 好彩我今日係正面, 只係上PE堂時因為唔想某同學一組就喊, 一定要換人, 咁老師都照換啦! 之後全日都好正常, 我算好好彩! 不過係午飯時間短啲啦, 因為只係有人嚟cover唔可以太耐, 有時都會偷吓時間抖多陣架嘛! 到佢地食飯我就企足咁耐, 其實日日咁企對腳都幾喺嘢! 放學遲咗啲先走到啦, 不過今日都係唔洗揍德仔, 都冇咩所謂啦, 比仲爺玩到4點多先走, 回來係咁整嘢食, 又早食晏又唔係多! 然後就梗係難得地hea吓啦! 老公就負責煮晚飯, 今晚都早眼瞓, 食完飯快叉咗一陣先好啲!
8/3/22. TUE. COLD
今日一閪電郵見到跟Zamora，即刻勁唔開心，因為今日一定冇好日子過！湊左細佬返學，我就返工，返到去咪死死地氣去開工囉，喺from room唔見佢，又再去reception 搵，最後原來佢遲到，自己上咗課室，第一堂數學，佢又嘈到老師要講咗佢個隔離房，都係好事！跟住都係轉課室時又周圍走啦，點都唔變！放break時更加變本加厲，玩到推來推去又整蠱同學，總之我真係好想用垃圾來形容佢！基本上嗰個LSA都唔想跟到佢，根本就係惡夢！放完break Settle好佢，我就可以去食飯，好好享受返半個鐘時間，之後返去其實都冇咩做等到佢放飯，又要睇住佢，其實罰佢坐喺老師房門口請個午飯時間就啱，呢啲人多啲根本就唔識乖！最尾嗰堂轉堂，又係要走來走去啦，走咗去廁所兩次，最終遲咗差不多10分鐘先去到課室，我都冇佢咁好氣，但唔話佢又唔得，都唔知點拿捏！終於放學啦，話知佢啦一出課室我就去攞單車走人啦！返到去子元佢哋已經返咗，咁就快啲準備好野出去打籃球，出門口前終於收到嫲嫲寄來果包裹啦，今晚食完飯再拆！接埋德德返嚟湊住佢，但係佢又好似開始想作病咁有啲燒，唔知佢聽日會唔會照返學！等佢走咗我又要煮飯啦又要摺衫啦，食完飯拆埋個包裹，都有好多驚喜，不過今日搞到太夜10點幾十一點先捉仲爺去瞓！
7/3/22 MON COLD
今日又要返工啦, 朝早仲爺唔肯起身有啲趕, 佢仲要朝早先嚟甩牙, 我真係救佢唔到呀, 好在最終佢自己拔咗, 叻仔! 快手出門口返工返學啦, 今日安排我本身跟個year 12, 但係佢今日冇返, 我就去咗佢嗰班就算, hea到不得了, 期間做咗一個lunch cover, 又係自閉嗰個, 佢今日又係好差, 躲咗喺枱底又用頭撞枱, 用針刺自己, 唉...所以等佢負責人回來就去通知阿頭, 又要記錄番佢啲情況, 最終好似都要Call SLT幫手! 我就12點半過番去課室吽, 提早咗1:15就放飯, 咁我就有足足1個鐘食飯時間, 實在太好啦, 咪係咁睇機囉! 最後嗰堂英文, 個同學仔係都要我教佢, 查實我都唔好得佢幾多囉, 終於捱到放學, 快閃返去接仲爺, 但佢又要玩啦, 查實咁樣我冇咩時間休息, 其實係好辛苦架! 返去準備吓又要揍德仔又要買餸等! 今日子元去試腳, 老公回來車佢過去, 咁得番我同仲爺揍德啦! 等佢走咗我仲要煮飯, 沖完涼又要處理吓公務咁, 都冇咩自己時間又半夜啦!
1/3/22 TUE. RAIN
今朝返學先至嚟落雨，返到去又濕晒，去課室搵返我今日個學生，點知佢哋又唔喺課室，我去Hall搵佢哋又搵唔到，終於忍唔住問咗個老師佢就話應該喺體育館嗰邊，我又要行三四，好彩都過到去！跟住都係如常咁一日跟住佢啦，除咗嗰兩堂英文係有啲壓力，因為又係跟住Miss rice，搞到我午飯都唔可以偷雞食耐啲！夠鐘就準時放學啦，同仲仲佢哋差不多時間返到屋企，快手咗好多嘢，又要出去趕巴士，佢哋去打籃球！然後去超市買埋今晚需要嘅餸同其他嘢，返屋企整起休息一陣，又要出去接德仔，得我一個湊住佢佢悶我又悶，好在佢阿爸都唔係好遲先來湊佢，跟住我就準備好晚飯啲嘢，然後就摺衫啦！明明放咗個膠箱喺出邊把車位，啲車都可以照攞開我個箱又再泊，搞到我出咗去幾次要同人哋講呢個位有人，好彩佢哋都肯讓出嚟！
